DJONDZO 18

Hi Nga Va Tivisa Ku Yini Vakreste Va Ntiyiso?

CHAYA

Vanhu va vanyingi va vula swaku vona i Vakreste, kambe a va kholwi minchumu ya ku fana naswona a va hanyi hi minawu ya ku fana. Se hi nga va tivisa ku yini lava va nga Vakreste va ntiyiso?

1. Swi vula yini ku va Mukreste?

Ku va Mukreste swi vula ku va mudjondzisiwa kumbe mulandzeli wa Yesu Kreste. (Lerha Mintirho 11:26.) I yini lexi kombisaka swaku munhu i mudjondzisiwa wa Yesu? Yena a te: “Loko mi yingisa leswi ni swi vulaka mi vadjondzisiwa va mina hikakunene.” (Yohani 8:31) Leswi swi vula swaku Vakreste va ntiyiso va fanele va yingisa leswi Yesu a nga swi djondzisa. Hinkwaswu leswi Yesu a a swi yentxa ni leswi a a swi djondzisa a swi ta hi ka Matsalwa. Hi mhaka leyo hinkwaswu leswi Vakreste va ntiyiso va swi kholwaka swi fanele swi ta hi ka Bibele. — Lerha Luka 24:27.

2. Vakreste va ntiyiso va li kombisisa ku yini lirhandzu?

Yesu a byele valandzeli va yena a ku: “Mi rhandzana ku fana ni leswi ni nga mi rhandzisa xiswona.” (Yohani 15:12) Yesu a swi kombisise ku yini swaku a a va rhandza vadjondzisiwa va yena? A tirhise nkama wa yena swaku a va djondzisa a tlhela a va pfuna. A tlhele a nyikela hi wutomi la yena swaku a va ponisa. (1 Yohani 3:16) Ku fana na Yesu, Vakreste va ntiyiso va kombisa lirhandzu hi marito ni hi leswi va swi yentxaka.

3. Hi wini ntirho lowu Vakreste va ntiyiso va wu yentxaka?

Yesu a va nyike ntirho vadjondzisiwa va yena. ‘A va rhume swaku va ya chumayela hi Mfumu wa Xikwembu’. (Luka 9:2) Vakreste va ku sungula a va nga chumayeli ntsena lomu vanhu a va tlhangana swaku va gandzela Xikwembu, kambe a va chumayela ni ka tindhawu tin’wana, ku patsa ni le makaya ka vanhu. (Lerha Mintirho 5:42; 17:17.) Ni namuntlha, Vakreste va ntiyiso va chumayela ntiyiso wa Bibele hinkwaku lomu va kumaka vanhu kona. Va rhandza vanhu van’wana, hi mhaka leyo hi ku swi rhandza va tirhisa nkama wa vona ni ntamu wa vona swaku va chumayela ntiyiso wa Bibele lowu nyikaka vanhu ntshembo, wu tlhela wu va tiyisa. — Marku 12:31.

DJONDZA SWIN’WANA

Vona leswi u nga swi kotisaka xiswona ku hambanisa Vakreste va ntiyiso ni lava va kalaka va nga landzeli tidjondzo ta Yesu ni xikombiso xa yena.

4. Va lavetela ntiyiso lowu nga ka Bibele

Vakreste va minkama ya vapostolo a va li nyika lisima Rito la Xikwembu

Vanhu van’wana lava va vulaka swaku i Vakreste a va wu nyiki lisima ntiyiso lowu nga ka Bibele. Sixtirani VHIDIYO, mi gama mi bula hi xivutiso lexi landzelaka.

VHIDIYO: Nkama Lowu Vanhu A Va Nga Djondzi Leswi Yesu A Nga Swi Djondzisa (5:11)

Tikereke tin’wana leti ti tivulaka Vakreste ti tsandzekise ku yini ku djondzisa tidjondzo ta Yesu?

Yesu a djondzise ntiyiso lowu nga ka Rito la Xikwembu. Lerhani Yohani 18:37, mi gama mi bula hi xivutiso lexi landzelaka:

Hi ku ya hi marito ya Yesu, hi nga va tivisa ku yini Vakreste lava va “hanyaka hi ntiyiso”?

5. Va chumayela ntiyiso lowu nga ka Bibele

Vakreste va minkama ya vapostolo a va chumayela

Na a nge se tlhelela tilweni, Yesu a va nyike ntirho valandzeli va yena, lowu wa ha yentxiwaka ni namuntlha. Lerhani Matewu 28:19, 20 na Mintirho 1:8, mi gama mi bula hi xivutiso lexi landzelaka:

Ntirho wa ku chumayela wu ta yentxiwa ku fikela kwini, naswona anze nkama muni?

6. Va hanya hi leswi va swi chumayelaka

I mpsini swi nga yentxa Tom a kholwa swaku a kume Vakreste va ntiyiso? Sixtirani VHIDIYO, mi gama mi bula hi swivutiso leswi landzelaka.

VHIDIYO: A Ni Nga Ha Lavi Ku Twa Nchumu Hi Wukhongeli (5:20)

Ka vhidiyo, i mpsini leswi nga yentxa Tom a godola ku landzelela wukhongeli?
Hi mhaka muni a a kholwa swaku a wu kumile ntiyiso?

Leswi munhu a swi yentxaka hi swona swi nga swa lisima ku tlula leswi a swi vulaka. Lerhani Matewu 7:21, mi gama mi bula hi xivutiso lexi landzelaka:

I mpsini swi nga swa lisima ka Yesu, hi leswi hi vulaka swaku ha swi kholwa kumbe hi leswi hi swi yentxaka?

7. Va rhandzana

Vakreste va minkama ya vapostolo a va rhandza vanhu van’wana

Ku nga va swaku hikakunene Vakreste va ntiyiso va veka wutomi la vona nghozini swaku va ponisa vamakwerhu? Sixtirani VHIDIYO, mi gama mi bula hi swivutiso leswi landzelaka.

VHIDIYO: A Ti Nyikelile Swaku A Mu Fela (2:55)

Hi ku ya hi vhidiyo i mpsini leswi nga yentxa Lloyd a veka wutomi la yena nghozini swaku a ponisa Makwerhu Johansson?
U vona swaku leswi a nga swi yentxa swi kombisa swaku i Mukreste wa ntiyiso?

Lerhani Yohani 13:34, 35, mi gama mi bula hi swivutiso leswi landzelaka:

Valandzeli va Yesu kumbe Vakreste va ntiyiso a va ta hanyisa ku yini ni vanhu van’wana? A va ta va ni xikheto kumbe a va ta rhandza vanhu hinkwavu?
Indje a va ta rhandzana hambiloko ku ni nyimpi?

VAN’WANA VA LI: “A ku na mhaka swaku u khongela kereke muni, xa lisima i ku pfumela ka Yesu.”