MATAUPU 18
Auala ke Iloa ei a Kelisiano ‵Tonu
E lau i piliona a tino e fai mai i a latou ne Kelisiano. Kae e kese‵kese a mea e tali‵tonu latou ki ei, mo olotou vaegā olaga. Tela la, e mafai pefea o iloa ne tatou a Kelisiano ‵tonu?
1. Se a te Kelisiano?
A Kelisiano ko soko o Iesu Keliso, io me ko tino kolā e tau‵tali atu i a ia. (Faitau te Galuega 11:26.) E fakamaoni atu pefea ne latou i a latou ko soko o Iesu? Ne fai mai a ia: “Kafai e tumau koutou i aku muna, ko oku soko ‵tonu koutou.” (Ioane 8:31) Ko tena uiga e ‵tau mo Kelisiano ‵tonu o faka‵logo ki akoakoga a Iesu. Kae pelā loa mo Iesu telā ne fakaaoga ne ia te Tusi Tapu ke ‵lago atu ki ana akoakoga, e fakavae foki ne Kelisiano ‵tonu olotou talitonuga ki te Tusi Tapu.—Faitau te Luka 24:27.
2. E fakaasi atu pefea ne Kelisiano ‵tonu a te alofa?
Ne fai atu a Iesu ki ana soko: “Ke fakatau a‵lofa koutou e pelā eiloa mo au ne alofa ki a koutou.” (Ioane 15:12) Ne fakaasi atu pefea ne Iesu tena alofa ki ana soko? Ne fakamāumāu ne ia ana taimi mo latou, fakamalosi latou, kae fesoasoani atu foki ki a latou. E se gata i ei, ne tuku atu foki ne ia tena ola mō latou. (1 Ioane 3:16) E penā foki a Kelisiano ‵tonu, e se fai‵pati fua latou e uiga ki te alofa. E fakaasi atu ne latou i olotou pati mo faifaiga me e fakatau a‵lofa latou.
3. Se a te galuega telā e fai faeloa ne Kelisiano ‵tonu?
Ne tuku atu ne Iesu se galuega ke fai ne ana soko. “Kae uga atu ne ia a latou ke olo o talai a te Malo o te Atua.” (Luka 9:2) Ne talai atu a Kelisiano i aso mua i olotou koga tapuaki, koga e tokouke ei a tino, kae penā foki mo fale o tino. (Faitau te Galuega 5:42; 17:17.) E penā foki a Kelisiano ‵tonu i aso nei, e talai atu ne latou te munatonu i te Tusi Tapu i so se koga e maua atu ei a tino. E a‵lofa latou ki olotou tuakoi tela la, e fakaaoga ne latou mo te fia‵fia olotou taimi mo olotou malosi, ke fakaoko atu a te fekau o fakamafanafanaga mo te fakamoemoega mai te Tusi Tapu.—Maleko 12:31.
KELI MALOSI IFO
Mafaufau ki auala e mafai ei o iloa ne koe a te ‵kese o Kelisiano ‵tonu mai tino kolā e se tau‵tali ki akoakoga mo faifaiga a Iesu.
4. E ‵sala latou ki te munatonu i te Tusi Tapu
E se ko tino katoa kolā e fai mai i a latou ne Kelisiano e fakatāua ne latou te munatonu i te Tusi Tapu. Pei te VITIO, ko sau‵tala ei ki te fesili tenei.
-
I auala fea ne fakata‵mala ei a lotu kolā e fai mai i a latou ne Kelisiano o akoako a tino ki mea ne akoako mai ne Iesu?
Ne akoako atu ne Iesu a te munatonu mai te Muna a te Atua. Faitau te Ioane 18:37, ko sau‵tala ei ki te fesili tenei:
-
E ‵tusa mo pati a Iesu, e iloa pefea ne tatou a Kelisiano kolā e “‵kau ki te feitu o te munatonu”?
5. Ne talai atu ne latou te munatonu i te Tusi Tapu
A koi tuai o fanaka a Iesu ki te lagi, ne tuku atu ne ia ki ana soko se galuega telā koi fai eiloa i aso nei. Faitau te Mataio 28:19, 20 mo te Galuega 1:8, ko sau‵tala ei ki te fesili tenei:
-
E pefea te lasi o te galuega talai e ‵tau o fai?
6. E ola latou e ‵tusa mo mea e talai atu ne latou
Se a te mea ne fakatalitonu atu ki te tagata e igoa ki a Tom me ko maua ne ia te Lotu Kelisiano tonu? Pei te VITIO, ko sau‵tala ei ki fesili konei.
-
I te vitio, se a te mea ne fai ei ke fulitua atu a Tom ki lotu?
-
Kaia ne talitonu ei a ia me ko maua ne ia te munatonu?
E se ko pati kae ko faiga. Faitau te Mataio 7:21, ko sau‵tala ei ki te fesili tenei:
-
Se a te mea e tāua atu ki a Iesu—ko ‵tou pati me e tali‵tonu tatou io me ko fakamaoniga i ‵tou faifaiga?
7. E fakatau a‵lofa latou
Kai ‵tu atu eiloa a ola o Kelisiano i se tulaga fakamataku mō olotou taina Kelisiano? Pei te VITIO, ko sau‵tala ei ki fesili konei.
-
I te vitio, kaia ne talia ei ne Lloyd ke tu tena ola i se tulaga fakamataku mō te Taina ko Johansson?
-
Se a tau faka‵tau, e mata, ne fai ne ia a faifaiga kolā e ‵tau o fai ne se Kelisiano tonu?
Faitau te Ioane 13:34, 35, ko sau‵tala ei ki fesili konei:
-
E ‵tau o pefea a faifaiga a soko o Iesu (Kelisiano ‵tonu) ki tino mai nisi matakāiga io me ko fenua?
-
Ne fai pefea latou penā i taimi o taua?
MEA E FAI MAI NE NISI TINO: “Ko oti ne fai ne Kelisiano a mea matagā—e mafai pefea o fai latou pelā me ko te lotu tonu?”
-
Se a te tusi faitau e mafai o faitau ne koe ke fakaasi atu te auala e iloa ei a Kelisiano ‵tonu?
MANATU AOGA
A Kelisiano ‵tonu e tau‵tali ki akoakoga i te Tusi Tapu, fakaasi atu te alofa sē fakapito, kae talai te munatonu i te Tusi Tapu.
Fesili
-
Se a te mea e fakavae ki ei a talitonuga o Kelisiano ‵tonu?
-
Se a te uiga e iloa ei a Kelisiano ‵tonu?
-
Se a te galuega e fai ne Kelisiano ‵tonu?
NISI FAKAMATALAGA
Tauloto ki mea e uke atu e uiga ki se potukau o tino kolā e taumafai o tau‵tali ki te fakaakoakoga a Iesu Keliso mo ana akoakoga.
Onoono ki mea ne fai ei se sina mua ke maua ne ia se “kāiga faka-te-agaga tonu.”
Onoono ki te auala e fakaasi atu ei ne Kelisiano ‵tonu a te alofa ki olotou taina tapuaki i taimi o fakalavelave ‵tupu.
Te Fesoasoani ki ‵Tou Taina i Taimi o Fakalavelave —Se vaega i ei (3:57)
Iloilo a te auala e fetaui ‵lei ei a mea e fai ne Kelisiano i aso nei mo mea ne fai ne Kelisiano mua telā ne fai mai a Iesu me ko te fakailoga o ana soko.
“Ne a Fakailoga o te Kelisiano Tonu?” (Te Faleleoleo Maluga, Me 1, 2012)