LECCIÓN 18
¿Bin-utʼil ya jnaʼtik machʼatik-a te smelelil jchʼuunjeletike?
Bayal ants winiketik ya yalik te schʼuunejik Cristo, pero ma pajaluk te bin schʼuunejike sok ma pajaluk te bin lek o ma lek ya yilike. Jich yuʼun, ¿bin-utʼil ya jnaʼtik machʼatik-a te smelelil jchʼuunjeletike?
1. ¿Bin ya spasik te smelelil jchʼuunjeletike?
Te jchʼuunjeletike jaʼik te jnopojeletik o te machʼatik ya stʼunik te Jesucristoe (kʼopona Hechos 11:26). ¿Bin-utʼil ya yakʼik ta ilel te ya stʼunike? Te Jesús la yal: «Teme jun awoʼtanic ya xʼayinex ta stojol te jcʼope, mero jnopojelex cuʼun ya xcʼohex» (Juan 8:31). Ya skʼan ya yal-abi te ya skʼan ya schʼuunik spasel te bin la yakʼ ta nopel te Jesús te smelelil jchʼuunjeletike. Jich yuʼun lokʼem tal ta Biblia te bin schʼuunejike jich bitʼil te Jesús te la slokʼes ta sJun Dios te bin la yakʼ ta nopele (kʼopona Lucas 24:27).
2. ¿Bin-utʼil ya yakʼik ta ilel skʼuxul yoʼtanik te smelelil jchʼuunjeletike?
Te Jesús jich la yalbey te jnopojeletike: «Talel cʼaxel cʼux me xawaʼiy abahic ta awoʼtanic hich te bin utʼil cʼux la jcaʼiyex ta coʼtan» (Juan 15:12). ¿Bin-utʼil la yakʼ ta ilel te Jesús te kʼux ta yoʼtan te jnopojeletik yuʼune? Jaʼ te kʼalal la sjokinlan, la yakʼtiklanbey smukʼul yoʼtan, la skoltaylan sok la yakʼ skuxlejal ta stojolik (1 Juan 3:16). Jich ya spasik-euk te smelelil jchʼuunjeletike, ma jaʼuknax ya yalik te ay skʼuxul yoʼtanik, jaʼnix jich ya yakʼik ta ilel ta swenta te bin ya yalik sok te bin ya spasike.
3. ¿Bin aʼtelil te kʼax mukʼ skʼoplal ya spasik te smelelil jchʼuunjeletike?
Te Jesús «la sticonlan bahel ta halbeyel scʼoblal te cuentahinel yuʼun Dios» (Lucas 9:2). Te sbabial jchʼuunjeletik la scholik skʼop Dios ta nanatik, te banti ya stsob sbaik ta yaʼiyel skʼop Dios sok ta yantikxan lugaretik (kʼopona Hechos 5:42; 17:17). Jaʼnix jich ta kʼajkʼal ini te smelelil jchʼuunjeletik ya scholbeyik skʼoplal te bin ya yal te Biblia chikan banti ay te ants winiketik. Kʼux ta yoʼtanik te spatxujkik, jaʼ yuʼun ya yakʼ stiempoik sok ya spasik tulan ta scholbeyel yaʼiyik te mukʼul oʼtanil ya yakʼ te Bibliae (Marcos 12:31).
JNOPTIKXAN TA LEK
Kiltik bin yuʼun ma pajal te smelelil jchʼuunjeletik sok te machʼatik ma stʼunbeyik stalel te Jesús sok ma schʼuunik te bin la yakʼ ta nopele.
4. Ya snopik ta lek te Biblia
Te sbabial jchʼuunjeletik mukʼ skʼoplal ta yoʼtanik-a te sKʼop Dios
Ma spisilukik te machʼatik ya yalik te schʼuunejik te Cristo mukʼ skʼoplal ya yilik te bin ya yakʼ ta nopel te Biblia. Ilawilik te VIDEO sok albeyaik skʼoplal ini:
-
Ay jwolwanejetik yuʼun religión te bayal bin la spasik swenta maba ya snopik-a te ants winiketik te bin la yakʼ ta nopel te Jesuse, ¿bintik la spasik?
Te Jesús la yakʼ ta nopel te bin-nix ya yal-a te sKʼop Diose. Kʼoponaik Juan 18:37 sok albeyaik skʼoplal ini:
-
Jich bitʼil la yal te Jesuse, ¿bin-utʼil ya jnaʼtik machʼatik-a te ya yakʼik ta nopel te bin smelelile?
5. Ya scholik te bin smelelil ya yal te Biblia
Te sbabial jchʼuunjeletik la spukik ta alel te sKʼop Dios
Te kʼalal mato xmo bael ta chʼulchan-a te Jesuse, la yakʼbey jilel yaʼtel te jnopojeletik te yakto ta pasel ta kʼajkʼal ini. Kʼoponaik Mateo 28:19, 20 sok Hechos 1:8, sok albeyaik skʼoplal ini:
-
¿Bantito kʼalal ya yichʼ cholel te skʼop Dios sok bin-ora ya xkejchaj ta pasel?
6. Ya spas ta skuxlejalik te bin ya scholike
¿Bin yuʼun la yal te la sta te smelelil jchʼuunjeletik jtul winik te Tom sbiile? Ilawilik te VIDEO sok albeyaik skʼoplal ini:
-
Jich bitʼil la kiltik ta video, ¿bin chebajtesbot yoʼtan yuʼun te Tom?
-
¿Bin yuʼun schʼuunej yoʼtan te Tom te la sta te smelelil jchʼuunjeletike?
Te bin ya kaltike ya xchiknaj ta swenta te kaʼteltik teme yuʼun-nix jich-ae. Kʼoponaik Mateo 7:21 sok albeyaik skʼoplal ini:
-
¿Bin-a te ya yichʼ ta wenta te Jesuse? ¿Jaʼbal te bin ya kaltike, o jaʼ te bin ya jpastike?
7. Talel kʼaxel kʼux ya yaʼiy sbaik
Te sbabial jchʼuunjeletik kʼaxel kʼux la yaʼiy sbaik
¿Aybal yakʼoj skuxlejalik te jchʼuunjeletik ta stojol te yermanotakike? Ilawilik te VIDEO sok albeyaik skʼoplal ini:
-
¿Bin tijbot yoʼtan yuʼun te Lloyd ta yakʼel skuxlejal ta stojol te hermano Johansson?
-
¿Labal yakʼ ta ilel te jaʼ smelelil jchʼuunjele?
Kʼoponaik Juan 13:34, 35 sok albeyaik skʼoplal ini:
-
¿Bin-utʼil ya skʼan ya yilik te smelelil jnopojeletik yuʼun Jesús te machʼatik yan stsʼumbalik o yan snacionike?
-
¿Bin-utʼil ya xchiknaj ta ilel te skʼuxul yoʼtanik ta yorail guerra?
AY MACHʼATIK JICH YA YALIK: «Te machʼatik schʼuunejik Dios ta skʼopike bayal bin ma lek spasojik. ¿Bin-utʼil-a te ya skuy sbaik ta smelelil religione?».
-
¿Bin texto ya atuuntes yuʼun ya awakʼ ta ilel machʼatik-a te smelelil jchʼuunjeletike?
¿BINTIK LA JNOPTIK?
Te smelelil jchʼuunjeletike ya spasik te bin ya yal te Bibliae, ya yakʼik ta ilel skʼuxul yoʼtanik manchukme ay wokolil sok ya scholik te smelelil kʼop ay ta Bibliae.
¿Jilbal ta awoʼtan into?
-
¿Banti lokʼem tal te bin schʼuunejik te smelelil jchʼuunjeletike?
-
¿Bin talelil ya yakʼik ta ilel te smelelil jchʼuunjeletike?
-
¿Bin aʼtelil yakik ta spasel?
YA XJUʼ YA ANOPXAN INI
Naʼbeyaxan sba te machʼatik ya spasik tulan ta stʼunel te ejemplo yuʼun te Jesús sok te ya spasik te bintik la yakʼ ta nopele.
Kʼopona awil te bitʼil jtul ants te monja-ae la sta te smelelil jchʼuunjeletike.
Ilawil bin-utʼil ya yakʼik ta ilel skʼuxul yoʼtanik te smelelil jchʼuunjeletik kʼalal ya xkʼax swokolik te yermanotakike.
Ya jkoltaytik te kermanotaktik kʼalal ya xkʼax jun tulan wokolil (jmajkʼnax) (3:57)
Te Jesús la yal bin yilel stalelik te jchʼuunjeletik yuʼune. Te sbabial jchʼuunjeletik la yakʼik ta ilel te talelil la yal te Jesuse, ilawil bin-utʼil ya yakʼik ta ilel-euk te smelelil jchʼuunjeletik ta kʼajkʼal ini.
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
