GURUY NI 18
Rogon ni Ngan Nang e Tin Riyul’ e Kristiano
Bokum bilyon e girdi’ ni yad ma yog ni yad e Kristiano. Machane ba thilthil e michan’ rorad, ma kub thilthil rogon e lem rorad u murung’agen e tin nib fel’ nge tin nib kireb. Ere uw rogon ni ngad nanged e tin riyul’ e Kristiano?
1. Uw rogon be’ nib Kristiano?
Piin Kristiano e yad pi gachalpen Jesus Kristus. (Mu beeg e Acts 11:26.) Uw rogon ni yad ma micheg ni yad pi gachalpen Jesus? I gaar Jesus: “Faan gimed ra fol ko thin ni gu be machibnag ngomed ma aram e kari mudugil ni kam manged pi gachalpeg.” (John 8:31) Re n’ey e be yip’ fan ni tin riyul’ e Kristiano e thingar ra folgad ko pi n’en ni i machibnag Jesus. Yad ma guy rogon ni nge puluw e machib rorad ko Bible, ni bod Jesus ni gubin ngiyal’ ni ma fil ko girdi’ e n’en bay u lan e Babyor nib Thothup.—Mu beeg e Luke 24:27.
2. Uw rogon ni ma dag e tin riyul’ e Kristiano e t’ufeg?
I gaar Jesus ngak pi gachalpen: “Nge bigimed me t’uf bigimed rok, ni bod rogon ni gimed ba t’uf rog.” (John 15:12) Uw rogon ni dag Jesus nib t’uf pi gachalpen rok? Yad ma rin’ boch ban’en u taabang, maku ma pi’ e athamgil nga lanin’rad, ma be ayuwegrad. Ki pi’ e yafos rok ni fan ngorad. (1 John 3:16) Ku arrogon e tin riyul’ e Kristiano ni gathi kemus ni yad ma weliy murung’agen e t’ufeg, ya ku ma m’ug ko thin nge ngongol rorad ni yad be t’ufeged yad.
3. Mang maruwel e be rin’ e tin riyul’ e Kristiano?
Bay e maruwel ni pi’ Jesus ngak pi gachalpen ni ngar rin’ed. I “l’ograd nga ranod ni ngar machibniged ngak e girdi’ murung’agen e gagiyeg rok Got.” (Luke 9:2) Tin som’on e Kristiano e gathi kemus ni ur machibgad ko pi tagil’ e liyor rorad, ya ku yad ma yan ko gin bay e girdi’ ni yoor riy nge tafen e girdi’ ni ngar machibgad. (Mu beeg e Acts 5:42; 17:17.) Ku arrogon e tin riyul’ e Kristiano e ngiyal’ ney ni yad ma machibnag e tin riyul’ u Bible ko gin bay e girdi’ riy. Bochan nib t’uf e girdi’ rorad, ma aram fan ni yad ba felfelan’ ngay ni ngar fanayed e tayim rorad nge gelngirad ni ngar weliyed e n’en be yog e Bible nra pi’ e athap ko girdi’ me fal’eg lanin’rad.—Mark 12:31.
KUM FIL BOCH BAN’EN U MURUNG’AGEN
Mu lemnag rogon nib thil e tin riyul’ e Kristiano ko piin ndarur folgad ko n’en ni i machibnag Jesus maku darur folwokgad ko ngongol rok.
4. Yad ma gay e tin riyul’ u Bible
Tin som’on e Kristiano e ba ga’ fan e Thin rok Got u wan’rad
Gathi gubin e girdi’ ni yad ma yog ni yad e Kristiano nib ga’ fan u wan’rad e tin riyul’ u Bible. Mu yaliyew e re VIDEO ney, mi gimew weliy e fulweg ko re deer ni baaray.
-
Mang boch e machib ni i fil boch e teliw ni yad ma yog ni yad e Kristiano ko girdi’ nib thil ko n’en ni i machibnag Jesus?
I machibnag Jesus e tin riyul’ ni bay ko Thin rok Got. Mu beegew e John 18:37, mi gimew weliy e fulweg ko re deer ni baaray:
-
Uw rogon ni ngad nanged ko tin ngan e Kristiano e yad “girdien e tin riyul’” nrogon ni yog Jesus?
5. Yad ma machibnag e tin riyul’ u Bible
Tin som’on e Kristiano e yad ma machib
U m’on ni nge sul Jesus nga tharmiy, me pi’ ba maruwel ngak pi gachalpen ni ka be ulul ke yib i mada’ ko chiney. Mu beegew e Matthew 28:19, 20 nge Acts 1:8, mi gimew weliy e fulweg ko re deer ni baaray:
-
Uw e ra garer fare maruwel ni machib nge yan i taw ngay?
6. Yad ma fol ko n’en yad ma machibnag
Mang e micheg nga laniyan’ be’ nib pumoon ni ka nog Tom ngak ni ke pirieg e piin nriyul’ ni yad ma fol ko n’en ni i machibnag Jesus? Mu yaliyew e re VIDEO ney, mi gimew weliy e fulweg ko gal deer ni baaray.
-
Mang e k’aring Tom ni nge dabuy ni ngki un nga barba’ e teliw?
-
Mang e micheg nga laniyan’ ni ke pirieg e tin riyul’?
Kab ga’ fan e ngongol rodad ko thin ni gad ma yog. Mu beegew e Matthew 7:21, mi gimew weliy e fulweg ko re deer ni baaray:
-
Gur, ba ga’ fan u wan’ Jesus e n’en gad ma yog ni ke mich u wan’dad, fa kab ga’ fan u wan’ e n’en ma m’ug ko ngongol rodad?
7. Yad ma t’ufeged yad
Tin som’on e Kristiano e yad ma t’ufeged yad
Riyul’ ni bay boch e Kristiano ni kar ted e yafos rorad nga thatharen e riya’ ni fan ngak e pi Kristiano ni taareb e michan’ rorad, fa? Mu yaliyew e re VIDEO ney, mi gimew weliy e fulweg ko gal deer ni baaray.
-
Mang e k’aring Lloyd ni nge tay e yafos rok nga thatharen e riya’ ni fan ngak Brother Johansson?
-
Ga be lemnag ni ngongol e re pumoon ney ni bod reb e tin riyul’ e Kristiano, fa?
Mu beegew e John 13:34, 35, mi gimew weliy e fulweg ko gal deer ni baaray:
-
Uw rogon e ngongol ni ma dag pi gachalpen Jesus (tin riyul’ e Kristiano) ngak e girdi’ nib thil ramaen dowrad ara nam rorad?
-
Uw rogon ni yad ma rin’ e re n’ey u nap’an ni yibe mahl?
MA GAAR BOCH E GIRDI’: “Gubin e Kristiano ni taab Got e yad ma liyor ngak ni yugu demtrug e re teliw ni yad ma un ngay.”
-
Mang thin nu Bible e rayog ni ngam beeg ngak be’ ni be tamilangnag rogon nrayog ni ngad nanged e tin riyul’ e Kristiano?
N’EN KAN FIL
Tin riyul’ e Kristiano e yad ma fol ko n’en be fil e Bible, ma yad ma t’ufeged yad, ma yad ma machibnag e tin riyul’ u Bible.
Ngan Sul u Daken
-
Mang e ma guy e tin riyul’ e Kristiano rogon ni nge puluw e machib rorad ngay?
-
Mang e re fel’ngin nib gagiyel ko tin riyul’ e Kristiano?
-
Mang maruwel e ma rin’ e tin riyul’ e Kristiano?
MU GAY MURUNG’AGEN
Kum fil boch ban’en u murung’agen ba ulung i girdi’ ni yad ma athamgil u rogon nrayog rorad ni ngar folwokgad rok Jesus Kristus nge n’en ni i machibnag.
Mu beeg e n’en ni k’aring reb e sibester ni nge gay e “piin riyul’ ni yad ma t’ufeged yad.”
“They Used the Bible to Answer Every Question!” (The Watchtower, April 1, 2014)
Mu guy rogon ni ma dag e tin riyul’ e Kristiano e t’ufeg ngorad u nap’an nra t’uf e ayuw rok boch i yad.
Mu beeg rogon ni dag e tin som’on e Kristiano nge rogon ni be dag e tin riyul’ e Kristiano e ngiyal’ ney ni yad ma fol ko n’en ni yog Jesus nra i rin’ pi gachalpen.
“Mang e Pow ko Tin Riyul’ e Kristiano?” (Fare Wulyang ko Damit, May 1, 2012)
