ESI ITUUGHẠ PHỌ 19
Abugbaanhaạn AZihova Abugey AKristẹn Ni?
Yira Abugbaanhaạn AZihova omeeraam mọ yira abugey aKristẹn ni. Eeghe kụ iḍighi? Ooḅeghiọn esi phọ yira okpasị bọ omheeraam mọ ayira, ḍien phọ igbatạn bọ iyira, ḅilhẹ r’ephomhoghiạn phọ yira omhoọgh bọ igbo ayira.
1. Abugbaanhaạn aZihova okpasị remheeraam mọ abidị ḍighen?
AZizọs aḅẹm mọ: “oghaạph phọ [Enhaạn] inẹ ni.” (Jọn 17:17) Idiphọ aZizọs, Abugbaanhaạn aZihova rokpasị ghan omheeraam mọ abidị siphẹ Ekpo-onhụ phọ Enhaạn. Ooḅeghiọn iphirigba ayira siẹn oghill phọ ophọn. Lhạ phọ eḍighi bọ 1870, egu anmụny askul aBaibul umhiigha ni loor ooḅeghiọn Baibul phọ. Kụ okpasị ghan remheeraam mọ abidị ipẹ aBaibul phọ aghaạph bọ, ghalhamọ r’amem dị ipẹ bidị omheeraam bọ egbatanhaạn ni r’itughemhị asisiosị phọ. Kụ esighẹ rekị, bịn bidị omhiigh oḅenhị aani abunhọn igey aBaibul phọ. a
2. Eeghe kụ iḍighi kụ yira ogholha bọ mọ Abugbaanhaạn aZihova?
AZihova ramạgh ghan rebenhẹ odị m’abugbaanhaạn odị idị eḍighi bọ bidị rokaạph ghan igey phọ ilọ odị. (Hibru 11:4–12:1) Esi omaạm, iḍiodi phọ, Enhaạn aḅenhị we phọ odị mọ: “Nyinha kụ abugbaanhaạn amhị.” (Ibạl Isaiah 43:10.) Umhạgh ni kẹn Zizọs mọ “ogbaanhaạn dị akpẹ oḍuomolhoghi.” (Ogananami 1:5, NWT) Esi iduọn phọ, lhạ phọ 1931 kụ edị yira ogholha bọ mọ Abugbaanhaạn AZihova. Olhoghi ayira aḅaạl li omheera aḍien phọ aḍiẹn phọ.
3. Ika kụ idị Abugbaanhaạn aZihova rotuughaạny ghan ephomhoghiạn phọ aZizọs?
AZizọs aphomhoghiạn bumatuạn phọ odị iboom dị tutụ asighẹ bidị idiphọ abuọ eghunotu odị. (Ibạl Mạk 3:35.) Iginha phọ kẹn kụ edị Abugbaanhaạn aZihova oḅophoghạn idiphọ eghunotu siẹn oomo aḅirinhi phọ. Pọ kụ iyaạr phọ oniin ramạgh ghan bọ nyoniin mọ umor ḅilhẹ umaranhi. (Failimọn 1, 2) Yira oḅilhẹ kẹn ronaghanhạn ghan itọ phọ eḅẹm bọ mọ: “Ipomoghiạn buọ [ookpomhoghan] phọ.” (1 Pita 2:17) Abugbaanhaạn aZihova roḍeenhaan ghan ephomhoghiạn phọ ephẹn phọ ibadị areten, idiphọ olhoghonhaạn aḍighaạgh buḅaramạ omheeraam mọ ayira siẹn oomo aḅirinhi phọ mem iiḅaghamhị.
OLHEGHERI OBUGHẸ
Ozuumaam ophogh iphirigba Abugbaanhaạn aZihova oḅilhẹ omhiịn inhọn ariphigh dị eḍeenhaan mọ yira abugey aKristẹn ni.
Abugey aKristẹn rokpasị ghan remheeraam abidị siphẹ aBaibul phọ koḅilhẹ oḅenhị aani bunhọ
4. Yira okpasị remheeraam mọ ayira siphẹ aBaibul phọ
AZihova aḅẹm mọ onhaghanhạn aḍughụm mọ ayira ilọ aBaibul phọ kaagholhaany ghan bịn. Ibạl Daniel 12:4 r’igẹ phọ edi bọ ude phọ, kụ eeḅeghiọn ḍipuru phọ aḍiẹn:
-
Eeghe iyaạr kụ “keepaany” igbo awe phọ Enhaạn iduọn bidị oghiọm bọ ni ghisigh rooḅeghiọn Baibul phọ?
Ooḅeghiọn idị anmụny askul aBaibul phọ omhaạr otuughạ Ekpo-onhụ phọ Enhaạn, oniin onyọ abuẹn phọ ughol mọ Charles Russell. Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Ika kụ idị aCharles Russell r’abuphẹ r’odị oḍighi bọ Nmụny Askul aBaibul phọ otuughạ ghan Baibul phọ?
Nạ alegheri ni?
Eeni amem yira rooḅenhion ghan ni raraạr phọ ipẹ yira omheeraam bọ. Eeghe kụ iḍighi? Idiphọ aḍiḅaạl aḍiroọr remiigha ghan bọ loor kụ kemite, kụ idị Enhaạn rangọ ghan onhaghanhạn aḍughụm Ekpo-onhụ phọ odị enụm enụm. (Ibạl Proverbs 4:18.) Ii aBaibul phọ ra/nmia ghan, kuolọ mem dị yira omhoọgh onhaghanhạn aḍughụm dị aagholhaany ilọ aBaibul phọ, yira ronme ghan ni omheeraam mọ ayira.
5. Yira rotọl ghan dọl dị eḅọph r’aḍien phọ ayira
Eeghe kụ iḍighi kụ yira osaḅạr bọ omheera mọ Abugbaanhaạn aZihova? Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Eeghe kụ iḍighi kụ aḍien phọ aḍiẹn, Abugbaanhaạn aZihova ekpeanhaạn bọ ni?
Uḍighi ika kụ aZihova asaḅạr bọ we oḍighi abugbaanhaạn odị? Loor esi dị bidị kụ komạ ghan omiteom mọ odị kụ egey Enhaạn, loor iduọn mogbaạm bọ nyodị okpẹ kirokirọ. Oghaạph ilọ iyạl asiagbạ phọ iphẹn phọ.
Iniin aruukụ iiḅereghị retughemhị ghan buọ ookpomhoghan phọ abidị mọ Enhaạn rawạ mọ bidị oḍighinhom ghan ni raraạr dị okạ mem dị rooḅereghị nyodị. Ipẹ phọ etu ni inẹ ḍughụm? Ibạl Leviticus 26:1, kụ eeḅeghiọn sipuru phọ iphẹn:
-
Ighẹn igey kụ edị esi aBaibul phọ emiteom? AZihova amiịn aani ika okạ iyaạr ooḅereghị?
Abuniin abuḍiemhiom aruukụ iiḅereghị otughemhị mọ aZizọs kụ okạr Enhaạn phọ. Ipẹ phọ etu ni inẹ ḍughụm? Ibạl Jọn 20:17, kụ eeḅeghiọn sipuru phọ iphẹn:
-
Ighẹn igey kụ edị esi aBaibul phọ emiteom? Enhaạn r’aZizọs oḍighi ni nyoniin oye ḍughụm?
-
Etọl ika esi anạ iduọn aZihova marom bọ Bugbaanhaạn odị m’ogbeelhom igey phọ ilọ odị ḅilhẹ r’Oọny ph’odị?
6. Yira opomhoghiạn siloor
ABaibul phọ atomaạm Kristẹn riisi aloor oye. Ibạl 1 Korịnt 12:25, 26, kụ eeḅeghiọn sipuru phọ iphẹn:
-
Abugey aKristẹn koḍighi eeghe mem dị abunhọn aKristẹn romiinhọm?
-
Eeghe iyaạr kụ edị nạ malhọgh elhegh ilọ ephomhoghiạn phọ edi bọ igbo Abugbaanhaạn aZihova?
Mem dị Abugbaanhaạn aZihova dị odi eniin apakirị aḅirinhi phọ romiinhọm, eginha amem Abugbaanhaạn oomo isiẹn aḅirinhi phọ rolọgh ghan ni ḍighaạgh. Omhiịn eniin eḍeenhaan, ipegh VIDIO phọ. Kụ eeḅeghiọn ḍipuru phọ edaphạn bọ siẹn.
-
Ika kụ idị iikolhobian olhoghonhaạn aḍighaạgh phọ Abugbaanhaạn aZihova romiteom ghan bọ mem iiḅaghamhị eḍeenhaan ephomhoghiạn?
Abugey aKristẹn roḍeenhaan ghan ephomhoghiạn buẹn ekuom bọ
ABUNIIN AWE OOTUGHIẠN MỌ: “Purukụ Abugbaanhaạn aZihova omite ni.”
-
Kapụr amem kụ edị aZihova amhiigh omhạgh arebenhẹ odị m’abugbaanhaạn onọ?
OGHAẠPH OOKARAGH
Abugbaanhaạn aZihova abugey aKristẹn ni. Yira eghunotu dị rooseeny ghan Enhaạn oomo isiẹn aḅirinhi phọ, dị okpasị torobọ omheeraam ayira siphẹ aBaibul phọ kụ oḅilhẹ rogbeelhom ghan igey phọ ilọ aZihova.
Ooḅula
-
Eeghe kụ iḍighi kụ yira ogholha bọ mọ Abugbaanhaạn aZihova?
-
Ika kụ idị yira rozọ ghan siphẹ igbo phọ ayira?
-
Nạ ragbi mọ Abugbaanhaạn aZihova abugey aKristẹn ni?
WAAGHỊ AMHIỊN
Legheri abughẹ iphirigba ayira.
Abugbaanhaạn AZihova—Omheeraam Dị Raḅạ Eye, Ekpịgh 1: U/lo Mun Ufiri (1:00:53)
Miịn eḍeenhaan idị Abugbaanhaạn aZihova oyegherọn ikarạph itughemhị.
Miịn ophanyanhaạn asipuru dị nạ katue ni apuru ilọ Abugbaanhaạn aZihova.
“Asipuru Dị Ogbor Ropuru Ilọ Abugbaanhaạn AZihova” (edi intanẹt)
AStephen aḍighom aani ghan ekụ dị olhọgh ghan ḍien we dị iḍighinhom araraạr abidị egbaranhaạn. Wạ alhegheri iyaạr dị odị amhiịn igbo Abugbaanhaạn aZihova dị enyu nyodị onmia.
“Aghuḍum Mọ Amhị Alhoghorị Ghan Bịn” (The Watchtower, July 1, 2015)
a K’alhạ phọ 1879, aḍinyạ phọ yira rogbor ghan bọ komiteom, Otu Okoriom, ragbeelhom ghan igey aBaibul phọ.
