PWONY ME 19
Lucaden pa Jehovah Tika Gubedo Lukricitayo me Ada?
Macalo Lucaden pa Jehovah, waye ni wabedo Lukricitayo me ada. Pingo? Niyewa jenge i kom gin ango? Pingo walwonge ni Lucaden pa Jehovah? Wanyutu nining ni wamarre i kinwa?
1. Niye pa Lucaden pa Jehovah jenge i kom gin ango?
Yecu owaco ni: ‘Lok pa Lubanga en ada.’ (Jon 17:17) Calo Yecu, Lucaden pa Jehovah kare ducu niyegi jenge i Lok pa Lubanga. Me labolle, nen kong jami mutimme i tekwaro pa Lucaden pa Jehovah, ma onongo con kilwongogi ni Lutino Kwan me Baibul. I mwaka 1870, gurup pa jo mo ma cwinygi atir gucako kwano Baibul i yo matut wek ginge gin ma Baibul ada pwonyo. Niyegi ojenge i kom gin ma Baibul pwonyo, kadi wa i kare ma niyegi opokke woko ki pwony pa kanica. I nge meno, gucako nywako ki jo mukene jami ma gupwonyo ki i Baibul. a
2. Pingo walwonge ni Lucaden pa Jehovah?
Jehovah lwongo jo ma giwore ni lucadenne pien gitito lok ada madok i kome. (Jo Ibru 11:4–12:1) Me labolle, i kare macon, Lubanga owaco bot jone ni: “Wun cadenna.” (Kwan Icaya 43:10.) Kilwongo Yecu ni “Lacaden ma Genne.” (Niyabo 1:5) Pi meno, i mwaka 1931 wacako tic ki nying man ni Lucaden pa Jehovah. Watye ki awaka madit me tic ki nying meno.
3. Lucaden pa Jehovah gilubo lanen me mar pa Yecu nining?
Yecu onongo maro lupwonnyene matek adada ma oweko onongo gitye calo jo me pacone. (Kwan Marako 3:35.) I yo acel-lu, Lucaden pa Jehovah gitye jo me ot acel ma gunote i wi lobo-ni ducu. Meno aye oweko walwonge kekenwa ni omego nyo lamego. (Pilemon 1, 2) Walubo bene cik man ma waco ni: ‘Wumar omegiwu ducu.’ (1 Petero 2:17) Lucaden pa Jehovah ginyuto mar man i yo mapatpat, calo ki konyo omegiwa ki lumegiwa ma i but lobo ducu i kare me peko.
NONG NGEC MATUT
Pwony lok i kom tekwaro pa Lucaden pa Jehovah, dok inen lanyut ma moko ni wan wabedo Lukricitayo me ada.
Niye pa Lukricitayo me ada jenge i kom Baibul dok ginywako niyegi ki jo mukene
4. Niyewa jenge i kom Baibul
Jehovah otito con ni i kare me agikki, kibiniang lok ada me Baibul maber adada. Kwan Daniel 12:4, ci i ngeye wunyam lapeny man:
-
Gin ango ma onongo “bimedde” i kin jo pa Lubanga ka ‘giringo tungi ki tungi,’ nyo gimedde ki ngiyo lok ma i Baibul?
Nen kong kit ma gurup pa lutino kwan me Baibul, ma i kine onongo tye iye Charles Russell, gukwano kwede Lok pa Lubanga. Tuk VIDIO, ci i ngeye wunyam lapeny ma lubo-ni.
-
Ki i vidio man, yo me kwan ango ma Charles Russell kacel ki Lutino Kwan me Baibul luwote gutiyo kwede me kwano Baibul?
Tika onongo ingeyo?
I kare mogo, waloko niangowa i kom lok ada me Baibul. Pingo? Kit macalo dero ceng ma tye ka tuc woto ki nyuto jami ma i kabedo moni motmot, Lubanga bene weko dano niang i kom Lokke motmot. (Kwan Carolok 4:18.) Dong kadi bed lok me Baibul pe lokke, waloko pwonywa ka niangowa me Baibul omedde.
5. Watito lok ada i kom Jehovah
Pingo wacako tic ki nying man ni Lucaden pa Jehovah? Tuk VIDIO, ci wunyam lapeny ma lubo-ni.
-
Pingo nying man ni Lucaden pa Jehovah opore?
Pingo Jehovah oyero dano me bedo Lucadenne? Pien gin onongo gibitito lok ada madok i kom Jehovah, Lubanga me ada, kit macalo dano dong guwaco lok goba mapol i kome. Nen kong goba aryo i kin magi.
Dini mogo gipwonyo lumembagi ni Lubanga mito ni guti ki cal i worogi. Tika meno lok ada? Kwan Lulevi 26:1, ci wunyam lapeny magi:
-
Lok ada mene ma tye i ginacoya man? Jehovah winyo nining ka kitiyo ki cal me wore?
Lupwonye dini mogo gipwonyo ni Yecu obedo Lubanga. Tika meno lok ada? Kwan Jon 20:17, ci wunyam lapeny magi:
-
Lok ada mene ma tye i ginacoya man? Tika Yecu obedo Lubanga?
-
Iwinyo nining me niang ni Jehovah ocwalo Lucadenne me tito lok ada madok i kome kacel ki Wode?
6. Wamarre i kinwa
Baibul waco ni Lukricitayo myero gubed ma guribbe kit macalo dul komwa mapatpat-ti bene tye ma oribbe kacel. Kwan 1 Jo Korint 12:25, 26, ci wunyam lapeny magi:
-
Lukricitayo me ada myero gudok iye nining ka Lukricitayo luwotgi gitye ka deno can?
-
Gin ango ma ineno ka odok i kom mar ma tye i kin Lucaden pa Jehovah?
Ka Lucaden pa Jehovah gitye ka deno can i but lobo mo acel, Lucaden luwotgi ma i wi lobo ducu gitute me konyogi cutcut. Me neno labol acel, tuk VIDIO. I nge meno, wunyam lapeny ma lubo-ni.
-
Lucaden pa Jehovah gukonnye i kingi nining i nge kot ma ocwer ki yamo lapiru?
Lukricitayo me ada ginyuto mar bot jo ma gitye i peko
JO MOGO GIWACO NI: “Lucaden pa Jehovah gubedo dini manyen.”
-
Awene ma Jehovah ocako lwongo jo ma giwore ni lucadenne?
WOT WIYE WIYE
Lucaden pa Jehovah gubedo Lukricitayo me ada. Wan wabedo jo me ot acel ma wanonge i but lobo ducu, niyewa jenge i kom Baibul dok watito lok ada madok i kom Jehovah.
Ngo ma ipwonyo?
-
Pingo wacako tic ki nying man ni Lucaden pa Jehovah?
-
Wanyuto nining ni wamarre i kinwa?
-
Tika itamo ni Lucaden pa Jehovah gubedo Lukricitayo me ada?
TIM KWED
Pwony lok madok i kom tekwarowa.
Lucaden pa Jehovah—Ticgi me Niye, Bute me 1: Gua ki i Colpiny (1:00:53)
Nen labol acel ma nyuto kit ma Lucaden pa Jehovah guyaro woko pwony goba.
Nong lagam pi lapeny ma gwok itye kwede i kom Lucaden pa Jehovah.
“Lapeny ma Pol Kare Dano Penyo i kom Lucaden pa Jehovah” (bute ma tye i jw.org)
Stephen onongo dag jo me rok mukene adada ma oweko en onongo lwenyo i komgi. Nen kong gin ma en oneno i kin Lucaden pa Jehovah ma otugo cwinye me loko kwone.
“Kwona Onongo Tye ka Doko Rac Medde Ameda” (Wi Lubele, Julai 1, 2015)
a Nicakke i mwaka 1879, jo pa Jehovah gugoyo magajin me Wi Lubele me tito gin ma Baibul ada pwonyo.
