LESEN 19
?Ol Witnes Blong Jehova Oli Ol Tru Kristin?
Mifala ol Witnes blong Jehova, i bilif se mifala nao ol trufala Kristin. ?From wanem? Bambae yumi luk samting we bilif blong mifala i stanap long hem, lav we mifala i gat bitwin mifala mo nem we i mekem se mifala i defren.
1. ?Bilif blong ol Witnes i stanap long wanem samting?
Jisas i talem se: “Tok blong [God] i trutok.” (Jon 17:17) Olsem Jisas, bilif blong ol Witnes blong Jehova i stanap oltaem long Tok blong God. Eksampol, tingbaot histri blong olgeta. Samwe long 1870, wan grup blong ol Baebol studen oli stadi long Baebol blong save se i rili tijim wanem. Nao oli bilif strong long ol samting we oli faenem, nating se ol bilif ya oli defren long ol doktrin blong ol jos. Biaen, oli stat blong serem ol trutok ya long ol narafala man. a
2. ?From wanem mifala i tekem nem ya ol Witnes blong Jehova?
Jehova i talem se ol man blong hem oli Witnes blong hem, from we oli stap talemaot trutok long saed blong hem. (Hibru 11:4–12:1) Eksampol, long taem blong Baebol, God i talem long ol man blong hem se: “Yufala i witnes blong mi.” (Ridim Aesea 43:10.) Baebol i singaot Jisas se: “Tru Witnes.” (Revelesen 1:5) From samting ya, long 1931 mifala i tekem nem ya Witnes blong Jehova. Mifala i praod blong holem nem ya.
3. ?Olsem wanem ol Witnes blong Jehova oli soem lav olsem Jisas?
Jisas i rili lavem ol disaepol mo i luk olgeta olsem ol famle blong hem. (Ridim Mak 3:35.) Sem mak, mifala ol Witnes, mifala i joengud mo mifala i olsem wan famle long fulwol. Taswe mifala i singaot mifala se ol brata sista. (Filimon 1, 2) Mo tu mifala i obei long komanmen ya se: “Yufala i mas lavem olgeta brata blong yufala we oli bilif.” (1 Pita 2:17) Ol Witnes blong Jehova oli soemaot lav ya long plante rod, eksampol, oli halpem ol brata sista long fulwol taem i nidim.
DIGIM MOA
Lukluk gud histri blong ol Witnes mo faenem ol narafala pruf we i soem se mifala i trufala Kristin.
Bilif blong ol trufala Kristin i stanap long Baebol, mo oli talemaot long ol narafala
4. Bilif blong mifala i stanap long Baebol
Jehova i bin talem se trutok blong Baebol bambae i kam klia moa. Ridim Daniel 12:4 mo futnot, mo tokbaot kwestin ya:
-
Taem ol man blong God oli gohed blong stadi Baebol, ?wanem “bambae i kam plante” moa long olgeta?
Luk olsem wanem Charles Russell wetem wan grup blong ol Baebol studen oli stadi long Tok blong God. Plei VIDEO, mo tokbaot kwestin ya.
-
Long video ya, ?olsem wanem Charles Russell mo ol narafala Baebol studen oli stadi long Baebol?
?Yu yu save?
Samtaem, mifala i jenisim sam bilif blong mifala. ?From wanem? God i mekem se sloslo, save blong Baebol i stap kam klia moa, olsem we laet blong san long eli moning, i mekem ples i stap kam klia sloslo. (Ridim Ol Proveb 4:18.) Baebol i no jenis, be taem save i kam klia moa, mifala i jenisim bilif blong mifala.
5. Mifala i mekem samting we nem blong mifala i talem
?From wanem mifala i tekem nem ya Witnes blong Jehova? Plei VIDEO, mo tokbaot kwestin ya.
-
?From wanem nem ya Witnes blong Jehova i stret?
?From wanem Jehova i jusum ol man blong oli witnes blong hem? Hemia blong oli talemaot se hem i tru God, from we i gat plante giaman tok long saed blong hem. Tingbaot tufala giaman tok ya.
Sam skul oli tijim ol man se God i wantem we oli yusum aedol blong wosipim hem. Ridim Levitikas 26:1, mo tokbaot ol kwestin ya:
-
?Tijing ya we ol skul oli talem i tru? ?Wanem tingting blong Jehova long ol aedol?
Sam lida blong skul oli tijim se Jisas i God. Ridim Jon 20:17, mo tokbaot ol kwestin ya:
-
?Tijing ya we oli talem i tru? ?God mo Jisas i sem man nomo?
-
From we Jehova i sanem ol Witnes blong oli talemaot trutok long saed blong Hem mo Jisas, ?hemia i mekem yu yu harem olsem wanem?
6. Mifala i lavlavem mifala
Baebol i komperem ol Kristin long ol defren haf blong bodi. Ridim 1 Korin 12:25, 26, mo tokbaot ol kwestin ya:
-
?Ol trufala Kristin oli sud mekem wanem taem sam long olgeta oli safa?
-
?Yu yu makem wanem long saed blong lav we ol Witnes oli gat?
Taem ol Witnes blong Jehova long samples long wol oli safa, ol narafala Witnes long fulwol oli kwik blong givhan. Blong luk wan eksampol, plei VIDEO. Biaen tokbaot kwestin ya.
-
?Olsem wanem wok we ol Witnes oli mekem i pruvum se oli lavlavem olgeta?
Ol trufala Kristin oli soem lav long olgeta we oli gat nid
SAM MAN OLI SE: “Jos blong ol Witnes i jes stat nomo.”
-
?Wetaem Jehova i singaot ol man se oli witnes blong hem?
SAMARI
Ol Witnes blong Jehova oli tru Kristin. Long fulwol mifala i joen blong wosip olsem wan famle, we bilif blong mifala i stanap long Baebol mo mifala i talemaot trutok long saed blong Jehova.
Tingtingbak
-
?From wanem mifala i tekem nem ya Witnes blong Jehova?
-
?Wanem fasin we mifala i stap soem long mifala?
-
?Yu ting se ol Witnes blong Jehova oli trufala Kristin?
FAENEMAOT
Luk histri blong mifala.
Jehovah’s Witnesses—Faith in Action, Part 1: Out of Darkness (1:00:53)
Luk olsem wanem ol Witnes blong Jehova oli talemaot klia ol giaman tijing blong ol skul.
Faenem ansa blong ol kwestin we maet yu gat long saed blong ol Witnes blong Jehova.
“Kwestin We Plante Man Oli Stap Askem Long Saed Blong Ol Witnes Blong Jehova” (web pej)
Stephen i no laekem mo i atakem ol man blong defren kala. Makem samting we hem i luk long ol Witnes blong Jehova nao i jenisim fasin blong hem.
a Stat long 1879, ol man blong Jehova oli wokem magasin ya, Wajtaoa, blong i eksplenem ol tok blong Baebol.
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
