PELAJAREN 19
Saksi-Saksi Jahwe nge Kalak Kristen Situhu-tuhu?
Kami Saksi-Saksi Jahwe tek maka kami me kalak Kristen situhu-tuhu. Engkai? Kai dasar kiniteken kami? Engkai maka gelar kami Saksi-Saksi Jahwe? Uga cara kami ncidahken kekelengen man sada ras si debanna?
1. Kai dasar kiniteken Saksi-Saksi Jahwe?
Nina Jesus, “Kata [Dibata] kap kebenaren.” (Johanes 17:17) Dasar ajaren Jesus eme Kata Dibata. Dasar kiniteken Saksi-Saksi Jahwe pe Kata Dibata. Contohna, perdiateken uga sejarah Saksi-Saksi Jahwe si tangtangna igelari Siswa-Siswa Alkitab ntah pe Ajar-Ajar Pustaka si Badia. Kira-kira tahun 1870, Siswa-Siswa Alkitab mulai mpelajari Pustaka si Badia alu tutus. Kebenaren si idat kalak e arah Pustaka si Badia, jadi dasar kiniteken kalak e, amin pe la seri ras ajaren gereja-gereja. Kenca si e, bagiken kalak e kebenaren-kebenaren arah Pustaka si Badia man kalak si deban. a
2. Engkai maka gelar kami Saksi-Saksi Jahwe?
Ikataken Jahwe umatNa SaksiNa perban ceritaken kalak e kebenaren kerna Ia. (Heber 11:4–12:1) Contohna, mbarenda nina Jahwe man umatNa, “Kena kap saksi-saksiKu.” (Baca Jesaya 43:10.) Jesus igelari “Saksi si Setia.” (Ketangkasen 1:5) Emaka, bas tahun 1931 igunaken kami me gelar Saksi-Saksi Jahwe. Sada kehamaten kel kap kami make gelar e.
3. Uga Saksi-Saksi Jahwe ngusih kekelengen Jesus?
Keleng kel ate Jesus murid-muridna, bagi keluargana kapna kalak e. (Baca Markus 3:35.) Saksi-Saksi Jahwe pe bage, kami sada keluarga si ersada i belang-belang doni. E me sebapna lebuh kami teman kami sada kiniteken turang ras senina. (Pilemon 1, 2) Patuhi kami ka perentah enda: “Kelengilah kerina teman si sada kiniteken.” (1 Petrus 2:17) Saksi-Saksi Jahwe engkelengi alu erbage cara, contohna sampati kami turang senina i sebelang doni sanga perlu kalak e penampat.
PELAJARI TERBAGESEN
Sipelajari kari uga sejarah Saksi-Saksi Jahwe. Janah sipelajari ka kai buktina maka Saksi-Saksi Jahwe me kalak Kristen situhu-tuhu.
Dasar kiniteken kalak Kristen situhu-tuhu eme Pustaka si Badia, janah ceritakenna kebenaren si lit bas Pustaka si Badia man kalak si deban
4. Dasar kiniteken kami eme Pustaka si Badia
Enggo inubuatken Jahwe maka pengangkanta kerna Pustaka si Badia reh jelasna. Bacalah Daniel 12:4, kenca si e bahas penungkunen enda:
-
Umat Dibata terus mereksa Pustaka si Badia. Kai nge si “mbue kel” dat kalak e?
Perdiatekenlah uga sada kelompok kalak si erlajar Pustaka si Badia termasuk Charles Russell, mpelajari Kata Dibata. Putar VIDEO, kenca si e bahas penungkunen enda:
-
Bas video e, uga cara Charles Russell ras Siswa-Siswa Alkitab si debanna mpelajari Pustaka si Badia?
Tehndu nge?
Mon-mon lit ajaren kami si isesuaiken. Engkai? Bali bagi pemandangen si reh jelasna teridah adi reh ganjangna matawari, pengangkanta kerna Kata Dibata pe iban Dibata reh dekahna reh jelasna. (Baca Kuan-kuanen 4:18.) Pustaka si Badia labo berubah, tapi kenca reh jelasna angkai kami Pustaka si Badia, sesuaiken kami ajaren kami.
5. Kami jadi saksi man Jahwe sesuai gelar kami
Engkai maka gelar kami Saksi-Saksi Jahwe? Putar VIDEO, kenca si e bahas penungkunen enda:
-
Engkai maka gelar Saksi-Saksi Jahwe cocok man kami?
Kai tujun Jahwe milih umatNa jadi saksiNa? Perban melala kataken kalak kai si la tuhu kerna Dibata. Lit dua contohna.
Piga-piga agama ngajarken perlu nggunaken patung sanga nembah Dibata. Tuhu kin e? Bacalah Imamat 26:1, kenca si e bahas penungkunen enda:
-
Adi menurut ayat e uga situhuna? Uga perasan Jahwe adi sisembah Ia nggunaken patung?
Piga-piga agama ngajarken maka Jesus e eme Dibata. Tuhu kin e? Bacalah Johanes 20:17, kenca si e bahas penungkunen enda:
-
Adi menurut ayat e, seri nge Dibata ras Jesus?
-
Suruh Jahwe Saksi-SaksiNa mberitaken kerna Ia ras kerna AnakNa. Uga nge perasanndu meteh si e?
6. Kami sikeleng-kelengen
Bas Pustaka si Badia, kalak Kristen ipeseri ras anggota daging, beda-beda baginna tapi ersada. Bacalah 1 Korinti 12:25, 26, kenca si e bahas penungkunen enda:
-
Kai nge si lakoken kalak Kristen adi susah turang seninana?
-
Uga nge idahndu Saksi-Saksi Jahwe engkelengi sada ras si debanna?
Sanga susah akap Saksi-Saksi Jahwe bas sada negri, kerina turang senina si lit i belang-belang doni mis erusaha nampati. Guna ngenen contohna, putar VIDEO. Kenca si e bahas penungkunen enda:
-
Sanga terjadi bencana, kai nge si lakoken Saksi-Saksi Jahwe bukti kalak e sikeleng-kelengen?
Kalak Kristen situhu-tuhu sikeleng-kelengen. Emaka sampatina temanna sada kiniteken si perlu penampat.
LIT SI NGATAKEN: “Saksi-Saksi Jahwe e agama si mbaru kap e.”
-
Mulai ndigan nge lebuh Jahwe umatNa saksi-saksiNa?
KESIMPULEN PELAJAREN ENDA
Saksi-Saksi Jahwe eme kalak Kristen situhu-tuhu. Kami sada umat si ersada i belang-belang doni bali bagi sada keluarga. Dasar kiniteken kami eme Pustaka si Badia janah ceritaken kami man kalak kebenaren kerna Jahwe.
Kai si Enggo Sipelajari?
-
Engkai maka gelar kami Saksi-Saksi Jahwe?
-
Uga kami ncidahken kekelengen man sada ras si debanna?
-
Menurutndu, tuhu nge Saksi-Saksi Jahwe e kalak Kristen situhu-tuhu?
DARAMI TERBUEN
Tontonlah kerna sejarah kami.
Saksi-Saksi Yehuwa—Beraksi dengan Iman, Bagian 1: Keluar dari Kegelapan (1:00:53)
Nenlah sada contoh uga Saksi-Saksi Jahwe njelasken kebenaren gelah ula kalak tertipu man ajaren si salah.
Adi lit penungkunenndu kerna Saksi-Saksi Jahwe, daramilah jawapenna i jenda.
Segat ate Stephen kalak arah suku si berbeda emaka serangna kalak e. Tapi dungna berubah ia perban idahna Saksi-Saksi Jahwe sikeleng-kelengen. Bacalah pengalamenna.
a Mulai tahun 1879, iterbitken Saksi-Saksi Jahwe majalah Sora Ermomo, guna njelasken kebenaren si lit bas Pustaka si Badia.
