CAWN DINGMI 19
Jehovah Tehte Hna Cu A Hmaanmi Khrihfa An Si Maw?
Jehovah Tehte Hna nih kannih cu a hmaanmi Khrihfa kan si ti kha kan zumh. Zeicah? A hrampi kan zumhnak, a kan thleidantermi min le pakhat le pakhat kan i dawtnak kong kha hlathlai.
1. Jehovah Tehte Hna nih an zumhnak kha zei cungah dah hram an bunh?
Jesuh nih hitin a ti: “Biatak cu [Pathian] bia kha a si.” (Johan 17:17) Jesuh bantukin Jehovah Tehte Hna nih an zumhnak kha Baibal cungah hram an bunh zungzal. Tahchunhnak ah, tuchan kan tuanbia aa thawk ning kong hi zohhmanh. Kumzabu 19 a donghnaklei ah Baibal siangngakchia phu pakhat nih Baibal kha ṭha tein an hun hlathlai. Mah zumhnak cu church pawl zumhnak he aa khah lo hmanhah an zumhnak kha Baibal chimmi cungah hram an bunh. Cun mah Baibal biatak kong kha midang sinah an hun chimh hna. a
2. Kanmahle kanmah kha zeicah Jehovah Tehte Hna tiah kan i auh?
Amah kong biatak kha an chim caah Jehovah nih amah a biami hna kha ka tehte tiah a auh hna. (Hebru 11:4–12:1) Tahchunhnak ah, hlanhlio chan in Pathian nih a miphun pawl kha “ka tehte cu nanmah hi nan si” tiah a ti hna. (Isaiah 43:10 rel.) Jesuh cu “Zumh Awk A Tlakmi Tehte” tiah auh a si. (Biathlam 1:5) Cucaah 1931 ah Jehovah Tehte Hna timi min kha kan i lak. Mah min kan i lak caah kan i lawm tuk.
3. Jehovah Tehte Hna nih Jesuh dawtnak kha zeitindah an i zohchunh?
Jesuh nih a zultu pawl kha a dawt tuk hna i annih cu a caah a chungkhar bantuk an si. (Marka 3:35 rel.) Cu bantukin Jehovah Tehte Hna cu a lung aa rualmi vawleicung pumpi chungkhar an si. Cucaah pakhat le pakhat kha unau tiah kan i au hna. (Filemon 1, 2) Mah nawlbia zong hi kan zulh: “Zumhnak i nan unau a simi kha daw hna u.” (1 Peter 2:17) Jehovah Tehte Hna nih mah dawtnak kha lam tampi in an langhter. Vawleicung pumpi ah a ummi zumtukhat unau pawl an herh caan ah an bawmh hnanak thawng zongin an langhter.
TAM DEUH IN HLATHLAI
Jehovah Tehte Hna kong tuanbia le a hmaanmi Khrihfa kan si ti a langhtermi a dang kong hna kha tam deuh in hlathlai.
A hmaanmi Khrihfa hna nih an zumhnak kha Baibal cungah hram an bunh i mah kong kha midang sinah an chimh hna
4. Kan zumhnak cu Baibal cungah hram aa bunh
Jehovah nih Baibal biatak kong cu phuan a si lai tiah a chimchung. Daniel 12:4 rel law mah biahalnak hi i ruah u:
-
Pathian miphun nih Baibal kha an hlathlai peng ahcun zei kong dah “tampi” an hngalh lai?
Charles Russell i telin Baibal siangngakchia phu pakhat nih zeitindah Baibal an hlathlai timi kong kha hlathlai. VIDEO kha piah, cun a tanglei biahalnak hi i ruah u.
-
Mah video ah Charles Russell le a hawile Baibal Siangngakchia hna nih Baibal kha zeitindah an rak hlathlai?
Na hngal maw?
A caan ah kan zumhnak cheukhat cu remh ṭhan a si. Zeicah? Ni a san deuhdeuh tikah khua a ceu deuhdeuh bantukin Pathian nih Baibal kong kha duhsah tein a kan hngalhthiamter. (Phungthlukbia 4:18 rel.) Cucaah Baibal bia cu aa thleng lo nain Baibal kong kha ṭha deuh in kan hngalhthiam tikah kan zumhnak kha kan remh ṭhan.
5. Kan min ningin kan nung
Jehovah Tehte Hna timi min kha zeicah kan i lak? VIDEO kha piah, cun a tanglei biahalnak hi i ruah u.
-
Jehovah Tehte Hna timi min cu zeicah aa tlak?
Jehovah nih a tehte si awkah mi pawl kha zeicah a thim hna? Mi tampi nih a kong he aa tlaiin lihbia an chim lioah annih nih a hmaanmi Pathian a si kha an langhter nakhnga caah a si. Mah lihbia hna lakah pahnih in i ruah hna hmanh u sih.
Biaknak cheukhat nih an mi pawl kha Pathian nih biaknak ah milem hman kha a duh tiah an cawnpiak hna. Asinain Levitikas 26:1 rel law mah biahalnak hna hi i ruah u:
-
Biatak cu zeidah a si? Milem kong he aa tlaiin Jehovah nih zeitindah a ruah?
Biaknaklei hruaitu cheukhat nih Jesuh cu Pathian a si tiah an cawnpiak hna. Asinain Johan 20:17 rel law mah biahalnak hna hi i ruah u:
-
Biatak cu zeidah a si? Pathian le Jesuh cu an i khat maw?
-
Jehovah nih a Tehte pawl kha amah le a Fapa kong biatak chim awkah a thlah hna ti na hngalhmi nih zeitindah aan umter?
6. Pakhat le pakhat kan i daw
Baibal nih Khrihfa pawl kha aa lo lomi minung pum ṭengnge he a tahchunh hna. 1 Korin 12:25, 26 rel law mah biahalnak hna hi i ruah u:
-
A dang Khrihfa pawl nih harnak an ton tikah a hmaanmi Khrihfa hna nih zeidah an tuah awk a si?
-
Jehovah Tehte Hna lakah dawtnak kong he aa tlaiin zeidah na hmuh?
Hmun pakhat ah Jehovah Tehte Hna cu harnak an ton ahcun vawleicung pumpi ah a ummi Jehovah Tehte Hna nih an bawmh colh hna. Tahchunhnak pakhat zoh awkah, VIDEO kha piah. Cun a tanglei biahalnak hi i ruah u.
-
Jehovah Tehte Hna i har tongmi hna bawmhnak rian nih dawtnak kha zeitindah a langhter?
A hmaanmi Khrihfa hna nih bawmhnak a herhmi hna cungah dawtnak an langhter
MI CHEUKHAT CHIMMI: “Jehovah Tehte Hna cu biaknak thar pakhat men an si.”
-
Jehovah nih amah a biami hna kha zeitik in dah ka tehte tiah a auh hna?
A TAWINAK
Jehovah Tehte Hna cu a hmaanmi Khrihfa kan si. Kan zumhnak cu Baibal cungah hram aa bunh i mi sinah Jehovah kong biatak a hngalhtertu vawleicung pumpi chungkhar pakhat kan si.
I Ruahṭi Ṭhannak
-
Jehovah Tehte Hna timi min kha zeicah kan i lak?
-
Pakhat le pakhat zeitindah kan i pehtlaih?
-
Jehovah Tehte Hna cu a hmaanmi Khrihfa an si tiah na ruat maw?
HLATHLAI CHAP
Kan tuanbia kong kha tam deuh in hlathlai.
Jehovah Tehte Hna—Zumhnak in Rianṭuannak, Ṭhen 1: Muihnak in Luatnak (1:00:53)
Jehovah Tehte Hna nih a hmaan lomi cawnpiaknak an phuan ning kong kha hlathlai.
Jehovah Tehte Hna kong he aa tlaiin hal na duhmi biahalnak hna i a phi kha hngalh awkah i zuam.
“Jehovah Tehte Hna Kong Atu le Atu an Halmi Biahalnak” (website cahmai)
Stephen nih miphun dang kha a huat tuk hna i a rak doh hna. Asinain Jehovah Tehte Hna lakah zei thil a hmuhmi nih dah thlennak tuah awkah a forh timi kong kha hlathlai.
a 1879 thawkin Jehovah miphun pawl nih Baibal chimmi kong fianter awkah Vennak Innsang mekazin kha hmaan tein an chuah.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
