ADZESUA 19
Aso Jehovah Adasefo Yɛ Nokwar Christianfo?
Hɛn Jehovah Adasefo dze, yɛgye dzi dɛ yɛyɛ nokwar Christianfo. Ebɛnadze ntsi na yɛreka dɛm? Ɔwodze, ma yensusu nsɛmbisa a odzidzi do yi ho, na ibohu siantsir no. Ebɛnadze do na yɛdze hɛn nkyerɛkyerɛ gyina? Ebɛnadze ntsi na yɛdze dzin Jehovah Adasefo ato hɛn do? Ebɛnadze na yɛyɛ dze kyerɛ dɛ yɛdodɔ hɛnho?
1. Jehovah Adasefo dze hɔn nkyerɛkyerɛ gyina ebɛnadze do?
Jesus kaa dɛ: ‘Nyankopɔn n’asɛm yɛ nokwar.’ (John 17:17) Dɛ mbrɛ Jesus yɛe no, Jehovah Adasefo so dze hɔn nkyerɛkyerɛ gyina Nyankopɔn n’Asɛm do aber biara. Sɛ ehwɛ hɛn abakɔsɛm mu a, ibohu dɛ dɛmara na yɛayɛ. Wɔ 1870 no mu hɔ beebi no, nkorɔfo bi a nna wohyia mu sua Bible no dze sii hɔn enyi do dɛ wɔbɔtɔ hɔn bo ara ahwehwɛ Bible no mu ehu dza ɔkyerɛkyerɛ ankasa. Wɔdze hɔn nkyerɛkyerɛ gyinaa dza wohunii wɔ Bible no mu no do. Sɛ nna dɛm nkyerɛkyerɛ no nye asɔrasɔr ahorow no hɔn nkyerɛkyerɛ nnhyia mpo a, nna wɔnnhwɛ hɔ. Afei, wɔhyɛɛ ase kaa dɛm nokwasɛm a woehu no ho asɛm kyerɛɛ nkorɔfo. a
2. Ebɛnadze ntsi na yɛdze dzin Jehovah Adasefo ato hɛn do?
Jehovah frɛ n’asomfo dɛ wɔyɛ n’adasefo osiandɛ wɔka noho nokwasɛm. (Hebrewfo 11:4–12:1) Dɛ nhwɛdo no, wɔ tsetseber mu no, Nyankopɔn kaa kyerɛɛ no nkorɔfo dɛ: “Homara nye m’adasefo.” (Kenkan Isaiah 43:10.) Bible no frɛ Jesus so dɛ ɔyɛ “dasefo nokwafo.” (Nyikyerɛ 1:5) Iyi ntsi, wɔ 1931 mu no, yɛdze dzin Jehovah Adasefo too hɛnho do. Ɔyɛ hɛn dɛw paa dɛ dɛm dzin no da hɛn do.
3. Ebɛnadze na Jehovah Adasefo yɛ dze kyerɛ dɛ ɔdɔ a Jesus daa no edzi no, hɔn so worusuasua?
Nna Jesus dɔ n’esuafo no paa ma ɔno ntsi, nna ohu hɔn dɛ wɔyɛ n’ebusuafo. (Kenkan Mark 3:35.) Dɛmara na Jehovah Adasefo a wɔwɔ wiadze nyina so tse. Hɔn nyina yɛ ebusua kor. Dɛm ntsi, sɛ yehyia hɛn nyɛnko Jehovah Dasefo bi a, yɛfrɛ no onua. (Philemon 1, 2) Afei so, Bible no ka dɛ: “Hom ndodɔ enuanom [nyina].” (1 Peter 2:17) Jehovah Adasefo mmfa dɛm asɛm yi nndzi agor koraa, wɔdze yɛ edwuma. Ntsi, yɛyɛ ndzɛmba ahorow pii dze kyerɛ dɛ yɛdɔ hɛn nuanom. Dɛ nhwɛdo no, sɛ asɛm to hɛn nuanom a wɔwɔ aman ahorow do no a, yɛboa hɔn.
PƐNSAPƐNSA MU KƆ EKYIR
Yɛbɔhwɛ Jehovah Adasefo abakɔsɛm ho nsɛm pii, na yeehu dase afofor a ɔkyerɛ dɛ hɛn na yɛyɛ nokwar Christianfo.
Nokwar Christianfo dze hɔn nkyerɛkyerɛ gyina Bible no do, na wɔka Bible no mu asɛm kyerɛ nkorɔfo
4. Yɛdze hɛn nkyerɛkyerɛ gyina Bible no do
Jehovah kae too hɔ dɛ, ber bi bɛba a yɛbɛtse Bible no ase yie. Ma yɛnkenkan Daniel 12:4, na yensusu asɛmbisa yi ho:
-
Kyerɛwsɛm yi se, sɛ Nyankopɔn no nkorɔfo dzi akɔnaaba, kyerɛ dɛ, sɛ wɔkɔ do hwehwɛ Bible no mu a, ebɛnadze na ‘ɔbɔdɔɔ so’?
Nna nkorɔfo bi bɔ mu sua Bible no. Hɔn mu kor nye Charles Russell. Ma yɛnhwɛ VIDEO yi, na yebohu kwan a wɔfaa do suaa Nyankopɔn n’Asɛm no. Yewie a, yebosusu asɛmbisa a odzi do no ho.
-
Wɔ video no mu no, sɛ nna Charles Russell nye hɔn a wɔnye no bɔ mu sua Bible no reyɛ Bible no mu mpɛnsampɛnsamu a, nna wɔyɛ no dɛn?
Ana inyim?
Ɔwɔ mu ara a, dɛ mbrɛ yɛtse Bible no mu asɛm bi ase no, yetum sesa no. Ebɛnadze ntsi na yɛyɛ dɛm? Ɔwodze, ma yɛnyɛ mfatoho yi. Sɛ adze rebɛkye ma wimu aatsetsew, na sɛ ewia no rupue a, nkakrankakra yehu adze yie. Dɛmara so na Nyankopɔn ma yɛtse n’Asɛm ase nkakrankakra. (Kenkan Mbɛbusɛm 4:18.) Ntsi ɔwɔ mu dɛ Bible no nsesa dze, naaso sɛ yɛtse Bible mu asɛm bi ase yie a, yɛyɛ nsesa wɔ hɛn nkyerɛkyerɛ mu.
5. Yɛyɛ dzin a ɔda hɛn do no ho edwuma
Ebɛnadze ntsi na yɛdze dzin Jehovah Adasefo too hɛn do? Ma yɛnhwɛ VIDEO yi, na yensusu asɛmbisa a odzi do no ho.
-
Dzin Jehovah Adasefo no fata hɛn paa. Ebɛnadze ntsi a?
Ebɛnadze ntsi na Jehovah eyi nyimpa bi dɛ wɔnyɛ n’adasefo? Dza ɔwɔ mu nye dɛ, woetwa akɔhwisɛm pii ato no do, ntsi oeyi binom dɛ wondzi noho dase, ama nkorɔfo eehu dɛ ɔno nye nokwar Nyankopɔn no. Ɔwodze, ma yɛnhwɛ dɛm akɔhwisɛm no mu ebien.
Ɔsom ahorow bi kyerɛkyerɛ hɔn asɔrmba dɛ Nyankopɔn pɛ dɛ wɔdze ehonyi, mfonyin nye ndzɛmba bi a ɔtsetse dɛm no som no. Naaso, ma yɛnkenkan Leviticus 26:1, na yensusu nsɛmbisa yi ho:
-
Sɛ ehwɛ kyerɛwsɛm yi a, aso ɔyɛ ampa dɛ Nyankopɔn pɛ dɛ yɛdze ehonyi anaa ndzɛmba bi a ɔtsetse dɛm som no? Sɛ obi yɛ dɛm a, Jehovah tse nka dɛn?
Asɔfo bi kyerɛkyerɛ dɛ Jesus noara nye Nyankopɔn. Naaso, ma yɛnkenkan John 20:17, na yensusu nsɛmbisa yi ho:
-
Ehwɛ a, aso ɔyɛ ampa dɛ Jesus noara nye Nyankopɔn? Ebɛn asɛm na Bible no ka?
-
Jehovah asoma n’Adasefo dɛ wɔnkɛka ɔno na ne Ba no ho nokwasɛm nkyerɛ nkorɔfo. Iyi a ehu no ma etse nka dɛn?
6. Yɛdodɔ hɛnho
Bible no ka dɛ ɔwɔ dɛ Christianfo yɛ kor, na wɔbɔ mu yɛ edwuma dɛ mbrɛ nyimpadua n’akwaa ahorow bɔ mu yɛ edwuma no. Ma yɛnkenkan 1 Corinthfo 12:25, 26, na yensusu nsɛmbisa yi ho:
-
Sɛ nokwar Christiannyi bi hu dɛ no nua Christiannyi bi ruhu amandze a, ebɛnadze na ɔsɛ dɛ ɔyɛ?
-
Ebɛnadze na ehu wɔ Jehovah Adasefo ho a ɔkyerɛ dɛ wɔdodɔ hɔnho?
Sɛ Jehovah Adasefo a wɔwɔ ɔman fofor bi do no ruhu amandze a, hɔn nuanom Adasefo a wɔwɔ wiadze nyina no yɛ biribi ntsɛm dze boa hɔn. Ma yɛnhwɛ VIDEO yi, na yebohu iyi ho nhwɛdo. Yewie a, yebosusu asɛmbisa a odzi do no ho.
-
Sɛ atoyerɛnkyɛm bi si a, ɔyɛ a Jehovah Adasefo boa hɔn a asɛm ato hɔn no. Ebɛnadze ntsi na dɛm a wɔyɛ no kyerɛ dɛ wɔwɔ ɔdɔ?
Sɛ afofor ho kyer hɔn a, nokwar Christianfo boa hɔn dze kyerɛ dɛ wɔdɔ hɔn
BINOM KA DƐ: “Jehovah Adasefo hɔn asɔr no dze, nkyɛ ndaansa yi ara na ɔreba.”
-
Ebɛn aber na Jehovah hyɛɛ ase frɛɛ n’asomfo dɛ wɔyɛ n’adasefo?
DZA ESUA
Jehovah Adasefo yɛ nokwar Christianfo. Adasefo a wɔwɔ wiadze nyina no yɛ ebusua kor. Yɛdze hɛn nkyerɛkyerɛ gyina Bible no do, na yɛka Jehovah ho nokwasɛm kyerɛ nkorɔfo.
Mbobɔdo
-
Ebɛnadze ntsi na yɛdze dzin Jehovah Adasefo too hɛn do?
-
Yesi dɛn kyerɛ dɛ yɛdodɔ hɛnho?
-
Egye dzi dɛ Jehovah Adasefo yɛ nokwar Christianfo?
HWEHWƐ PII KA HO
Hwɛ video yi na ibohu hɛn abakɔsɛm ho nsɛm pii.
Jehovah Adasefo—Gyedzi A Wɔda No Edzi, Ɔfa 1: Woefi Sum Mu (1:00:53)
Jehovah Adasefo apa ator nkyerɛkyerɛ ho tam. Hwɛ iyi ho nhwɛdo kor wɔ video yi mu.
Sɛ ewɔ Jehovah Adasefo ho asɛm bi a ɔkyer w’adwen a, ɔno kenkan nsɛm a ɔwɔ ha yi, na ibenya ho mbuae.
“Nsɛm A Wɔtaa Bisa Fa Jehovah Adasefo Ho” (Asɛm bi a ɔwɔ wɛbsaet do)
Nna Stephen kyir aborɔfo kɔkɔɔkɔ, na ɔyɛɛ hɔn adzegyangyan so. Naaso ohun biribi wɔ Jehovah Adasefo ho ma ɔsesaa no suban. Kenkan asɛm yi na hwɛ dza ohunii.
a Ɔweɔn-Aban no yɛ magazine tsitsir a Jehovah no nkorɔfo dze kyerɛkyerɛ nokwar a ɔwɔ Bible mu. Wɔ 1879 mu na yɛhyɛɛ ase dɛ yeritsintsim.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
