KAPITE 19

Ko Le Kau Kilisiteano Māʼoki Ko Ia Le Kau Fakamāʼoki a Seova?

PLAY

Ko le Kau Fakamāʼoki a Seova, e lotou tui e lotou mulimuli ki akonaki a Sesu. Koleā lona tupuʼaga? Ko nei anoʼaga maʼuiga e tolu: Ko le fakatafito o lalātou tui, le igoa kua tuku ake kia lātou ti mo lolātou fealofani.

1. E fakatafito ki le ā le tui a le Kau Fakamāʼoki a Seova?

Na pati Sesu: “Ko lau folafola ko le maoki.” (Soane 17:17) Na faifaitakiʼi e le Kau Fakamāʼoki a Seova a Sesu o fakatafito tuʼumaʼu lalātou tui ki le Folafola a le Atua. O fai pe le anoʼaga leia na soko i le fētuʼu 1870, ko se gā kutuga na lotou ako fakamālotoloto le Tosi-Tapu. Na fakatafito lalātou tui ki le Tosi-Tapu logo ai e leʼaise ano tasi mo akonaki alā e akoʼi e le kau takitaki lotu o ʼĒkelesia. Ti na lotou kamata māsau loa ki ʼiki ki māʼoki alā i le Tosi-Tapu. a

2. Koleā e fakaʼigoa ai tātou ko le Kau Fakamāʼoki a Seova?

E fakaʼigoa e Seova lana kakai ko ana “tagata fakamaoki.” (Epeleo 11:4–12:1) O fai pe le temi muʼa, na pati le Atua ki lana kakai: “Ko koutou ko aku tagata fakamaoki.” (Lau Esaia 43:10.) E fakaʼigoaʼi Sesu ko le “tagata fakamaoki agatonu.” (Apokalipisi 1:5) Ko ia i le fētuʼu 1931, na fakaʼigoa loa le kakai a Seova “Kau Fakamāʼoki a Seova.” Ti e motou fiafia lasi i lomatou fakaʼigoa fenaʼaki.

3. E faifaitakiʼi fefeʼaki e le Kau Fakamāʼoki a Seova le alofa o Sesu?

Na alofa māʼoki Sesu ki ana tisipulo o fakaʼigoa e ia lātou ko lona fāmili. (Lau Maleko 3:35.) Ti e felaʼaki mo le Kau Fakamāʼoki a Seova, e lotou fai pe se fāmili e tasi. (Filemo 1, 2) Ti e motou mulimuli ki le fakatotonu leinei: “Kotou alofa ki fetaina.” (1 Petelo 2:17) E motou fakasā le alofa lenā i anoʼaga kesekese. O sakinake la, e motou tokoi ki omatou fetaina mo tuagaʼane logo ai le fenua leia e lotou maʼuʼuli ai.

MANATU LOLOTO

Ta māsau muʼa ki le isitolia o le Kau Fakamāʼoki a Seova mo tioʼi a ʼiki fakamāʼoki e fakasā ai ko matou ko le kau Kilisiteano māʼoki.

Ko le kau Kilisiteano māʼoki e fakatafito lalātou tui ki le Tosi-Tapu ti e lotou māsau ki māʼoki anā mo ʼiki

4. E fakatafito a latātou tui ki le Tosi-Tapu

Na fakakikite e Seova e matala loa le tokaʼapi ki māʼoki o le Tosi-Tapu. Lau Taniela 12:4 mo le gā nota ti fai le vesili leinei:

Koleā leia ka ‘tupu loa o lasi’ ki le kakai a le Atua mokā soko atu lalātou ako le Tosi-Tapu?

Ta tioʼi pe na fefeʼaki le ako o le Tosi-Tapu e le gā kutuga ako Tosi-Tapu leia na kau ai Charles Russel. Tioʼi le GĀ ʼATA, ti fai le vesili leinei.

GĀ ʼATA: Na Lotou Matala Loa Ki Māʼoki o Le Tosi-Tapu (7:45)

Na fefeʼaki le ʼaga a le gā kutuga o Charles Russel o ako le Tosi-Tapu?

E ke iloa ko ia?

Na motou ʼaga o tiʼaki a ʼiki a neʼa na motou tui ki ai. Koleā lona tupuʼaga? O fai pe le laʼā e sopo o mafoa mai le ʼao, na fenaʼaki le fakasā mamālie e le Atua o lana Folafola. (Lau Taagapati 4:18.) Logo ai e leʼaise fetogi le Tosi-Tapu, kae e soko atu a latātou ʼaga o akoʼi ke tuputupu ai lotātou matala ki le māʼoki.

5. E tou fai a neʼa fuli e ano tasi mo lotātou igoa

Koleā na tou filifili ai le igoa Kau Fakamāʼoki a Seova? Tioʼi le GĀ ʼATA, ti fai a vesili anei.

GĀ ʼATA: Ko Le Igoa e Ano Tasi Mo Le Kau Fakamāʼoki a Seova (2:40)

Koleā na soli ai le igoa Fakamāʼoki a Seova ki lana kakai?

Koleā na fakatotonu ai e Seova ke liliu ni kakai ko ana tagata fakamāʼoki? Ke lotou fakasā ai pe ko ai le Atua māʼoki ti mo loi alā e māsau o uiga mo ia. Ta tioʼi muʼa ni loi e lua.

E akoʼi e ʼiki a lotu e loto le Atua ke tou fakaʼaogaʼi ni fakatātā pe ko ni paaki pe ko ni ʼiki ake a neʼa ke tou atolasio ai kiate ia. Lau Levitiko 26:1, ti fai a vesili anei:

Koleā le māʼoki o uiga mo neʼa alā e fakaʼaoga ki le tausi ki le Atua la? Koleā le manatu a Seova o uiga mo neʼa anā?

Ko ʼiki a lotu e lotou akoʼi ko Sesu ko le Atua. Lau Soane 20:17, ti fai a vesili anei:

Koleā le māʼoki o uiga mo le Atua ti mo Sesu? Ko le kilisiteano ko ia e tasi?
Koleā e ke ʼaga o logoʼi i lau iloa leia na kakau e Seova lana Kau Fakamāʼoki ke ano o fakasā le māʼoki o uiga mo ia ti mo lona Alo?

6. E tou fealofani ia tātou

I le Tosi-Tapu, e fakatātā le kau Kilisiteano ki koga kesekese o le tino. Lau 1 Kolinito 12:25, 26, ti fai a vesili anei:

Koleā e logoʼi e le kau Kilisiteano māʼoki mokā felāvei olātou fetaina mo tuagaʼane mo ni faigataʼaʼia?
O mulimuli ki anoʼaga na ke ʼaga o tioʼi, e fakasā fefeʼaki e le Kau Fakamāʼoki a Seova lolātou fealofani māʼoki?

Ka soko se tuʼutāmaki ki ni Fakamāʼoki a Seova o se tasi fenua, ko le Kau Fakamāʼoki o le mālamanei kātoa e lotou tokoi kia lātou. Ke ke tioʼi se faifaitaki tioʼi le GĀ ʼATA, ti fai le vesili leinei.

GĀ ʼATA: Na Soko Le Afā Matthew i Le Fenua o Haiti (5:29)

Na fakasā fefeʼaki e le Kau Fakamāʼoki a Seova lolātou alofa mo lolātou fia tokoi ki fetaina mo tuagaʼane alā na tau mo se tuʼutāmaki?

Ko le Kau Fakamāʼoki a Seova e fakasā lolātou alofa o tokoi kia lātou alā e maʼuli mamae

E PATI A ʼIKI: “Ko le Kau Fakamāʼoki a Seova ko se lotu foʼou.”

Talu mei nāfea le fakaʼigoa e Seova o lana kakai ko le kau fakamāʼoki?

MANATU TĀFITO

Ko le Kau Fakamāʼoki a Seova ko le kau Kilisiteano māʼoki. E motou kau ki se fāmili fakamālamanei, o fakatafito lamatou tui ki le Tosi-Tapu ti mo fakamafola a le māʼoki o uiga mo Seova.