NIKASEMƆ 19
Ani Yehowa Odasefoi Ji Kristofoi Diɛŋtsɛ?
Wɔ Yehowa Odasefoi lɛ, wɔheɔ wɔyeɔ akɛ Kristofoi diɛŋtsɛ ji wɔ. Mɛni hewɔ? Nɔ ni nibii ni wɔheɔ wɔyeɔ lɛ damɔ nɔ, gbɛ́i ni kã wɔ nɔ ni hãa esoroɔ wɔ, kɛ suɔmɔ ni wɔsumɔsumɔɔ wɔhe lɛ, hewɔ wɔkɛɔ nakai lɛ.
1. Mɛni nɔ nibii ni Yehowa Odasefoi lɛ heɔ amɛyeɔ lɛ damɔ?
Yesu wie akɛ: “[Nyɔŋmɔ wiemɔ] lɛ anɔkwale ni.” (Yohane 17:17) Taakɛ Yesu fee lɛ, be fɛɛ be lɛ, Yehowa Odasefoi hu hãa Nyɔŋmɔ Wiemɔ lɛ kudɔɔ nibii ni amɛheɔ amɛyeɔ lɛ. Hã wɔsusu Yehowa Odasefoi ni yɔɔ ŋmɛnɛ lɛ ayinɔsane he wɔkwɛ. Kɛjɛ afi 1870 mli kɛbaa lɛ, hii anɔkwafoi komɛi bɔi Biblia lɛ kasemɔ waa, koni amɛna anɔkwalei ni yɔɔ mli lɛ. Amɛhã nibii ni amɛheɔ amɛyeɔ lɛ damɔ nɔ ni Biblia lɛ kɛɔ lɛ nɔ, kɛ́ esoro no yɛ nɔ ni atsɔɔ yɛ sɔlemɔi lɛ amli lɛ he po. Kɛkɛ ni amɛbɔi mɛi Biblia mli anɔkwalei ni amɛna lɛ gbaa. a
2. Mɛni hewɔ wɔtsɛɔ wɔhe Yehowa Odasefoi lɛ?
Yehowa tsɛɔ mɛi ni jáa lɛ lɛ akɛ edasefoi, ejaakɛ amɛgbaa mɛi anɔkwalei ni kɔɔ ehe. (Hebribii 11:4–12:1) Akɛ nɔkwɛmɔnɔ lɛ, yɛ blema lɛ, Nyɔŋmɔ kɛɛ ewebii lɛ akɛ: “Nyɛji midasefoi.” (Kanemɔ Yesaia 43:10.) Atsɛɔ Yesu akɛ “Odasefonyo Anɔkwafo lɛ.” (Kpojiemɔ 1:5) Enɛ hewɔ lɛ, yɛ afi 1931 mli lɛ, wɔŋɔ gbɛ́i Yehowa Odasefoi lɛ wɔfɔ̃ wɔnɔ. Eŋɔɔ wɔnaa akɛ gbɛ́i nɛɛ kã wɔnɔ.
3. Mɛɛ gbɛ nɔ Yehowa Odasefoi jieɔ suɔmɔ kpo tamɔ Yesu fee lɛ?
Yesu sumɔ ekaselɔi lɛ aahu akɛ, ena amɛ akɛ ewekumɛi. (Kanemɔ Marko 3:35.) Nakai nɔŋŋ Yehowa Odasefoi naa amɛhe akɛ weku ni yɔɔ jeŋ fɛɛ ni efee ekome. No hewɔ wɔtsɛɔ wɔhe akɛ nyɛminuu kɛ nyɛmiyoo lɛ. (Filemon 1, 2) Wɔboɔ fãmɔ nɛɛ hu toi, ni no ji: “Nyɛsumɔa nyɛmimɛi asafo muu lɛ fɛɛ.” (1 Petro 2:17) Yehowa Odasefoi jieɔ suɔmɔ nɛɛ kpo yɛ gbɛi pii anɔ, ni eko ji akɛ, kɛ́ wɔnyɛmimɛi ni yɔɔ jeŋ fɛɛ lɛ ahe fĩ amɛ lɛ wɔyeɔ wɔbuaa amɛ.
KASEMƆ PII OFATA HE
Obaale Yehowa Odasefoi lɛ ayinɔsane he nibii krokomɛi, ni obaana nibii krokomɛi ni tsɔɔ akɛ wɔji Kristofoi diɛŋtsɛ.
Mɛi ni ji Kristofoi diɛŋtsɛ lɛ hãa nibii ni amɛheɔ amɛyeɔ lɛ damɔɔ Biblia lɛ nɔ, ni amɛgbaa mɛi krokomɛi
4. Nibii ni wɔheɔ wɔyeɔ lɛ damɔ Biblia lɛ nɔ
Yehowa gba akɛ, Biblia mli anɔkwalei lɛ baafee faŋŋ. Nyɛkanea Daniel 12:4 kɛ shishigbɛ niŋmaa lɛ, ni nyɛsusua sanebimɔ nɛɛ he:
-
Be ni Nyɔŋmɔ webii lɛ yaa nɔ amɛtaoɔ Biblia lɛ mli fitsofitso lɛ, mɛni “baafa babaoo” yɛ amɛteŋ?
Obaana bɔ ni Biblia kaselɔi akuu ko, ni Charles Russell fata he lɛ, kase Nyɔŋmɔ Wiemɔ lɛ amɛhã. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Te Charles Russell kɛ mɛi ni fata ehe lɛ kase Biblia lɛ amɛhã tɛŋŋ?
Ani ole akɛ . . .
bei komɛi lɛ, wɔtsakeɔ nibii ni wɔheɔ wɔyeɔ lɛ ekomɛi? Mɛni hewɔ? Bɔ ni kɛ́ hulu lɛ miije lɛ ehãa anaa nibii ni yɔɔ shikpɔŋ lɛ nɔ lɛ jogbaŋŋ fiofio lɛ, nakai nɔŋŋ Nyɔŋmɔ hãa anuɔ e-Wiemɔ lɛ shishi fiofio. (Kanemɔ Abɛi 4:18.) Hewɔ lɛ, eyɛ mli akɛ Biblia lɛ tsakeee moŋ, shi kɛ́ wɔnu shishi jogbaŋŋ lɛ, wɔtsakeɔ nibii ni wɔheɔ wɔyeɔ lɛ ekomɛi.
5. Wɔhiɔ shi yɛ wɔgbɛ́i lɛ naa
Mɛni hewɔ wɔŋɔ gbɛ́i ni ji Yehowa Odasefoi lɛ wɔfɔ̃ wɔnɔ lɛ? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛni hewɔ gbɛ́i ni ji Yehowa Odasefoi lɛ sa waa lɛ?
Mɛni hewɔ Yehowa ehala gbɔmɛi akɛ edasefoi lɛ? Akɛni agbɛ ehe amalei ashwã hewɔ lɛ, edasefoi lɛ baahã mɛi ale akɛ lɛ ji anɔkwa Nyɔŋmɔ lɛ. Naa amalei nɛɛ ateŋ enyɔ pɛ.
Jamɔi komɛi tsɔɔ amɛmli bii lɛ akɛ, Nyɔŋmɔ miisumɔ ni amɛtsɔ amagai loo mfonirii anɔ amɛjá lɛ. Ani eji anɔkwale? Nyɛkanea 3 Mose 26:1 lɛ, ni nyɛsusua sanebimɔi nɛɛ ahe:
-
Mɛɛ anɔkwale yɔɔ ŋmalɛ nɛɛ mli? Te Yehowa naa amagajamɔ ehãa tɛŋŋ?
Osɔfoi komɛi tsɔɔ akɛ Yesu ji Nyɔŋmɔ. Ani eji anɔkwale? Nyɛkanea Yohane 20:17 lɛ, ni nyɛsusua sanebimɔi nɛɛ ahe:
-
Mɛɛ anɔkwale yɔɔ ŋmalɛ nɛɛ mli? Ani Nyɔŋmɔ nɔŋŋ ji Yesu?
-
Yehowa etsu e-Dasefoi lɛ koni amɛyagba mɛi anɔkwalei ni kɔɔ lɛ kɛ e-Bi lɛ he, te no hãa onuɔ he ohãa tɛŋŋ?
6. Wɔsumɔsumɔɔ wɔhe
Biblia lɛ kɛɛ esa akɛ Kristofoi afee ekome, tamɔ bɔ ni adesa gbɔmɔtso lɛ henii lɛ feɔ ekome kɛtsuɔ nii lɛ. Nyɛkanea 1 Korintobii 12:25, 26 lɛ, ni nyɛsusua sanebimɔi nɛɛ ahe:
-
Mɛni esa akɛ mɛi ni ji Kristofoi diɛŋtsɛ lɛ afee kɛ́ amɛnyɛmimɛi Kristofoi lɛ miina nɔ?
-
Mɛni ona yɛ bɔ ni Yehowa Odasefoi jieɔ suɔmɔ kpo yɛ amɛteŋ lɛ he?
Kɛ́ Yehowa Odasefoi miina nɔ yɛ maŋ ko nɔ lɛ, Odasefoi ni yɔɔ jeŋ fɛɛ lɛ bɔɔ mɔdɛŋ ni amɛye amɛbua amɛ oya nɔŋŋ. Naa ehe nɔkwɛmɔnɔ ko. Jiemɔ VIDIO lɛ. No sɛɛ lɛ, nyɛsusua sanebimɔ ni nyiɛ sɛɛ nɛɛ he.
-
Mɛɛ gbɛ nɔ nibii ni Yehowa Odasefoi feɔ kɛwaa mɛi ni oshãra enina amɛ lɛ hãa anaa akɛ amɛyɛ suɔmɔ?
Mɛi ni ji Kristofoi diɛŋtsɛ lɛ jieɔ suɔmɔ kpo amɛtsɔɔ mɛi ni ehia amɛ lɛ
MƐI KOMƐI KƐƆ AKƐ: “Yehowa Odasefoi ajamɔ lɛ ba etsɛko.”
-
Kɛjɛ mɛɛ be Yehowa bɔi ejálɔi lɛ tsɛmɔ akɛ edasefoi?
EMLI OTI
Yehowa Odasefoi ji Kristofoi diɛŋtsɛ. Wɔji Kristofoi ni efee ekome akɛ weku ni yɔɔ jeŋ fɛɛ, wɔhãa Biblia lɛ kudɔɔ nibii ni wɔheɔ wɔyeɔ lɛ, ni wɔgbaa mɛi Yehowa he anɔkwalei.
Mɛni Okase?
-
Mɛni hewɔ wɔŋɔ gbɛ́i ni ji Yehowa Odasefoi lɛ wɔfɔ̃ wɔnɔ lɛ?
-
Te wɔkɛ wɔhe yeɔ wɔhãa tɛŋŋ?
-
Kɛ́ okwɛ lɛ, Yehowa Odasefoi ji Kristofoi diɛŋtsɛ?
EHE SAJI KROKOMƐI
Obaale wɔyinɔsane he nibii pii.
Yehowa Odasefoi—Wɔhemɔkɛyeli Lɛ Hiɛ Kã, Fã 1: Wɔje Duŋ Mli (1:00:53)
Obaana bɔ ni Yehowa Odasefoi ekpa amale tsɔɔmɔi komɛi ahe mama.
Obaaná saji komɛi ni ekolɛ obiɔ yɛ Yehowa Odasefoi ahe lɛ ahetoo.
“Saji ni Kɔɔ Yehowa Odasefoi Ahe ni Mɛi Fɔɔ Bimɔ” (eyɛ jw.org lɛ nɔ)
Stephen he tsɛ̃ɔ mɛi ni esoro amɛhewolonɔ su lɛ aahu akɛ, etutuaa amɛ. Obaana nɔ ni ena yɛ Yehowa Odasefoi lɛ ahe ni hã etsake.
a Kɛjɛ afi 1879 kɛbashi ŋmɛnɛ lɛ, Yehowa Odasefoi etee nɔ amɛfee magazin ni ji Buu-Mɔɔ lɛ, kɛgbála nɔ ni Biblia lɛ kɛɔ lɛ mli.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
