ƝAAKWƐLƐI 19

Zehova ŋɔ Kəlaɠaa kaa mɔɔn a Kilistalea leeleeɠaa ?

NWOO MƐN

Kuɔi a Zehova ŋɔ Kəlaɠaa ku laana kpɔ a neelee kuɔ ma ku kaa a kilistalea leeleeɠaa. Lə mɛni ɓa ku laa tii na ? Mɛni kpea-kpea haaɓa ŋɛi maamɛni ɓa : Yii ku wɔ laanalaa kɔwɔ hwilɛnŋaa mɛi, ku laa ŋɛi a kwa kalan dakpɛliɠaa ku kulɔbɔ kɛ, ə lɛɛ nwɛlikɛmaalaa gaa ku lowai.

1. Lə ɓə Zehova ŋɔ Kəlaɠaa di wɔ laanalaa kɔwɔ hwilɛnŋaa mɛi ?

Zesu ə kɛ ma : “ [Yálá] laawoo kaa a teɲa ” (Ɉaan 17:17). Yɛ pələi lɔ Zesu ə kɛi gɛ la, Zehova ŋɔ Kəlaɠaa da di wɔ kalan-nwooɠaa həɠə Biblə hu a lowai kəlee. Gu gɔɔmaa həɠə Zehova ŋɔ Kəlaɠaa di wɔ pɔlɔkiliinŋaa ɓa, diɛi di kɛi kɛ diɛ toloo Biblə maakwɛlinua. Gwəlan 1870 tənən ma, nu kpulu logolo ta yii ɉu nua di kɛi Biblə kalan gbɔ a di nwanai, di kɛi Biblə maakwɛli ə gɛ yii kpɔ Biblə a galan diɛ pɛli gɔlɔn ɉii. Di kɛi di wɔ laanalaa kɔwɔ hwilɛn Biblə mɛi, ə ma kɛ yii Biblə a mo da yii kalanŋaa di kɛi mo ho kɛi li gee pɔ. Yili pulu teɲaɠaa di kɛi maakwɛli Biblə hu di kɛi li diɛ mo nu takpɛliɠaa a diɛ.

2. Lə mɛni ɓa ku ku laa hee a Zehova ŋɔ Kəlaɠaa ?

Zehova a kɛ matoo nua diɛ ŋɔ kəlaɠaa maahɔlɔɓo da kɛ teɲa hukulɔi yɛ hwilɛn na ma (Hebreu 11:4–12:1). Gwa gɔɔmaa həɠə, Yálá ə wɔlɔ kɛ ŋɔ nu huwui ɓa “ ŋɔ Kəlaɠaa ɓaa kaa ” (Esai 43:10 ɓo). Ə lɛɛ nwɔnɔ Biblə a kɛ Zesu ɓa “ Kəlai a kulɔ nwoo ɓa ” (Kulɔ ponoŋa hɛɓɛ 1:5). Yili ɓa 1931, ku ku laa hee a Zehova ŋɔ Kəlaɠaa. Ku laa tii a ku kwəinɛɛ kpɔ kɛnɛ.

3. Zehova ŋɔ Kəlaɠaa da Zesu ŋɔ wɛlikɛmaalaa pɔɔkɔɔn nəi ?

Zesu ə kɛi ŋɔ kalan nea wɛlilakɛ kpɔ kɛnɛ yɛ di kaa lɔ yɛ da diɛ ni da kɛ a pɛlɛ tɔnɔ mu nua (Markə 3:35 ɓo). Bələ lɔ ɓə gaa la Zehova ŋɔ Kəlaɠaa yee lɔ gee, ə lɛɛ di kaa lɔ yɛ pɛlɛ tɔnɔ mu nua lɔi mɛi naa kəlee. Yili ɓə a gɛ kwa kɛ ku kee ni diɛ nan non (Filemɔn 1 , 2 , 17). Kwa niɛwoo ŋɛi pɔ túwɔ́ ɓo nwɔnɔ yai kɛi ma : “ Ka ka nan nonnii wɛlilakɛ ” (Piɛrə dɔlɔɔ 2:17). Zehova kəlaɠaa da nwɛlikɛmaa tii lɛ a kpaalə tamaa, gwa gɔɔmaa həɠə kwa kɛ kpɔnmaa tɛɛ ku nan nonnii pɔ lɔi mɛi naa kəlee diɛi di kaa kpaan ɉu.

Ə́ WƆ MƐNIKƆLƆNŊAA TA PƐLƐ MA

Ə́ wɔ mɛnikɔlɔnŋaa ta pɛlɛ ma, yɛ hwilɛn Zehova ŋɔ Kəlaɠaa di wɔ pɔlɔ kilinŋaa ɓa. Ə lɛɛ ə́ mɛni takpɛliɠaa kaa yii a nɛ yɛ ma ku kaa a kilistalea leeleeɠaa.

Kilistalea leeleeɠaa di wɔ laanalaa kɔwɔ hwilɛnŋaa Biblə mɛi, ə lɛɛ da di wɔ laanalaa hukulɔ nu takpɛliɠaa diɛ

4. Ku wɔ laanalaa kɔwɔ hwilɛnŋaa Biblə mɛi

Zehova ə nɛɛ tɔwɔ ə mo yɛ ma mɛnikɔlɔnŋaa yii vilɛnŋaa Biblə ɓa da kaa pai kɛ pɛlɛi ma kpɔ kɛnɛ. Daniɛlə 12:4 ɓo, ə lɛɛ ka lono kɛ gɛɛmaalən ŋɛi mɛi :

Zehova ŋɔ kólókɛnua da lɛɛ lɔ kɛ ma diɛ Biblə kalan, lə ɓə kɛ da a pɛlɛ ma di yəi ?

Kpulu ta yii ɉu mun dɔnɔ laa ɓaa kɛ Charles Russell, gaa pələi ɉu nua di pɛli Biblə maakwɛlii la. VIDIO kaa, ə lɛɛ ka lono kɛ gɛɛmaalən ŋɛi mɛi.

VIDIO : Daa pənə daa kulɔ Biblə ŋɔ teɲaɠaa ɓa (7:45)

Vidio hu, kpaalə ləkɛɛ ɓə Charles Russell da məlaa di kɛi Biblə kalan na ?

Ə́ kili kaa ɉu ?

Mɛniɠaa ku laa kɛ na a kɛ a lowai taɠaa kuɔ daɠaa maahwalən. Lə mɛni ɓa kwa kɛ gɛi tii ? Pələi lɔ yələ a kɛi bɔ la kɛɛpono ta a kɛ pɛlɛɛ ma a bɛlɛɛ-pɛlɛɛ, guɔ gu kwɛlɛ hɛnŋaa kaa a nɛlɛɛ, pələ lɔ ɓə Yálá a kɛ gu wɔ mɛnikɔlɔnŋaa ta pɛlɛi la ma a bɛlɛɛ-pɛlɛɛ yɛ hwilɛn na Nawoo ɓa (Hanwon 4:18 ɓo). Biblə nwɛi maa hwa hwalən, yili ɓa ku kaa lɔ kɛi ku wɔ mɛnikɔlɔnŋaa ta pɛlɛi ma yɛ hwilɛn na Biblə ɓa kuɔ mɛniɠaa maahwalən ku wɔ laanalaa hu.

5. Kwa teɲa kalan yɛ hwilɛn na Zehova ɓa

Lə mɛni ɓa ku ku laa hee a Zehova ŋɔ Kəlaɠaa ? VIDIO kaa, ə lɛɛ ka lono kɛ gɛɛmaalən ŋɛi mɛi.

VIDIO : Ku laa a ku kɛ kóló lɛ (2:40)

Naa ŋɛi kuɔ diɛ kɛ ma Zehova ŋɔ Kəlaɠaa lə mɛni ɓa bɛliɛ ɉu ?

Lə mɛni ɓa Zehova ə nua həɠə ɉu ə gɛ di kɛ a ŋɔ Kəlaɠaa ? Yálá ə gɛ tii ə gɛ di teɲa ɓo yɛ hwilɛn na ma, maahɔlɔɓo, daa lɛɛ tamaa kɛ yɛ hwilɛn na Yálá ɓa. Gu nɛɛɠaa tii veelɛ kaa.

Kalan daɠaa da kɛ moi diɛ kɛ ma Yálá kaa bɔ guɔ matoo a manininŋaa. Ɉáláá hɛɓɛ 26:1 ɓo, ə lɛɛ ka lono kɛ gɛɛmaalənŋaa ŋɛi mɛi :

Teɲa ləkɛɛ ɓə gaa vɛlisɛɛ ŋɛi hu ? Zehova a giliŋahiɛ ləi yɛ hwilɛn na maaninin ɉaɠaaɠaa diɛ ?

Kalan ɲɛitɔwɔnua taɠaa da kɛ kɛi ma Zesu kaa a Yálá. Ɉaan 20:17 ɓo, ə lɛɛ ka lono kɛ gɛɛmaalənŋaa ŋɛi mɛi :

Teɲa ləkɛɛ ɓə gaa vɛlisɛɛ ŋɛi hu ? Yálá da Zesu di kaa mɔɔn a nu tɔnɔ ?
Zehova aa ŋɔ Kəlaɠaa tɛɛ yii yaan di teɲa kalan yɛ hwilɛn na yaa da non diɛ. Ya kɛ a yili kɔlɔnŋaa tii lə ɓə yili a gɛ yɛ́ ?

6. Kwa ku kee ni wɛlilakɛ

Biblə a kilistalea kɔɔn kɔlɔ dɔɔ-tɔɔɠaa ɓa. Korɛntə dɔlɔɔ 12:25, 26 ɓo, ə lɛɛ ka lono kɛ gɛɛmaalənŋaa mɛi :

Lə ɓə kilistalea leeleeɠaa da gɛ ɓɛlowai di ɓəlaa kalan nea da kɛ mɔnɔ mii la ?
Pələi Zehova ŋɔ Kəlaɠaa da wɛlikɛmaalaa lɛ la di kee ni diɛ, lə ɓə yaa gaa yɛ hwilɛn na yili ɓa ?

Zehova ŋɔ Kəlaɠaa da kɛi mɔnɔ mii kɛɛnaa ta, Zehova ŋɔ Kəlaɠaa lɔi mɛi kɛɛnaa takpɛliɠaa da di muhəɠə kpɔnmaa tɛɛ mɛni ɓa di pɔ. VIDIO kaa, ə lɛɛ ka lono kɛ gɛɛmaalən ŋɛi mɛi.

VIDIO : Vaŋa hilɛ kɛnɛɛ ŋɛi da kɛ ma Matthew, Haiti nua di mɔnɔ mii ɲəi (5:29)

Kpɔnmaa Zehova ŋɔ Kəlaɠaa da kɛ dɛɛi di kee ni pɔ yili a di wɔ wɛlikɛmaalaa lɛ ləi ?

Wɛlikɛmaa a gɛ kilistalea leeleeɠaa di kpɔnmaa tɛɛ nua mɔnɔ mii di pɔ

NUTAƓAA DA KƐ KƐI MA : “ Zehova ŋɔ Kəlaɠaa di wɔ kalan kaa a kalan ninɛ. ”

Lowai ləkɛɛ ɓə Zehova ə gɔwɔtɔɔ la yɛ kɛ matoonua diɛ ŋɔ Kəlaɠaa ?

YII GU GALAN

Zehova ŋɔ Kəlaɠaa kaa a kilistalea leeleeɠaa. Ku kaa lɔ yɛ pɛlɛ tɔnɔ mu nua, ku wɔ laanalaa kɔwɔ hwilɛnŋaa Biblə mɛi, ə lɛɛ ku wɔ Zehova maa teɲa kalan nua diɛ.