NUPINPLỌN 19
Be Kunnudetọ Jehovah Tọn lẹ Yin Klistiani Nugbo lẹ Ya?
Míwu Kunnudetọ Jehovah tọn lẹ yise dọ Klistiani nugbo lẹ wẹ mí yin. Etẹwutu? Pọ́n dodonu he ji nuyise mítọn lẹ sinai do, yinkọ mítọn he hẹn mí gbọnvo, gọna owanyi he mí tindo na ode awetọ.
1. Dodonu tẹ ji wẹ nuyise Kunnudetọ Jehovah tọn lẹ tọn sinai do?
Jesu dọmọ: “Ohó [Jiwheyẹwhe tọn] wẹ nugbo.” (Johanu 17:17) Taidi Jesu, Kunnudetọ Jehovah tọn lẹ nọ ze nuyise yetọn lẹ sinai do Ohó Jiwheyẹwhe tọn ji to whepoponu. Lẹnnupọndo whenuho mítọn egbezangbe tọn ji. To nudi owhe 1870, pipli Biblu Plọntọ lẹ tọn de yí sọwhiwhe do jẹ dogbapọnna Biblu ji. Yé nọ ze nuyise yetọn lẹ sinai do nuhe Biblu dọ lẹ ji, dile etlẹ yindọ nuyise enẹlẹ gbọnvona nuplọnmẹ sinsẹ̀n devo lẹ tọn. Enẹgodo, yé jẹ nugbo Biblu tọn he yé plọn lẹ má hẹ mẹdevo lẹ ji. a
2. Naegbọn mí do nọ ylọ míde dọ Kunnudetọ Jehovah tọn lẹ?
Jehovah nọ ylọ sinsẹ̀n-basitọ etọn lẹ dọ kunnudetọ etọn lẹ, na yé nọ dọ nugbo gando ewọ go wutu. (Heblu lẹ 11:4–12:1) Di apajlẹ, Jiwheyẹwhe dọna omẹ etọn lẹ to hohowhenu dọ: “Mìwlẹ wẹ kunnudetọ ṣie lẹ.” (Hia Isaia 43:10.) Jesu yin yiylọdọ “Kunnudetọ Nugbonọ lọ.” (Osọhia 1:5) Enẹwutu, to 1931 mí kẹalọyi yinkọ lọ Kunnudetọ Jehovah tọn lẹ. E nọ vivi na mí taun nado tindo oyín enẹ to ota.
3. Nawẹ Kunnudetọ Jehovah tọn lẹ nọ do owanyi hia taidi Jesu gbọn?
Jesu yiwanna devi etọn lẹ sọmọ bọ yé taidi whẹndo etọn. (Hia Malku 3:35.) Mọdopolọ, Kunnudetọ Jehovah tọn lẹ yin whẹndo he to kọndopọ mẹ lẹdo aihọn pé de. Enẹ wẹ zọ́n bọ mí nọ ylọ ode awetọ mítọn dọ mẹmẹsunnu po mẹmẹyọnnu po. (Filemọni 1, 2) Mí sọ nọ setonuna gbedide lọ he dọmọ: “Mì tindo owanyi na pipli mẹmẹsunnu lẹ tọn pete.” (1 Pita 2:17) Kunnudetọ Jehovah tọn lẹ nọ do owanyi enẹ hia to aliho susu mẹ, taidi alọgigọna yisenọ hatọ mítọn lẹ lẹdo aihọn pé to ojlẹ nuhudo tọn lẹ mẹ.
DINDONANU DOGỌ
Yí sọwhiwhe do gbadopọnna whenuho Kunnudetọ Jehovah tọn lẹ tọn, bo pọ́n kunnudenu devo lẹ he dohia dọ Klistiani nugbo lẹ wẹ mí yin.
Klistiani nugbo lẹ nọ ze nuyise yetọn lẹ sinai do Biblu ji bo nọ má yé hẹ mẹdevo lẹ
4. Biblu ji wẹ mí nọ ze nuyise mítọn lẹ sinai do
Jehovah ko dọ jẹnukọn dọ nugbo Biblu tọn lẹ na wá họnwun dogọ to nukọn mẹ. Hia Daniẹli 12:4, po nudọnamẹ odò tọn po, enẹgodo dọhodo kanbiọ ehe ji:
-
Etẹwẹ na “lẹzun susugege” to omẹ Jiwheyẹwhe tọn lẹ ṣẹnṣẹn dile yé na zindonukọn nado to dogbapọnna Biblu po sọwhiwhe po?
Pọ́n lehe pipli Biblu plọntọ lẹ tọn de, he mẹ Charles Russell tin te gbadopọnna Ohó Jiwheyẹwhe tọn do. Hò VIDEO lọ, enẹgodo dọhodo kanbiọ he bọdego ji.
-
To video lọ mẹ, nawẹ Charles Russell po Biblu Plọntọ hatọ etọn lẹ po nọ plọn Biblu gbọn?
Be a yọnẹn ya?
To ojlẹ delẹ mẹ, mí ko vọ́ delẹ to nuyise mítọn lẹ mẹ jlado. Etẹwutu? Kẹdẹdile nuhe to aigba ji lẹ nọ to wunhọ́n vudevude dile owhè to zizẹ do, mọ wẹ Jiwheyẹwhe nọ gọalọna mí nado to nukunnumọjẹ Ohó etọn mẹ vudevude do niyẹn. (Hia Howhinwhẹn lẹ 4:18.) Enẹwutu, dile etlẹ yindọ Biblu ma nọ diọ, mí nọ diọ nuyise mítọn dile nukunnumọjẹnumẹ he mí tindo gando Biblu go to wunhọ́n dogọ do.
5. Mí nọ yinuwa sọgbe hẹ yinkọ he mí tindo to ota
Naegbọn mí do kẹalọyi yinkọ lọ Kunnudetọ Jehovah tọn lẹ? Hò VIDEO lọ, enẹgodo dọhodo kanbiọ he bọdego ji.
-
Naegbọn yinkọ lọ Kunnudetọ Jehovah tọn lẹ do jẹna mí?
Naegbọn Jehovah do de mẹdelẹ nado yin kunnudetọ etọn lẹ? E wàmọ, na omẹ enẹlẹ nido nọ do ewọ hia taidi Jiwheyẹwhe nugbo lọ, na lalo susu wẹ ko yin dido dokọna ẹn wutu. Pọ́n awe poun to lalo enẹlẹ mẹ.
Sinsẹ̀n delẹ nọ plọn sinsẹ̀nvi yetọn lẹ dọ Jiwheyẹwhe jlo dọ yé ni nọ yí yẹdide lẹ zan to sinsẹ̀n-bibasi yetọn mẹ. Be nugbo wẹ enẹ ya? Hia Levitiku 26:1, enẹgodo dọhodo kanbiọ ehelẹ ji:
-
Etẹwẹ yin nugbo lọ? Numọtolanmẹ tẹwẹ Jehovah nọ tindo gando boṣiọ lẹ go?
Sinsẹ̀ngán delẹ nọ plọnmẹ dọ Jesu wẹ yin Jiwheyẹwhe. Be nugbo wẹ enẹ ya? Hia Johanu 20:17, enẹgodo dọhodo kanbiọ ehelẹ ji:
-
Etẹwẹ yin nugbo lọ? Be Jiwheyẹwhe po Jesu po yin omẹ dopolọ lẹ wẹ ya?
-
Numọtolanmẹ tẹwẹ a tindo todin he a ko wá yọnẹn dọ Jehovah do Kunnudetọ etọn lẹ hlan nado lá nugbo gando ewọ po Visunnu etọn po go?
6. Mí nọ yiwanna ode awetọ
Biblu dọ dọ Klistiani lẹ dona nọ nọpọ́ kẹdẹdile awutugonu mítọn lẹ nọ nọpọ́ do. Hia 1 Kọlintinu lẹ 12:25, 26, enẹgodo dọhodo kanbiọ ehelẹ ji:
-
Nawẹ Klistiani nugbo lẹ dona nọ yinuwa gbọn to whenue Klistiani devo lẹ to yaji?
-
Etẹ go wẹ a doayi gando owanyi he tin to omẹ Jehovah tọn lẹ ṣẹnṣẹn go?
Eyin Kunnudetọ Jehovah tọn lẹ to yaji to awà aigba tọn de ji, Kunnudetọ hatọ lẹ lẹdo aihọn pé wẹ nọ wá alọgọ na yé to afọdopolọji. Nado mọ apajlẹ dopo, hò VIDEO lọ. Enẹgodo dọhodo kanbiọ he bọdego ji.
-
Nawẹ alọgọ kọgbọ tọn Kunnudetọ Jehovah tọn lẹ tọn do owanyi he yé tindo na ode awetọ hia gbọn?
Klistiani nugbo lẹ nọ do owanyi hia mẹhe to nuhudo mẹ lẹ
MẸDELẸ NỌ DỌ DỌ: “Sinsẹ̀n yọyọ de poun wẹ Kunnudetọ Jehovah tọn lẹ yin.”
-
Whetẹnu gbọ́n wẹ Jehovah ko nọ ylọ sinsẹ̀n-basitọ etọn lẹ dọ kunnudetọ lẹ?
BLADOPỌ
Klistiani nugbo lẹ wẹ Kunnudetọ Jehovah tọn lẹ yin. Whẹndo mẹmẹsunnu po mẹmẹyọnnu po tọn de wẹ mí yin lẹdo aihọn pé, bo nọ ze nuyise mítọn lẹ sinai do Biblu ji, podọ mí nọ lá nugbo lọ gando Jehovah go.
Dogbapọn
-
Naegbọn mí do kẹalọyi yinkọ lọ Kunnudetọ Jehovah tọn lẹ?
-
Nawẹ mí nọ yinuwa hẹ ode awetọ gbọn?
-
Naegbọn a do lẹndọ Kunnudetọ Jehovah tọn lẹ yin Klistiani nugbo lẹ?
PỌ́N NUDỌNAMẸ DEVO LẸ
Gbadopọnna whenuho mítọn yinukọn dogọ.
Kunnudetọ Jehovah Tọn Lẹ—Azọ́n Yise Tọn Lẹ, Apá 1: Tintọ́n sọn Zinvlu Mẹ (1:00:53)
Pọ́n apajlẹ de nado mọ lehe Kunnudetọ Jehovah tọn lẹ ko de nuplọnmẹ lalo lẹ gbà do.
Dín gblọndo na kanbiọ delẹ he a sọgan kanse gando Kunnudetọ Jehovah tọn lẹ go.
“Kanbiọ He Mẹsusu Nọ Kanse Gando Kunnudetọ Jehovah Tọn lẹ Go Lẹ” (Adà Intẹnẹt ji tọn)
Stephen doalọ to sẹ́nhẹngba susu mẹ, na e nọ ṣinyan akọ̀ wutu. Pọ́n nuhe e mọ to Kunnudetọ Jehovah tọn lẹ dè, ehe gọalọna ẹn nado diọ.
“Gbẹzan Ṣie Fọ́n bo to Yinylan Deji” (Atọ̀họ̀-Nuhihọ́ lọ Tọn, juillet-septembre 2015 tọn)
a Linlinwe tangan mítọn, Atọ̀họ̀-Nuhihọ́ lọ Tọn, he ko to yinyin zinzinjẹgbonu sọn 1879 gbọ́n nọ plọnmẹ nugbo Biblu tọn lẹ po gbesisọ po.
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Tito Biblu Pinplọn Tọn Tẹwẹ Kunnudetọ Jehovah Tọn lẹ Do?
Vọnu wẹ tito Biblu pinplọn tọn Kunnudetọ Jehovah tọn lẹ tọn, podọ a gán zan lẹdogbedevomẹ Biblu tọn depope. Voawu nado ylọ whẹndo towe blebu po họntọn towe depope po wá nupinplọn lọ tẹnmẹ.
