KUKWE JA TÖTIKARA 19
¿Nitre testiko Jehovakwe ye kristiano metre?
Nun testiko Jehovakwe nun kristiano metre ruin nunye. ¿Ñobätä? Nunta dre mike täte, nun kädekata ño aune nunta ja tare bämike ño jai kwärikwäri ye ani mike gare jai.
1. ¿Ni testiko Jehovakwe tä kukwe mike täte ye kite medenkri?
Jesukwe niebare Ngöböi: “mä kukwei ye metre” (Juan 17:17, TNM). Jesukwe dre nuainbare ye erere nun testiko Jehovakwe tä nuainne: nunta kukwe Bibliabätä mike täte. Nitre testiko Jehovakwe nengwane jatani ño kena ye mike gare jai. Kä 1870 ye ngrabare, nitre braibe jatani ja tötike nguseta kukwe Ngöbökwe yebätä. Iglesia nämäne kukwe mada driere, akwa yebiti ta niaratre jatani kukwe nie nämäne Bibliabätä ye mike täte. Aune kukwe metre kwani ietre ye niaratre jatani driere ni madai. a
2. ¿Ñobätä nunta ja kädekete testiko Jehovakwe?
Nitre tä Jehová mike täte ye testiko kwe nieta kwe, ñobätä ñan aune tä kukwe metre niarabätä mike gare (Hebreos 11:4-12:1, TNM). Ñodre, kira Ngöbökwe niebare juta kwe ie: “Mun testiko tikwe” (mäkwe ñäkä Isaías 43:10 yebätä). Aune Jesús ie “Testiko ja ngwanka metre” nieta (Apocalipsis 1:5, TNM). Ye medenbätä, kä 1931 nunkwe ja kädekani testiko Jehovakwe. Nunkwe ja kädekani kore ye käi juto nunbätä.
3. ¿Nitre testiko Jehovakwe tä ja tare bämike ño Jesús erere?
Jesús nämäne nitre ja tötikaka kwe tarere krubäte, aisete niaratre nämäne tuin ie mräkä jeñe kwe ye kwrere (mäkwe ñäkä Marcos 3:35 yebätä). Nun testiko Jehovakwe tä keteitibe ni ja mräkäre kwrere kä jökräbiti. Yebätä nunta “eteba” aune “ngwai” niere jai kwärikwäri (Filemón 1, 2). Ne madakäre, “munkwe ja mräkätre jökrä taredre” niebare ye nunta mike täte (1 Pedro 2:17, TNM). Nun testiko Jehovakwe tä ja tarere kwärikwäri ye nunta bämike kukwe keta kabrebiti, keteiti abokän ja mräkätre kä mada känti tä ja tuin kukwe tare ben ngwane, nunta dimike.
JA TÖTIKE BÄRI NGUSETA
Nitre testiko Jehovakwe mike gare bäri kwin jai aune kukwe ruäre tä mike gare metre nun abokän kristiano metre ye mike gare jai.
Ni kristiano metre tä kukwe Bibliabätä mike täte aune tä blitebätä nitre madabe.
4. Nunta kukwe Bibliabätä mike täte
Jehovakwe mikani gare, kukwe metre Bibliabätä ye rükai gare bäri kwin. Ñäkädre Daniel 12:4 yebätä aune kukwe ne kädriedre jabe:
-
Ni Ngöbö mikaka täte ja tötikai jankunu Bibliabätä ngwane, ¿dre ririai bäri?
Nitre braibe nämäne ja tötike ño Bibliabätä abokän ngätäite Charles Russell nämäne ye mike ñärärä. VIDEO mikadre ñärärä, biti kukwe ne kädriedre jabe:
-
¿Charles Russell aune nitre ja tötikaka Bibliabätä ye nämäne ja tötike ño Ngöbö kukweibätä?
¿Ne gare mäi?
Kukwe mikata täte nunkwe ye ruäre tuaninte aune ükaninte. ¿Ñobätä? Kätä kite ngwen ngwane, kiakia kätä kite tuen kwin, ye erere Ngöböta kiakia jatäri kukwe jakwe mike nüke gare bäri kwin nunye (mäkwe ñäkä Proverbios 4:18 yebätä). Kukwe Bibliabätä kwita ñan jene, akwa tä nüke gare bäri kwin nunye ngwane, ye ererebätä kukwe mikata täte nunkwe ye nunta kite ükete.
5. Nunta ja kädeke testiko ye ererebätä nunta ja ngwen
¿Ñobätä nunkwe ja kädekani testiko Jehovakwe? VIDEO mikadre ñärärä, biti kukwe ne kädriedre jabe:
-
¿Nun ja kädekani testiko Jehovakwe ye ñobätä debe?
¿Ñobätä Jehovata nitre denkä testikore jakrä? Ñobätä ñan aune, kukwe keta kabre ngwarbe niebarera niarabätä, aisete nitre ne käkwe kukwe metre niedi Jehová, Ngöbö metre yebätä. Kukwe ngwarbe nieta ye ari ruäre kädriere.
Jondron üai sribebare yebiti Ngöbö tö ja mikamana täte drieta iglesia ruärekwe. ¿Akwa ye metre? Ñäkädre Levítico 26:1 yebätä aune kukwe ne kädriedre jabe:
-
Texto tä niere erere, ¿kukwe meden metre? ¿Jondron üai sribeta yebätä Ngöbö töita ño?
Nitre ji ngwanka iglesiate ye ruäre tä driere, Jesús ye abokän Ngöbö. ¿Akwa ye metre? Ñäkädre Juan 20:17 yebätä, aune kukwe ne kädriedre jabe:
-
Texto tä niere erere, ¿kukwe meden metre? ¿Ngöbö ye arabe Jesús?
-
¿Jehovata testiko jakwe juen kukwe metre mike gare jabätä aune Monso kwebätä ye tuin ño mäi?
6. Nunta ja tarere kwärikwäri
Biblia tä nitre kristiano kete ni ngrabare kiakia yebätä. Ñäkädre 1 Corintios 12:25, 26 yebätä aune kukwe ne kädriedre jabe:
-
Ni kristiano iti tä ja tare nike ngwane, ¿nitre kristiano mada käkwe dre nuaindre?
-
¿Ni testiko Jehovakwe tä ja tare bämike ño jai?
Ni testiko Jehovakwe kä keteiti känti tä ja tare nike ngwane, mräkätre kä jökräbiti tibien tä jötrö ngwarbe dimike. Mikakäre gare keteiti jai, VIDEO mikadre ñärärä, biti kukwe ne kädriedre jabe:
-
¿Nitre testiko Jehovakwe tä ja dimike kwärikwäri yebiti tätre ja tare bämike? ¿Ñobätä?
Nire tä ja di ribere ye ie ni kristiano metre tä ja tare bämike.
NITRE RUÄRE TÄ KUKWE NE NIERE: “Nitre testiko Jehovakwe ye abokän religión bitinkä”.
-
¿Ñongwane Jehová jatani nitre niara mikaka täte ye kädeke “testiko jakwe”?
¿DRE NIBI GARE MÄI?
Nun testiko Jehovakwe, nun abokän kristiano metre. Nunta kä jökräbiti tibien ni ja mräkäre erere Ngöbö mike täte gwairebe, kukwe Bibliabätä ye mikata täte nunkwe aune kukwe metre Jehovabätä ye nunta mike gare.
Ngwankäreta törö
-
¿Ñobätä nunta ja kädeke testiko Jehovakwe?
-
¿Nunta ja tarere kwärikwäri ye nunta bämike ño?
-
¿Ni testiko Jehovakwe ye kristiano metre ruin mäi?
KUKWE MIKE GARE BÄRI JAI
Nun mike gare bäri kwin jai.
Ni testiko Jehovakwe tödekaka metre. Kukwe kena: Ñan niena kä ikote (1:00:53)
Kukwe ngwarbe drieta abokänbätä nitre testiko Jehovakwe tä ni mike mokre ye mike gare keteiti jai.
Mäta kukwe ngwentari jai nitre testiko Jehovakwe yebätä ngwane, mike gare ruäre jai.
“Kukwe ngwantarita bäri nitre testiko Jehovakwe yebätä” (Sección jw.org)
Stephen brukwä nämäne yebätä kukwe käme nuainbare kwe. Dre namani gare ie nitre testiko Jehovakwe yebätä käkwe töi kwitani ye mike gare jai.
“Ti jataba ja ngwen bäri käme” (Ni Mikaka Mokre, 1 julio 2015)
a Kä 1879 yete ja käne täräkwata Ni Mikaka Mokre ye sribe jatani aune sribe täbe nükebe nengwane.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
