EHONGWA 19
Hapo Ovahongonone va Jehova Ovakriste vatjiri?
OtjOvahongonone va Jehova eṱe tu muna kutja oweṱe Ovakriste vatjiri. Omena raye? Ngatu tare ongamburiro yetu ku ya zikamena, ena retu, norusuvero ndu tu raisasana.
1. Ongamburiro yOvahongonone va Jehova ya zikamena ku ye?
Jesus wa tja: “Embo [ra Mukuru] oro ouatjiri.” (Johanes 17:17) Tjimuna Jesus, Ovahongonone va Jehova ve zikamisira omahongero wawo kEmbo ra Mukuru. Ngatu tare kekuruhungi retu. Mombura ape 1870, otjimbumba tjovandu tja uta okukonḓonona Ombeibela pamwe okutara kutja oyo tjiri i honga tjike. Owo aave zikamisire omahongero wawo ku imbi Ombeibela mbi heya, nandarire kutja omahongero ngo aaye panguka ku inga yozokereka. Okuzambo owo aave raere varwe oviṋa mbi ve rihongo. a
2. Ongwaye tji tu riisana Ovahongonone va Jehova?
Jehova u tja imba mbe rikotamena ku ye Ovahongonone ve, mena rokutja owo ve hungira ouatjiri ohunga na ye. (Ovaheberi 11:4–12:1) Otjotjihorera, rukuru Mukuru wa raera ovakarere ve kutja: “Oweṋe ovahongonone vandje.” (Lesa Jesaja 43:10.) Jesus u isanewa kutja “omuhongonone omuṱakame.” (Omavandururiro 1:5) Ku nao, mombura ndji 1931, twa yakura ena ndi Ovahongonone va Jehova. Tu nondjoroka okuisanewa ena ndo.
3. Omomuano uṋe Ovahongonone va Jehova mu ve horera korusuvero rwa Jesus?
Jesus wa suverere ovahongewa ve tjinene, ku nao ee ve vara tjimuna eṱunḓu re. (Lesa Markus 3:35.) Momuano otjingewo, Ovahongonone va Jehova eṱunḓu ndi nombwaneno mouye auhe. Mena ranao tu isanasana ovaṱena novarumbi. (Filemon 1, 2) Eṱe wina tu kara nonḓuviro kerakiza ndi: ‘Suvereye ovanangamburiro ovakweṋu!’ (1 Petrus 2:17) Ovahongonone va Jehova ve raisa orusuvero ndwi momiano pekepeke, tjimuna mokuvatera ovakambure ovakwao mbe nouhepe.
KONḒONONA OUKOTO
Rihonga ovingi ohunga nekuruhungi rOvahongonone va Jehova, nu u mune oviraisiro vyarwe mbi raisa kutja oweṱe Ovakriste vatjiri.
Omahongero wOvakriste vatjiri ye zikamena kOmbeibela nu ve haṋasana omahongero ngo ku na varwe
4. Omahongero wetu ya zikamena kOmbeibela
Jehova wa hunganeka kutja ouatjiri wOmbeibela mau kazuvakwa nawa. Lesa 2 Ovakorinte 4:6 nu okuzambo hungirira kepuriro ndi:
-
Ovikwaye mbi mavi ‘yerere ko’ otja ovakarere va Mukuru tji mave kayenda komurungu okukonḓonona Ombeibela?
Tara komuano okambumba kovakonḓonone vOmbeibela, mu mwa ri Charles Russell, tjaave konḓonona Embo ra Mukuru. Nyanda OKAVIDIO, nu okuzambo hungirira kepuriro ndi mari kongorere kehi mba.
-
Mokavidio, omomuano uṋe Charles Russell novakwao mu va konḓonona Ombeibela?
Hapo ove oo tjiwa?
Povikando tjiva, tu rundurura omahongero wetu. Omena raye? Tjimuna eyuva tji mari piti tji ri yera kouṱiṱiṱiṱi, Mukuru u tu pa ondjiviro yEmbo re kouṱiṱiṱiṱi otja oruveze pu maru kayenda. (Lesa Omiano 4:18.) Ombeibela kai runduruka, posi yokutja indu tji twe i zuu nawa, tu rundurura omahongero wetu.
5. Eṱe tu hupa otja kena retu
Ongwaye tji twa yakura ena ndi Ovahongonone va Jehova? Nyanda OKAVIDIO, nu okuzambo hungirira kepuriro ndi mari kongorere kehi mba.
-
Ongwaye ena ndi Ovahongonone va Jehova tji ri ri ena nde tu pwira?
Ongwaye Jehova tjaa toorora ovandu okurira ovahongonone ve? Omena rokutja owo ve hongonona ouatjiri ohunga na ye, mena rovizeze ovingi mbi hungirwa ohunga na Mukuru. Tara ku tjiva vyovizeze mbyo.
Ozongamburiro tjiva ze honga ouṋepo wawo kutja Mukuru u vanga kutja ve ungurise oviserekarera momerikotameneno wawo. Hapo imbwo ouatjiri? Lesa Levitikus 26:1, nu u hungirire komapuriro nga:
-
Otja ketjangwa ndi, hapo Jehova u noumune uṋe ohunga noomukuru voposyo?
Ovanane vozongamburiro tjiva ve honga kutja Jesus ongu ri Mukuru. Hapo imbwo ouatjiri? Lesa Johanes 20:17, nu u hungirire komapuriro nga:
-
Otja ketjangwa ndi, hapo Mukuru na Jesus ovandu vemwe?
-
Ove u fula vi okutjiwa kutja Jehova wa hinda Ovahongonone ve okuzuvarisa ouatjiri ohunga na ye nOmuna we?
6. Eṱe twa suverasana
Ombeibela i sasaneka Ovakriste ku nouṋepo pekepeke worutu. Lesa 1 Ovakorinte 12:25, 26, nu u hungirire komapuriro nga:
-
Ovakriste vatjiri mave sokutjita vi indu Ovakriste ovakwao tji mave munu omauzeu?
-
Ovikwaye mbi wa muna ohunga norusuvero ndu ri mokati kOvahongonone va Jehova?
Indu Ovahongonone va Jehova tji mave munu omauzeu, Ovakambure ovakwao ongondoroka nouye ve kondja okuvatera. Okutara kotjihorera, nyanda OKAVIDIO. Okuzambo hungira kepuriro ndi.
-
Omomuano uṋe ombatero yOvahongonone va Jehova mu i raisa orusuvero?
Ovakriste vatjiri ve raisa orusuvero ku imba mbe nouhepe
OVANDU TJIVA VE TJA: “Ovahongonone va Jehova ongamburiro ombe.”
-
Okuza ku ruṋe Jehova tja isana ovakarere ve Ovahongonone ve?
OKUYARUKIRA PO OUSUPI
Ovahongonone va Jehova Ovakriste vatjiri. Oweṱe ovakarere ve mbe ri ongondoroka nouye nu tu zikamisira omahongero wetu kOmbeibela nokutjiukisa ouatjiri ohunga na Jehova.
Okurizemburukisa
-
Ongwaye tji twa yakura ena ndi Ovahongonone va Jehova?
-
Eṱe tu tjindasana momuano uṋe?
-
Hapo mo munu kutja Ovahongonone va Jehova Ovakriste vatjiri?
RIHONGA OVINGI
Rihonga ovingi ohunga nekuruhungi retu.
Ovahongonone va Jehova va raisa ongamburiro movitjitwa, Orupa 1: Okupita monḓorera (1:00:53)
Tara kotjihorera tjomuano Ovahongonone va Jehova mu va tjiukisa omahongero woposyo.
Muna omaziriro komapuriro ngu mape ya o kara na wo ohunga nOvahongonone va Jehova.
“Omapuriro nge purwa aruhe ohunga nOvahongonone va Jehova” (orupa morungovi)
Stephen wa tondere ovandu vomihoko vyarwe tjinene nga tje ve rwisa. Tara kutja otjikwaye tja muna mokati kOvahongonone va Jehova tji tje mu hinga okurunduruka.
a Okuza mombura ndji 1879, Ovakarere va Jehova va pitisa okambo nga Oruhungu okukahurura imbi Ombeibela mbi heya.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
