LEKSION 19
Kurug Kari nga Cristiano i Saksi ira ni Jehova?
Bilang Saksi ira ni Jehova, kumbinsidu kami nga kurug kami nga Cristiano. Ngatta? Ammuan nu sitaw nga nebase i pangurug mi, nu ngatta Saksi ira ni Jehova i nengagan nikami, anna nu kunnasi mi ipasingan i aya mi ta kataggi-tadday.
1. Sitaw nebase i pangurug na Saksi ira ni Jehova?
Kinagi ni Jesus: “I uvovug [na Dios] ay kurug.” (Juan 17:17) Kagitta ni Jesus, nebase i pangurug na Saksi ira ni Jehova ta Uvovug na Dios. Angngariganna, turi ta meka-19 siglo, ginigiammu tu mapia na grupo na estudiante na Biblia nu anni talaga i ituttuddu na Biblia. Nibaseda tatun i pangurugda maski nu neruma yatun ta doktrina na simbahan. Nilayyagayyada gapa ta tanakuan i kinakurug ta Biblia. a
2. Ngatta magalakkami tu Saksi ira ni Jehova?
Agalan ni Jehova tu saksina i maddayaw ira nisa megafu ta ikakkagida i kinakurug meyannung nisa. (Hebreo 11:4–12:1) Angngariganna, ta ollu nga tiempo kinagi na Dios ta totolena: “Sikamu i saksì ira.” (Bibbigan i Isaias 43:10.) Magalan si Jesus tu “i Matalo nga Saksi.” (Nepakannammu 1:5, NW ) Turi ta 1931, inusa mi i ngagan nga Saksi ira ni Jehova, anna magayayya kami nga nengagan nikami yatun.
3. Kunnasi nga parigan na Saksi ira ni Jehova i aya ni Jesus?
Ayatan ni Jesus i disipulona ira yatutta ibilangna ira tu familiana. (Bibbigan i Marcos 3:35.) Kunnatun gapa i kukukuan na Saksi ira ni Jehova ta interu mundo. Yatutta ibilang mi nga wagi i kataggi-tadday. (Filemon 1, 2) Tuttulammi gapa i bilin nga: “Ayatan nu i wawwagi nu ta angngurug.” (1 Pedro 2:17) Nadduruma i pangipasingan na Saksi ira ni Jehova taw nga aya, kagitta na panguffudda ta kapangngurugda ira ta interu mundo.
GIGIAMMUAN I ARU PAGA
Gigiammuan i historia na Saksi ira ni Jehova anna i karuan paga nga ebidensia nga kurug ira nga Cristiano.
Nebase ta Biblia i pangurug na kurug ira nga Cristiano anna ilayyagayyada yatun ta tanakuan
4. Ibase mi i pangurug mi ta Biblia
Niprofesiya ni Jehova nga mas mannawag i pakalippawa ta tuddu na Biblia. Bibbigan i Daniel 12:4 anna footnote, anna paguvovugan yaw nga pakkiavu:
-
Anni i mesimmu nu itulu-tuloy nga gigiammuan na totolay na Dios i Biblia?
Ikonsidera nu kunnasi ginigiammu ni Charles Russell anna na kavuluna ira, i Uvovug na Dios. Girawan i VIDEO, anna paguvovugan yaw nga pakkiavu.
-
Ta video, kunnasi ginigiammu ni Charles Russell anna na kavuluna nga Estudiante ira na Biblia i Uvovug na Dios?
Ammum kari?
Nu mittan i-adjust mi i pakalippawa mi. Ngatta? Nu kunnasi nga ta pallattuag na bilag, sisinu nga mannawag i pallevu, sisinu gapa nga ipalippawa na Dios i Uvovugna. (Bibbigan i Proverbio 4:18.) Ari manguli i Biblia. Ngem nu mas malippawa mi i tuttudduna, mawag nga itonos mi tatun i tuttuddu mi.
5. Mattolay kami segun ta nengagan nikami
Ngatta inusa mi i ngagan nga Saksi ira ni Jehova? Girawan i VIDEO, anna paguvovugan i tumunug nga pakkiavu.
-
Ngatta mepangngo nga magalakkami nga Saksi ira ni Jehova?
Ngatta nappili si Jehova tu totolay nga mabbalin tu saksina? Tapenu pakurugadda nga yayya i kurug nga Dios megafu ta aru nga kinaladdug i ituttuddu na tanakuan meyannung nisa. Ikonsidera i dua tatun ira nga kinaladdug.
Ituddu na karuan nga relihion ta miembroda nga ikaya na Dios nga mangusa ira tu imahen ta paddayawda. Bibbigan i Levitico 26:1, anna paguvovugan yaw ira nga pakkiavu:
-
Anni i kurug meyannung tatun? Anni i matageno na Dios ta imahen ira?
Ituddu na karuan nga lider na relihion nga si Jesus i Dios. Bibbigan i Juan 20:17, anna paguvovugan yaw ira nga pakkiavu:
-
Anni i kurug meyannung tatun? I Dios kari anna si Jesus ay tattadday?
-
Anni i matageno mu ta nammuammu nga zinog ni Jehova i Saksi ira tapenu ilayyagayya i kinakurug meyannung nisa anna ta Anana?
6. Ayatammi i kataggi-tadday
Nikumpara na Biblia i Cristiano ira ta nadduruma nga parte na baggi na tolay. Bibbigan i 1 Corinto 12:25, 26, anna paguvovugan yaw ira nga pakkiavu:
-
Anni i kuan na kurug ira nga Cristiano nu mazziga-riga i kapangngurugda?
-
Anni i naobserbam ta pangipasingan na Saksi ira ni Jehova tu aya ta kataggi-tadday?
Nu egga mazziga-riga nga Saksi ira ni Jehova, insigida nga manguffun i kapangngurugda ta interu mundo. Girawan i VIDEO tapenu masingan i tadday nga angngarigan. Kabalinna, paguvovugan i tumunug nga pakkiavu.
-
Kunnasi ipasingan na Saksi ira ni Jehova i ayada?
Ipasingan na kurug ira nga Cristiano i ayada ta makawag ira
I KAGIAN NA KARUAN: “Bagu laman nga relihion i Saksi ira ni Jehova.”
-
Kanni namegafu nga inagalan ni Jehova tu saksina i maddayarayaw ira nisa?
ANNI I NAGIGIAMMUM?
Kurug nga Cristiano i Saksi ira ni Jehova. Tadday kami nga familia ta interu mundo nga maddayaw kani Jehova, nebase ta Biblia i pangurug mi, anna ilayyagayya mi i kinakurug meyannung kani Jehova.
Review
-
Ngatta inusa mi i ngagan nga Saksi ira ni Jehova?
-
Kunnasi i pattratu mi ta kataggi-tadday?
-
Ngatta makagim nga kurug nga Cristiano i Saksi ira ni Jehova?
I AWAYYAM PAGA KUAN
Gigiammuan i aru paga meyannung nikami.
Saksi ira ni Jehova—Pangurug nga Egga Annangnguana, Part 1: Nakalawan ta Zibbo (1:00:53)
Innan i angngarigan nu kunnasi nibulgar na Saksi ira ni Jehova i falsu ira nga tuttuddu.
Ammuan i tabbag ta pakkiavu mu ira meyannung ta Saksi ira ni Jehova.
“Gagangay ira nga Pakkiavu Meyannung ta Saksi ira ni Jehova” (web page)
Nagangngua si Stephen tu krimen ira ta totolay nga tanakuan i lahida. Innan nu anni i nasinganna ta Saksi ira ni Jehova yatutta nanguli yayya.
a Namegafu ta 1879, nepublisa i magazina nga Passifusifutan tapenu ipakanawag i tuddu na Biblia.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
