DAW 19

Yehowa Sakse Ni Gaw Jet Ai Hkristan Ni Rai Kun?

HPAW

Yehowa Sakse ni re ai anhte gaw, jet ai Hkristan ni re ai hpe kam ai. Hpa majaw kun? Anhte a makam masham madung tawn ai lam, mying hkam la da ai lam, shada da tsawra ai lam hpe hkaja yu u.

1. Yehowa Sakse ni gaw shanhte a makam masham hpe gara kaw madung tawn ai kun?

Yesu ndai hku tsun ai: “[Karai a] mung ga gaw, teng man ai lam rai nga lit dai.” (Yawhan 17:17) Yesu zawn, Yehowa Sakse ni mung shanhte a makam masham hpe Karai A Mungga hta galoi mung madung tawn ai. Dai ni aten na anhte a labau hpe yu yu ga. 1870 ning daram hta, Chyum Laika hkaja ai hpung langai gaw Chyum Laika hpe atsawm sawk sagawn hpang wa ai. Church a sharin achyin ai lam ni hte shanhte a makam masham shai ai lam ni nga tim pyi, Chyum Laika tsun da ai hpe sha kam ma ai. Shanhte gaw kaga ni hpe Chyum Laika tengman lam ni hkaw tsun hpang wa ai. a

2. Yehowa Sakse ngu nna anhte hpa majaw hkam la da ai kun?

Yehowa gaw shi hte seng nna tengman ai lam hpe tsun dan ai ni, shi hpe nawku ai ni hpe shi a sakse ni ngu nna shaga ai. (Hebre 11:4–12:1) Ga shadawn, moi aten hta Karai Kasang gaw shi a amyu masha ni hpe “nanhte nye a sakse ni” ngu nna shaga wa ai. (Esaia 43:10 hpe hti u.) Yesu hpe mung “kangka re ai sakse wa” ngu nna shaga da ai. (Shingran 1:5) Dai majaw, 1931 hta anhte gaw Yehowa Sakse ni ngu ai mying hpe hkam la wa ai. Dai mying hpe hkam la lu ai majaw anhte arawng la ai.

3. Yehowa Sakse ni gaw Yesu a tsawra myit hpe gara hku kasi la ai kun?

Yesu gaw sape ni hpe grai tsawra ai majaw, shanhte hpe nta masha ni zawn hkamsha ai. (Marku 3:35 hpe hti u.) Dai hte maren, Yehowa Sakse ni mung grai zinlum ai majaw, mungkan grup hta nga ai nta masha ni zawn sha re. Dai majaw, anhte shada da hpunau nauna ni ngu shaga ai. (Hpilemon 1, 2) “Kahpu kanau ni hpe tsaw ra nga mu” ngu ai lam matsun hpe mung anhte hkan sa ai. (1 Petru 2:17) Yehowa Sakse ni gaw, mungkan ting hta nga ai hpunau nauna ni ra kadawn nga ai aten hta, karum ya ai hku nna tsawra myit hpe lam amyu myu hku nna madun ai.

Kahtap Hkaja

Yehowa Sakse ni a labau hte anhte gaw jet ai Hkristan ni re ai hpe danleng shangun ai lam ni hpe grau hkaja yu ga.

Jet ai Hkristan ni gaw shanhte a makam masham hpe Chyum Laika hta madung tawn nna, kaga ni hpe mung hkaw tsun dan ai

4. Anhte a makam masham hpe Chyum Laika hta madung tawn

Chyum Laika tengman lam gaw danleng wa na ngu Yehowa tau hkrau tsun da ai. Daniela 12:4 hpe hti nna, ndai ga san hpe bawngban u:

Chyum Laika hpe matut sawk sagawn ai majaw, Karai a masha ni lapran gara lam “jat wa na” kun?

C. T. Rase hte hpawn, Chyum jawngma hpung langai gaw, Karai A Mungga hpe gara hku hkaja wa ai hpe yu yu u. VIDEO hpe hpaw, dai hpang ndai ga san hpe bawngban u.

VIDEO: Chyum Laika Tengman Lam Hpe Bai Tam Mu Wa (7:45)

Ndai video hta, C. T. Rase hte Chyum Laika rau hkaja ai shi a manang ni gaw, Chyum Laika hpe gara hku hkaja wa ai kun?

Nang chye ai kun?

Kalang lang, Chyum Laika hte seng nna anhte a kamsham ai lam nkau mi hpe galai shai ai lam ni galaw wa ai. Hpa majaw kun? Jan pru wa magang asan sha mu wa magang re ai zawn, Karai Kasang mung shi a mungga hpe angwi ngwi chye na wa na ngu tsun da ai. (Ga Shagawp 4:18 hpe hti u.) Chyum Laika gaw n galai shai tim, Chyum Laika hpe grau chye na wa ai majaw, anhte a makam masham hpe mung galai shai ra wa ai.

5. Anhte a mying hte maren asak hkrung

Yehowa Sakse ngu ai mying hpe hpa majaw hkam la ai kun? VIDEO hpe hpaw, dai hpang ndai ga san hpe bawngban u.

VIDEO: Anhte Hkam La Ai Mying (2:40)

Yehowa Sakse ni ngu ai mying gaw hpa majaw htap htuk ai kun?

Yehowa gaw, shi a sakse ni byin na matu masha ni hpe hpa majaw lata ai kun? Shanhte gaw, Karai Kasang hte seng nna masha law law masu ga tsun ai majaw, Yehowa hpe tengman ai Karai Kasang re ai lam sakse madun ra ai majaw re. Dai masu ga ni kaw na lahkawng hpe hkaja yu ga.

Karai Kasang gaw, nawku dawjau ai lam hta sumla ni hpe jailang shangun mayu ai ngu nawku htung nkau mi gaw, hpung masha ni hpe sharin ya ma ai. Raitim, Jaw Jau 26:1 hpe hti nna, ndai ga san ni hpe bawngban u:

Tengman ai lam gaw hpa rai kun? Gawngngu sumla ni hte seng nna Yehowa gara hku hkamsha ai kun?

Yesu gaw Karai Kasang re ai ngu nawku htung ningbaw nkau mi sharin ya ma ai. Raitim, Yawhan 20:17 hpe hti nna, ndai ga san ni hpe bawngban u:

Tengman ai lam gaw hpa rai kun? Karai Kasang hte Yesu gaw marai langai sha rai kun?
Yehowa gaw shi hte shi Kasha a lam hte seng ai tengman lam hpe hkaw tsun na matu shi a sakse ni hpe shangun dat ai. Dai lam hpe chye lu ai majaw nang gara hku hkamsha ai kun?

6. Anhte gaw shada da tsawra

Chyum Laika hta Hkristan ni hpe hkum hkrang a adaw achyen ni hte shingdaw da ai. 1 Korinhtu 12:25, 26 hpe hti nna, ndai ga san ni hpe bawngban u:

Jet ai Hkristan ni gaw hpunau nauna ni yakhkak hkrum ai shaloi gara hku galaw ging ai kun?
Yehowa Sakse ni a lapran tsawra myit hte seng nna nang hpa hpe sadi hkrup ai kun?

Shara ra hta nga ai Yehowa Sakse ni yakhkak hkrum ai shaloi, mungkan ting hta nga ai hpunau nauna ni gaw kalang ta karum ya ma ai. Ga shadawn langai hpe yu na matu, VIDEO hpe hpaw. Dai hpang, ndai ga san hpe bawngban u.

VIDEO: Met-tayu Harikin Nbung Laru Hpe Heti Masha Ni Hkam Jan (5:29)

Yehowa Sakse ni a hkye mawai bungli gaw tsawra myit hpe gara hku danleng shangun ai kun?

Jet ai Hkristan ni gaw ra kadawn nga ai ni hpe tsawra myit madun ai

Nkau Mi Tsun Ai: “Yehowa Sakse ni gaw ya she pru wa ai hpung nnan sha re.”

Yehowa gaw, gara aten kaw na shi hpe nawku dawjau ai ni hpe shi a sakse ni ngu shaga wa ai kun?

Kadun Dawk

Yehowa Sakse ni gaw jet ai Hkristan ni re. Anhte gaw Yehowa hte seng ai tengman lam hpe tsun dan ai, anhte a makam masham hpe Chyum Laika hta madung tawn ai mungkan ting na Yehowa hpe nawku dawjau ai ni re.