LISHOMO 19
Mashaidi va Yeova ni Vaklistu vaiu?
Wetu Mashaidi va Yeova, tunkwamini kenga ni Tuvaklistu vaiu. Mwaa wa nyamani? Mu lishomo ali tundamanya lipata lya vinu vyatwamini, lina lyapagweka lyatuvenavo, na mwatuladyedya linagwaledyo kula munu na muje.
1. Da lipata lyalikulupililo lya Mashaidi va Yeova ni lyakwashi?
Yesu atedoni: “lilove lya [Nnungu] ni umwiu.” (Nshuwau 17:17) Kenga Yesu, lipata lyalikulupililo lya Mashaidi va Yeova ni lilove lya Nnungu. Kwampano manya maimyo a Mashaidi va Yeova. Mu myaka miya kumi na tisa vipitile kunyuma, shipinga sha vashikola va Ibibiliya vandyanjanga kulalyanga shana Ibibiliya. Vanavo vashilota vamanye ashilá shitangaleka mu Ibibiliya, ata ikava kenga vishinavilingananga na mapundisho la maganisha lanji. Badae, vandyanjanga kuvapundisha vanu vanji umwiu wamu Ibibiliya. a
2. Mwaa shani tunkushamegwa Mashaidi va Yeova?
Yeova andivashema vatumika vake kenga mashaidi vake kwamwaa vanavo vankupundisha umwiu kwaupande wake. (Shomya Vabalaniya 11:4–12:1) Kwampano, muwakati wakala, Nnungu andívamanyia venentete vake: ‘Mwenu ni mashaidi vangu.’ (Shomya Ishaiya 43:10.) Yesu amanyika kuva ‘nshaidi wakukulupilika.’ (Maono 1:5) Pavedoni, tangu mwaka wa 1931 wetu tunkumanyika kuva Mashaidi va Yeova. Pavedoni wetu tunkupuwanga kumanyika kwa lina ali.
3. Mashaidi va Yeova vaodedya dashi linagwaledyo limwe Yesu?
Yesu ashínavanagwaledya namene vakwoda vake kenga likola lyake. (Shomya Malukushi 3:35.) Ndyomana, Mashaidi va Yeova ni likola lyaupamo, mushilambo uti. Na pakati petu tunkushamana vanung’unumunu na valumbumunu. (Pilemoni 1, 2) Nayadavo wetu twigwilila lilamulo liishidoni: “Vanagwaledye vanung’unumunu.” (1 Patulu 2:17) Mashaidi va Yeova vankulodya linagwaledyo mu dinamuna dyoe, kwampano kuvapwashela vanung’unumunuvetu mushilambo uti vakalota lipwashalelo.
LAMBELA KUMANYA VYOE
Lambela kumanya vyoe kwaupande wa maimyo la Mashaidi va Yeova na manya vimanyikilo vinji vilodya kenga wetu ni Vaklistu vaiu.
Vaklistu vaiu vankutumila Ibibiliya kenga lipata lyalikulupililo lyavo na vandavapundisha vanu vanji
4. Ibibiliya ni lipata lyalikulupililo lyetu
Yeova andívalanga kaladavo kenga umwiu wamu Ibibiliya ukandyuka ndamanyika. Shomya Daniyele 12:4 na inota, na badae mwambangile mwaa shakudya sha mwina:
-
Nyamani shavalota “kupata” vatumika vake Nnungu vakauka mushu valalyanga Ibibiliya?
Lola mwashi shipinga sha vashikola va Ibibiliya, kummika nkati Charles Russell, mwavalipundishididye Lilove lya Nnungu. Lola VIDEO, na badae mwambangile mwaa shakudya sha mwina.
-
Mu video avi, Charles Russell na vashikola mwagwe va Ibibiliya valipundishidye dashi Ibibiliya?
Wako ushindamanya?
Myanda vinji, wetu tunaigwiniya vyatwamini. Mwaa wa nyamani? Mwaa kenga mwalitandela liduva palyuma na kwanjanga kulangala mpaka vinu kwaneka shana, Nnungu ankutupwashela kwigwa shana Lilove lyake padikipadiki. (Shomya Mikong’o 4:18.) Kwaumwiu Ibibiliya hainabadilika shinu; kanji wetu tunaigwiniya vyatwamini kulingana mwatwigwila umwiu wamu Ibibiliya.
5. Wetu tunkunama kwodananga na lina lyetu
Mwaa shani tunkushamegwa Mashaidi va Yeova? Lola VIDEO, na badae mwambangile mwaa shakudya sha mwina.
-
Mwaa shani lina lya Mashaidi va Yeova ni lyambone?
Mwaa shani Yeova andivatandola vanu pakulota vave mashaidi vake? Vanavo vankulodya kenga nae ni Nnungu wiu, tangu pautunduvenge ushwang’a kwaupande wake nae. Lola ushwang’a awo.
Didini dinji dinkuvapundisha vanu kenga Nnungu ankulota vanavo, vatumile mashinamu mukulipudya kwavo. Pavedoni, shomya Valawi 26:1, na badae mwambangile mwaa vyakudya vya mwina:
-
Umwiu ni nyamani? Yeova aligwa dashi kwaupande wa mashinamu?
Didini dinji vananangalaledi vapundisha kenga Yesu ni Nnungu. Pavedoni, shomya Nshuwau 20:17, na badae mwambangile mwaa vyakudya vya mwina:
-
Umwiu ni nyamani? Da Nnungu namu Yesu ni munu jumo?
-
Wako unkuligwa dashi paumanyite kenga, Yeova andivatuma Mashaidi vake pakulota kuvalanga umwiu kwaupande wake na wa Mwanagwe?
6. Wetu tunkunagwaladyania kula munu na muje
Ibibiliya ivalinganianga Vaklistu na dimbande dyakuvilingananga dya mmili. Shomya 1 Vakolintu 12:25, 26, na badae mwambangile mwaa vyakudya vya mwina:
-
Vaklistu vaiu ivaikidile vatende nyamani ikava kenga Vaklistumwagwe vankuvauvanga?
-
Nyamani shaugwene kwaupande wa linagwaledyo pakati pa Mashaidi va Yeova?
Mashaidi va Yeova va shilambo shinji vakapita matatisho, Mashaidi mwavo mushilambo uti vanavapwashela kwashipajelo. Pakulota ulole mpano umo, Lola VIDEO. Badae mwambangile mwaa shakudya sha mwina.
-
Kupwashela kwa Mashaidi va Yeova kuladidye dashi linagwaledyo?
Vaklistu vaiu vandalodya linagwaledyo kwa avalá vauvauvanga
VANU VANJI VANKUSHIDONI: “Mashaidi va Yeova ni idini yaambi.”
-
Yeova atunduvenge duvani kuvashema venentete vake mashaidi?
KWAUNGWIPI
Mashaidi va Yeova ni Vaklistu vaiu. Wetu ni likola lya vatumika lya mushilambo uti, tunkutumila Ibibiliya kenga lipata lyalikulupililo lyetu na tunkuvapundisha vanu umwiu kwaupande umwe Yeova.
Tukumbukilange
-
Mwaa shani tunkushamegwa Mashaidi va Yeova?
-
Tulodya dashi kenga tunkunagwaladyania?
-
Wako wona kenga Mashaidi va Yeova ni Vaklistu vaiu?
LIPUNDISHE
Manya vyoe kwaupande wa maimyo letu.
Mashaidi va Yeova—Likulupililo muvitendo, Imbande 1: Kumananga mushii (1:00:53)
Lola mpano ulodya mwashi Mashaidi va Yeova mwavalodedya palangele mapundisho lakushang’apa.
Pata majibu la vyakudya vyauvenavo kwaupande wa Mashaidi va Yeova.
“Maswali Yanayoulizwa Mara Nyingi Kuhusu Mashahidi wa Yehova” (habari zilizo kwenye mtandao)
Stephen ashíndavanyatila vanu va ikabila inji mpaka ashindavatenda vyakunyata. Manya nyamani shagwene Stephen pakati pa Mashaidi va Yeova shintadídye nae kubadili makumbukililo lake.
“Maisha Yangu Yalizidi Kuwa Mabaya” (Mnara wa Mlinzi, Julai 1, 2015)
a Ligasheti lyetu likumene, A Sentinela, linkuvalanga umwiu wamu Ibibiliya tangu mwaka wa 1879.
