មេរៀនទី១៩
តើសាក្សីព្រះយេហូវ៉ាជាគ្រិស្តសាសនិកពិតឬទេ?
ក្នុងនាមជាសាក្សីព្រះយេហូវ៉ា យើងជឿថាយើងជាគ្រិស្តសាសនិកពិត។ ហេតុអ្វី? សូមពិចារណាអំពីមូលដ្ឋាននៃជំនឿរបស់យើង ឈ្មោះដែលធ្វើឲ្យយើងខុសពីគេ និងសេចក្ដីស្រឡាញ់ដែលយើងមានចំពោះគ្នាទៅវិញទៅមក។
១. តើជំនឿរបស់សាក្សីព្រះយេហូវ៉ាមានមូលដ្ឋានលើអ្វី?
លោកយេស៊ូបានមានប្រសាសន៍ថា៖ «បណ្ដាំរបស់[ព្រះ]ជាសេចក្ដីពិត»។ (យ៉ូហាន ១៧:១៧) ដូចលោកយេស៊ូដែរ ជំនឿរបស់សាក្សីព្រះយេហូវ៉ាតែងតែមានមូលដ្ឋានលើបណ្ដាំរបស់ព្រះ។ ជាឧទាហរណ៍ សូមពិចារណាប្រវត្តិរបស់សាក្សីព្រះយេហូវ៉ា ដែលពីមុនបានត្រូវស្គាល់ថាជានិស្សិតគម្ពីរ។ នៅចុងសតវត្សរ៍ទី១៩ និស្សិតគម្ពីរមួយក្រុមបានពិនិត្យមើលគម្ពីរយ៉ាងយកចិត្តទុកដាក់។ បន្ទាប់មក ពួកគេយកអ្វីដែលគម្ពីរចែងធ្វើជាមូលដ្ឋាននៃជំនឿរបស់ពួកគេ ទោះជាជំនឿរបស់ពួកគេខុសគ្នាពីសេចក្ដីបង្រៀនរបស់គ្រិស្តសាសនាឯទៀតក៏ដោយ។ រួចមក ពួកគេចាប់ផ្ដើមប្រាប់អ្នកឯទៀតអំពីសេចក្ដីពិតដែលពួកគេបានរកឃើញក្នុងគម្ពីរ។ a
២. ហេតុអ្វីយើងមានឈ្មោះថាសាក្សីព្រះយេហូវ៉ា?
ព្រះយេហូវ៉ាហៅអ្នកគោរពប្រណិប័តន៍លោកថាជាសាក្សីរបស់លោក ដោយសារពួកគេប្រាប់សេចក្ដីពិតអំពីលោក។ (ហេប្រឺ ១១:៤–១២:១) ជាឧទាហរណ៍ នៅសម័យបុរាណ ព្រះបានប្រាប់រាស្ត្ររបស់លោកថា៖ «អ្នករាល់គ្នាជាសាក្សីរបស់ខ្ញុំ»។ (សូមអាន អេសាយ ៤៣:១០) លោកយេស៊ូបានត្រូវហៅថា«សាក្សីដ៏ស្មោះត្រង់»។ (ការបើកបង្ហាញ ១:៥) នៅឆ្នាំ១៩៣១ យើងបានជ្រើសរើសយកឈ្មោះសាក្សីព្រះយេហូវ៉ា។ យើងមានមោទនភាពដែលមានឈ្មោះនេះ។
៣. តើសាក្សីព្រះយេហូវ៉ាបង្ហាញសេចក្ដីស្រឡាញ់ដូចលោកយេស៊ូតាមរបៀបណា?
លោកយេស៊ូស្រឡាញ់ពួកអ្នកកាន់តាមលោកខ្លាំងណាស់ ប្រៀបដូចជាពួកគេជាក្រុមគ្រួសាររបស់លោក។ (សូមអាន ម៉ាកុស ៣:៣៥) ស្រដៀងគ្នាដែរ សាក្សីព្រះយេហូវ៉ាជាក្រុមគ្រួសារធំមួយនៅទូទាំងពិភពលោកដែលមានសាមគ្គីភាព។ នេះជាមូលហេតុដែលយើងហៅអ្នករួមជំនឿថាបងប្អូន។ (ភីលេម៉ូន ១, ២) ម្យ៉ាងទៀត យើងធ្វើតាមបង្គាប់ដែលថា៖ «ចូរស្រឡាញ់បងប្អូនរួមជំនឿទាំងអស់»។ (ពេត្រុសទី១ ២:១៧) សាក្សីព្រះយេហូវ៉ាបង្ហាញសេចក្ដីស្រឡាញ់តាមរបៀបជាច្រើន ដូចជាជួយបងប្អូនរួមជំនឿនៅទូទាំងពិភពលោក ពេលពួកគេត្រូវការជំនួយជាដើម។
បង្កើនចំណេះ
សូមពិនិត្យមើលឲ្យបានដិតដល់អំពីប្រវត្តិរបស់សាក្សីព្រះយេហូវ៉ា ហើយសូមមើលភ័ស្តុតាងថែមទៀតដែលបញ្ជាក់ថាយើងជាគ្រិស្តសាសនិកពិត។
៤. ជំនឿរបស់យើងមានមូលដ្ឋានលើគម្ពីរ
ព្រះយេហូវ៉ាប្រាប់ទុកជាមុនថា សេចក្ដីពិតក្នុងគម្ពីរនឹងត្រូវបើកបង្ហាញ។ សូមអាន ដានីយ៉ែល ១២:៤ និងកំណត់សម្គាល់ រួចពិភាក្សាសំណួរនេះ៖
-
តើអ្វីនឹង«មានជាបរិបូរ»ក្នុងចំណោមរាស្ត្ររបស់ព្រះ កាលដែលពួកគេបន្តពិនិត្យមើលគម្ពីរ?
សូមពិចារណាអំពីរបៀបនិស្សិតគម្ពីរមួយក្រុមដែលរួមមានឆាល រ៉ាសិល បានសិក្សាបណ្ដាំរបស់ព្រះ។ លេងវីដេអូ រួចពិភាក្សាសំណួរដូចតទៅ៖
-
ក្នុងវីដេអូ តើតាមរបៀបណាឆាល រ៉ាសិលនិងអ្នករួមការងាររបស់គាត់សិក្សាគម្ពីរ?
តើអ្នកដឹងទេ?
ម្ដងម្កាល យើងបានកែសម្រួលអ្វីដែលយើងជឿ។ ហេតុអ្វី? ពីព្រោះព្រះផ្ដល់ការយល់ដឹងអំពីបណ្ដាំរបស់លោកបន្តិចម្ដងៗ ប្រៀបដូចជាថ្ងៃកំពុងរះបន្តិចម្ដងៗដែលបង្ហាញឲ្យឃើញទេសភាពកាន់តែច្បាស់។ (សូមអាន សុភាសិត ៤:១៨) គម្ពីរមិនផ្លាស់ប្ដូរទេ តែពេលយើងយល់គម្ពីរកាន់តែច្បាស់ យើងកែសម្រួលអ្វីដែលយើងជឿ។
៥. យើងរស់នៅស្របតាមឈ្មោះរបស់យើង
ហេតុអ្វីយើងមានឈ្មោះថាសាក្សីព្រះយេហូវ៉ា? លេងវីដេអូ រួចពិភាក្សាសំណួរដូចតទៅ៖
-
ហេតុអ្វីឈ្មោះសាក្សីព្រះយេហូវ៉ាគឺសមត្រឹមត្រូវ?
ហេតុអ្វីព្រះយេហូវ៉ាបានជ្រើសរើសមនុស្សមួយក្រុមឲ្យធ្វើជាសាក្សីរបស់លោក? ពីព្រោះមានពាក្យកុហកជាច្រើនអំពីលោក ដូច្នេះពួកគេនឹងបញ្ជាក់ថាលោកជាព្រះពិត។ សូមពិចារណាពាក្យកុហកពីរយ៉ាង។
សាសនាខ្លះបង្រៀនសមាជិកខ្លួនថា ព្រះចង់ឲ្យពួកគេប្រើរូបសំណាកផ្សេងៗក្នុងការគោរពប្រណិប័តន៍លោក។ ក៏ប៉ុន្តែ សូមអាន ច្បាប់លេវី ២៦:១ រួចពិភាក្សាសំណួរដូចតទៅ៖
-
តើខគម្ពីរនេះប្រាប់ការពិតអ្វី? តើព្រះយេហូវ៉ាមានអារម្មណ៍យ៉ាងណាចំពោះរូបសំណាក?
អ្នកដឹកនាំសាសនាខ្លះបង្រៀនថា លោកយេស៊ូជាព្រះ។ ក៏ប៉ុន្តែ សូមអាន យ៉ូហាន ២០:១៧ រួចពិភាក្សាសំណួរដូចតទៅ៖
-
តើខគម្ពីរនេះប្រាប់ការពិតអ្វី? តើលោកយេស៊ូជាព្រះឬទេ?
-
តើអ្នកមានអារម្មណ៍យ៉ាងណាដែលដឹងថា ព្រះយេហូវ៉ាបានចាត់សាក្សីរបស់លោកឲ្យផ្សព្វផ្សាយសេចក្ដីពិតអំពីលោកនិងបុត្ររបស់លោក?
៦. យើងស្រឡាញ់គ្នាទៅវិញទៅមក
គម្ពីរប្រៀបប្រដូចគ្រិស្តសាសនិកទៅនឹងអវយវៈផ្សេងៗនៃរូបកាយ។ សូមអាន កូរិនថូសទី១ ១២:២៥, ២៦ រួចពិភាក្សាសំណួរដូចតទៅ៖
-
តើគ្រិស្តសាសនិកពិតធ្វើយ៉ាងណា ពេលគ្រិស្តសាសនិកឯទៀតរងទុក្ខ?
-
តើអ្នកបានឃើញសាក្សីព្រះយេហូវ៉ាបង្ហាញសេចក្ដីស្រឡាញ់ចំពោះគ្នាយ៉ាងដូចម្ដេច?
ពេលសាក្សីព្រះយេហូវ៉ានៅប្រទេសផ្សេងទៀតរងទុក្ខលំបាក សាក្សីឯទៀតបានចាត់វិធានការណ៍ផ្ដល់ជំនួយភ្លាមៗ។ ដើម្បីមើលឧទាហរណ៍មួយ សូមលេងវីដេអូ។ រួចពិភាក្សាសំណួរដូចតទៅ៖
-
តើការផ្ដល់ជំនួយរបស់សាក្សីព្រះយេហូវ៉ាជាភ័ស្តុតាងបញ្ជាក់យ៉ាងណាអំពីសេចក្ដីស្រឡាញ់របស់ពួកគេ?
មនុស្សខ្លះនិយាយថា៖ «សាក្សីព្រះយេហូវ៉ាគ្រាន់តែជាសាសនាថ្មីមួយប៉ុណ្ណោះ»។
-
តើតាំងពីពេលណាដែលព្រះយេហូវ៉ាបានហៅអ្នកគោរពប្រណិប័តន៍លោកថាសាក្សី?
សេចក្ដីសង្ខេប
សាក្សីព្រះយេហូវ៉ាជាគ្រិស្តសាសនិកពិត។ យើងជាក្រុមគ្រួសារធំមួយនៅទូទាំងពិភពលោកដែលគោរពប្រណិប័តន៍ព្រះយេហូវ៉ា ជំនឿរបស់យើងមានមូលដ្ឋានលើគម្ពីរ ហើយយើងប្រាប់សេចក្ដីពិតអំពីលោក។
រៀនសាឡើងវិញ
-
ហេតុអ្វីយើងមានឈ្មោះថាសាក្សីព្រះយេហូវ៉ា?
-
តើយើងបង្ហាញថាយើងស្រឡាញ់គ្នាយ៉ាងដូចម្ដេច?
-
តើអ្នកគិតថាសាក្សីព្រះយេហូវ៉ាជាគ្រិស្តសាសនិកពិតឬទេ?
ស្វែងយល់ថែមទៀត
សូមរៀនថែមទៀតអំពីប្រវត្តិរបស់យើង។
សាក្សីព្រះយេហូវ៉ា ការប្រព្រឹត្តតាមជំនឿ ផ្នែកទី១: ចេញពីសេចក្ដីងងឹត (១:០០:៥៣)
សូមមើលឧទាហរណ៍មួយអំពីរបៀបដែលសាក្សីព្រះយេហូវ៉ាបានបកអាក្រាតសេចក្ដីបង្រៀនមិនពិត។
សូមស្វែងរកចម្លើយចំពោះសំណួរដែលអ្នកប្រហែលជាឆ្ងល់អំពីសាក្សីព្រះយេហូវ៉ា។
«សំណួរដែលមនុស្សជាច្រើនសួរអំពីសាក្សីព្រះយេហូវ៉ា» (អត្ថបទក្នុងគេហទំព័រ)
ស្ទីវើនស្អប់ជនជាតិផ្សេងខ្លាំងណាស់ រហូតដល់គាត់ដើរវាយពួកគេ។ សូមមើលថា តើអ្វីបានជំរុញចិត្តគាត់ឲ្យកែប្រែជីវិត?
«ខ្ញុំធ្លាប់ជាមនុស្សអាក្រក់ខ្លាំងណាស់» (brwp១៥០៧០១)
a តាំងពីឆ្នាំ១៨៧៩ រាស្ត្ររបស់ព្រះយេហូវ៉ាបានបោះពុម្ពទស្សនាវដ្ដីប៉មយាមជាទៀងទាត់ ដើម្បីពន្យល់អ្វីដែលគម្ពីរចែង។