Awˬ lawn 19
Yaˬhoˉvaˬ ve Shaˉhkiˆhkanˍ ve chaw awˬ tehˬ ve Hkriꞈ yaˇ hpehꞈ˗aw laˇ?
Ngaˬ hui Yaˬhoˉvaˬ ve Shaˉhkiˆhkanˍ ve chaw lehˬ awˬ tehˬ ve Hkriꞈ yaˇ hpehꞈ ve tehꞈ yonˍ ve yoˬ. Aˬ htoꞈ ma pa taw ngaˬ hui chi hkʼe yonˍ gʼa ve le? Ngaˬ hui ve yonˍ hkʼaˇ, ngaˬ hui ve awˬ meh, leh ngaˬ hui teˇ gʼaˇ leh teˇ gʼaˇ haꞈ daꞈ ve htaꞈ teˇ geh nyi sheˍ.
1. Yaˬhoˉvaˬ ve Shaˉhkiˆhkanˍ ve chaw yonˍ hkʼaˇ hkʼaˬ kaˬ lo laˬ ve le?
Yeˍsuˆ kʼoˆ ve, Gʼuiˬ sha ve tawˇ hkawˇ lehˬ “hteˇ ve cawˇ ve teˇ ceuˬ hpehꞈ ve yoˬ.” (Yoˇhanˬ 17:17) Yeˍsuˆ hkʼa shuˍ Yaˬhoˉvaˬ ve Shaˉhkiˆhkanˍ ve chaw yonˍ hkʼaˇ kaꞈ Liꞈ hpu hkʼaw laˬ ve yoˬ. Yaˬhoˉvaˬ ve Shaˉhkiˆhkanˍ ve chaw hui ve awˬ lawn htaꞈ nyi sheˍ. Aˬ laˬ hkʼe 1870 C.E. htaˇ, Liꞈ hpu henˇ yaˇ teˇ moˍ lehˬ Liꞈ hpu hkʼaw maˍ laˇ ve htaꞈ hkʼa dehꞈ tanˬ chaˬ nyi ve yoˬ. Yawˇ hui ve yonˍ hkʼaˇ bon yaˇ teˇ hpaˍ maˍ ve htaꞈ maˇ shuˍ daꞈ ve htawˇ, yawˇ hui Liꞈ hpu hkʼaw cawˬ ve ceh tiˉ yonˍ ve yoˬ. Liꞈ hpu henˇ yaˇ awˬ moˍ Liꞈ hpu hkʼaw maˍ laˇ ve htaꞈ na gʼa htaˇ, shu htaꞈ kaꞈ tanˬ kʼoˆ maˍ piˇ ve yoˬ. a
2. Aˬ htoꞈ ma pa taw ngaˬ hui a shu yawˇ awˬ to htaꞈ Yaˬhoˉvaˬ ve Shaˉhkiˆhkanˍ ve chaw tehꞈ kuˬ ve le?
Yaˬhoˉvaˬ lehˬ yawˇ htaꞈ oˉ kʼoˍ pui ve chaw htaꞈ yawˇ ve shaˉ hkiˆ tehꞈ kuˬ ve yoˬ. Awˬ lawn kʼo, yawˇ hui yawˇ htaꞈ caˉ daꞈ ve awˬ tehˬ ve awˬ lawn hto toˇ ve yoˬ. (Heˍbrehˇ 11:4–12:1) Tawˇ pa haˉ te kʼo, aˬ sho˗eˬ htaˇ Gʼuiˬ sha yawˇ ve chaw htaꞈ kʼoˆ piˇ ve, “nawˬ hui lehˬ ngaˬ ve shaˉ hkiˆ hpehꞈ ve yoˬ.” (Iˉsaˍyaˆ 43:10 gʼaw sheˍ.) Liꞈ hpu hkʼaw Yeˍsuˆ htaꞈ, “ka tiꞈ yeˬ ve shaˉ hkiˆ hkanˍ shehˍ hpaˇ” tehꞈ kʼoˆ taˍ ve yoˬ. (Hpeuꞈ maˍ ve 1:5) Chi htaꞈ pa taw, 1931 hkʼawꞈ htaˇ tanˬ leh ngaˬ hui a shu yawˇ awˬ to htaꞈ Yaˬhoˉvaˬ ve Shaˉhkiˆhkanˍ ve chaw hpehꞈ ve tehꞈ kuˬ ve yoˬ. Awˬ meh chi htaꞈ gʼa yehˇ ve ngaˬ hui ha lehˬ jaˇ ve yoˬ.
3. Yeˍsuˆ haꞈ pehnˇ ve htaꞈ Yaˬhoˉvaˬ ve Shaˉhkiˆhkanˍ ve chaw hkʼaˬ hkʼe te henˇ yuˬ ve le?
Yeˍsuˆ yawˇ ve awˬ laꞈ gʼawˇ htaꞈ haꞈ jaˇ ve pa taw, yehˬ kʼa hkʼaw ve chaw hpehꞈ ve tehꞈ shawˍ taˍ ve yoˬ. (Maˍkuˆ 3:35 gʼaw sheˍ.) Chi beuꞈ teˇ co˗e Yaˬhoˉvaˬ ve Shaˉhkiˆhkanˍ ve chaw htawˇ chi hkʼe te ve yoˬ. Teˇ yehˬ kʼa hkʼaw ve chaw hpehꞈ ve tehꞈ shawˍ leh ngaˬ hui teˇ gʼaˇ leh teˇ gʼaˇ awˬ viˉ awˬ nyi tehꞈ kuˬ daꞈ ve yoˬ. Miˬ guiˬ hkʼoˆ lo hkʼaˬ kaˬ lo chehˇ ve maˇ kʼoˆ, ngaˬ hui teˇ moˍ tiˉ hpehꞈ ve yoˬ. (Hpiˇleˍmonˍ 1, 2) Chi hkʼoˆ kaꞈ, “awˬ viˉ awˬ nyi teˇ hpaˍ htaꞈ haꞈ˗oꞈ” tehꞈ kʼoˆ ve htaꞈ ngaˬ hui gʼaꞈ te ve yoˬ. (1 Peˍtruˆ 2:17) Yaˬhoˉvaˬ ve Shaˉhkiˆhkanˍ ve chaw haꞈ daꞈ ve tehꞈ laiˉ hkʼaˇ hkʼaw hpeuꞈ maw piˇ ve yoˬ. Tawˇ pa haˉ te kʼo, miˬ guiˬ hkʼoˆ lo awˬ viˉ awˬ nyi shoꞈ shaꞈ ve htaꞈ gʼa hpuˇ htaˇ yawˇ hui ga daꞈ ve yoˬ.
Henˇ shiˍ maˇ la tuˬ
Yaˬhoˉvaˬ ve Shaˉhkiˆhkanˍ ve chaw hui ve awˬ lawn htaꞈ nyi la sheˍ. Ngaˬ hui awˬ tehˬ ve Hkriꞈ yaˇ hpehꞈ ve tehꞈ hkʼaˬ hkʼe te shiˍ gʼa ve le, teˇ geh henˇ sheˍ.
Awˬ tehˬ ve Hkriꞈ yaˇ ve yonˍ hkʼaˇ lehˬ Liꞈ hpu hkʼaw laˬ ve, leh yawˇ hui ve yonˍ hkʼaˇ shu htaꞈ hto piˇ maˍ piˇ ve
4. Ngaˬ hui maˍ ve awˬ ceuˬ Liꞈ hpu hkʼaw laˬ ve
Yaˬhoˉvaˬ kʼoˆ taˍ ve Liꞈ hpu hkʼaw awˬ tehˬ ve lehˬ, shaˬ te shaˬ shiˍ maˇ la tuˬ yoˬ. Daˍyeˍlaˆ liꞈ 12:4 b (Miˬ guiˬ awˬ suhˉ yuˬ tawˆ ve Liꞈ hpu) awˬ maiˉ htaꞈ gʼaw leh na hkawˇ chi htaꞈ tawˇ yaw daꞈ sheˍ:
-
Gʼuiˬ sha ve chaw Liꞈ hpu hkʼaw hkʼa dehꞈ chaˬ nyi htaˇ, yawˇ hui aˬ htoꞈ ma “hkʼa biˇ cawˬ tuˬ” le?
Liꞈ hpu henˇ yaˇ awˬ moˍ hkʼaw ve chaw Chanˍ Raˆsenˍ leh yawˇ ve awˬ chawˇ Liꞈ hpu hkʼaˬ hkʼe te henˇ ve htaꞈ teˇ geh nyi sheˍ. VDO hpaw leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw Raˆsenˍ leh yawˇ ve awˬ chawˇ Liꞈ hpu hkʼaˬ hkʼe te henˇ ve le?
Nawˬ shiˍ˗aˬ laˇ?
Aˬ htoꞈ ma pa taw teˇ pawˆ pawˆ ngaˬ hui maˍ ve awˬ ceuˬ pa ve le? Awˬ paˇ awˬ kui cawˬ ve htaꞈ hkʼa dehꞈ mawˬ tuˬ, mvuhˇ nyi awˬ gʼeuˆ awˬ meu˗eˇ awˬ meu˗eˇ ba tawˆ la ve hkʼe, awˬ yanˇ cawˇ ve hkʼaw Gʼuiˬ sha ngaˬ hui htaꞈ Liꞈ hpu hkʼaw awˬ tehˬ ve htaꞈ na gʼa leh kʼawꞈ shiˍ maˇ la tuˬ ga laˇ ve yoˬ. (Tawˇ naˉ ve 4:18 gʼaw sheˍ.) Chi hkʼa shuˍ shuˍ Liꞈ hpu hkʼaw ve tawˇ hkawˇ maˇ pa ve htawˇ, ngaˬ hui Liꞈ hpu hkʼaw awˬ tehˬ ve htaꞈ hkʼa dehꞈ kʼawꞈ shiˍ maˇ la ve pa taw, Liꞈ hpu hkʼaw hawˍ daꞈ tuˬ maˍ ve awˬ ceuˬ kʼawꞈ pa ve yoˬ.
5. Ngaˬ hui ve awˬ meh ngaˬ hui aˬ htoꞈ ma te chehˇ ve htaꞈ hpeuꞈ maw laˇ ve
Aˬ htoꞈ ma pa taw ngaˬ hui htaꞈ Yaˬhoˉvaˬ ve Shaˉhkiˆhkanˍ ve chaw tehꞈ kuˬ ve le? VDO hpaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw ngaˬ hui htaꞈ Yaˬhoˉvaˬ ve Shaˉhkiˆhkanˍ ve chaw tehꞈ kuˬ ve lehˬ keunˍ daꞈ jaˇ ve le?
Aˬ htoꞈ ma pa taw Yaˬhoˉvaˬ lehˬ chaw teˇ hpaˍ htaꞈ leuˆ yuˬ leh yawˇ ve Shaˉhkiˆhkanˍ ve chaw hpehꞈ tcuh ve le? Awˬ lawn kʼo, yawˇ htaꞈ caˉ daꞈ ve awˬ tehˬ ve htaꞈ maˍ yaꞈ ve laiˉ lawn cawˬ ve yoˬ. Chi htaꞈ pa taw, Yaˬhoˉvaˬ ve Shaˉhkiˆhkanˍ ve chaw yawˇ htaꞈ caˉ daꞈ ve awˬ tehˬ ve awˬ lawn shu htaꞈ hto maˍ piˇ ve yoˬ. Maˍ yaꞈ ve 2 lawn htaꞈ ngaˬ hui teˇ geh nyi sheˍ.
Gʼuiˬ sha lehˬ ngaˬ hui yawˇ htaꞈ oˉ kʼoˍ pui htaˇ, shaˉ hoꞈ yehˇ tcuh gaˇ ve tehꞈ bon liˇ teˇ hpaˍ hpaˍ maˍ ve yoˬ. Liꞈ hpu hkʼaw hkʼaˬ hkʼe maˍ ve le? Oˉ kʼoˍ pui ve liꞈ 26:1 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Awˬ tehˬ kʼo, Gʼuiˬ sha ngaˬ hui htaꞈ shaˉ hoꞈ yehˇ leh oˉ kʼoˍ pui tcuh gaˇ˗aw laˇ? Nawˬ dawˇ kʼo, shaˉ hoꞈ yehˇ leh oˉ kʼoˍ pui ve htaꞈ Gʼuiˬ sha hkʼaˬ hkʼe dawˇ tuˬ le?
Bon liˇ teˇ hpaˍ hpaˍ maˍ ve, Yeˍsuˆ lehˬ Gʼuiˬ sha hpehꞈ ve yoˬ. Yaꞈ hkʼaˇ, chi awˬ tehˬ laˇ? Yoˇhanˬ liꞈ 20:17 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Liꞈ hpu hkʼaw Yeˍsuˆ leh Gʼuiˬ sha teˇ gʼaˇ tiˉ hpehꞈ ve tehꞈ maˍ laˇ˗aw laˇ?
-
Yaˬhoˉvaˬ leh yawˇ ve Yaˇ hpu ve awˬ lawn htaꞈ caˉ daꞈ ve chaw yaˇ awˬ tehˬ ve shiˍ tuˬ, yawˇ ve Shaˉhkiˆhkanˍ ve chaw htaꞈ ca hto toˇ tcuh ve yoˬ. Nawˬ awˬ lawn chi shiˍ htaˇ, hkʼaˬ hkʼe dawˇ ve le?
6. Ngaˬ hui haꞈ daꞈ ve
Liꞈ hpu hkʼaw maˍ laˇ ve, Hkriꞈ yaˇ teˇ gʼaˇ le le lehˬ awˬ to hkʼaw cawˬ ve awˬ hkʼeun htaꞈ shuˍ ve yoˬ. 1 Kawˇrenˍhtuˆ liꞈ 12:25, 26 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Awˬ viˉ awˬ nyi Hkriꞈ yaˇ tuꞈ hkanˍ ve htaꞈ gʼa hpuˇ htaˇ, awˬ tehˬ ve Hkriꞈ yaˇ hkʼaˬ hkʼe te ve le?
-
Yaˬhoˉvaˬ ve Shaˉhkiˆhkanˍ ve chaw awˬ tehˬ haꞈ daꞈ ve tehꞈ nawˬ gʼa mawˬ ve aˬ htoꞈ ma cawˬ ve le?
Teˇ kaˬ kaˬ lo Yaˬhoˉvaˬ ve Shaˉhkiˆhkanˍ ve chaw tuꞈ ve hkanˍ ve gʼa hpuˇ htaˇ, awˬ nu ve teˇ kaˬ lo chehˇ ve Shaˉhkiˆhkanˍ ve chaw laꞈ haˉ ga daꞈ ve yoˬ. Tawˇ pa haˉ teˇ maˬ htaꞈ nyi tuˬ, VDO hpaw sheˍ. Peuˬ leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ ve Shaˉhkiˆhkanˍ ve chaw hkʼaˬ hkʼe te ga daꞈ ve le? Chi ve lehˬ yawˇ hui awˬ tehˬ awˬ na haꞈ daꞈ ve tehꞈ hpeuꞈ maw laˇ˗aw laˇ?
Awˬ tehˬ ve Hkriꞈ yaˇ lehˬ ga laˇ tuˬ loˍ ve chaw htaꞈ haꞈ pehnˇ ve hkʼaw ga piˇ ve
Chaw teˇ hpaˍ kʼoˆ ve: “Yaˬhoˉvaˬ ve Shaˉhkiˆhkanˍ ve chaw lehˬ bon moˍ awˬ suhˉ hpehꞈ ve yoˬ.”
-
Liꞈ hpu hkʼaw kʼoˆ laˇ ve, Yaˬhoˉvaˬ lehˬ yawˇ htaꞈ oˉ kʼoˍ pui ve chaw htaꞈ yawˇ ve shaˉ hkiˆ hpehꞈ ve tehꞈ hkʼaˬ htaˆ tanˬ kuˬ ve le?
A yeˇ uiˍ ve awˬ lawn
Yaˬhoˉvaˬ ve Shaˉhkiˆhkanˍ ve chaw awˬ tehˬ ve Hkriꞈ yaˇ hpehꞈ ve yoˬ. Ngaˬ hui miˬ guiˬ hkʼa peu˗eˬ hkʼoˆ teˇ yehˬ kʼa hkʼaw ve chaw hkʼe hpehꞈ ve yoˬ. Ngaˬ hui ve yonˍ hkʼaˇ Liꞈ hpu hkʼaw laˬ ve, leh ngaˬ hui Yaˬhoˉvaˬ htaꞈ caˉ daꞈ ve awˬ tehˬ ve awˬ lawn shu htaꞈ hto piˇ ve yoˬ.
Kʼawꞈ gʼaꞈ na ve
-
Aˬ htoꞈ ma pa taw ngaˬ hui a shu yawˇ awˬ to htaꞈ Yaˬhoˉvaˬ ve Shaˉhkiˆhkanˍ ve chaw tehꞈ kuˬ ve le?
-
Ngaˬ hui awˬ tehˬ awˬ na haꞈ daꞈ ve tehꞈ hkʼaˬ hkʼe te hpeuꞈ maw daꞈ ve le?
-
Nawˬ dawˇ kʼo, Yaˬhoˉvaˬ ve Shaˉhkiˆhkanˍ ve chaw awˬ tehˬ ve Hkriꞈ yaˇ hpehꞈ ve laˇ?
Kʼawꞈ caˉ nyi gʼa ve
Ngaˬ hui ve awˬ lawn kʼawꞈ shiˍ maˇ la tuˬ, VDO nyi gʼa ve.
Yaˬhoˉvaˬ ve Shaˉhkiˆhkanˍ ve chaw shu htaꞈ aˬ htoꞈ ma awˬ tehˬ ve awˬ lawn hpeuꞈ maw piˇ ve le?
Gʼuiˬ sha ve chaw Gʼuiˬ sha ve awˬ meh htaꞈ chiˇ uiˍ chiˇ mvuh ve (7:08)
Yaˬhoˉvaˬ ve Shaˉhkiˆhkanˍ ve chaw htaꞈ caˉ daꞈ ve awˬ lawn, nawˬ kʼawꞈ shiˍ gaˇ ve aˬ htoꞈ ma cawˬ sheˍ ve le?
“Yaˬhoˉvaˬ ve Shaˉhkiˆhkanˍ ve chaw htaꞈ caˉ daꞈ ve na hkawˇ” (Vehˆsaiˉ hkʼaw ve awˬ lawn)
Sa˗te˗feˇ awˬ nu ve chaw ceuˬ htaꞈ canˇ leh dawˆ piˇ ve yoˬ. Yaꞈ hkʼaˇ, yawˇ Yaˬhoˉvaˬ ve Shaˉhkiˆhkanˍ ve chaw htaꞈ shiˍ daꞈ la htaˇ, a shaꞈ teꞈ hkʼaˇ pa gʼa ve yoˬ. Yawˇ ve awˬ lawn htaꞈ gʼaw nyi sheˍ.
“Ngaˬ haiˬ jaˇ ve chaw hpehꞈ jaw ve” (Shaw nyi kuiˬ Taꞈ yehˬ 2015 hkʼawꞈ ha pa 7 maˬ 1 nyi)
a Liꞈ hpu hkʼaw maˍ ve awˬ lawn teˇ hpaˍ htaꞈ kʼoˆ maˍ tuˬ 1879 C.E. htaˇ, Yaˬhoˉvaˬ ve Shaˉhkiˆhkanˍ ve chaw Shaw nyi kuiˬ Taꞈ yehˬ liꞈ te tawˆ la ve yoˬ.
b Daˍyeˍlaˆ liꞈ 12:4 (MGS): “Chi htaꞈ pa taw Daˍyeˍlaˆ˗oˬ, awˬ leh meuˇ ve awˬ nyi awˬ haˉ teˇ hpaˍ gaˬ la htaˇ hkʼa gaˬ, liꞈ htaꞈ hoˆ taˍ leh hkʼa dehꞈ yinˉ tcuhˉ taˍ˗oꞈ. Chaw laiˉ gʼaˇ lehˬ liꞈ chi htaꞈ hkʼa dehꞈ chaˬ nyi leh, awˬ tehˬ ve cuˇ yiˍ hkʼa biˇ cawˬ tuˬ yoˬ.”
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
