KĨTHOOMO KĨA 19

Rĩ, Akũũjĩ Ba Jehova Kamma Nĩ Athingati Ba Kristũ?

CHETHA

Tũrĩ Akũũjĩ ba Jehova, nĩtwĩtĩkagia tũrĩ Akristũ ba mma. Nĩkĩ? Tegeera Mũsingi jwa wĩtĩkio bwetũ, riĩtwa rĩrĩa rĩtwathũraga na bangĩ, na wendo bũrĩa twonanagia kĩrĩ muntũ na ũngĩ.

1. Nĩmbi mũsingi jwa wĩtĩkio bwa Akũũjĩ ba Jehova?

Jesũ augĩre: “Ruteto rwaku [Murungu] niru umma.” (Johana 17:17) O ta Jesũ, Akũũjĩ ba Jehova nĩbekĩte mũsingi jwa wĩtĩkio bwao kĩrĩ Rũteto rwa Mũrungu. Cũnkũũna karũgono gatwegie tũrĩ Akũũjĩ ba Jehova ntukũne cietũ. Mĩakene ya 1870, gakundi ka aritwa ba Bibiria nĩkaambĩrĩĩrie gũcũnkũũna bwega Bibiria. Beekaga mũsingi jwa wĩtĩkio bwao kĩrĩ jarĩa yaugaga, kinya kethĩra jarĩa beetĩkagia jatagwatanagĩra na nkuagaya cia kanisa. Rĩu, barambia kwĩra bangĩ mma iu cia Bibiria. a

2. Nĩkĩ tũciĩtaga Akũũjĩ ba Jehova?

Jehova etaga athathayia baawe Akũũjĩ tontũ nĩbaragia ũmma bũmwegie. (Ahibirania 11:4–12:1) Ngerekano, ĩgiita rĩa karaaja Mũrungu erĩre antũ baawe: “Bwi nibwi akuuji bakwa.” (Thooma Isaya 43:10.) Jesũ etagwa “mukuuji wa gwitikika.” (Kugwurirwa 1:5) Kwou, mwakene jwa 1931 nĩtwambĩrĩĩrie gwĩtwa Akũũjĩ ba Jehova. Na nĩtwikumagĩria gwĩtwa riĩtwa rĩu.

3. Nĩatĩa Akũũjĩ na Jehova baigerekanagia na wendo bwa Jesũ?

Jesũ neendete aritwa baawe mono na kwou aabonaga ta antũ ba nja yaawe. (Thooma Mariko 3:35.) O ũu nou Akũũjĩ ba Jehova bethĩrĩtwe na ũrũmwe, nthĩgũrũne yonthe. Nĩkĩo gĩtũmi twĩtanaga mũtaana na mwarĩ-wa-baaba. (Filemona 1, 2) Kinya nĩtwathĩkagĩra waatho bũbũ: “Endanageni na aana bonthe ba Baaba wetu.” (1 Petero 2:17) Akũũjĩ ba Jehova nĩbonanagia wendo bũu na njĩra inyingĩ, ta gũtethia Akũũjĩ bangĩ nthĩgũrũne yonthe ĩgiita rĩa thĩĩna.

ĨNJA NKŨRŨKI

Iritane nkũrũki bwegie rũgono rwa Akũũjĩ ba Jehova, na wone ũrikithia nkũrũki atĩ kamma tũrĩ athingati ba Kristũ.

Mũsingi jwa wĩtĩkio bwa Akristũ ba mma nĩ Bibiria na nĩberaga bangĩ bwegie wĩtĩkio bwao

4. Mũsingi jwa wĩtĩkĩo bwetũ nĩ Bibiria

Jehova neeranĩte atĩ ũmma bwa Bibiria bũrĩngĩgwũrwa. Thooma Danieli 12:4, rĩu bwarĩĩrie kĩũria gĩkĩ:

Nĩmbi ‘biringiongereka’ kĩrĩ antũ ba Mũrungu o ũrĩa barĩngĩĩta na mbere gũcũnkũũna Bibiria?

Ona ũrĩa gĩkundi kĩa aritwa ba Bibiria, ũmwe waao arĩ Charles Russell, bairitanĩre Rũteto rwa Mũrungu. Tega VIDIO, rĩu bwarĩĩrie kĩũria gĩkĩ kĩthingatĩte

VIDIO: Gũcookia Kaĩrĩ Mma Cia Bibiria (7:45)

Kĩrĩ vidio, nĩatĩa Charles Russell na bau bangĩ baagwatanĩrĩte nabo bairitanĩre Bibiria?

Ũramenya?

Magiita jamwe, nĩtũgarũraga jamwe ja jarĩa twĩtĩkĩtie. Nĩkĩ? O ta ũrĩa into bĩũmbaga kwonekana bwega nkũrũki riũa rĩaumĩra na rĩeta na mbere kwaara, nou Mũrungu atũgwũragĩra Rũteto rwawe ĩtagaaria kwa ĩtagaaria. (Thooma Njuno 4:18.) Kwou kinya kethĩra Bibiria ĩtĩgarũkaga, nĩtũgarũraga mawĩtĩkio jeetũ o ũrĩa tũgũcĩukĩrwa nĩ Bibiria nkũrũki.

5. Tũtũũraga kũringana na riĩtwa rĩetũ

Nĩkĩ tweetĩrwe Akũũjĩ ba Jehova? Tega VIDIO, rĩu bwarĩĩrie kĩũria gĩkĩ kĩthingatĩte.

VIDIO: Riĩtwa Rĩrĩa Rĩonanagia Nĩtuĩ Baaũ (2:40)

Nĩkĩ riĩtwa Akũũjĩ ba Jehova rĩkwagĩra?

Nĩkĩ Jehova athuurĩte antũ baa Akũũjĩ baawe? Nĩ tontũ kũrĩna morongo jamaingĩ jaugĩtwe jamwegie, na kwou nakwenda bamũmenyithania arĩ Mũrungu wa mma. Ona jaĩrĩ ja morongo jau.

Ndini imwe iritanaga athingati baacio atĩ Mũrungu endaga batumĩra mĩngˈuanano kĩrĩ ũthathayia bwao. Amwe na bũu, thooma Mantu ja Alawi 26:1, rĩu bwarĩĩrie biũria bibi:

Ũmma nĩ bũrĩkũ? Nĩatĩa Jehova aigagua bwegie mĩngˈuanano?

Atongeeria bamwe ba ndini baritanaga atĩ Jesũ nĩ Murungu. Amwe na bũu, thooma Johana 20:17, rĩu bwarĩĩrie biũria bibi:

Ũmma nĩ bũrĩkũ? Rĩ, Mũrungu na Jesũ nĩ muntũ ũmwe?
Nĩatĩa ũkwigua wamenya atĩ Jehova natũmĩte Akũũjĩ baawe, nĩkenda batũmĩĩria ũmma bũmwegie na bwegie Mũtaanowe?

6. Nĩtwendene twingwa

Bibiria ĩngˈuanithanagia Akristũ na irũngo bia mwĩrĩ jwa muntũ. Thooma 1 Akorintho 12:25, 26, rĩu bwarĩĩrie biũria bibi:

Nĩatĩa Akristũ ba mma babuĩrĩte kũthithia rĩrĩa Akristũ bangĩ bakũthangĩka?
Nĩmbi woneete bwegie wendo gatĩgatĩne ka Akũũjĩ ba Jehova?

Rĩrĩa Akũũjĩ ba Jehova bathangĩka gĩcigone kĩmwe kĩa nthĩgũrũ, Akũũjĩ bangĩ nthĩgũrũne yonthe nĩbaritaga ũtethio ntũti. Nĩkenda wona ngerekano ĩmwe, tega VIDIO. rĩu bwarĩĩrie kĩũria kĩrĩa kĩthingatĩte.

VIDIO: Gĩcigo kĩa Haiti Kũgwatwa nĩ Kĩurutani kĩa Matthew (5:29)

Nĩatĩa ngũgĩ ya kwejana ũtethio ya Akũũjĩ ba Jehova ĩrĩ ũrikithia bwa wendo?

Athingati ba mma ba Kristũ nĩbonagia barĩa barĩ na ũbatu wendo

ANTŨ BAMWE BAUGAGA: “Akũũjĩ ba Jehova nĩ ndini ĩnjerũ.”

Nĩrĩ Jehova aambĩrĩĩrie gwĩta athathayia baawe Akũũjĩ?

NA NJĨRA ĨNKUĨ

Akũũjĩ ba Jehova kamma nĩ athingati ba Kristũ. Tũrĩ nja ya athathayia ba nthĩgũrũne yonthe, mũsingi jwa wĩtĩkio bwetũ nĩ Bibiria na nĩtũmenyithanagia ũmma bwegie Jehova.