OHUDHERA 19

Anamona a Yehova makiristawu eebaribari?

ORUMIHE

Iyo Anamona a Yehova nnorumedha wihina niri makiristawu ebaribari, mwaha wa ddi? Yohudhera ela, nnere woona winadhela dhithu nnarumedhihu, mwahaya bwaddi ndhe nithukulege ndina na Anamona a Yehova ni makalelo nnonihihu wi nnodhivelana mmodha ni mukwaye.

1. Dhithu dhinarumedha Anamona a Yehova dhinadhela wuuvi?

Yesu ohuwoga: ‘Madhu [a Mulugu] bebaribari.’ (João 17:17) Ninga Yesu, dhohudhiha ni dhorumedha dhehu dhinadhela Mmadhuni a Mulugu. Woone makalelo nnaharihu mweddelo oyo okuma yaka ya 1870. Mudhidhi yole nikuru naathu opwasedha omuhudhera Bibliya. Aliwa yafuna enone ethu anahudhiha Bibliya. Yonelamo ethuya, aliwa yorumedha, naarive akala yohiyana ni dhithu dhahudhiha gereja dhimodha. Nuwindo obajha wahudhiha ebaribari eyo athu amodhaya. a

2. Mwahaya bwaddi nigiithaniwa Anamona a Yehova?

Yehova anawithana athu ale enamwebedha ninga anamona aye mwaha enowoga ebaribari wodhela oliye. (Hebreus 11:4–12:1) Motajhiha, yaka dha mundduli, Mulugu ahiwoga ni nlogo naaye egi: ‘Nyu muli anamona aaga.’ (Omwileri Isaías 43:10.) Yesu anithaniwa ‘Namona Oororomeleya.’ (Apocalipse 1:5) Bumwahaya yaka ya 1931 iyo othukula ndina Namona a Yehova. Nnohagalala vanlubale withaniwa ni ndina nno.

3. Anamona a Yehova enatajhiha aavi odhivela wa Yesu?

Yesu owadhivela vanlubale anamahara aye ofiyedha wawonaga ninga amudhaaye. (Omwileri Marcos 3:35.) Emodhave, Anamona a Yehova bowiwanana ni emudhi eli wapela elabo yatene. Bumwahaya aliwa egithanana addibila ni arogola. (Filémon 1, 2) Iyo nnowiwelela nlamulo nna: ‘Mwadhivelege addibilinyu,’ a elabo yatene. (1 Pedro 2:17) Anamona a Yehova enowakwaneliha madhu ala. Aliwa enowadhivela addibiliwa eli mwilaboni yatene, thabwa-tabwa mudhidhi yahowelaga nikavihero.

OHUDHERE DHTHU DHIMODHA

Onone thalako dhimodha wodhela Anamona a Yehova ni woone wi aliwa makiristawu eebaribari.

Makiristawu ebaribari dhithu dhinarumedhiwa dhinadhela mBibiliyani ni enowahudhiha amodha dhithu enahudheriwa

4. Dhithu nnarumedhihu dhinadhela mBibiliyani

Yehova ahipaganya wihina makalelo ehu omoonelamo Bibliya yerege othabwa wooniwa. Mmwileri Daniel 12:4 vamodha nnota, mwamala muthapanyedhe nikoho nnaharela:

Nlogo na Yehova nasayelaga obe naamuhudheraga Bibliya, ‘enathabwege winjhiva ddiniya’?

Woone makalelo nikuru naathu, muwari mwa aliwa mulobwana anithaniwa Charles Russell, yahudheriwa Madhu a Mulugu. Osugwe VIDIYU, mwamala muthapanyedhe makoho enaharela:

VIDIYU: Ebaribari ya mBibiliyani enobubuhuliwa (7:45)

Vidiyu nonilihu, makalelo baani Charles Russell ni amodhaya yamuhudheriwa Bibliya?

Wahinona?

Mudhidhi mmodhaya iyo nnosaddula makalelo ehu omoonelamo Bibliya. Mwaha wa ddi? Mwaha wi Mulugu ananikavihera wawonelamo Madhu aye vang’ono-vang’ono. Enoligana ni nduwa naakumaga vang’ono-vang’ono iyo obajha woona elabo yatene. (Omwileri Provérbios 4:18.) Ebaribari wihina Bibliya kanasadduwa, mbwenye nonelagamo pamadhene anawogiye nnosaddula dhorumedha dhehu.

5. Anamona a Yehova: egumi yehu enowiwanana ni ndina nehu

Mwahaya bwaddi ndhe nsakulege ndina na Anamona a Yehova? Osugwe VIDIYU, mwamala muthapanyedhe makoho enaharela.

VIDIYU: Ndina nnanitonyihedha (2:40)

Mwahaya bwaddi ndina nna na Anamona a Yehova ndhe nikalege nofwanelela?

Mwahaya bwaddi Yehova adhe asakulege athu wihina akale anamona aye? Mwaha anamona ayo yerege omwakihedha Yehova mwa dhithu enamotera athu owinjhiva. Nnafuna none dhowoota bili.

Gereja dhimodha dhinahudhiha wi Mulugu anafuna nilabihedhege dhikwamuthu naamwebedhaga. Eyo ebaribari? Mmwileri Levítico 26:1, mwamala muthapanyedhe makoho enaharela:

Ebaribari wi Mulugu anafuna nilabihedhege dhikwamuthu wihina nimwebedhege oliye? Yehova anonelamo aavi dhikwamuthu ndha?

Gereja dhimodha dhinahudhiha wihina Yesu di Mulugu. Eyo ebaribari? Mmwileri João 20:17, mwamala muthapanyedhe makoho enaharela:

Ebaribari wihina Yesu di Mulugu? Yesu ni Mulugu muthu mmodhave?
Mulugu ohusakula nlogo wihina nawaddelege athu ebaribari ya mwanaye. Ononamo aavi mwaha woonona muselu oyo?

6. Nnodhivelana mmodha ni mukwaye

Bibliya anowaliganiha makiristawu ni dhipaddi dhohiyana dha yano dha mwili wa muthu. Mmwileri 1 Coríntios 12:25, 26, mwamala muthapanyedhe makoho enaharela:

Mukiristawu ebaribari anafwanelela ere ddi?
Ethu baani woniliwe wodhela odhivela enna Anamona a Yehova?

Anamona a Yehova adhilabo dhimodha yahowelaga nikavihero, addibiliwa a dhilabo yatene enofuna wakavihera. Wegi woone yopadduwa, osugwe VIDIYU, mwamala muthapanyedhe makoho enaharela.

VIDIYU: Elabo yo Haiti yahifwanyiwa furakawu Matthew (5:29)

Nihoona wihina yapadduwa ethu-sithu, Anamona a Yehova enowaloba addibila enakavihera yapadduwa ng’ovi wihina ekavihere. Eyo enoniha aavi odhivela enniwana?

Makiristawu eebaribari enowawoniha odhivela ale enahowela okaviheriwa

ATHU AMODHA ENAWOGA YEGI: “Anamona a Yehova gereja emodhaya exa ekumelele ovanene.”

Yehova anawithana adhaari aye ninga anamona aye okuma mudhidhi baani?

OVIRISEDHA

Anamona a Yehova makiristawu ebaribari. Nili emudhi ya adhaari a Yehova wapela elabo yatene, dhithu nnarumedhihu dhinadhela mBibliyani teto nnowahudhiha amodha wodhela Yehova.