ISAMBILILO 19
Uzye Inte zya kwe Yehova Awina Klistu Wacisinka?
Swe Nte zya kwe Yehova, twasuwila ukuti swe wina Klistu wa cisinka. Amulandu ci? Apinye pano pasimpwa ivizumilo vitu? Amulandu ci wuno tukayitila ukuti swe Nte zya kwe Yehova? Swinya tukalanjizya wuli ukuti twakundana?
1. Uzye ivizumilo vya Nte zya kwe Yehova vyasimpwa pa cani?
E Yesu walanzile ukuti: “Izwi lya kwe [Leza] alyakusimicila.” (Yohani 17:17) Vyonsinye vino Inte zya kwe Yehova zyazumilamo vyafuma mwe Baibolo, ndi wulyanye vino calinji kwe Yesu. Kucakulolelako, lola vino calinji ukufuma na kali. Mu ma 1870 iwumba lya wantu wa cisinka watalisile ukusambilila Baibolo pakuti wivwicisye vino yikasambilizya. Wazumizile mwe vino yikalanda nanti acakuti ivizumilo vyawo ivya mu Baibolo vyapusine ni vizumilo vya mu macalici. Mukupita kwa mpindi watalisile ukunenako wanji icisinka ca mu Baibolo cino wasambilizile. a
2. Amulandu ci wuno tukayitila ukuti Inte zya kwe Yehova?
E Yehova akakwita wakapepa wakwe ukuti Inte amuno wakalanda icisinka pe weliwe. (Waheberi 11:4–12:1) Ku cakulolelako, mu mpindi zya kunsizi e Yehova wawuzizye awawomvi wakwe ukuti: ‘Mwe Nte zyane.’ (Wazya Ayizeya 43:10.) Ne Yesu nye akakwitwa ukuti ‘Inte ya Cisinka.’ (Ukuwumbulika 1:5) Acino mu 1931 twizile atusolapo ukutalika ukwitwa ukuti Inte zya kwe Yehova. Twawa ni nsansa nkaninye ukwitilwa pe lyo-o inzina.
3. Uzye Inte zya kwe Yehova wakakolanya wuli ulukundo lwa kwe Yesu?
E Yesu wakunzile nkaninye awasambilizi wa kwe ica kuti wawalolanga vye ngati awalupwa lwakwe. (Wazya Marko 3:35.) Wonye avino cawa na ku Nte zya kwe Yehova insi yonsinye, walemenkana swinya alupwa longa. Wo-o awuli mulandu wuno tukakwitilana ukuti awanawitu na wankazi. (Filimoni 1, 2) Cinji aca kuti tukakonka isundo lya kuti: “Wino wakunda Leza akunde numunyinanye.” (1 Yohani 4:21) Inte zya kwe Yehova wakalanjizya ukuti wakundana mu nzila indekane ndekane, ndi vino ukwavwa wakapepa wawuye wano wakulonda uwavwilizyo.
SAMBILILA IVICILE PA-A
Sambilila na vinji pe kuno Inte zya kwe Yehova zyafumilila, na vinji vino vyalenga tusinincizye ukuti swe wina Klistu wa cisinka.
Awina Klistu wacisinka wazumila ivya mu Baibolo swinya wakawizizyako na wanji
4. Vino twazumilamo vyafuma mu Baibolo
E Yehova walandizile lyankani ukuti tuliwaya tukwivwicisya icisinka ca mu Baibolo. Wazyani Daniel 12:4, NWT, nu kulanzyanya lyo-o iwuzyo:
-
Acani cino ‘cilivula’ mu wantu wa kwe Leza nga watwalilila ukuyisambilizya amawaliko?
Lola vino awasambi wamwi awe Baibolo, pano palinji ne Charles Russell, wasambilizile izwi lya kwe Leza. Tambani e VIDYO, nu kulanzyanya ya-a amazyo.
-
Ukulingana na vino tetwatamba mwe vidyo, uzye e Charles Russell na wawuye wasambililanga wuli e Baibolo?
Uzye umanyile?
Impindi zimwi tukapiluka mwe vino twazumizile kali. Amulandu ci? Wulyanyene vino umusanya wukaya wukuwomelako nga cakuti wafuma, avino ne Leza akatwavwa ukwivwicisya katici katici icisinka cino cawa mwi Zwi lyakwe. (Wazya Imilumbe 4:18.) Kweni e Baibolo yisipiluka, lelo nga twivwicisya cimwi tukapiluka mwe vino tukasambilizya.
5. Tukacita ivintu ukulingana ni zina litu
Amulandu ci wuno twasolelapo ukwitwa ukuti Inte zya kwe Yehova? Tambani e VIDYO, nu kulanzyanya ya-a amawuzyo.
-
Amulandu ci wuno izina lya kuti Inte zya kwe Yehova lyayanila?
Amulandu ci wuno e Yehova wasolela awantu ukuwa Inte zyakwe? Pa kuti wasambilizya icisinka pe Yehova, e Leza wa kusimicila. Amuno kwawa ivivule vino wamuwipizya. Ku cakulolelako lola ivintu viwili vino wakamuwipizya.
Awa mu mipepele yimwi wakasambilizya awantu ukuti e Leza akalonda wawomvya amakolania pakumupepa. Wazyani Levitikasi 26:1, nu kulanzyanya ya-a amawuzyo:
-
Uzye icisinka acilikwi? Uzye e Yehova akayivwa wuli pa kupepa amakolania?
Wasimapepo wamwi wakasambilizya awantu ukuti e Yesu awili e Leza. Nomba, wazyani Yohani 20:17, nu kulanzyanya ya-a amawuzyo:
-
Uzye icisinka acilikwinye? Uzye e Yesu we Leza?
-
Uzye ukakwivwa wuli ukumanya ukuti e Yehova watuma Inte zyakwe ukuti zyasambilizya icisinka pe weliwe na pa mwana wakwe?
6. Twakundana
E Baibolo yikakolanya awina Klistu ku vyawi vya kumuwili. Wazyani 1 Wakorinte 12:25, 26, nu kulanzyanya ya-a amawuzyo:
-
Uzye awina Klistu wacisinka wazipizile ukucita wuli nga cakuti awina Klistu wawuye wakucula?
-
Avyani vino walola pa Nte zya kwe Yehova vino vikalanjizya ukuti wakalanjizya ulukundo?
Nga cakuti wa Nte ku nsi yimwi wakucula, wa Nte wawuye wasilema na kwi sote ukuya mukuwavwa. Pakulola icakulolelako cimwi, tambani e VIDYO. Nu kulanzyanya lyo-o iwuzyo.
-
Uzye wo-o vino Inte zya kwe Yehova wakayipelesya ukwavwilizya wano waponezilwe nu wusanso vikalanjizya cani?
Awina Klistu wacisinka wakakwavwako wano wasowezizye
WAMWI WAKATI: “Mungawa wuli Inte zya kwe Yehova nge mukatela amumulolapo?”
-
Ampindi ci pano e Yehova watalisile ukwita wakapepa wakwe ukuti Inte?
IVISINKA VIKULU
Inte zya kwe Yehova awakapepa wacisinka. Swensinye asa mulandu na kuno twikala swe lupwa longa ulwakapepa wano wazumila ivya mu Baibolo swinya tukasambilizya wanji icisinka pe Yehova.
Avyani vino wasambilila
-
Amulandu ci wuno twasolelapo ukwitwa ukuti Inte zya kwe Yehova?
-
Uzye tukalanjizya wuli ukuti twakundana?
-
Uzye ukulola ukuti Inte zya kwe Yehova awakapepa wacisinka?
MANYILAPO NA VINJI
Manyilapo na vinji pe kuno twafumilila.
Vino Inte zya kwe Yehova Wakalanjizya Isuwilo Uluwali 1: Ukufuma mu Mfinzi (1:00:53)
Lola vino Inte zya kwe Yehova zyacita pakulanda ivisambilizyo vya wufi vino awantu wakasambilizya.
Zana ivyasuko kwe vyonsinye vino ukalonda ukumanya pa Nte zya kwe Yehova.
“Amawuzyo Yano Awantu Wavulila Ukukolowozya pa Nte zya kwe Yehova” (icipande ca pa Webusayiti)
E Stephen wapasile nkaninye awantu wankanda yinji ica kuti wawasansanga nu kuwasansa. Lola cino waweni mu Nte zya kwe Yehova cino calenzile ukuti apiluke.
“Uwumi Wane Wayanga Wukuwipilako vye” (Ulupungu lwa kwa Kalinda, July 1, 2015)
a Awantu wa kwe Yehova watalisile ukufumya e magazine ya Ulupungu lwa kwe Kalinda mu 1879 pakulondolola vino Baibolo ikasambilizya.
Mungakunda na vyoo
AMAWUZYO YANO AWANTU WAKAWUZYAPO SANA
Uzye Isambililo lye Baibolo Ilya Nte zya kwe Yehova Lyawa Wuli?
Mwe lyoo isambililo lino Inte zya kwe Yehova wakasambilila na wantu uwiilanye, mungawomvya e Baibolo iyili yonsinye ino mukulonda. Mungitako na wali wonsinye wano mukulonda.
