LECCIÓN 19
¿Á na̱ testigo Jehová kúú na̱ cristiano na̱ nda̱a̱?
Ndi̱ʼi̱ na̱ testigo Jehová kándíxandi̱ ña̱ kúúndi̱ cristiano na̱ nda̱a̱. ¿Nda̱chun? Ná ka̱ʼa̱nyó xa̱ʼa̱ ndáa míí ka̱na ña̱ kándíxandi̱, saátu ki̱vi̱ ña̱ kúúmiíndi̱ ta saátu kotoyó ndáa ki̱ʼva náʼa̱ndi̱ ña̱ kúʼvi̱-inindi̱ xínitáʼanndi̱.
1. ¿Ndáa míí va̱xi ña̱ kándíxa na̱ testigo Jehová?
Ta̱ Jesús ni̱ka̱ʼa̱nra ña̱yóʼo xíʼin Ndióxi̱: “Tu̱ʼún ña̱ nda̱a̱ kúúña” (Juan 17:17). Ndi̱ʼi̱ na̱ testigo Jehová kéʼéndi̱ nda̱a̱ táki̱ʼva ke̱ʼé ta̱ Jesús, saáchi nu̱ú tu̱ʼun Ndióxi̱ va̱xi ña̱ kándíxandi̱. Koto ama ki̱xáʼa íyo na̱ testigo Jehová na̱ íyo tiempo vitin. Tá ku̱i̱ya̱ 1870 iin tiʼvi na̱ xi̱kaʼvi Biblia ki̱xáʼana nándukú va̱ʼana xa̱ʼa̱ tu̱ʼun Ndióxi̱. Ta ña̱ xi̱kandíxana va̱xiña nu̱ú Biblia, ni va̱ása níxikitáʼan ña̱yóʼo xíʼin ña̱ sánáʼa̱ na̱ veʼe-ñu̱ʼu. Tándi̱ʼi ki̱xáʼana nátúʼunna xíʼin inkana xa̱ʼa̱ ña̱ nda̱a̱ ña̱ sa̱kuaʼana. a
2. ¿Nda̱chun naníndi̱ testigo Jehová?
Jehová káʼa̱nra na̱ ndásakáʼnu miíra kúúna testigora saáchi nátúʼunna ña̱ nda̱a̱ xa̱ʼa̱ra (Hebreos 11:4-12:1). Tá kúú, tá tiempo xi̱naʼá Ndióxi̱ ni̱ka̱ʼa̱nra ña̱yóʼo xíʼin na̱ ñuura: “Ndóʼó kúú testigoi̱” (kaʼvi Isaías 43:10). Ta saátu káʼa̱nna xíʼin ta̱ Jesús ña̱ kúúra “testigo ta̱ nda̱kúní-ini” (Apocalipsis 1:5). Ña̱kán, tá ku̱i̱ya̱ 1931 nda̱kaxinndi̱ ña̱ kunaníndi̱ testigo Jehová. Ta kúsi̱íní-inindi̱ ña̱ naníndi̱ saá.
3. ¿Ndáa ki̱ʼva náʼa̱ na̱ testigo Jehová ña̱ kúʼvi̱-inina xínina inkana nda̱a̱ táki̱ʼva ke̱ʼé ta̱ Jesús?
Ta̱ Jesús xi̱kuʼvi̱ní-inira xi̱xinira na̱ discípulora, ta nda̱a̱ táki̱ʼva ni̱xi̱yo na̱ veʼera saá ni̱xi̱yona nu̱úra (kaʼvi Marcos 3:35). Ndi̱ʼi̱ na̱ testigo Jehová va̱ʼaní kítáʼanndi̱ xíʼin ndiʼi na̱ testigo na̱ íyo iníísaá ñuyǐví. Xa̱ʼa̱ ña̱kán káʼa̱nndi̱ xíʼin táʼanndi̱ “ñani” xíʼin “ku̱ʼva” (Filemón 1, 2). Ta saátu ndíku̱nndi̱ ña̱ consejo yóʼo: “Kuʼvi̱ní-inindó kunindó ndiʼi na̱ kítáʼan ndásakáʼnu Ndióxi̱ xíʼinyó” (1 Pedro 2:17). Ndi̱ʼi̱ na̱ testigo Jehová ku̱a̱ʼá ki̱ʼva náʼa̱ndi̱ ña̱ kúʼvi̱-inindi̱ xínitáʼanndi̱, iin ña̱yóʼo kúú ña̱ chíndeétáʼanndi̱ xíʼin na̱ hermanondi̱ na̱ íyo iníísaá ñuyǐví tá yáʼana nu̱ú tu̱ndóʼo.
NÁ SAKUAʼAKAYÓ XA̱ʼA̱ÑA
Ná kunda̱a̱ka-iniyó xa̱ʼa̱ na̱ testigo Jehová ta kotoyó ndáaña kúú ña̱ náʼa̱ ña̱ ndixa kúúna cristiano.
Nu̱ú Biblia va̱xi ña̱ kándíxa na̱ ndixa kúú cristiano ta káʼa̱nna xa̱ʼa̱ ña̱yóʼo xíʼin inka na̱ yiví.
4. Nu̱ú Biblia va̱xi ña̱ kándíxandi̱
Jehová ni̱ka̱ʼa̱nra ña̱ káxiní xa̱a̱ na̱ yiví kunda̱a̱-inina xa̱ʼa̱ ña̱ nda̱a̱ ña̱ va̱xi nu̱ú Biblia. Kaʼvindó Daniel 12:4 ta ka̱ʼa̱nndó xa̱ʼa̱ ña̱yóʼo:
-
¿Ndáaña va̱ʼa kúú ña̱ ndakiʼin na̱ káchíñu nu̱ú Ndióxi̱ tá ná nandukú va̱ʼana xa̱ʼa̱ ña̱ káʼa̱n Biblia?
Koto ndáa ki̱ʼva xi̱nandukú va̱ʼa na̱ xi̱kaʼvi Biblia xa̱ʼa̱ tu̱ʼun Ndióxi̱, ta xíʼin na̱yóʼo xi̱kitáʼan ta̱ Charles Russell. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva xi̱niyó nu̱ú video, ¿ndáa ki̱ʼva xi̱nandukú ta̱ Charles Russell xa̱ʼa̱ tu̱ʼun Ndióxi̱ ta saátu na̱ xi̱kitáʼan xíʼinra?
¿Á xa̱a̱ xíni̱ún xa̱ʼa̱ ña̱yóʼo?
Sava yichi̱ násamandi̱ ña̱ kándíxandi̱. ¿Nda̱chun? Saáchi Ndióxi̱ chíndeétáʼanra xíʼinndi̱ ña̱ kunda̱a̱-inindi̱ loʼo tá loʼo xa̱ʼa̱ tu̱ʼunra, nda̱a̱ táki̱ʼva kúu tá ku̱a̱ʼa̱n túvi saáchi loʼo tá loʼo kíxáʼa ndátu̱vi ña̱ʼa (kaʼvindó Proverbios 4:18). Ña̱ Biblia va̱ása nása̱maña, soo tá viíka kúnda̱a̱-inindi̱ xíʼin ña̱ káʼa̱nña násamandi̱ ña̱ kándíxandi̱.
5. Ki̱vi̱ndi̱ náʼa̱ña ndáaña kéʼéndi̱
¿Nda̱chun káʼa̱nndi̱ ña̱ naníndi̱ testigo Jehová? Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Nda̱chun va̱ʼaní ña̱ nda̱kaxinna kunanína testigo Jehová?
¿Nda̱chun nda̱kaxin Jehová na̱ yiví ña̱ va̱ʼa koona testigora? Saáchi xa̱ʼa̱ ña̱ káʼa̱nna ku̱a̱ʼání ña̱ vatá xa̱ʼa̱ Jehová, na̱ yiví na̱ nda̱kaxinra ña̱ koona testigora kúú na̱ káʼa̱n ña̱ nda̱a̱ xa̱ʼa̱ra, ta̱ kúú Ndióxi̱ ta̱ nda̱a̱. Ná ka̱ʼa̱nyó xa̱ʼa̱ u̱vi̱ ña̱ vatá ña̱ káʼa̱nna xa̱ʼa̱ra.
Sava na̱ religión sánáʼa̱na ña̱ kúni̱ Ndióxi̱ ña̱ ná kuniñúʼuyó imagen ña̱ ndasakáʼnuyóra. Soo, ¿á ña̱ nda̱a̱ kúú ña̱yóʼo? Kaʼvindó Levítico 26:1 ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva káchi ña̱ versículo yóʼo, ¿ndáaña kúú ña̱ nda̱a̱? ¿Ndáaña ndákanixi̱ní Ndióxi̱ xa̱ʼa̱ ña̱ xíniñúʼuna imagen?
Sava na̱ níʼi yichi̱ nu̱ú na̱ veʼe-ñu̱ʼu sánáʼa̱na na̱ yiví ña̱ ta̱ Jesús kúú Ndióxi̱. Soo, ¿á ña̱ nda̱a̱ kúú ña̱yóʼo? Kaʼvindó Juan 20:17 ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva káchi ña̱ versículo yóʼo, ¿ndáaña kúú ña̱ nda̱a̱? ¿Á iin kúú Ndióxi̱ xíʼin ta̱ Jesús?
-
¿Ndáaña ndákanixi̱níún xa̱ʼa̱ ña̱ ta̱xi Jehová chiñu ndaʼa̱ na̱ testigora ña̱ natúʼunna ña̱ nda̱a̱ xa̱ʼa̱ra xíʼin xa̱ʼa̱ se̱ʼera?
6. Kúʼvi̱-inindi̱ xínitáʼanndi̱
Ña̱ Biblia káʼa̱nña, na̱ cristiano íyona nda̱a̱ táki̱ʼva íyo iin táʼví ku̱ñu na̱ yiví. Kaʼvindó 1 Corintios 12:25, 26 ta ka̱ʼa̱nndó xa̱ʼa̱ ña̱yóʼo:
-
¿Ndáaña xíniñúʼu keʼé na̱ cristiano na̱ nda̱a̱ xa̱ʼa̱ inka na̱ cristiano tá yáʼana nu̱ú tu̱ndóʼo?
-
¿Ndáa ki̱ʼva xítoún ña̱ náʼa̱ na̱ testigo Jehová ña̱ kúʼvi̱-inina xínitáʼanna?
Tá yáʼa na̱ testigo Jehová na̱ íyo inka lugar nu̱ú tu̱ndóʼo, na̱ hermano na̱ íyo iníísaá ñuyǐví ndi̱ku̱n chíndeétáʼanna xíʼinna. Ña̱ va̱ʼa kunda̱a̱-iniyó xa̱ʼa̱ ña̱yóʼo, kotondó VIDEO. Tándi̱ʼi ka̱ʼa̱nndó xa̱ʼa̱ ña̱yóʼo:
-
Xa̱ʼa̱ ña̱ chi̱ndeétáʼan na̱ testigo Jehová xíʼin na̱ ni̱ya̱ʼa nu̱ú tu̱ndóʼo, ¿á ni̱na̱ʼa̱na ña̱ kúʼvi̱-inina xíninana? ¿Nda̱chun ndákanixi̱níún saá?
Na̱ ndixa kúú cristiano náʼa̱na ña̱ kúʼvi̱-inina xínina inkana tá chíndeétáʼanna xíʼinna.
ÑA̱ KÁʼA̱N SAVA NA̱ YIVÍ: “Iin religión ña̱ xa̱áva kúú na̱ testigo Jehová”.
-
¿Ama ki̱xáʼa Jehová káʼa̱nra xíʼin na̱ yiví na̱ ndásakáʼnu miíra ña̱ kúúna testigora?
ÑA̱ XA̱A̱ SA̱KUAʼAYÓ
Na̱ testigo Jehová kúú na̱ cristiano na̱ nda̱a̱. Ndiʼindi̱ na̱ íyo iníísaá ñuyǐví inkáchi ndásakáʼnundi̱ Ndióxi̱, ta nu̱ú Biblia va̱xi ña̱ kándíxandi̱ ta nátúʼunndi̱ xíʼin inkana ña̱ nda̱a̱ xa̱ʼa̱ Jehová.
Ná ndakaʼányó xa̱ʼa̱ ña̱yóʼo
-
¿Nda̱chun nda̱kaxinndi̱ ña̱ kunaníndi̱ testigo Jehová?
-
¿Ndáa ki̱ʼva náʼa̱ndi̱ ña̱ kúʼvi̱-inindi̱ xínitáʼanndi̱?
-
¿Á túviún ña̱ na̱ testigo Jehová kúú na̱ cristiano na̱ nda̱a̱?
NANDUKÚKA XA̱ʼA̱ÑA
Kivi kunda̱a̱ka-iniún xa̱ʼa̱ndi̱.
Los testigos de Jehová: una historia de fe viva. Parte 1: Salen de la oscuridad (1:00:53)
Koto ndáaña vatá ña̱ sánáʼa̱ na̱ veʼe-ñu̱ʼu kúú ña̱ ni̱ka̱ʼa̱n na̱ testigo Jehová xa̱ʼa̱.
Nandukú ña̱ kúni̱ún kunda̱a̱-iniún xa̱ʼa̱ na̱ testigo Jehová.
“Ña̱ kúni̱ na̱ yiví kunda̱a̱-inina xa̱ʼa̱ na̱ testigo Jehová” (Sección ña̱ va̱xi nu̱ú jw.org)
Xa̱ʼa̱ ña̱ xi̱sa̱a̱-ini ta̱ Stephen xi̱xinira inkana ni̱xa̱a̱ra ni̱ki̱ʼvira iin ku̱a̱chi ndeé. Koto ndáaña xi̱nira kéʼé na̱ testigo Jehová ña̱kán va̱ʼa na̱samara ki̱ʼva ña̱ íyora.
“Ku̱a̱ʼání ña̱ va̱ása va̱ʼa xi̱keʼíi̱” (La Atalaya, 1 tí julio ku̱i̱ya̱ 2015)
a Tá ku̱i̱ya̱ 1879 ki̱xáʼandi̱ távándi̱ ña̱ La Atalaya, ta ña̱yóʼo kúú ña̱ xáxaníkandi̱ ndaʼa̱ na̱ yiví.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
