MWAHA 19
Apwanne Anamoona a Yehova Akristu Eeparipari?
Ntoko Anamoona a Yehova, ninneemererya wi hiyaano na Akristu eeparipari. Ntakhara heeni? Muthokororye mathipelo a soororomela sahu, nsina nenlo nnanisuwanyeiha, ni osivela nryaahuno mukina ni mukhwaawe.
1. Soororomela sa Anamoona a Yehova inathipeleya moomi?
Yesu ooloca: “Masu [a Muluku] teeparipari.” (Yohani 17:17) Ntoko Yesu, soororomela sa Anamoona a Yehova inathipeleya Mmasu a Muluku. Ntoko yootakiherya, muthokororye yaweereya ahu ya mutano. Variyari va eyaakha ya 1870, nikhuuru na oohuserya a Piipiliya naahipacerya omuthokororya Piipiliya mwawiiseela. Soororomela saya saathipeleya mwa yeeyo Piipiliya onahusiheiye, naamwi soororomela iho saari soohiyana ni mahusiheryo a ikerexa. Voocharela, awo yaapacerya waaleela akina iparipari sa Mpiipiliyani yaaphwanyaaya. a
2. Ntakhara heeni nryaahuno nsina nawi Anamoona a Yehova?
Yehova onawiichana alapeli awe ntoko anamoona awe woona wi awo annaloca eparipari vooloca sa yoowo. (Ahebri 11:4–12:1) Ntoko yootakiherya, khalai, Muluku aahiloca wa achu awe: “Muri anamoona aka.” (Maalakhanye Isaiya 43:10.) Yesu oniichaniwa “namoona oororomeleya.” (Wupulula 1:5) Mwawiihiiha, mu 1931 naakuxa nsina nawi Anamoona a Yehova. Ninnahakalala okhalano nsina nenla.
3. Anamoona a Yehova anatakiherya hai osivela wa Yesu?
Yesu aanaasivela vancipale oohuserya awe ophiyerya wi awo yaari ntoko amusi awe. (Mwaalakhanye Marko 3:35.) Moolikana, Anamoona a Yehova ari awiiwanana ntoko emusi ya elapo yoothene. Ti nthowa nene nnawiichanaahu mukina ni mukhwaawe munna ni murokora. (Filémone 1, 2) Hiyaano tho ninniiwelela nlamulo nla: “Mwaakhweleke tho anna.” (1 Pedro 2:17) Anamoona a Yehova annooniherya osivela yoola mmikhalelo soohiyana hiyana, ntoko moorweela wa waakhaviherya anna ni arokora aya orukurerya elapo vaavaa anathoiwaaya.
OHUSERYA MWAWIISEELA
Muhuserye sincipale vooloca sa Anamoona a Yehova nave moone sawooniherya sawi hiyaano na Akristu eeparipari.
Akristu eeparipari soororomela saya inathipeleya Mpiipiliyani nave annaloca iho wa akina
4. Soororomela sahu inathipeleya Mpiipiliyani
Yehova aahiloca mwa miririmo wi iparipari sa Mpiipiliyani sahaala wuupululiwa. Mwaalakhanye Daniyeli 12:4, nave voocharela muthokororye nikoho nla:
-
Tiheeni yaahaala ‘waaceereryeya’ mwa achu a Muluku vaavaa yeeraaya etitelele omuthokororya Piipiliya?
Muthokororye mukhalelo nikhuuru na oohuserya a Piipiliya, ophitaanyerya Charles Russell, yaahuseryaaya Masu a Muluku. Moone EXILEMA, nave muthokororye nikoho nnacharela.
-
Mu exilema, Charles Russell ni Oohuserya a Piipiliya akhwaawe yaamuhuserya hai Piipiliya?
Nyuwaano mwaanasuwela?
Ikwaha ikina, ninnapaka matorokelo mu soororomela sahu. Ntakhara heeni? Hiiha ntoko okhuma wa nsuwa onaaryaaya vakhaani-vakhaani, Muluku onniiwexexiha Masu awe vakhaani-vakhaani. (Mwaalakhanye Masiposipo 4:18.) Mwawiihiiha, naamwi Piipiliya ahitorokeyaka, ninnatoroka soororomela sahu vaavaa nnamwiiwexexaahu phaama Piipiliya.
5. Nnakhala mwawiiwanana ni nsina nahu
Ntakhara heeni nikunxaahu nsina nawi Anamoona a Yehova? Moone EXILEMA, nave muthokororye nikoho nnacharela.
-
Ntakhara heeni nsina nawi Anamoona a Yehova ti noophwanelela?
Ntakhara heeni Yehova aathanlileiye achu wi ekhale anamoona awe? Nthowa nawi awo yaahaala omusuwanyeiha owo ntoko Muluku eeparipari, woona wi sinnalociwa sawootha sincipale vooloca sa yoowo. Muthokororye sawootha piili sa seiho.
Ikerexa ikina inaahusiha achu aya wi Muluku onachuna wi awo ephariheleke iruku wi emulapeleke yoowo. Vano, mwaalakhanye Onamukutxho 26:1, nave voocharela muthokororye makoho ala:
-
Eparipari taani enaphwanyeya mu yoorepa yeela? Yehova onoona hai soophwaniherya?
Ahooleli akina a ikerexa anahusiha wi Yesu ti Muluku. Vano, mwaalakhanye Yohani 20:17, nave voocharela muthokororye makoho ala:
-
Eparipari taani enaphwanyeya mu yoorepa yeela? Apwanne Muluku ni Yesu muchu mmohamoha?
-
Munoona hai voosuwela wi Yehova ohaathanla Anamoona awe wi elaleerye eparipari vooloca sa yoowo ni Mwanawe?
6. Ninnasivelana mukina ni mukhwaawe
Piipiliya onaalikanyiha Akristu ni makupa oohiyana hiyana a mwiili wa muchu. Mwaalakhanye 1 Korinto 12:25, 26, nave voocharela muthokororye makoho ala:
-
Tiheeni Akristu eeparipari anaphwanelaaya weera vaavaa Akristu akina anahooseyaaya?
-
Tiheeni monnaanyu vooloca sa osivela variyari va Anamoona a Yehova?
Vaavaa anamoona a Yehova anahooseyaaya mmakupa mamoha a elapo, Anamoona oothene orukurerya elapo annavaha nikhaviheryo nawaakuveya. Wi moone yootakiherya emoha, moone EXILEMA. Voocharela muthokororye nikoho nnacharela.
-
Ti mwawiihai wiilipiserya wa Anamoona a Yehova mmuteko wa okhaviherya enooniheryaaya osivela?
Akristu eeparipari annooniherya osivela wa oothoiwa
ACHU AKINA ANI: “Anamoona a Yehova malapelo mavyaani.”
-
Ovinyerya liini Yehova onaweereiye alapeli awe okhala anamoona?
MUKWASU
Anamoona a Yehova Akristu eeparipari. Hiyaano na emusi ya elapo yoothene ya alapeli a Muluku. Soororomela sahu inathipeleya Mpiipiliyani nave ninnasuweliha eparipari vooloca sa Yehova.
Makoho awuuluulela
-
Ntakhara heeni nikunxaahu nsina nawi Anamoona a Yehova?
-
Nnakhalihana hai mukina ni mukhwaawe?
-
Mano munoona wi Anamoona a Yehova Akristu eeparipari?
OTHOLATHOLA
Muhuserye sincipale vooloca sa yaweereya ahu.
Testemunhas de Jeová—Fé em ação, parte 1: Da escuridão para a luz (1:00:52)
Moone yootakiherya emoha vooloca sa mukhalelo Anamoona a Yehova yaakumihenryaaya vaate mahusiheryo atheru.
Mphwanye maakhulo a makoho muryaanyuno vooloca sa Anamoona a Yehova.
“Makoho Anapakiwa Wiiliwiili Vooloca sa Anamoona a Yehova” (Mwaha wa mu jw.org)
Stephen aanawiica achu a ilapo ikina, ophiyerya wi aanawiipha yaawo. Musuwele yeeyo owo oonneiye variyari va Anamoona a Yehova, yaamweerinhe opaka matorokelo.
“Minha vida ia de mal a pior” (A Sentinela, 1.º de julho de 2015)
a Erevista ahu yoochuneya, Mulipeleli, ennalaleya eparipari ya Mpiipiliyani moohihiyererya ovinyerya eyaakha ya 1879.
