MUTU 19
Kansi a Mboni za Yehova ni Akhristu Acendi?
Seo a Mboni za Yehova tukhulupilila kuti nise Akhristu acendi. Ndaŵa yanji? M’mutu uno muphunzile zatukhulupilila, zina yatuziŵika nayo na cikondi catuoneshana.
1. Kansi zakukhulupilila a Mboni za Yehova n’zozikiwa pa cinji?
Yesu ekamba kuti: “Mau a [Mulungu] ni cendi.” (Yohane 17:17) Monga ni mwenzocitila Yesu, a Mboni za Yehova okhulupilila nophunzisa zinthu zocokela m’Mau a Mulungu nthawi zonse. Mwacisanzo, ca m’ma 1870, kagulu katontho ka ŵanthu oona mtima keyamba kuphunzila Baibo mosamala, kuti aziŵe zayuphunzisa. Eyamba kukhulupilila zenzophunzila m’Baibo, olo kuti zikhulupililo zao zenzosiyana na ziphunziso za machechi ayakine. Pavuli pake, eyamba kuuzhyako ayakine zinthu zenzopeza m’Baibo. a
2. Ndaŵa yanji tunena kuti nise Mboni za Yehova?
Yehova ofotokoza kuti atumiki ŵake ni mboni zake, cifukwa olalikila cendi cokhuza yove. (Aheberi 11:4–12:1) Mwacisanzo, m’nthawi zakuvuli, Mulungu euzhya ŵanthu ŵake kuti: “Nimwe mboni zangu.” (Ŵelengani Yesaya 43:10.) Naye Yesu oitiwa kuti “Mboni Yokhulupilika.” (Chivumbulutso 1:5) Tetyo, mu 1931, tesankha zina yakuti Mboni za Yehova. Tumekela ngako kuziŵika na zina iyi.
3. Kansi a Mboni za Yehova otolela tyani cisanzo ca Yesu?
Yesu enzoŵakonda ngako ophunzila ŵake cakuti enzoŵaona monga ni abanja ŵake. (Ŵelengani Maliko 3:35) Nase a Mboni za Yehova tili monga ni banja imozi ya pacalo conse, ndipo nise ogwilizana. Ndiye cifukwa cake tuitana kuti akwasu na azilongosi. (Filimoni 1, 2) Tumvwila soti lamulo ya m’Baibo yakuti: “Kondani gulu yonse ya akwasu.” (1 Petulo 2:17) Tuonesha cikondi ici m’njila zinyinji. Njila imozi yatucitilamo izi ni mwa kuyavya akwasu na azilongosi pacalo conse akakumana na mavuto.
PHUNZILANI ZINYINJI
Ziŵani zinyinji zokhuza mbili ya Mboni za Yehova, noona umboni wakuti ni Akhristu acendi.
Akhristu acendi okhulupilila zinthu zocokela m’Baibo ndipo ouzhyako ayakine zinthu zakukhulupilila
4. Tukhulupilila zinthu zozikiwa m’Baibo
Yehova elosela kuti panthawi iyakine, ŵanthu akamvwishe bwino-bwino cendi ca m’Baibo. Ŵelengani Danieli 12:4, nokambilana konsho iyi:
-
Kansi atumiki a Mulungu eziŵa “zinthu zinyinji” zotyani pecipitilizhya kuphunzila Baibo?
Onani njila yenzoseŵenzesha ophunzila Baibo, kuyangizhyilapo Charles Rusell, pophunzila Mau a Mulungu. Onelelani VIDYO, nokambilana konsho iyi:
-
Mu vidyo iyi, kansi Charles Russel na ayake enzoseŵenzesha njila yotyani pophunzila Baibo?
Kansi muziŵa?
Nthawi ziyakine, tucinja kamvwidwe ka zinthu zatukhulupilila. Ndaŵa yanji? Ngati zuŵa yasala patontho kufuma, kuwala kuyamba kuonekela patontho-patontho. Molingana na izi, Mulungu oyavya atumiki ŵake kuti amvwishe Mau ŵake patontho-patontho. (Ŵelengani Miyambo 4:18.) Olo kuti Baibo yucinja lini, seo tucinja kamvwidwe kasu ngati tamvwisha mfundo iyakine ya m’Baibo, yamene kale tenzoimvwishisha lini.
5. Tucita zinthu mokatizhyana na zina yasu
Ndaŵa yanji tesankha zina yakuti Mboni za Yehova? Onelelani VIDYO, nokambilana konsho yokonkhapo.
-
Ndaŵa yanji zina yakuti Mboni za Yehova ni yoyenelela?
Ndaŵa yanji Yehova wasankha ŵanthu kunkhala Mboni zake? Yehova wasankha ŵanthu kuti amuziŵikishe kuti ni Mulungu wacendi, cifukwa ŵanthu anyinji ankhala okamba zinthu zawenye zokhuza yove. Tiyeni tioneko tyala zinthu ziŵili zawenye zakukamba.
Vipembezo viyakine vuphunzisa ŵanthu ŵao kuti Mulungu ofuna kuti akoseŵenzesha zifanizilo pomulambila. Kuti muziŵe zacendi, ŵelengani Levitiko 26:1, nokambilana makonsho aŵa:
-
Kansi mfundo yacendi ni yotyani? Kansi Yehova akumvwa tyani ngati ŵanthu oseŵenzesha mafano pomulambila?
Asogoleli ayakine a vipembezo ophunzisa kuti Yesu ni Mulungu. Kuti muziŵe zacendi, ŵelengani Yohane 20:17, nokambilana makonsho aŵa:
-
Kansi mfundo yacendi ni yotyani? Kansi Mulungu na Yesu ni munthu m’mozi?
-
Kansi mwamvwa tyani poziŵa kuti Yehova etuma Mboni zake kuti zilalikile cendi cokhuza yove na Mwana wake?
6. Tukondana
Baibo yukamba kuti Akhristu ali monga ni ziwalo zosiyanasiyana za muŵili wa munthu. Ŵelengani 1 Akorinto 12:25, 26, nokambilana makonsho aŵa:
-
Kansi Akhristu acendi ofunika kucitanji ngati Akhristu ayao ovutika?
-
Ni umboni wotyani wamwaonako woonesha kuti a Mboni za Yehova okondana?
Ngati Mboni za Yehova kudela iyakine zakumana na vuto, Mboni ziyao pacalo conse zucitapo kanthu mofulumila. Kuti muone cisanzo cimozi, onelelani VIDYO, nokambilana konsho yokonkhapo.
-
Kansi thandizo yakupeleka a Mboni za Yehova pakacitika soka yuonesha tyani kuti okondana?
Akhristu acendi oonesha cikondi mwa kuyavya ŵala amene ofunika thandizo
ŴANTHU AYAKINE OKAMBA KUTI: “Mboni za Yehova ni cipembezo calombapano ngako.”
-
Kansi Yehova wankhala oita atumiki ŵake kuti Mboni zake kwa nthawi itali tyani?
MFUNDO ZACIDULE
Seo a Mboni za Yehova nise Akhristu acendi. Nise banja imozi ya pacalo conse. Tukhulupilila zinthu zocokela m’Baibo, ndipo tuuzhyako ayakine cendi cokhuza Yehova.
Kuwelezhya mfundo zikulu-zikulu
-
Ndaŵa yanji tesankha zina yakuti Mboni za Yehova?
-
Kansi tuonesha tyani kuti tukondana?
-
Muganiza kuti Mboni za Yehova ni Akhristu acendi?
FUFUZANI
Phunzilani zinyinji zokhuza gulu yasu.
Mboni za Yehova Zinasonyeza Chikhulupiriro, Gawo 1: Kutuluka mu Mdima (1:00:53)
Onani mwamene Mboni za Yehova zayavyila ŵanthu kumasuka ku viphunziso vawenye.
Pezani mayankho pa makonsho yamungankhale nayo yokhuza Mboni za Yehova.
“Makonsho Yakukonsha Ŵanthu Yokhuza Mboni za Yehova” (Nkhani yupezeka tyala pa webusaiti)
Stephen enzozonda ŵanthu a mitundu iyakine. Onani zeciona pakati pa Mboni za Yehova, zamene zemupangisha kuti acinje.
“Umoyo Wangu Wenzoipilaipila” (Nsanja ya Olonda, July 1, 2015)
a Kuyambila mu 1879, Mboni za Yehova zankhala zufalisa Nsanja ya Mulonda yamene yufotokoza cendi ca m’Baibo.
