ELONGESO 19
Okuti Onombangi mba Siovaa Ovakilisitau Votyotyili?
Onthwe Nombangi mba Siovaa Tuvakilisitau votyotyili. Oityi tupopila ngotyo? Opo utyinoñgonoke nawa, tala ine ovipuka tulongesa tuvipola-pi. Tupu tala ankho onthwe Nombangi mba Siovaa tuhole umwe vakuetu. Enyina eli tutumbulwa liokuti Onombangi mba Siovaa, tuelipola-pi?
1. Ovipuka Onombangi mba Siovaa valongesa vevipola-pi?
Sesusi wapopile okuti “ondaka [ya Huku] otyili.” (Suau 17:17) Onombangi mba Siovaa navo vasoka nga Sesusi. Atyiho valongesa vetyipola Mondaka ya Huku Ombimbiliya. Kohale-hale kwali ovanthu vamwe ankho vatiwa Ovalilongesi vo Mbimbiliya. Velilukile tupu ngotyo omokonda ankho velilongesa nawa Ombimbiliya. Ankho valandula vala etyi Ombimbiliya ipopia naapa umwe ankho tyilipona netyi vonongeleya vapopia. Ovipuka ankho velilongesa vevipopila vakuavo. Ongotyo tyehimbika Onombangi mba Siovaa. a
2. Oityi tutumbulilwa okuti Tunombangi mba Siovaa?
Siovaa wapopile okuti ovanthu vokupopila vakuavo oñgeni ekahi, onombangi mbae. (Ova Hebeleu 11:4 – 12:1) Kohale Siovaa wapopilile ovanthu vae ova Isilayeli eveti: “Onwe, mu nombangi mbange.” (Tanga Isaías 43:10.) Ombimbiliya tupu ipopia okuti Sesusi Kilisitu “Ombangi Omukuatyili” wa Huku. (Eholololo 1:5) Pahe mokonda no onthwe tulongesa vakuetu oñgeni Siovaa ekahi, mo 1931 atuti hahe tutiwe Tunombangi mba Siovaa. Enyina olio onthwe tulihole.
3. Okuti Onombangi mba Siovaa vehole umwe vakuavo nga Sesusi?
Sesusi ankho uhole unene ovalanduli vae. Ankho uvehole umwe unene, uti vala velikwai. (Tanga Maluku 3:35.) Onombangi mba Siovaa aveho velikwata-po, na tyina uvevasa ñgaa, uti vala hamwe velii. Otyo hamwe uhole okuvemonena, tyina veliihana ñgaa, veliti: ndenge yange, mukulu wange, mphange yange. (Filemo 1, 2) Tupu, Ombimbiliya yapopia umwe nawa okuti tuna ‘okuhumba ovanthu aveho tufenda navo Huku.’ Ngwe onthwe tutavela umwe otyitumino otyo. (1 Petulu 2:17) Onombangi mba Siovaa vakuatesako vakuavo tyina vamonekelwa novihuna. Otyo, o tyimwe vala valinga tyimoneka umwe nawa okuti ovanthu vamwe velihole.
KUHANDE OKUNOÑGONOKA VALI?
Monoñgonoka oñgeni Onombangi mba Siovaa vahimbika. Tupu motale ovipuka mavikukalesa umwe nonthumbi yokuti onthwe Tuvakilisitau votyotyili.
Ovakilisitau votyotyili vetavela etyi Ombimbiliya ipopia avetyilongesa vakuavo
4. Atyiho tulongesa tutyipola mo Mbimbiliya
Siovaa wapopile okuti Ombimbiliya, ovanthu maveinoñgonoka nawa katutu-katutu. Tangei Daniel 12:4, amutomphola epulo eli:
-
Ngetyi tuamona mo tesitu, ine ovanthu va Huku velilongesa nawa Ombimbiliya, oityi ankho mavapolo-ko?
Pahe tala etyi Ovalilongesi vo Mbimbiliya ankho valinga tyina vati pokulilongesa Ondaka ya Huku. Umwe puvo, omukulu umwe ankho utiwa o Charles Russell. Talei OVIDIU, amutomphola epulo eli:
-
Oñgeni Charles Russell nomapanga ae ankho velilongesa Ombimbiliya?
Okuti ankho utyii-ale?
Pamwe otyipuka tyimwe tyili mo Mbimbiliya tutyinoñgonoka omapita. Mahi tyina tuamatale okuti otyipuka etyi tuna okutyitala nawa, ngatyo umwe tulinga. Oityi tulingila ngotyo? Nkhele soka kekumbi. Tyina litunda, kakuti vala tyee, ovipuka aviho avimoneka, ine hatyo? Na Huku otyo alinga ngotyo. Utukuatesako okunoñgonoka Ombimbiliya katutu-katutu. (Tanga Provérbios 4:18.) Onthwe tutyii umwe nawa okuti etyi tyili mo Mbimbiliya katyipilauluka. Mahi tyina tuamanoñgonoka nawa Ombimbiliya, ine pena tyimwe tulongesa tuamona okuti tuna okutyipilulula opo tyehelipone Nombimbiliya, otyo umwe tulinga.
5. Tulinga otyilinga tyelikuata umwe nenyina lietu
Oityi tutumbulilwa okuti Tunombangi mba Siovaa? Talei OVIDIU, amutomphola epulo eli:
-
Ngetyi tuamona movidiu, okuti enyina olio liokuti Tunombangi mba Siovaa likahi nawa? Oityi wakumbululila ngotyo?
Omokonda yatyi Siovaa apopila ovanthu vamwe okuti Onombangi mbae? Omokonda ovanthu vamwe vehole okumupopia omapita. Mahi Onombangi mbae, ovo vala vemuamena. Ovo vala valongesa okuti Siovaa, o Huku yotyotyili una okufendwa. Tala vala ovipuka vimwe ovanthu vapopia viayemba ku Huku.
Onongeleya mbumwe mbulongesa ovanthu okuti Huku uhanda tyina tuya pokumufenda, ñgeno tukwata ovilolo novipuka ovikwavo vali. Tangei Levítico 26:1, amutomphola omapulo aa:
-
Mahi pahe, oityi Ombimbiliya yapopia? Tyina usoka, oñgeni Huku akala tyina amona ovanthu veli nokufenda ovilolo novipuka ovikwavo vali?
Monongeleya mbumwe, valongesa okuti Sesusi o Huku. Tangei Suau 20:17, amutomphola omapulo aa:
-
Mahi pahe, oityi Ombimbiliya yapopia? Okuti Sesusi o Huku?
-
Pahe wetyimona okuti Siovaa watuma Onombangi mbae valongese etyi muene Ombimbiliya ipopia tyayemba Kwe, no Komona wae. Otyipuka otyo tyina utyisoka, tyikukalesa ñgeni?
6. Onthwe tuhole vakuetu
Ombimbiliya ipopia okuti Ovakilisitau vena okuundapela kumwe ngetyi olutu lwomunthu luundapela kumwe. Tangei 1 Ova Kolindu 12:25, 26, amutomphola omapulo aa:
-
Tyina Ovakilisitau votyotyili vamona vakuavo vena ovitateka, oityi valinga?
-
Tyina utala ñgaa, okuti Onombangi mba Siovaa velihole? Oityi wapopila ngotyo?
Onombangi mba Siovaa tyina vameivi okuti Onombangi vakuavo kotyilongo tyimwe vena ovitateka, vakuluminya liwa vekevekuateseko. Talei OVIDIU mutyitale. Pahe amutomphola epulo eli:
-
Oñgeni Onombangi mba Siovaa vakuatesako vakuavo motyitateka otyo?
Ovakilisitau votyotyili tyina vakuavo vena ovitateka vevekuatesako
OVANTHU VAMWE VATI: “Ongeleya Yonombangi mba Siovaa omphe vala.”
-
Onalupi Siovaa ehimbika-le okupopia ovanthu vae okuti Onombangi mbange?
ETYI WELILONGESA
Wanoñgonoka okuti onthwe Nombangi mba Siovaa Tuvakilisitau votyotyili mokonda tulihole, atyiho tulongesa tutyipola mo Mbimbiliya, tupu tulongesa vakuetu etyi muene Ombimbiliya ipopia tyayemba ku Siovaa.
Okupitulula
-
Oityi tutumbulilwa okuti Tunombangi mba Siovaa?
-
Oñgeni tulitekula na vakuetu?
-
Ku ove, Onombangi mba Siovaa Ovakilisitau votyotyili?
KUHANDE OKUOVOLA VALI?
Tala ovidiu ei utale oñgeni Onombangi mba Siovaa vehimbika, netyi valinga-linga.
Onombangi Mba Siovaa Vayumba Onthumbi mu Huku, Onthele 1: Vatunda Menthiki Aveya Motyimimi (1:00:53)
Tala oñgeni Onombangi mba Siovaa vakembulula omatutu ovanthu vehole okulongeswa.
Ovipuka vimwe hamwe uhole okulipula viayemba Konombangi mba Siovaa, vili apa.
“Omapulo Ovanthu Vehole Okulinga Viayemba Konombangi Mba Siovaa” (Mo jw.org)
Omukulu ou utiwa o Stephen, ankho kahande ovanthu vovilongo ovikwavo. Okulivasa vala navo, uveveta. Mahi pena etyi amona Konombangi mba Siovaa tyemukuatesako etyiyekepo. Oityi?
“Omuenyo Wange Ankho Uvila-po Okukala Omapita” (Omutala Womulavi 1 ya Julho yo 2015)
a Omukanda wetu utiwa Omutala Womulavi uhangununa nawa Ombimbiliya. Tundee apa tuehimbika okuulinga mo 1879, na hono katutai tuulinga vala.
