19 NUENƆ

Pya Ekeebee Jɛhova Luge Pya Kaāna Nɛɛ Kraist Ni?

PLAY

Ili Pya Ekeebee Jɛhova yiga kɔ i lue pya kaka Nɛɛ Kraist. E na anua a? Naa ɛp pya nu i yiga dɛɛa nyɔɔ, bee a i sere kee, le wereloo i ɛrɛ loo ɛnia ii.

1. E na nu Pya Ekeebee Jɛhova yiga dɛɛa nyɔɔ a?

Jizɔs bee kɔ: “Ue [Bari] lu kaka.” (Jɔn 17:17) Doodoo Jizɔs, Pya Ekeebee Jɛhova wee doo kɔ wa yiga a dɛɛa nyɔɔ Muɛ̄ Ue Bari dɛ̄dɛɛ̄ sɔ̄. Naa ɛp eloh a i kiiloo bu ilii dee ama. Bu pya zua 1870 a, ziī nwīgbagbara eku pya nɔ Baibol bee bɔātɛ̄ esu kaāna ekɛɛrɛ nɔā Baibol. Ba bee yiga nu Baibol kɔ, kere sɔ̄ nu ba yiga lu kee loo tɔgɛnu pya dɔɔ̄na tɔbari. Lɛɛ ba bɔātɛ̄ ekɔ pya kaka ue ba enɔā aābu Baibol nɛ pya dɔɔ̄na. a

2. E na anua i yiga bee a kura Pya Ekeebee Jɛhova a?

Jɛhova wee su pya a ye taāŋabah kue pya ye ekeebee nyɔɔbee ba kɔ kaka ue a ye kiiloo nɛ pya dɔɔ̄na. (Pya Hibru 11:4–12:1) Bu edoba, Bari bee kɔ nɛ pya ye nɛɛ lo a le pya Izrɛl a dee kere kɔ: “Bɔɔlo na pya mdaa ekeebee a.” (Buū Aisaia 43:10.) Lu esu Jizɔs kue “nɛɛ ekeebee a bɔloo eture nyiɛ loo.” (Mumuuna 1:5) Nyɔɔwo, i bee bɔātɛ̄ eyiga bee a kura Pya Ekeebee Jɛhova aā bu zua 1931. Bu i ɛɛ lo eyiga lo bee.

3. Bu mɛ sīdee na Pya Ekeebee Jɛhova nɔ wereloo Jizɔs a?

Jizɔs bee wereloo pya a wee ye nyɔɔnɛ dumɛ mmɛ lo kɛ̄ ba bee le doodoo pya ye butɔ. (Buū Maak 3:35.) Bu aba lo sīdee, Pya Ekeebee Jɛhova lu ziī butɔ a le tɛɛ̄ ɛŋɛnɛ nyɔuwe ba le bu gbaaloo. Nu anua i su ziī kure wuga nɛɛdam le nɛɛwa lo. (Failimɔn 1, 2) I gbaɛ̄nage tɔ̄ lok a kɔ: “Wereaaloo pya wuga.” (1 Pita 2:17) Pya Ekeebee Jɛhova tɔgɛ wereloo bu gbɛnɛ-edo sīdee, doodoo yerebah nɛ pya i wuga bu yira a le bu ebɛɛ̄ tɛɛ̄ ɛŋɛnɛ nyɔuwe.

NƆ YERELOO

Kiisī lo enɔ eloh akiiloo Pya Ekeebee Jɛhova sa muɛ pya dɔɔ̄na nu a tɔgɛ kɔ i lu pya kaka Nɛɛ Kraist.

Pya kaka Nɛɛ Kraist doo kɔ nu ba yiga a dɛɛa nyɔɔ Baibol sa nyɔɔnɛ pya dɔɔ̄na ponia nu ba yiga

4. I Tɔgɛnu dɛɛa nyɔɔ Baibol

Jɛhova ebee kɔ sere kɛ̄ kɔ edaābee loo kaka ue Baibol eyii loo. Buū Daniel 12:4, lɛɛ o agara ebip a nyɔɔnɛ ama:

E na dɔ ama kɔ “eyiiloo” yɛɛ pya nɛɛ Bari kuma sɔ̄ ba kiisī lo egbītɛ̄ pya ue a le bu Baibol a?

Naa ɛp kɛ̄ ziī nwī eku pya nɔ Baibol le Charles Russell bee gbaa nɔ Muɛ̄ Ue Bari doo. Bira lo VIDIO, lɛɛ o agara ebip a nyɔɔnɛ ama.

VIDIO: Sikɛ̄ Gbī Kaka Ue Baibol Muɛ (7:45)

Dookɛ̄ lo vidio tɔgɛ doo, mɛ sīdee na Charles Russell le pya a ye le loo bee gbaa nɔ Baibol a?

O suāge ni?

Bu pio sɔ̄ lo, i ekwaabahloo pio nu i yiga. E na anua a? Dookɛ̄ zue wee mɔ kina kina sa ɛɛrɛ kɛ̄ doo, kɛ̄ Bari doonage kɔ i dābeeloo ye Muɛ̄ Ue kina kina doolo. (Buū Kam 4:18.) Nyɔɔwo, kere Baibol naa nyaa, i kwabahloo nu i yiga kuma sɔ̄ i edaābeeloo Baibol aa yii loo a.

5. I tɔɔ̄dum a bɔloo i bee

E na anua i yiga bee a kura Pya Ekeebee Jɛhova a? Bira lo VIDIO, lɛɛ o agara ebip a nyɔɔnɛ ama.

VIDIO: Ziī Bee A Kɔ Nu I Lu (2:40)

E na anua bee a kura Pya Ekeebee Jɛhova bɔloo a?

E na anua Jɛhova esagɛ pya nɛɛ kɔ ba alu pya ye ekeebee a? Nyɔɔbee ba esuā ye loo nua aba kaka Bari, kuma sɔ̄ gbɛnɛ-edo esah elua ekɔ ye kumaloo a. Naa kɛɛrɛ nu akiiloo aba baɛ yɛɛ pya lo esah ama.

Pio sīdee yigabari tɔgɛ pya a wa le kɛɛ̄ kɔ Bari gbī kɔ ba a su nwī-nɛɛ-pie ale nu alu etɔ̄ ye taāŋaebah. Mɛ naa buū Levitikɔs 26:1, lɛɛ o agara pya ebip ama:

E na kaka ue a? Nwī-nɛɛ-pie tɔɔ̄loo Jɛhova doodoo wa?

Pio pya zaāsī yigabari tɔgɛ kɔ Jizɔs na Bari a. Buū Jɔn 20:17, lɛɛ o agara pya ebip ama:

E na kaka ue a? Bari le Jizɔs luge aba ziī nɛɛ ni?
Tɔɔ̄ a loo doodoo wa sɔ̄ o suā kɔ Jɛhova eyere pya ye Ekeebee kɔ ba a zue kaka akiiloo ye Nwiīnɛɛdam le ɛɛ ni?

6. I wereloo ɛnia ii

Baibol su Pya Nɛɛ Kraist dooreloo keekee kɛ̄ a le ekpaloo nɛɛ. Buū 1 Pya Kɔrint 12:25, 26, lɛɛ o agara pya ebip ama:

E na Pya Nɛɛ Kraist edoo sɔ̄ ba muɛ dɔɔ̄na Nɛɛ Kraist aa tɔga ani?
E na o emɔna akiiloo wereloo a le yɛɛ Pya Ekeebee Jɛhova a?

Sɔ̄ Pya Ekeebee Jɛhova a le ziī sīloo nyɔuwe tɔga, Pya Ekeebee a le tɛɛ̄ ɛŋɛnɛ nyɔuwe wee nwaabah doo dogo lo eyerebah wa nɛ. Lo e’ɛp ziī edoba, bira lo VIDIO. Lɛɛ o agara ebip a nyɔɔnɛ ama.

VIDIO: Pya Wuga Alu Haiti Bee Tama Hurricane Matthew (5:29)

E na a tɔgɛ kɔ Pya Ekeebee Jɛhova ɛrɛ wereloo sɔ̄ ba yerebah nɛ pya nɛɛ nu bugia siraloo a?

Pya kaka Nɛɛ Kraist tɔgɛ wereloo loo pya a le bu ebɛɛ̄

PIO NƐƐ KƆ: “Pya Ekeebee Jɛhova lu aā sīdee taāŋabah a yii.”

Aā mɛ sɔ̄ na Jɛhova bee su pya a ye taāŋabah kure pya ekeebee a?

TƐƐ̄NYƆƆ

Pya Ekeebee Jɛhova lu pya kaāna Nɛɛ Kraist. Tɛɛ̄ ɛŋɛnɛ nyɔuwe, i lu ziī butɔ i gbaa taāŋabah Bari lo nu i yiga dɛɛa nyɔɔ Baibol, le pya a kɔ kaka ue akiiloo Jɛhova siā.