NXA̱DI 19
¿Xiʼu̱ yu̱ testigo ä Jeoba ha geʼu̱ yu̱ ʼyëʼkyëi majuäniʼu̱?
Nuje ge di testigo ä Jeobahe di ëʼkyëihe ge majuäni di te̱nhne ʼne di o̱the nuʼä di mandaʼä Cristo. ¿Hanja ngübu̱ di manhme? Mu̱di gä pähmu̱ xi nho hapu̱ di häkje nuʼä di ëʼkyëihe, ʼne hanja ma thühe testigo ä Jeoba, ʼne ʼbe̱pu̱ di nʼyüʼthe ra nhuëkäte ʼna ngü ʼnaʼu̱ ma kühe.
1. ¿Hapu̱ bi häki o hapu̱ nʼtoʼti nuʼä ëʼkyëi yu̱ testigo ä Jeoba?
Nuʼä Jesús bi ʼyënä ge nuʼä na Nhman Ojä geʼä majuäniʼä (Juan 17:17). Nuje ge di testigo ä Jeoba, di o̱the tengüʼä bi ʼyo̱ʼtä Jesús, ge di häkjebu̱ ja Biblia nuʼä di ëʼkyëihe. Dä mi pädi ʼbe̱pu̱ bä fu̱ʼu̱ nuʼu̱ mi ʼtëmbi estudiantes de la Biblia, ge mʼbe̱fa bi pa̱di na thü ge testigo ä Jeoba. Nuʼä ra je̱ya 1870 ʼna grupo ge yu̱ jäʼi ge mi nxa̱ʼä Biblia, bi mu̱di bi nxa̱di xi nho nuʼä na Nhman Ojä. Nuʼä mi ëʼkyëiʼu̱ mi häkpu̱ ja Biblia, madägeʼä hinmi ʼraigü nuʼä mi pa nʼtüdibu̱ ja yu̱ nijä. ʼNe nuʼä mi päpu̱ ja Biblia mi üʼtu̱ miʼra yu̱ jäʼi pa kextä dä bädi nuʼä majuäni. a
2. ¿Hanja ma thühe testigo ä Jeoba?
Nuʼä Jeoba ëna ge nuʼu̱ yu̱ jäʼi ge di thänne geʼu̱ yu̱ testigoʼu̱, geʼtho nuʼu̱ manʼä majuäni nangeʼä Jeoba (Hebreos 11:4-12:1). Tengü, nuʼbu̱ ma njämʼbu̱tho, nuʼä Jeoba bi ʼyëmbä na hnini: “Nuʼähu̱ ma testigoʼähu̱” (dä mi nu Isaías 43:10). Nuʼä Jesús nzäntho manʼä majuäni nangeʼä Jeoba, nangeʼä kextä dä za̱ gä ënhmu̱ ge ʼna ra testigoʼä (Apocalipsis 1:5). Janangeʼä, nuʼä ra je̱ya 1931 dä honhme nuʼä ra thü testigo ä Jeoba. Emme di johyahe ge ma thühe testigo ä Jeoba.
3. ¿Xiʼu̱ yu̱ testigo ä Jeoba ʼbe̱pu̱ häkpäʼä ra nhuëkäteʼä Jesús?
Nuʼä Jesús emme mi huëʼku̱ yu̱ disipulo tengüʼbu̱ na familiaʼu̱ (dä mi nu Marcos 3:35). Nuje ge di testigo ä Jeoba, emme di nhuëkje tengü ʼna ra familia madägeʼä ma ʼueni di ʼbu̱hme. Nangeʼä di nxihme hermano ʼne hermana nuʼu̱ ma kühe (Filemón 1, 2). Kextä di te̱nhne nuʼä ra nʼtëdi ge ja gä nhuëkje ga̱ʼthoʼu̱ ma kühe (1 Pedro 2:17). Xi ngü ʼbe̱pu̱ di ühme ge di nhuëkjeʼu̱ ma kühe, tengüʼbu̱ thoʼä ʼna ra ʼyänthi di ze̱hmeʼu̱ madägeʼä yaʼätho mengü.
GÄ PÄHMU̱ MANʼNA NANGEHNA
Gä pähmu̱ hapu̱ bä fu̱di nuʼä ma nʼtëʼkyëihe ʼne nuʼä xtä thohme, ʼne gä nuhu̱ ʼbe̱ʼä üdi ge majuäni di te̱nhneʼä Cristo.
Nuʼu̱ yu̱ ʼyëʼkyëi majuäni te̱nni ʼne ëʼkyëi nuʼä ga̱ʼtho mambu̱ ja Biblia ʼne kextä xiʼu̱ miʼra yu̱ jäʼi nuʼä xi mbäpu̱ ja Biblia.
4. Di te̱nhne ʼne di ëʼkyëihe nuʼä ga̱ʼthoʼä nʼtoʼtibu̱ ja Biblia
Nuʼä Jeoba bi ʼyëna ge ʼrahmiʼtsu̱ dä fädi xi nho nuʼä ne dä manʼu̱ yu̱ profesia bä ʼyëpu̱ ja Biblia. Dä mi nuui 2 Corintios 4:6 ʼne manhmi nangehna:
-
¿Toʼoʼä o̱ʼte ge manʼna gä pähmu̱ xi nho nuʼä nʼtoʼtibu̱ ja Biblia?
Dä mi pädi ʼbe̱ʼä mi o̱ʼte ʼna grupo ge mi ʼtëmbi estudiantes de la Biblia pa di nxa̱di xi nho nuʼä na Nhman Ojä, nuʼä ʼna ge mi ʼyobu̱ geʼä Charles Russell. Dä mi nuui ä BIDEO ʼne manhmi nangehna:
-
Nangeʼä gä nubu̱ ja bideo, ¿ʼbe̱ʼä mi o̱ʼte pa di nxa̱di xi nhoʼä Biblia nuʼä Charles Russell ʼne nuʼu̱ miʼra yu̱ jäʼi?
¿Ha mi päkena?
Jaʼbu̱ ʼnandi dä pa̱hmeʼtsu̱ nuʼä mi ëʼkyëihe. ¿Hanja? Geʼtho nuʼä Ojä ʼrahmiʼtsu̱ xi ʼyo̱ʼte ge manʼna gä pähme xi nho nuʼä na Nhma. Tengüthoʼbu̱ bi hyaʼtsi ge ʼrahmiʼtsu̱ di nuhu̱ʼä ra neki, asta geʼbu̱ bi neki xi nho, njarbu̱tho, nuʼä Jeoba ʼrahmiʼtsu̱ bi xogä ma nʼyomfënihe (dä mi nuui Proverbios 4:18). Nuʼä Biblia njämʼbu̱ di mpa̱ʼä, pe̱ nuʼä Jeoba xi ʼyo̱ʼte ge ʼrahmiʼtsu̱ manʼna gä pähme ʼbe̱ʼä ni bäʼä bä ʼyëpu̱ ja na nhma. ʼNe nuʼbu̱ mahyoni gä pa̱hme nuʼä hingi po̱manho ge di ëʼkyëihe, di pa̱hme.
5. Di manhmeʼä majuäni nangeʼä Jeoba
¿Hanja ma thühe testigo ä Jeoba? Dä mi nuui ä BIDEO ʼne manhmi nangehna:
-
¿Hanja po̱manho o ni nsa̱ui ge ma thühe testigo ä Jeoba?
¿Hanja nuʼä Jeoba bi huanhni yu̱ jäʼi pa dä ʼyo̱ʼte yu̱ testigo? Geʼtho nuʼä Jeoba ne ge nuʼu̱ yu̱ jäʼi dä manʼä majuäni nangeʼä. ¿Hanja? Geʼtho xi ngü yu̱ fe̱hni xi tho̱xä Jeoba ʼne nuʼä ne ge dä fäʼä majuäni. Gä nuhu̱ yoho yu̱ fe̱hni xi tho̱xä Jeoba.
Jaʼu̱ ʼra yu̱ nijä ge üdi ge nuʼä Ojä ne ge gä honhmu̱ yu̱ santo pa gä thännehu̱ʼä Ojä. Pe̱ ¿ha majuäniʼä manʼu̱ yu̱ nijä? Dä mi nuui Levítico 26:1 ʼne manhmi nangehna:
-
¿Ha numanho Jeoba ge gä thännehu̱ʼu̱ yu̱ santo?
ʼBu̱ʼu̱ ʼra yu̱ jäʼi ge ʼbe̱ʼtobu̱ ja yu̱ nijä o yu̱ mpe̱ti ge ëna ge nuʼä Jesús geʼä Ojäʼä. Pe̱ ¿ha majuäniʼä manʼu̱? Dä mi nuui Juan 20:17 ʼne manhmi nangehna:
-
¿Ha üʼä Biblia ge nuʼä Ojä ʼne nuʼä Jesús ʼnanjäʼithoʼu̱ o ge ʼnathoʼu̱?
-
¿ʼBe̱ʼä gi mbënhya ge gä pädi ge nuʼä Jeoba ne ge nuʼu̱ yu̱ testigo dä xa̱mbäʼu̱ yu̱ jäʼi nuʼä majuäni nangeʼä Jeoba ʼne nuʼä na ʼtsu̱nʼtu̱?
6. Di nhuëkje ʼna ngü ʼnaje
Nuʼä Biblia ma ge pa nangeʼä Ojä ga̱ʼthoʼu̱ yu̱ ʼyëʼkyëi majuäni emme di muuiʼu̱, ʼne emme jaʼtse̱di nuʼä o̱ʼtä ʼna ngü ʼnaʼu̱. Dä mi nuui 1 Corintios 12:25, 26 ʼne manhmi nangehna:
-
¿ʼBe̱ʼä ja dä ʼyo̱ʼtu̱ yu̱ ʼyëʼkyëi majuäni nuʼbu̱ handi ge di nʼu̱mbäʼu̱ miʼra yu̱ kü?
-
Nangeʼä xkä nu, ¿xiʼu yu testigo ä Jeoba ʼbe̱pu̱ üdi ge di nhuëki ʼna ngü ʼnaʼu̱?
Nuʼbu̱ thoʼä ʼna ʼyänthi nuʼu̱ yu̱ testigo ä Jeoba ge yabu̱ bi ʼbu̱i, nuʼu̱ miʼra yu̱ kü ʼbeske di ze̱di. Gä nuhu̱ ʼna ejemplo ge bi thogi, dä mi nuui ä BIDEO. Mʼbe̱fa manhmi nangehna:
-
¿ʼBe̱ʼä üdi nuʼä ra ʼbe̱fi ge o̱ʼtu̱ yu̱ testigoʼä Jeoba nuʼbu̱ thoʼä ʼna ʼyänthiʼu̱ yu̱ kü? ¿Hanja gi mbëni ngübu̱?
Nuʼu̱ yu̱ ʼyëʼkyëi majuäni di ze̱ʼu̱ honʼä mfa̱ʼtsi.
NUʼÄ ʼBE̱ʼÄ MANʼU̱ ʼRA YU̱ JÄʼI: “Nuʼu̱ yu̱ testigo ä Jeoba, ja xi mu̱ʼu̱”.
-
Xiʼä Jeoba ¿njämʼbu̱ bi mu̱di ge ëmbi ge yu̱ testigoʼu̱ yu̱ jäʼi ge di thännebi?
NUʼÄ MANʼNA JAʼTSE̱DI
Nuʼu̱ yu̱ testigo ä Jeoba majuäni yu̱ ʼyëʼkyëi. Madägeʼä ʼrahmi ʼnanʼyo yu̱ hnini di mengühe, pe̱ di nhuëkje tengü ʼna ra familia, ʼne nuʼä di ëʼkyëihe bä ʼyëpu̱ ja Biblia, ʼne di xa̱mbähe yu̱ jäʼi nangeʼä Jeoba.
Nuʼä dä pähmu̱
-
¿Hanja ma thühe testigo ä Jeoba?
-
¿ʼBe̱pu̱ di ühme ge di nhuëkje ʼna ngü ʼnaje?
-
¿Ha gi ëʼkyëi ge nuʼu̱ yu̱ testigo majuäni te̱nnä Cristo, ge nuʼu̱ majuäni yu̱ ʼyëʼkyëiʼu̱?
DÄ MI PÄDI MANʼNA
Dä mi pädi xi nho ʼbe̱pu̱ bä fu̱di nuʼu̱ yu̱ testigo ä Jeoba.
Dä mi pädi nangeʼä ʼna ra fe̱hni ge ëʼkyëi yu̱ jäʼi pe̱ ge himbä ʼyëpu̱ ja Biblia.
Dä mi pädi nangeʼä ʼra yu̱ nʼta̱nni gi o̱dbu̱ ʼnandi nangeʼu̱ yu̱ testigo ä Jeoba.
“Nuʼu̱ ʼra yu̱ nʼta̱nni ge o̱tyu̱ jäʼi nangeʼu̱ yu̱ testigo ä Jeoba” (Bä ʼyëpu̱ jw.org)
Nuʼä ra nʼu̱kpäte mi sa̱ʼä Stephen bi japi dä ʼyo̱ʼte xi ngü yu̱ nʼtso. Dä mi pädi ʼbe̱ʼä bi nu nangeʼu̱ yu̱ testigo ä Jeoba pa bi za̱ dä pa̱di nuʼä na mʼbu̱i.
“Ëna ge̱ʼbu̱ njämʼbu̱ gä pa̱hma mʼbu̱i, manʼna mi honhyu̱ hëi” (La Atalaya, 1 julio ge 2015)
a Nuʼä su̱kuä La Atalaya geʼä ra mu̱di su̱kuä bä ju̱ʼku̱ yu̱ testigo ä Jeoba, ʼne desde nuʼä ra je̱ya 1879 njämʼbu̱ xi hye̱gi xi gu̱ki nuʼä Atalaya.
