ISOMO LYA 19
K’Abahamirizi ba Yehova bo Babà Bakristu b’Okuli?
Rhuli Bahamirizi ba Yehova rhuba rhuyemire n’obwalagale oku rhwe rhuba Bakristu b’okuli. Bulya gurhi? Olole aha rhukula ebi rhuba rhuyemire, izino lirhuberula n’abandi, n’oku rhuba rhuzigirine rhwene na nnene.
1. Bici obuyemere bw’Abahamirizi ba Yehova buba buyimangireko?
Yezu adesire ntya: “Akanwa [ka Nnâmahanga] kwo okuli.” (Yowane 17:17) Aka Yezu, obuyemere bw’Abahamirizi ba Yehova buba buyimangire oku Kanwa ka Nnâmahanga. Orhanye oku myanzi eganirire Abahamirizi ba Yehova ba buno. Oku buzinda bw’emyaka ya 1870 ecigusho c’abanafunzi barhondera okujira obusagasi lyo bahugûkwa Ebibliya. Bakayemera ebiri omu Bibliya byone, ciru akaba byakagiba birhapatini n’ebi amadîni gakagiyigiriza. Buzinda barhondera okuyigiriza abandi ebi bwabwine kugerera obusagasi bajijire omu Bibliya. a
2. Bulya gurhi rhuhamagalwa Bahamirizi ba Yehova?
Yehova anahamagale abamuharamya oku bo bahamirizi bage bulya banamanyise abandi okuli okubimuyerekire. (Abahabraniya 11:4–12:1) Kwa lwiganyo, Nnâmahanga abwira abantu bage b’omu mango ga mîra ntya: “Mwe bahamirizi bani.” (Osome Izaya 43:10.) Ebibliya ehamagire Yezu oku ye “muhamirizi w’okucîkubagirwa.” (Amafulûlo 1:5) Co carhumaga rhwarhondera okuhamagalwa okw’izino ly’Abahamirizi ba Yehova omu mwaka gwa 1931. Rhunacidinire okuhamagalwa kw’er’izino.
3. Gurhi Abahamirizi ba Yehova bayerekanamwo obuzigire buli nk’obwa Yezu?
Yezu al’izigire abanafunzi bage bwenene akagibabona nka bantu b’omu mulala gwage. (Osome Marko 3:35.) Ko n’oko, Abahamirizi ba Yehova guba mulala g’omw’igulu lyoshi gugwerhe ecinyabuguma. Co cirhuma rhuhamagalana bene wirhu na bali birhu. (Filemoni 1, 2) Na kandi rhuba rhukenzire er’irhegeko: “Muzigire bene winyu [boshi].” (1 Petro 2:17) Abahamirizi ba Yehova banayerekane obo buzigire omu njira ziri lubero, kwa lwiganyo nk’okurhabala abirhu bemezi b’omw’igulu lyoshi amango bali omu mazibu.
HUMBIRIRA LY’OHUGÛKWA
Oyige kwa bulîri emyanzi eyerekire Abahamirizi ba Yehova onalole ebindi biyerekine oku rhwe rhuba Bakristu b’okuli.
Obuyemere bw’Abakristu b’okuli buba buyimangire oku Bibliya na kandi banaganirire abandi ebi baba bayemire
4. Obuyemere bwirhu buba buyimangire oku Bibliya
Yehova ali erhi alebire oku okuli kuba omu Bibliya kwakafulwîrwe. Osome Daniyeli 12:4, NWT n’amahugûlo g’idako, na buzinda oganirire er’idoso:
-
Bici ‘byakayushusire’ amango abantu ba Nnâmahanga bakagendekire baciyigiriza Ebibliya?
Olole gurhi Charles Russell n’abandi banafunzi b’Ebibliya bakagiyiga Akanwa ka Nnâmahanga. Olole EVIDEO, na buzinda oganirire idoso likulikire.
-
Nk’oku obwine mw’eyo video, gurhi Charles Russell n’abandi banafunzi b’Ebibliya bakagiyiga Ebibliya?
K’omanyire?
Mango maguma na maguma, rhunakubûle ebintu rhuyemire. Bulya gurhi? Nka kula rhuja rhwabona bwinja hantu halebe erhi izuba ligendekera lyamoleka, ko na Nnâmahanga naye aja arhabala abantu bage bunyi-bunyi bahugûkwe Akanwa kage. (Osome Emigani 4:18.) Ebibliya erhakashanja cikone erhi rhuhugûkwa bwinja kulusha bintu bilebe eyigiriza, rhunakubûle buhyahya ebi rhuba rhuyemire.
5. Er’izino liba lirhushinganine
Bici byarhumaga rhwarhôla izino ly’Abahamirizi ba Yehova? Olole EVIDEO, na buzinda oganirire idoso likulikire.
-
Bulya gurhi izino ly’Abahamirizi ba Yehova lirhushinganine?
Bulya gurhi Yehova acishozire bantu balebe oku babe Bahamirizi bage? Ly’abantu bamanya oku ye Nnâmahanga w’okuli bulya abantu babwizirwe bunywesi bunji okubimuyerekire. Rhuganirire bunywesi bubirhi bwa muli bo.
Madîni maguma maguma ganayigirize oku Nnâmahanga aba alonzize abantu bakolese ensanamu omu nterekêro. Cikone, Osome Bene-Levi 26:1, na buzinda oganirire aga madoso:
-
Okuli kuhi kw’Ebibliya kuyerekinwe omo? Entanya za Yehova ziba zihi okubiyerekire ensanamu?
Bakulu baguma na baguma b’amadîni banayigirize abantu mpu Yezu ye Nnâmahanga. Cikone, Osome Yowane 20:17, na buzinda oganirire aga madoso:
-
Okuli kw’Ebibliya kuhi kuyerekinwe omo? Ka Nnâmahanga na Yezu baba muntu muguma?
-
Gurhi ociyumvirhe okumanya oku Yehova arhumire Abahamirizi bage lyo barhabala abantu bamanye okuli okubimuyerekire n’okubiyerekire Omugala?
6. Rhunazigirane rhwene na nnene
Ebibliya edesire oku Abakristu ko bali nka birumbu bya mubiri. Osome 1 Abakorinti 12:25, 26, na buzinda oganirire aga madoso:
-
Gurhi Abakristu b’okuli bashinganine bajire amango ababo Bakristu bali balibûka?
-
bici wacibwinîre biyerekine oku Abahamirizi ba Yehova baba bazigirine?
Amango Abahamirizi ba Yehova ba hantu halebe bali balibûka, ababo b’omw’igulu lyoshi banajire kantu kalebe duba-duba lyo babarhabala. Ly’obona olwiganyo, olole EVIDEO. Buzinda oganirire idoso likulikire.
-
Mipango ehi Abakristu barhôzire lyo bajirhabala ababo Bakristu na gurhi eyerekinemwo oku baba bazigirine?
Abakristu b’okuli banayerekane obuzigire oku bantu bali omu bulagirire bw’okurhabalwa
HALI ABANTU BADERHA NTYA: “Abahamirizi ba Yehova liba idîni lihyahya.”
-
Kurhenga mangaci Yehova arhonderaga okuhamagala abamuharamya oku bo bahamirizi bage?
KWA BOFOFI
Abahamirizi ba Yehova bo baba Bakristu b’okuli. Rhuba mulala g’omw’igulu lyoshi gw’abantu baharamya Nnâmahanga, obuyemere bwirhu buba buyimangire oku Bibliya na kandi rhunamanyise abandi okuli lugenda Yehova.
Okucikengeza
-
Bici byarhumaga rhwarhôla izino ly’Abahamirizi ba Yehova?
-
Gurhi ngasi muguma wirhu ajirira owabo?
-
K’orhanyize kobinali oku Abahamirizi ba Yehova bo baba Bakristu b’okuli?
OCIYIGIRIZE KWA BULÎRI
Oyige binji okubiyerekire emyanzi eganirire Abahamirizi ba Yehova.
Abahamirizi ba Yehova—Bantu Bakola n’Obuyemere, Cigabi ca 1: Kurhenga omu Mwizimya (1:00:53)
Olole lwiganyo luguma luyerekine oku Abahamirizi ba Yehova banakafulûla obunywesi bw’idîni n’obwalagale.
Obone amashuzo g’amadoso nkaba olugicidosa okubiyerekire Abahamirizi ba Yehova.
“Amadoso Abantu Balugidosa Okubiyerekire Abahamirizi ba Yehova” (Mwanzi guli oku jw.org)
Stephen akagishomba abantu b’irangi ly’omubiri liri lubero n’elyage ananakag’ibajirira ebintu bibi. Olole ebyarhumire ashanja.
“Maisha Yangu Yaliendelea Kuwa Mabaya Sana” (Ilabiro ly’Akalalizi, ly’omu lusiku 1/7/2015)
a Ilabiro ly’Akalalizi, gazeti yirhu y’obulagirire bwenene, eri yacapisibwa burhahusa kurhangira omu mwaka gwa 1879.
Olole n'Ebi Bikulikire
AMADOSO GALUG’IDOSIBWA
Gurhi Abahamirizi ba Yehova Bayigiriza Abantu Ebibliya?
Kugerera eprograma y’okuganîra ohâbwa n’Abahamirizi ba Yehova, wanakolesa Ebibliya onalonzize. Orharhindiraga okuyegereza abantu b’omulala gwawe n’abîra okucilunga haguma nawe okw’ifunzo lyawe ly’Ebibliya.
