WOTO 19

Dee Jehovah Kotoigi da tuutuu Keesitu sëmbë u?

PËË

U dee Jehovah Kotoigi ta biibi taa u da dee tuutuu Keesitu sëmbë. Faandi mbei? Pakisei naasë dee soni dee u ta lei ta kumutu, pakisei di apaiti në di u ta tja, ku di lobi di u lobi useei.

1. Naasë dee soni di dee Jehovah Kotoigi ta biibi ta kumutu?

Jesosi bi taki taa: „Di Wöutu fii [Gadu] hën da di tuu” (Johanisi 17:17). Leti kuma Jesosi, dee Jehovah Kotoigi ta biibi dee soni dee sikifi a di Wöutu u Gadu. Luku unfa soni bi waka da dee Bëibel Öndösukuma a di ten di pasa, dee ta tja di në Jehovah Kotoigi nöunöu. A di jaa 1870, hën wan kulupu sëmbë di bi ta lei soni u Bëibel bi bigi öndösuku di Bëibel finifini. De bi ta biibi dee soni di di Bëibel ta taki, hii fa dee soni dë bi tooka ku dee lei u dee woto keiki. Baka di dë, hën de bigi ta konda dee soni di de lei a di Bëibel da woto sëmbë. a

2. Faandi mbei u ta kai useei Jehovah Kotoigi?

Jehovah ta kai dee dinima fëën hën kotoigi, u di de ta konda tuutuu soni fëën da sëmbë (Hebelejën 11:4–12:1). Na awooten Gadu bi piki dee sëmbë fëën taa: „Unu da kotoigi u mi”. (Lesi Jesaaja 43:10.) De bi ta kai Jesosi „di Kotoigi di dë u futoou” (Akoalimbo 1:5). A di jaa 1931, hën u tei di në Jehovah Kotoigi. U ta wai seei taa u ta tja di në dë.

3. Unfa dee Jehovah Kotoigi ta lei taa de lobi sëmbë leti kuma Jesosi?

Jesosi bi lobi dee bakama fëën gaanfa seei taa a bi ta si de kuma hën famii. (Lesi Maikusi 3:35.) A hii së u goonliba, dee Jehovah Kotoigi ta libi kuma wan famii tu. Fëën mbei u ta kai useei baaa ku sisa (Filemon 1, 2). U ta hoi di wëti di ta taki taa: „Lobi hii dee baaa” (1 Petuisi 2:17). Dee Jehovah Kotoigi ta lei taa de lobi wotowan a peipei fasi. De ta lei taa de lobi wotowan, u di de ta heepi dee woto biibima kuma de, dee dë a hii së u goonliba te de abi heepi fanöudu.

WOTO SONI DI I SA LEI

Woo lei möön soni di dee Jehovah Kotoigi du a di ten di pasa, söseei woo luku woto soni di ta lei taa de da dee tuutuu Keesitu sëmbë.

Dee tuutuu Keesitu sëmbë ta biibi dee soni dee sikifi a di Bëibel, nöö de ta konda de da woto sëmbë

4. Dee soni dee u ta biibi ta kumutu a di Bëibel

Jehovah bi taki a fesi taa sëmbë bi o ko fusutan di Bëibel möön bunu. Lesi Daniëli 12:4, nöö piki di hakisi aki.

Andi dee sëmbë u Gadu bi o ko sabi te de bi o ta öndösuku di Bëibel?

Luku unfa Charles Russell ku dee woto Bëibel öndösukuma bi ta öndösuku soni a di Wöutu u Gadu. Pëë di FËLÖN, nöö piki di hakisi aki.

FËLÖN: De Bijbelse waarheid herontdekt (7:45)

Unfa Charles Russell ku dee woto Bëibel Öndösukuma bi ta öndösuku soni a di Bëibel?

I bi sabi di soni aki ö?

So juu u ta tooka wan soni di u bi ta biibi fosu. Faandi mbei? Leti kumafa pikipiki i ta si wan soni möön bunu te kamian ta limbo, sö nöö Gadu ta mbei taa pikipiki u ta ko fusutan di Wöutu fëën möön bunu. (Lesi Nöngö 4:18.) Wë hii fa di Bëibel an ta tooka, ma tökuseei u ta tooka dee soni dee u ta biibi te u ko ta fusutan di Bëibel möön bunu.

5. U ta konda dee tuutuu soni dee nama ku Jehovah da sëmbë?

Faandi mbei u tei di në Jehovah Kotoigi? Pëë di FËLÖN, nöö piki di hakisi aki.

FËLÖN: Een unieke naam (2:40)

Faandi mbei a fiti taa u tei di në Jehovah Kotoigi?

Faandi mbei Jehovah tei sëmbë u dë kotoigima fëën? U di de o mbei sëmbë ko sabi taa hën da di tuutuu Gadu, u di sëmbë konda sömëni mindimindi soni fëën. Luku tu u dee soni di de mindi da Gadu.

So u dee keiki ta lei dee sëmbë u de taa Gadu kë u de dini ën ku pindi. Lesi Leifitiki 26:1, nöö piki di hakisi aki:

Wë kumafa u si a di tëkisi, nöö unfa Jehovah ta si di dini di sëmbë ta dini pindi?

So u dee fesima u keiki ta lei sëmbë taa Jesosi da Gadu. Lesi Johanisi 20:17, nöö piki di hakisi aki:

Wë kumafa u si a di tëkisi, nöö Gadu ku Jesosi da di wan sëmbë u?
Unfa i feni ën taa Jehovah manda dee kotoigi fëën u de go konda dee tuutuu soni dee nama ku hën ku di Womi Mii fëën da sëmbë?

6. U lobi useei

Di Bëibel ta tei dee Keesitu sëmbë maaka ku dee peipei pisi u libisëmbë sinkii. Lesi 1 Kolenti 12:25, 26, nöö piki dee hakisi aki:

Andi tuutuu Keesitu sëmbë o du te fuka ta miti woto Keesitu sëmbë?
Andi i si a di lobi di dee Jehovah Kotoigi lobi deseei?

Te dee Jehovah Kotoigi a wan woto kamian u goonliba ta miti fuka, nöö dee woto Kotoigi a hii së u goonliba ta hopo du wan soni wantewante u heepi de. Ee i kë si fa de ta du ën, nöö pëë di FËLÖN. Baka di dë, nöö piki di hakisi aki.

FËLÖN: Dee Kotoigi u Haiti ta hoi dou baka di wan gaan ventu bi ko booko soni (5:29)

Unfa dee Jehovah Kotoigi bi lei taa de lobi de na de di di soni aki pasa?

Tuutuu Keesitu sëmbë ta lei taa de lobi wotowan, u di de ta heepi dee sëmbë dee abi heepi fanöudu

SO SËMBË TA TAKI TAA: „Dee Jehovah Kotoigi da wan njunjun keiki.”

Na un ten Jehovah bi bigi ta kai dee dinima fëën hën kotoigi?

ANDI I LEI?

Dee Jehovah Kotoigi da tuutuu Keesitu sëmbë. U dë wan gaan famii di dë a hii së u goonliba, nöö u ta biibi dee soni dee sikifi a di Bëibel, söseei u ta konda di tuutuu lei di nama ku Jehovah da sëmbë.