CIIYO 19
Sena Bakamboni ba Jehova Mbanakristo Beni-beni?
Mbotuli Bakamboni ba Jehova tulasyoma kuti tuli Banakristo beni-beni. Nkaambo nzi? Atulange-lange aayeeme njiisyo zyesu, izina litwaandaanya kuli bamwi, alimwi aluyando ndotujisi kuli umwi amweenzinyina.
1. Ino njiisyo zya Bakamboni ba Jehova ziyeeme anzi?
Jesu wakaamba kuti: “Ijwi lya Leza, nkasimpe.” (Johane 17:17) Mbubwenya mbuli Jesu, Bakamboni ba Jehova lyoonse njiisyo zyabo ziyeeme a Jwi lya Leza. Amubone makani aajatikizya Bakamboni ba Jehova mazuba aano. Mumwaanda wamyaka wa 19, kabunga kabasikwiiya Bbaibbele kakatalika kulilingaula Bbaibbele cakulomya. Njiisyo zyabo zyakayeeme a Bbaibbele nokuba kuti zyakaliindene ancoziyiisya zikombelo. Mpoonya bakatalika kwaambila bamwi kasimpe nkobakaiya. a
2. Nkaambo nzi ncotulyaamba kuti tuli Bakamboni ba Jehova?
Jehova waamba bakombi bakwe kuti Mbaakamboni nkaambo baambila bamwi kasimpe kajatikizya nguwe. (Bahebrayo 11:4–12:1) Mucikozyanyo, kaindi Leza wakaambila bantu bakwe kuti: “Nywebo ndinywe bakamboni bangu.” (Amubale Isaya 43:10.) Jesu wiitwa kuti ngu “Kamboni Uusyomeka.” (Ciyubunuzyo 1:5) Aboobo mu 1931 twakatalika kwiitwa kuti Bakamboni ba Jehova. Tulakkomana kapati kwiitwa azina eeli.
3. Mbuti Bakamboni ba Jehova mbobalwiiya luyando lwa Jesu?
Jesu wakali kubayanda kapati basikwiiya bakwe cakuti wakali kubabona mbuli banamukwasyi. (Amubale Marko 3:35.) Mbubwenya buyo, Bakamboni ba Jehova balikamantene mbuli mukwasyi munyika yoonse. Nkakaambo kaako ncotwiitana kuti mukwesu naa mucizyi. (Filimoni 1, 2) Alimwi tulautobela mulawo wakuti: “Amube aluyando kuciinga coonse cabakwesu.” (1 Petro 2:17) Bakamboni ba Jehova balalutondezya luyando oolu munzila zinji, mbuli kugwasyilizya basyominyina munyika yoonse ciindi nokwayandika kucita boobo.
AMWIIYE ZINJI
Amwiiye zinji kujatikizya Bakamboni ba Jehova, alimwi akubona bumboni butondezya kuti tuli Banakristo beni-beni.
Njiisyo zya Banakristo beni-beni ziyeeme a Bbaibbele alimwi balabayiisya bamwi kujatikizya nzizyo
4. Njiisyo zyesu ziyeeme a Bbaibbele
Jehova wakasinsima kuti kasimpe kamu Bbaibbele kayooyubununwa. Amubale Daniele 12:4 alimwi abupanduluzi buyungizyidwe, akubandika mubuzyo uutobela:
-
Ncinzi cakali ‘kuyoovwula kapati’ akati kabantu ba Leza ciindi nobakazumanana kulingaula Bbaibbele?
Amubone kabunga kabasikwiiya Bbaibbele kubikkilizya a Charles Russell, mbokakaliiya Jwi lya Leza. Atweebelele VIDIYO, akubandika mubuzyo uutobela.
-
Muvidiyo, mbuti Charles Russell alimwi a Basikwiiya Bbaibbele bamwi mbobakaliiya Bbaibbele?
Sena mulizyi?
Zimwi ziindi twali kuzicinca njiisyo zyesu. Nkaambo nzi? Mbubwenya zuba noliyaabupola mbolipa kuti katucikonzya kubona zintu, awalo Leza ulatugwasya kumvwisya Jwi lyakwe aasyoonto-syoonto. (Amubale Tusimpi 4:18.) Bbaibbele talicinci, pele ciindi notwalimvwisya kabotu tulazicinca nzyotuyiisya.
5. Tulapona kweelana ancolyaamba zina lyesu
Nkaambo nzi ncotwiitwa kuti Bakamboni ba Jehova? Atweebelele VIDIYO, akubandika mubuzyo uutobela.
-
Nkaambo nzi zina lyakuti Bakamboni ba Jehova ncolyeelela?
Nkaambo nzi Jehova ncaakasala bantu kuba bakamboni bakwe? Bakali kuyoomuzyiba kuti ngu Leza wakasimpe, mbwaanga bakali kuyoozyiba twaambo tunji twakubeja itwakaambwa kujatikizya nguwe. Atulange-lange twaambo tobilo buyo akati katwaambo ooto.
Zikombelo zimwi ziyiisya bantu babo kuti Leza uyanda kuti kababelesya zikozyanyo mubukombi bwabo. Amubale Levitiko 26:1, akubandika mibuzyo eeyi:
-
Ino masimpe ngaali? Ino Jehova ulimvwa buti kujatikizya mituni?
Basololi bazikombelo bamwi bayiisya kuti Jesu ngu Leza. Amubale Johane 20:17, akubandika mibuzyo eeyi:
-
Ino masimpe ngaali? Sena Leza a Jesu muntu omwe?
-
Ino mulimvwa buti ikuzyiba kuti Jehova wakatuma Bakamboni bakwe kukambauka kasimpe kajatikizya nguwe alimwi a Mwanaakwe?
6. Tulayandana
Bbaibbele likozyanisya Banakristo kuzizo zyamubili ziindene-indene. Amubale 1 Bakorinto 12:25, 26, akubandika mibuzyo eeyi:
-
Ino Banakristo beni-beni beelede kucita buti ciindi Banakristo bamwi nobapenga?
-
Ncinzi ncomwakabona kujatikizya luyando luliko akati ka Bakamboni ba Jehova?
Ciindi Bakamboni ba Jehova nobapenga kubusena bumwi, Bakamboninyina munyika yoonse balabagwasya cakufwambaana. Kutegwa mubone cikozyanyo comwe, atweebelele VIDIYO. Akubandika mubuzyo uutobela.
-
Mbuti lugwasyo ndobapa Bakamboni ba Jehova ciindi nokwayandika kucita boobo, mbobuli bumboni bwaluyando?
Banakristo beni-beni balatondezya luyando kulibaabo bapengede
BAMWI BAAMBA KUTI: “Bakamboni ba Jehova ncikombelo cipya.”
-
Ndilili Jehova naakatalika kwiita bakombi bakwe kuti mbaakamboni?
MUBUFWAAFWI
Bakamboni ba Jehova Mbanakristo beni-beni. Tuli mukwasyi wanyika yoonse wabakombi, ibajisi njiisyo ziyeeme aa Bbaibbele alimwi ibazyibya kasimpe kajatikizya Jehova.
Ncinzi Ncomwaiya?
-
Nkaambo nzi ncotwakatalika kwiitwa kuti Bakamboni ba Jehova?
-
Ino tweendelezyanya buti?
-
Sena muyeeya kuti Bakamboni ba Jehova Mbanakristo beni-beni?
AMUZYIBE ZINJI
Amubone cikozyanyo icitondezya Bakamboni ba Jehova mbobayubununa njiisyo zyakubeja.
Amujane bwiinguzi kumibuzyo njomujisi kujatikizya Bakamboni ba Jehova.
“Mibuzyo Iivwula Kubuzyigwa Kujatikizya Bakamboni ba Jehova” (peeji lyaawebbusaiti)
Ba Stephen tiibakali kubayanda bantu bamisyobo iimbi cakuti bakali kubalwana. Amubone ncobakabona akati ka Bakamboni ba Jehova icakabapa kucinca.
“Buumi Bwangu Bwakali Kuyaabwiindila Kubija” (Ngazi Yamulindizi, July 1, 2015)
a Kuzwa mu 1879, bantu ba Jehova balikumwaya magazini ya Ngazi Yamulindizi kupandulula ncolyaamba Bbaibbele.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
