HADGE 19

Sedeewa Jeofa wo mbaara diŋ jar Jag-Baa maa ti ngeel ɓen yawlà?

KAŊ NE

Wùr go de bawge jag jiili wùr ga wùr diŋ jar jag-Baa maa ti ngeel ɓe no. Wer mayselà? Ko fẽn maaga hãge ɓil wùr de oole ti ɓe, ɗuu wùr maaga sara de jag-Baa maa lan wo no, lan dage kããra maa ti holaŋ wùr ɗa.

1. Hãge ɓil Sedeewa Jeofa wo de oole diŋ ti maylà?

Yeso wãã ga: “Wããre ‘Baa’ diŋ cwãy” (Jaŋ 17:17). Doo Yeso no lay, hãge ɓil Sedeewa Jeofa wo de oole tum diŋ ti Wããre Baa. Ko ba wããre maa ti Sedeewa Jeofa maa nen wur maa waran wo ɗa. Ti tawge ti kiŋgi maa 1800, jar po wo mbag hay tĩĩ wo wer frug nen Wããre Baa. À oo wo hãge ɓil ɓaara ti Wããre Baa, hadge ɓaaran hay sara de maa ti jag-Baa maa lan wo. Blam, saara tĩĩ wer sii cwãy maaga saara da’ ɓil Bible ne jare. a

2. Wer mayse ga wùr ɗe see wùr ga Sedeewa Jeofa wo là?

Jeofa ɗe jar goŋge ɓen wo ga Sedeewa se wo werga á wãã wo cwãy go ti ɓe (Hebre wo 11:4–12:1). Le ɓaa mono, Jeofa wãã ne jar Israyel wo ga: “Jar sedeewa ɓin wo diŋ nday” (Jaŋ Esay 43:10). À hay ɗe Yeso ga “Je sedewa go ti Baa de deele no” (Naage nene 1:5). Diŋ wersen so ga nen kiŋgi maa 1931 mono, wùr kol ɗe see wùr ga Sedeewa Jeofa. Ɓil wùr go feh ti ɗuu sen debaŋ.

3. Sedeewa Jeofa da wo kããra doo Yeso na da ge là?

Yeso hay da jar maa wer ɓen wo debaŋ doo ga á diŋ jar maa liŋ ni ɓaara wo nono (Jaŋ Mark 3:35). Doo sen no lay, Sedeewa Jeofa wo go de tayge boŋ ti tamsir ɓuy. Diŋ wersen so ga wùr ɗe kããra ti holaŋ wùr ga hẽnbe noga maygemanbe mono (Filemoŋ 1, 2). Wùr hoo sug ti jag liŋgi maaga wãã ga: “da we hẽẽre ɓay maa de hã se ɓaara ne Baa wo” (1 Piyer 2:17). Sedeewa Jeofa naa wo nen dage sen go de wer ɗeŋ ngaɓa, doo maaga naa kay hẽẽre naa maa ti tamsir wo ɓuy ti wur maaga á yaŋ wo nen re no.

FRUGGI NEN HADGE NO

Ya’ kiɗ wer ne Sedeewa Jeofa wo ciŋ ni, lan da’ wer ne fẽẽre maa tigriŋ wo ga ngaɓ wo ga á wo diŋ jar jag-Baa maa ti ngeel ɓen mono.

Hadge krétiyẽ maa ti ngeel ɓen wo de oole diŋ ɓil Bible day saara sii cwãy ne jar lay

4. Hãge ɓil wùrn de oole diŋ ti Bible

Jeofa hay wãã go peel bol ga cwãy maa ɓil Bible naa ge nen yaŋ go. Jaŋ Danyel 12:4, blam ni ndal wee ti wiigi jag maa blam la no:

Mayse “ya’ge yaŋ ciŋ” yoo jar maa ni Baa wo nen maaga joŋ wo ya’ koge re ɓaara ciŋ ti wããre Baa tum ni là?

Ko ɗeŋ maaga Charle Rusel wo de jar maa wer ɓen hay wo frug nen wããre Ɓaa mo ɗa KO VIDEYO ni ndal wee ti wiigi jag ma blam la no.

VIDEYO: Á fer wo da’ cwãy wããre Baa no (7:45)

Ti videyon la, Charle Rusel wo de bar ɓen hay wo frug nen wããre Baa na fruggi là?

Ndo hay mbo de koge ɓe ne lay?

Day ti wur maa po, wùr coo mbe hadge wùr maa po wo lay. Wer mayse là? Sen doo maaga lerge ngeel wur seɗ de peel de peel hãã wo tee ngeel go ne mono, Baa kay naa maa laa wer wããre ɓen de seege me’ me’ doo sen no lay (Jaŋ Jag jõõ wo 4:18). Koh de maaga Bible bay mbe cooge wa mono, wùr coo hadge wùr diŋ de maaga koge re wùr ti Bible ya’ we ciŋ ni no.

5. Wùr hoo sug ti ɗuu wùr no

Wùr ɗe see wùr ga Sedeewa Jeofa wo wer maylà? Ko VIDEYO ni ndal wee ti wiigi jag ma blam la no.

VIDEYO: Ɗuu maaga wãã ga wùr diŋ wose wo là (2:40)

Wer mayse ga ɗuu ‘Sedeewa Jeofan’ de baage see wùr là?

Wer mayse ga Jeofa hoo jar maaga á mo hay wo sedeewa se là? Werga á ngaɓ wo go ga Jeofa diŋ Baa maa cwãy, lan werga jar hay dem ɗuu ɓe de gete’ wo debaŋ. Ko gete’ maa po wo ɓog mo lag la ɗa:

Jag-Baa maa po had wo ne jar maa ti jag-Baa ɓaaran wo ga Baa da ga naa mo goŋ se de koo maa de ceɗge wo. Amaa, jaŋ Joŋre jar Lefid wo 26:1, ni ndal wee ti wiigi jag maa blam wo la no:

Cwãyn diŋ ga hãylà? Jeofa ɗig ti goŋge koore wo na ga hãylà?

Jar maa peel Jag-Baa maa po had wo ga Yeso diŋ Baa. Amaa, Jaŋ Jaŋ 20:17, ni ndal wee ti wiigi jag maa blam wo la no:

Cwãyn diŋ ga hãylà? Baa wo de Yeso wo diŋ jobo boŋ yawlà?
Á joŋ see mo joŋge de maaga ndo ko wara so ga Jeofa hay laa sedeewa ɓe wo maa sii cwãy go ti ɓaara de weel ɓen mo nè?

6. Wùr da kããra

Bible ngaɓ krétiyẽ wo doo fẽẽre maa ti hõõgese ne no. Jaŋ 1 Korente wo 12:25, 26, ni ndal wee ti wiigi jag maa blam wo la no:

Krétiyẽ maa ti ngeel ɓen joŋ wo joŋge de maaga hẽẽre ɓaara yaŋ wo ti bon là?
Ndo ti see ɓo ndo ko mayse ti dage maaga Sedeewa Jeofa da wo kããra mo là?

De maaga sedeewa Jeofa yaŋ wo ti bon ti cõõ sir po no, hẽẽre ɓaara a wo kay ra ge deparday tu seŋ. Maa ko saɓlaŋ po boŋ mono, ko videyo no: Ko VIDEYO ni ndal wee ti wiigi jag maa blam la no.

VIDEYO: Leege maa de ẽgre hay ɓlag fẽẽre ti sir Ayiti (5:29)

Durgi maaga Sedeewa Jeofa dur wo maa kay hẽẽre ɓaara wo ngaɓ go ga á da wo kããra ti holaŋ ɓaara na ngaɓ ge là?

Krétiyẽ maa ti ngeel ɓen naa wo nen dage ɓaaran go ne jar maaga wo nen kayge mono

NAA YAŊ LAƊGE GA: “Sedeewa Jeofa wo diŋ jag-Baa maaga a le suu suu la.”

Jeofa tĩĩ wer ɗe jar maa joŋ joŋre ne hẽn wo ga sedeewa se wo le na hãã hun nè?

KLUURI HADGE NO

Sedeewa Jeofa wo diŋ krétiyẽ maa ti ngeel ɓe no. Wùr diŋ hẽẽrebe maa de tay jag boŋ ti tamsir ɓuy maa goŋ Jeofa. Hadge wùrn wo de oole diŋ ti Bible lan wùr sii cwãy go ti Jeofa.