XCHANOBIL 19
¿Mi jaʼik melel yajtsʼaklomtak Kristo li stestigotak Jeovae?
Li stestigounkutik Jeovae jchʼunojkutik lek ti jaʼunkutik li melel yajtsʼaklomtak Kristoe. ¿Kʼu yuʼun? Jkʼeltik avil bu jlokʼesojkutik tal li kʼusi jchʼunojkutike, li jbikutike xchiʼuk ti kʼu yelan chkakʼkutik ta ilel ti jkʼanoj jbakutike.
1. ¿Bu lokʼem tal li kʼusi xchʼunojik li stestigotak Jeovae?
Li Jesuse xi laj yalbe li Diose: «Jaʼ melel li akʼope» (Juan 17:17). Jech kʼuchaʼal la spas Jesuse, li stestigounkutik Jeovae ta Skʼop Dios ta jlokʼeskutik tal li kʼusi jchʼunojkutike. Kʼelavil ti jech xa onoʼox spasojik tal ta voʼne li stestigotak Jeovae. Li ta sjabilaltik 1870, oy jtsop krixchanoetik ti la skʼelik lek li Skʼop Diose. Ta Vivlia la slokʼesik li kʼusi xchʼunojike akʼo mi mu jechuk xchʼunojik li yan relijionetike. Ta mas jelavele, laj yalbeik yantik li kʼusi la staik ta chanele. a
2. ¿Kʼu yuʼun stestigo Jeova jbikutik?
Li Jeovae chal ti jaʼ stestigotak li buchʼutik ch˗ichʼat ta mukʼe, yuʼun chalik ta jamal li kʼusi melel ta stojolale (Ebreos 11:4-12:1). Jun skʼelobile jaʼ li kʼusi laj yalbe steklumal ta voʼne li Diose: «Voʼoxuk jtestigooxuk» (kʼelo Isaias 43:10). Li Jesus eke laj yichʼ biiltasel ta jun ‹Tukʼil Testigo› (Apokalipsis 1:5). Jaʼ yuʼun, li ta 1931 la jtʼuj jbikutik kʼuchaʼal stestigotak Jeova. ¡Ximuyubajkutik tajek ti jech jbikutike!
3. Li stestigotak Jeovae, ¿kʼuxi chchanbeik Jesus ti kʼu yelan kʼanvane?
Ta skoj ti solel skʼanojan tajek yajchankʼoptak li Jesuse, xkoʼolaj xa laj yil ta yutsʼ yalaltak (kʼelo Markos 3:35). Li stestigounkutik Jeova eke jmoj tsobolunkutik, jech oxal kutsʼ kalal xa chkaʼi jbakutik ta spʼejel balumil. Jaʼ yuʼun, kermano jbakutik xchiʼuk kermana jbakutik (Filemon 1, 2). Jech xtok, ta jchʼunkutik li mantal liʼe: «Kʼanik me skotol li avermanoik ta chʼunolajele» (1 Pedro 2:17). Ep ta tos ti kʼu yelan chkakʼkutik ta ilel ti jkʼanoj jbakutike; jtose jaʼ ti ta jkolta kermanotakutik ta spʼejel balumil kʼalal chil svokolike.
JCHANTIK TO BATEL MAS
Kojtikintik kʼuxi lik talel li stestigotak Jeovae xchiʼuk ti kʼu yuʼun chkalkutik ti jaʼunkutik li melel yajtsʼaklom Kristoe.
Li melel yajtsʼaklomtak Kristoe ta Vivlia tslokʼesik li kʼusi xchʼunojike xchiʼuk chalbeik batel li yantike.
4. Ta Vivlia jlokʼesojkutik li kʼusi jchʼunojkutike
Li Jeovae yaloj xa onoʼox ti chichʼ to aʼibel mas smelolal li kʼusi chal Vivliae. Kʼelik Daniel 12:4 xchiʼuk albeik skʼoplal li sjakʼobil liʼe:
-
¿Kʼusi ti ch˗epaj yuʼunik li yajtuneltak Dios kʼalal mi la skʼelik lek li Vivliae?
Kʼelavil kʼuxi la skʼelik lek Skʼop Dios li Charles Russell xchiʼuk xchiʼiltake. Kʼelik li VIDEOE xchiʼuk albeik skʼoplal li sjakʼobil liʼe:
-
Jech kʼuchaʼal laj avil ta videoe, ¿kʼu yelan la skʼelik lek Vivlia li Charles Russell xchiʼuk xchiʼiltake?
¿Mi chak’an to chachan mas?
Bakʼintike, ta xjel li kʼusi jchʼunojkutike. ¿Kʼu yuʼun? Yuʼun li Diose ta kʼunkʼun chakʼ kaʼibetik smelolal li Skʼope, jech kʼuchaʼal kʼalal kʼunkʼun chvinaj talel osiltik kʼalal chlokʼ talel li kʼakʼale (kʼelik Proverbios 4:18). Akʼo mi muʼyuk chjel li Vivliae, ta jelkutik kʼusi jchʼunojkutik mi oy kʼusi laj kaʼibekutik lek smelolale.
5. Chkakʼkutik ta ilel ti stestigounkutik Jeovae
¿Kʼu yuʼun ti stestigo Jeova la jbiinkutike? Kʼelik li VIDEOE xchiʼuk albeik skʼoplal li sjakʼobil liʼe:
-
¿K’u yuʼun lek sta˗o ti stestigotak Jeova jbikutike?
¿Kʼu yuʼun oy buchʼutik stʼujojan Jeova sventa xkʼot ta yajtestigotake? Jaʼ sventa spakbeik skʼoplal li melel Dios Jeovae, yuʼun ep tajek kʼusi chopol yichʼoj alel ta stojolal. Jkʼeltik junantik li kʼusi yalojik ta stojolale.
Junantik relijionetike chchanubtasvanik ti skʼan jtunestik lokʼoletik o santoetik sventa xkichʼtik ta mukʼ li Diose. Pe ¿mi jech ta melel? Kʼelik Levitiko 26:1 xchiʼuk albeik skʼoplal li sjakʼobiltak liʼe:
-
¿Kʼusi jamal chal avil li tekstoe? ¿Kʼu yelan chil Dios li lokʼoletik o santoetike?
Junantik jnitvanejetik ta relijione chchanubtasvanik ti jaʼ Dios li Jesuse. Pe ¿mi jech van taje? Kʼelik Juan 20:17 xchiʼuk albeik skʼoplal li sjakʼobiltak liʼe:
-
¿Kʼusi jamal chal avil li tekstoe? ¿Mi koʼolik li Dios xchiʼuk Jesuse?
-
¿Kʼu yelan chavil ti stakoj talel stestigotak Jeova sventa xalik li kʼusi melel ta stojolale xchiʼuk ta stojolal li Xnichʼone?
6. Jkʼanoj jbakutik ta jujuntal
Li Vivliae chal ti skʼan jmoj tsoboluk li yajtsʼaklomtak Kristoe jech kʼuchaʼal li stsʼakbenal jbekʼtaltike. Kʼelik 1 Korintios 12:25, 26 xchiʼuk albeik skʼoplal li sjakʼobiltak liʼe:
-
¿Kʼusi tspasik li melel yajtsʼaklomtak Kristo kʼalal chil svokol li xchiʼilik ta chʼunolajele?
-
¿Kʼu yelan chakʼik ta ilel aviloj ti skʼanoj sbaik li stestigotak Jeovae?
Kʼalal oy bu chil svokol li stestigotak Jeovae, chkoltavanik ta anil li yermanoik ta spʼejel balumile. Sventa xkiltik kʼu yelan tskolta sbaike, kʼelik li VIDEOE. Mi laje, albeik skʼoplal li sjakʼobiltak liʼe:
-
¿Mi jaʼ svinajeb xanaʼ ti skʼanoj sbaik li stestigotak Jeova kʼalal tskolta sbaike? ¿Kʼu yuʼun ti jech chavale?
Li melel yajtsʼaklomtak Kristoe chakʼik ta ilel ti skʼanojik li buchʼutik chtun yuʼunik koltaele.
JUNANTIKE XI CHALIKE: «Li stestigotak Jeovae achʼ relijion to».
-
¿Kʼusi ora laj yal Jeova ti jaʼ stestigotak li buchʼutik ch˗ichʼat ta mukʼe?
¿KʼUSI LA ACHAN?
Li stestigotak Jeovae jaʼik li melel yajtsʼaklomtak Kristoe. Jaʼunkutik jun utsʼ alalil ta spʼejel balumil ti chkichʼkutik ta mukʼ Diose, ta Vivlia ta jlokʼeskutik li kʼusi jchʼunojkutike xchiʼuk chkalkutik ta jamal li kʼusi melel ta stojolal li Jeovae.
Svulesobil ta joltik
-
¿Kʼu yuʼun stestigotak Jeova jbikutik?
-
¿Kʼuxi chkakʼkutik ta ilel ti jkʼanoj jbakutik ta jujuntale?
-
¿Mi achʼunoj ti jaʼ melel yajtsʼaklomtak Kristo li stestigotak Jeovae?
XUʼ TO XAKʼEL LIʼE
Ojtikino lek li stestigotak Jeovae.
Stestigotak Jeova: tsots xchʼunel yoʼontonik. Sbavokʼal: lokʼik tal ta ikʼal osil (1:00:53)
Kʼelavil jtos chanubtasel ti jamal chal stestigotak Jeova ti maʼuk melele.
Sabo avil stakʼobiltak li kʼusi chajakʼbe aba ta stojolal li stestigotak Jeovae.
«Li kʼusitik tsjakʼilanik ta sventa li stestigotak Jeovae» (Xuʼ te xata ta jw.org)
Ta skoj ti ch˗ilin tajek li Stephene, oy kʼusitik chopol la spas. Kʼelavil kʼusitik laj yil ta stojolal stestigotak Jeova ti jaʼ tijbat˗o yoʼonton sventa sjel xkuxlejale.
«Yantik xaʼox sok batel tajek li jkuxlejale» (Li Jkʼel˗osil ta toyole, 1 yuʼun julio ta 2015)
a Leʼ xa talel ta 1879, li steklumal Jeovae slokʼesoj talel li revista Li Jkʼel˗osil ta toyol sventa xalbe smelolal li Vivliae.
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
