YOOSOMA 19

Niireke Anamoona a Yehova Makristau Eekeekhai?

MURUMIHE

Hiyo Anamoona a Yehova, ninnikupali ni murima wotheene wira na makristau eekeekhai. Mwaha wa xeeni? Yoosoma ela, ninrowa oweha opuro sookupali sahu sinikhuma aya, xeeni nniitthaniwa ahu Anamoona a Yehova ni moota nnooniherya ahu wira ninniphentana mukina ni mukhwaawe.

1. Sookupali sa Anamoona a Yehova sinikhuma woowi?

Yesu aahimmye so: “Nuulumo nanyu ti neekeekhai”. (Yohani 17:17) Ntoko Yesu, itthu Anamoona a Yehova anikupali aya sinikhuma mBiibiliyani, Nuulumo na Muluku. Nwehe moota naapanke ahu eyo ni yowiiraneya ahu ya mahiku ala okhuma eyaakha ya 1870. Okathi ole, ekrupu yaamukhaani ya alipa-oomusoma Biibiliya, yaahipacerya omusoma oratteene Biibiliya. Awo yaaphavela osuwela ele Biibiliya oniixuttiha awe. Okathi yaiwexexa aya oratteene etthu emosa Biibiliya oniixuttiha awe, awo yaanikupali hata ikerexa sikina sihiixuttihaka etthu eyo. Nuumala-vo, awo yaahipacerya owiixuttiha atthu akina itthu iyo sa mBiibiliyani. a

2. Xeeni nniihaniwa ahu Anamoona a Yehova?

Yehova, onniwiitthana ale animukokhorela okhala Anamoona awe, mwaha woowi awo annaaleela atthu akina ikeekhai voohimya sa yena. (aHeeberi 11:4–12:1) Mwa ntakiheryo, khalai Muluku aahaahimya atthu awe wira: ‘Anamon’aka ti nyuwo’. (Mmusome Yesaya 43:10.) Yesu onnihimmwa okhala “Namoona Oororomeleya”. (Wiisuupulula 1:5) Tivonto, okhuma mwaakha wa 1931 naahipacerya wiitthaniwa Anamoona a Yehova. Nto ninnihakalala vanceene wiihaneliwa nsina nno.

3. Anamoona a Yehova anitakiha sai ophenta wa Yesu?

Yesu aanaaphenta vanceene atthareli awe ni aanaathokorerya ntoko amusi awe. (Mmusome Marko 3:35.) Moolikanasa, Anamoona a Yehova toowiiraana ari ntoko emusi emosa olumwenku wotheene. Eyo ti etthu enniiriha ohimya wira na anna ni arokora. (Fileemoni 1, 2) Nave, ninniiwelela yooruma enihimya wira: “Mwaaphenteke anna a olumwenku wotheene”. (1 Pedru 2:17) Anamoona a Yehova annipaka eyo, maana annaaphenta annaya olumwenku wotheene otepexa wene okathi wooxankiha.

MWIIXUTTE ITTHU SIKINA

Nwehe itthu sikina sa yowiiraneya ya Anamoona a Yehova. Nave nwehe itthu sinooniherya wira Anamoona a Yehova makristau eekeekhai.

Itthu makristau eekeekhai anikupali aya sinikhumamBiibiliyani ni anniwiixuttiha atthu akina

4. Sookupali sahu sinikhuma mBiibiliyani

Yehova aahihimya khalai ene wira wamphiya okathi naarowa ahu wiiwexexaka oratteene ekeekhai ya mBiibiliyani. Mmusome Daniyeli 12:4, nuumala-vo mwaakhule nikoho ninttharelana:

Etthu xeeni yaarowa ‘wuncerereya’ okathi atthu a Muluku yaarowa aya omusomaka oratteene Biibiliya?

Nwehe moota yaasoma aya Nuulumo na Muluku ekrupu emosa ya alipa-oomusoma Biibiliya omuhela muhina Charles Russell. Nwehe EVIIDIYU, nuumala-vo mwaakhule nikoho.

EVIIDIYU: Yaahipwanya Ikeekhai sa MBiibiliyani (7:45)

Ntoko yoonihenrye aya eviidiyu, Charles Russell ni atthu akina yaamusoma sai Biibiliya?

Nyuwo mwaanisuwela?

Okathi mukina, hiyo ninnilokiherya omwiiwexexa wahu Biibiliya. Mwaha wa xeeni? Mwaha woowi Muluku onninikhaliherya wiiwexexa Nuulumo nawe vakhaani-vakhaani ntoko siisaale nsuwa nimphattuwa aya nnaarya vakhaani-vakhaani. (Musome Miruku 4:18.) Ekeekhai wira Biibiliya khoniturukeya, masi okathi nniiwexexa ahu ele Biibiliya onihimya awe ninnituruka sookupali sahu.

5. Hiyo Anamoona a Yehova ninkhala moovarihana ni nsina nahu

Xeeni nithanlale ahu nsina na Anamoona a Yehova? Nwehe EVIIDIYU, nuumala-vo, mwaakhule nikoho.

EVIIDIYU: Nsina Ninnisuwanyeiha (2:40)

Xeeni nsina Anamoona a Yehova niri aya nootthuneya?

Xeeni Yehova aathanlale awe atthu wira akhale Anamoona awe? Mwaha woowi atthu awo annimwaakiha Yehova mwaha wa itthu onootheriwa awe. Nwehe itthu piili sowoothiwa.

Itiini sikina, siniixuttiha wira Muluku oniphavela wira atthu amukokhoreleke arumeelaka ilatarato. Niireke eyo ekeekhai? Mmusome Onamukuttho 26:1, nuumala-vo mwaakhule makoho anittharelana:

Niireke ekeekhai wira Muluku oniphavela wira okathi nimmukokhorela ahu nirumeeleke ilatarato? Yehova onoonela sai?

Ahooleli akina a itiini aniixuttiha wira Yesu Muluku. Masi niireke eyo ekeekhai? Mmusome Yohani 20:17, nuumala-vo mwaakhule makoho anittharelana:

Niireke ekeekhai wira Yesu Muluku? Niireke Muluku ni Yesu mutthu mmosaru?
Muluku ohaathanla atthu wira yaahimeeryeke ekeekhai atthu akina voohimya sa Mwanawe. Nyuwo munoonela sai osuwela eyo?

6. Hiyo ninniphentana mukina ni mukhwaawe

Biibiliya, onnaalikanyiha makristau ni mipantta soovirikana sa erutthu. Mmusome 1 aKorinto 12:25, 26, nuumala-vo mwaakhule makoho anittharelana:

Etthu xeeni mukristau eekeekhai okhanle awe oopaka vaavo mukristau mukhwaawe onikumana awe mixankiho?
Etthu xeeni moonale anyu voohimya sa ophentana wa Anamoona a Yehova?

Okathi Anamoona a Yehova a elapo ekina sinaaphwanya aya mixankiho, awo annikhaliheriwa ni anna ni arokora a ilapo sikina. Nwehe ntakiheryo nimosa, nwehe EVIIDIYU. Nuumala-vo, mwaakhule nikoho.

VIDEO: Haiti Aahikhumelela Munamukhaya Matthew (5:29)

Nihoona wira okathi enikhumelela aya ehasara, Anamoona a Yehova annikhaliheryana. Eyo enooniherya sai ophentana waya?

Makristau eekeekhai annaaphenta ale anikumana mixankiho

ATTHU AKINA ANIHIMYA WIRA: “Anamoona a Yehova etiini ya niinaano”.

Okhuma silini, Yehova oniwiitthana awe arumeyi awe okhala Anamoona awe?

IPONTO SUULUPALE

Anamoona a Yehova, makristau eekeekhai. Hiyo na emusi emosa ya arumeyi a Muluku olumwenku wotheene. Sookupali sahu sinikhuma mBiibiliyani ni ninniwiixuttiha atthu akina ekeekhai voohimya sa Yehova.