LEKSYON 19
Tinuod ba nga mga Kristiano an mga Saksi ni Jehova?
Sugad nga mga Saksi ni Jehova, natoo kami nga tinuod kami nga mga Kristiano. Kay ano? Usisaha an basihan han amon mga gintotoohan, an ngaran nga tungod hito naiiba kami, ngan an amon gugma ha usa kag usa.
1. Diin ginbabasar han mga Saksi ni Jehova an ira mga gintotoohan?
Hi Jesus nagsiring: ‘An pulong han Dios kamatuoran.’ (Juan 17:17) Pariho kan Jesus, pirme ginbabasar han mga Saksi ni Jehova an ira mga gintotoohan ha Pulong han Dios. Hibaroi an amon kasaysayan ha moderno nga panahon. Han mga 1870, usa nga grupo han mga estudyante han Biblia an nagtikang pag-usisa hin maopay han Biblia. Iginbasar nira an ira mga gintotoohan ha kon ano an ginsisiring hito, bisan kon an ira mga gintotoohan iba ha mga doktrina han singbahan. Katapos, ginsumat nira ha iba ito nga mga kamatuoran ha Biblia. a
2. Kay ano nga gintatawag namon an amon kalugaringon nga mga Saksi ni Jehova?
Gintatawag ni Jehova an mga nagsisingba ha iya sugad nga iya mga saksi kay nagsusumat hira han kamatuoran mahitungod ha iya. (Hebreo 11:4–12:1) Pananglitan, ha kadaan nga panahon, an Dios nagsiring ha iya katawohan: “Kamo an akon mga saksi.” (Basaha an Isaias 43:10.) Hi Jesus gintatawag nga “an Matinumanon nga Saksi.” (Pahayag 1:5) Salit han 1931 gintikangan namon paggamit an ngaran nga mga Saksi ni Jehova. Proud kami nga tawagon hito nga ngaran.
3. Paonan-o ginsusubad han mga Saksi ni Jehova an gugma ni Jesus?
Hinigugma hinduro ni Jesus an iya mga disipulo nga sugad hin iya hira kapamilya. (Basaha an Marcos 3:35.) Ha pariho nga paagi, an mga Saksi ni Jehova usa nga nagkakaurosa nga pamilya ha bug-os nga kalibotan. Tungod hito gintatawag namon an usa kag usa nga bugto. (Filemon 1, 2) Ginsusunod liwat namon ini nga sugo: “Higugmaa an ngatanan nga kabugtoan.” (1 Pedro 2:17) Ini nga gugma iginpapakita han mga Saksi ni Jehova ha damu nga paagi, sugad han pagbulig ha amon nanginginahanglan nga mga igkasi-tumuroo ha bug-os nga kalibotan.
DUGANG NGA USISAHA
Hibaroi hin dugang an kasaysayan han mga Saksi ni Jehova, ngan kitaa an iba pa nga ebidensya nga tinuod kami nga mga Kristiano.
Ginbabasar ha Biblia han tinuod nga mga Kristiano an ira mga gintotoohan ngan iginsusumat ito ha iba
4. Ginbabasar namon ha Biblia an amon mga gintotoohan
Igintagna ni Jehova nga an pagsabot ha kamatuoran ha Biblia magtitikaklaro. Basaha an Daniel 12:4 ngan footnote, katapos, hisguti niyo ini nga pakiana:
-
Ano an “magigin hura” ha katawohan han Dios samtang padayon nga gin-uusisa nira an Biblia?
Hibaroi kon paonan-o gin-adman an Pulong han Dios han usa nga grupo han mga estudyante han Biblia upod na hi Charles Russell. I-play an VIDEO, katapos, hisguti niyo an masunod nga pakiana.
-
Ha video, paonan-o gin-adman an Biblia nira Charles Russell ngan han iya kaupod nga mga Estudyante han Biblia?
Maaram ka ba?
Usahay ginbabag-o namon an pipira han amon gintotoohan. Kay ano? Sugad la nga hinay-hinay nga nakaklaro an mga butang ha palibot samtang nasirang an adlaw, ginbubuligan liwat han Dios an iya katawohan nga hinay-hinay nga masabtan an iya Pulong. (Basaha an Proberbios 4:18.) Salit bisan kon an Biblia diri nagbabag-o, ginbabag-o namon an amon mga gintotoohan samtang nagigin mas klaro an amon pagsabot ha Biblia.
5. Nagkikinabuhi kami uyon ha amon ngaran
Kay ano nga ginagamit namon an ngaran nga mga Saksi ni Jehova? I-play an VIDEO, katapos, hisguti niyo an masunod nga pakiana.
-
Kay ano nga angayan nga gamiton an ngaran nga mga Saksi ni Jehova?
Kay ano nga nagpili hi Jehova hin katawohan basi magin iya mga saksi? Kay hira an magpapakilala ha iya nga hiya an tinuod nga Dios, kay damu nga buwa an iginsusumat mahitungod ha iya. Hisgotan naton an duha hito nga buwa.
An iba nga relihiyon nagtututdo ha ira mga membro nga karuyag han Dios nga gumamit hira hin mga imahen ha ira pagsingba. Pero basaha an Levitico 26:1, katapos, hisguti niyo ini nga mga pakiana:
-
Ano an kamatuoran? Ano an inaabat ni Jehova mahitungod ha mga idolo?
An iba nga mga lider han relihiyon nagtututdo nga hi Jesus an Dios. Pero basaha an Juan 20:17, katapos, hisguti niyo ini nga mga pakiana:
-
Ano an kamatuoran? An Dios ba ngan hi Jesus usa la nga persona?
-
Ano an imo inaabat nga nahibaroan mo nga hi Jehova nagsusugo han iya mga Saksi basi isangyaw an kamatuoran mahitungod ha iya ngan ha iya Anak?
6. Hinigugma namon an usa kag usa
Ha Biblia, iginpapariho an mga Kristiano ha iba-iba nga parte han lawas han tawo. Basaha an 1 Corinto 12:25, 26, katapos, hisguti niyo ini nga mga pakiana:
-
Ano an angay buhaton han tinuod nga mga Kristiano kon an ira mga igkasi-Kristiano nag-aantos?
-
Ano an imo naobserbaran mahitungod ha gugma han mga Saksi ni Jehova ha usa kag usa?
Kon nag-aantos an mga Saksi ni Jehova ha usa nga bahin han tuna, an ira mga igkasi-Saksi ha bug-os nga kalibotan nabulig dayon. Basi makita an usa nga ehemplo, i-play an VIDEO. Katapos, hisguti niyo an masunod nga pakiana.
-
Kay ano nga an pagbulig han mga Saksi ni Jehova ha panahon han kalamidad ebidensya han gugma?
An tinuod nga mga Kristiano nagpapakita hin gugma ha mga nanginginahanglan
AN IBA NASIRING: “An mga Saksi ni Jehova bag-o la nga relihiyon.”
-
Kakan-o gintikangan ni Jehova nga tawagon nga mga saksi an mga nagsisingba ha iya?
SUMARYO
An mga Saksi ni Jehova tinuod nga mga Kristiano. Bug-os-kalibotan kami nga pamilya han mga magsiringba nga an mga gintotoohan ginbabasar ha Biblia ngan iginsusumat namon an kamatuoran mahitungod kan Jehova.
Repaso
-
Kay ano nga ginagamit namon an ngaran nga mga Saksi ni Jehova?
-
Paonan-o namon gintatratar an usa kag usa?
-
Para ha imo, tinuod ba nga mga Kristiano an mga Saksi ni Jehova?
DUGANG NGA IMPORMASYON
Mahibaro hin dugang mahitungod ha amon kasaysayan.
Mga Saksi ni Jehova—Marig-on an Pagtoo, Bahin 1: Tikang ha Kasisidman Ngadto ha Kalamrag (1:00:53)
Kitaa an usa nga ehemplo kon paonan-o iginbuhayhag han mga Saksi ni Jehova an buwa nga katutdoan.
Hibaroi an baton ha mga pakiana nga bangin nahuhunahuna mo mahitungod ha mga Saksi ni Jehova.
“Komon nga mga Pakiana Mahitungod ha mga Saksi ni Jehova” (web page)
Hi Stephen nangangalas hinduro ha mga tawo nga iba an lahi salit ginkakastigo niya hira. Hibaroi kon ano an iya nakita ha mga Saksi ni Jehova nga nagpagios ha iya nga magbag-o.
“Nagtitikaraot La an Akon Kinabuhi” (An Barantayan, Hulyo 1, 2015)
a An amon nangunguna nga barasahon, nga An Barantayan, padayon nga nagpupublikar han kamatuoran ha Biblia tikang pa han 1879.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
