LIJIGANYO 19

Ana ŵa Mboni sya Yehofa Ali Aklistu Ŵasyesyene?

ALOLELE

M’weji tukusakulupilila kuti tuli Aklistu ŵasyesyene. Ligongo chichi tukuŵecheta myoyo? Kwende tukambilane kwayikusatyochela yikulupi yetu, mwalikusati lina lyetu kutulekanganya ni ŵane soni yatukusati pakunonyelana.

1. Ana yakusakulupilila ŵa Mboni sya Yehofa yikusatyochelaga kwapi?

Yesu jwasasile kuti: ‘Maloŵe ga [Mlungu] gali gakuwona.’ (Yohane 17:17) Yaŵakulupililaga Yesu, yatyochelaga m’Baibulo. Nombe nawo ŵa Mboni sya Yehofa yakusakulupilila yikusatyochela m’Baibulo. Mwachisyasyo, kwende tukambilane mbili ja ŵa Mboni sya Yehofa ŵele pandanda ŵamanyikaga kuti Ŵakulijiganya Baibulo. Cha m’ma 1870, kagulu ka ŵandu kalijiganyaga Baibulo mwakusamala ni chakulinga chakuti kamanyilile yisyesyene yajikusajiganya Baibulo. Kaneko ŵakulupililaga yapatile pakulijiganya Baibulo kula. Yeleyi yaliji myoyo atamose kuti yaŵatandite kuyikulupililayo yaliji yakulekangana ni dini sine. Kaneko jemanjaji ŵasalilaga ŵane yindu yisyesyene yajikusajiganya Baibulo. a

2. Ana ligongo chichi tukusamanyika kuti ŵa Mboni sya Yehofa?

Yehofa akusasala kuti ŵakutumichila ŵakwe ali mboni syakwe. Akusatenda yeleyi ligongo lyakuti jemanjaji akusiŵasalilaga ŵane yisyesyene yakwe yakwamba jwalakwe. (Ahebeli 11:4–12:1) Mwachisyasyo, kalakala Mlungu ŵasalile ŵandu ŵakwe kuti, “Mli mboni syangu.” (Aŵalanje Yesaya 43:10.) Yesu akusamanyika kuti ‘Mboni Jakulupichika.’ (Chiwunukuko 1:5) Ni ligongo lyakwe mu 1931 twatandite kukamulichisya masengo lina lyakuti Mboni sya Yehofa. Kusala yisyene tukusasangalala mnope kumanyika ni linali.

3. Ana ŵa Mboni sya Yehofa akusamkuyaga chamtuli Yesu pakulosya chinonyelo?

Yesu ŵanonyelaga mnope ŵakulijiganya ŵakwe mwamti yaŵaga mpela ali ŵamwiŵasa limo. (Aŵalanje Maliko 3:35.) Mwakulandana ni yeleyi, ŵa Mboni sya Yehofa pachilambo chosope, akusatenda yindu mwakamulana mpela liŵasa limo. Ni ligongo lyakwe tukusakolangana kuti m’bale ni mlongo. (Filimoni 1, 2) M’weji tukusapikanila lilamusi lyakuti, “Mwanonyeleje ŵakulupilila achimjenu [“wosope,” NWT].” (1 Petulo 2:17) Ŵa Mboni sya Yehofa akusalosya chinonyelo mmatala gejinji. Mwachisyasyo, akusiŵakamuchisyaga ŵakulupilila achimjawo ŵakusosechela chikamuchisyo.

KULIJIGANYA YEJINJI

Chitulijiganye yejinji yakwamba mbili ja ŵa Mboni sya Yehofa soni chitulole maumboni gakulosya kuti tuli Aklistu ŵasyesyene.

Yakusakulupililaga Aklistu ŵasyesyene yikusatyochelaga m’Baibulo soni akusiŵasalilaga ŵane yakusakulupililagayo

4. Yatukusakulupilila yikusatyochela m’Baibulo

Yehofa jwaliji ali aŵechete kala kuti ŵandu chachipikanichisya usyesyene wa m’Baibulo. Aŵalanje Daniele 12:4, kaneko akambilane chiwusyo achi:

Ana ni umanyilisi wapi ‘wawakulilekulile’ kwa ŵandu ŵa Mlungu paŵalijiganyaga Baibulo?

Alole yiŵatendaga ŵakulijiganya Baibulo pakulijiganya maloŵe ga Mlungu. Jumo mwa ŵanduŵa ali Charles, Russell. Alolele FIDIYO, kaneko akambilane chiwusyo chakuyichisyachi.

FIDIYO: Kusimanikwasoni kwa Usyesyene wa m’Baibulo (7:45)

Ana mu fidiyoji M’bale Charles Russell ni achimjakwe ŵatendaga yamtuli pakulijiganya Baibulo?

Ana akumanyilila?

Ndaŵi sine tukusachengaga yatukusakulupilila. Ligongo chichi? Mwachisyasyo pakukulanguka, tukusatanda kuyiwona chenene yindu mwapanandipanandi. Myoyosoni Mlungu akusatukamuchisya kupikanichisya maloŵe gakwe mwapanandipanandi. (Aŵalanje Misyungu 4:18.) Myoyo atamose kuti Baibulo jangachenga, nambope patupikanichisye usyesyene wa m’Baibulo, tukusachenga yatukusakulupilila.

5. Tukusatenda yakamulana ni lina lyetu

Ligongo chichi twatandite kumanyika kuti ŵa Mboni sya Yehofa? Alolele FIDIYO, kaneko akambilane yiwusyo yakuyichisyayi.

FIDIYO: Lina Lyalikusatumanyikasya (2:40)

Ana ligongo chichi yili yakuŵajilwa kumanyika kuti ŵa Mboni sya Yehofa?

Ana ligongo chichi Yehofa jwasagwile ŵandu kuti aŵe mboni syakwe? Ligongo jemanjajo yaliji yakuti chiŵakamuchisye ŵandu kummanyilila Mlungu jusyesyene. Yeleyi yili myoyo ligongo lyakuti ŵandu aŵele ali mkuŵecheta yaunami yejinji yakwamba jwalakwe. Kwende tukambilane yindu yiŵili yaunamiyi.

Dini sine sikusajiganya ŵandu ŵawo kuti Mlungu akusasaka kuti akamulichisyeje masengo yiwanichisyo pakumtumichila jwalakwe. Ana yeleyi yili yisyene? Aŵalanje Lefitiko 26:1, kaneko akambilane yiwusyo yakuyichisyayi:

Ana ni yisyesyene yapi yatukulijiganya pelepa? Ana Yehofa akusayiwonaga chamtuli yiwanichisyo yeleyi?

Achimlongola ŵane ŵa dini akusajiganya kuti Yesu ali Mlungu. Ana yeleyi yili yisyene? Aŵalanje Yohane 20:17, ni akambilane yiwusyo yakuyichisyayi:

Ana ni yisyesyene yapi yatukulijiganya pelepa? Ana Yesu ali Mlungu?
Ana akupikana uli mumtima kumanyilila kuti Yehofa jwatumisye Mboni syakwe kukulalichila yakwamba jwalakwe soni Mwanache jwakwe?

6. Tukusanonyelana

Baibulo jikusasala kuti Aklistu akusosekwa kuŵa ŵakamulana mpela mwachiŵelele chilu cha mundu. Aŵalanje 1 Akolinto 12:25, 26, kaneko akambilane yiwusyo yakuyichisyayi:

Ana Aklistu ŵasyesyene akusatenda yamtuli achimjawo pakusimana ni yipwetesi?
Ana ayiweni yamtuli yakulosya kuti Mboni sya Yehofa sikusanonyelana?

Ŵa Mboni sya Yehofa ŵachilambo chine pasimene ni yipwetesi, ŵa Mboni ŵa m’yilambo yine akusiŵakamuchisyaga. Kuti alole chisyasyo panganiji, alolele FIDIYO. Kaneko akambilane chiwusyo chakuyichisyachi.

FIDIYO: Yaŵatite Kupilila Abale ŵa ku Haiti Panyuma pa ula ja Mbungo (5:29)

Ana chikamuchisyo chaŵapeleche ŵa Mboni sya Yehofa chalosisye chamtuli kuti akusiŵanonyela ŵane?

Aklistu ŵasyesyene akusalosya chinonyelo pakwakamuchisya ŵane

YAKUSAŴECHETA ŴANDU ŴANE: “Dini ja Mboni sya Yehofa jigambile kupagwa kwene.”

Ana Yehofa ŵatandite chakachi kusala kuti ŵakutumichila ŵakwe ali mboni syakwe?

YALIJIGANYISYE

Ŵa Mboni sya Yehofa ali Aklistu ŵasyesyene. Tuli ŵandu ŵakamulana pachilambo chosope chapasi. Yatukusakulupilila yikusatyochela m’Baibulo soni tukusasalilaga ŵane yisyesyene yakwamba Yehofa.