UMBUESÁ 19

Será Umbeusaitá Jeová resé aintá cristão supiwaitá?

UYUPIRŨ

Yandé, Umbeusaitá Jeová resé, yakuaté yandé cristão supiwaá. Marã taá? Kuá umbuesá upé, yasú yamaã maã resé yaruyari, marã ta useruka yandé mayé Umbeusaitá Jeová resé asuí mayé yaxari ta ukuá yayusaisuwaá.

1. Maã resé Umbeusaitá Jeová resé ta uruyari?

Jesus umbeu: ‘Supiwaá kuá [Deus] Ñheenga.’ (João 17:17) Mayé Jesus yawé, yaruyariwara añhũ maã resé Bíblia umbeuwaá. Remaã mayé yamuñhã kuayé akayú 1870 suíwara. Ñhã tempo upé, yepé bando miraitá ta uyupirũ ta usikari kirimbá ta uyumbué Bíblia resé. Aintá ta uputari ta ukuá supiwaá Bíblia umbuewaá. Ta uyumbué ramé yepé maã Bíblia upé, ta uruyari kuá resé, até mairamé igrejaitá ta umbué amurupité. Ape, ta uyupirũ ta umbué kuá supiwaá amú miraitá supé. a — Remaã nota.

2. Marã ta useruka yandé mayé Umbeusaitá Jeová resé?

Jeová useruka miraitá ta uadorariwaá aé mayé umbeusaitá isesé, ñhãsé ta umbeu supiwaá isesé. (Ebreoitá 11:4–12:1) Kuxiíma kuera, Deus umbeu kuayé imiraitá supé: “Peñhe umbeusaitá se resé.” (Releri Izaía 43:10.) Bíblia useruka Jesus mayé “Umbeusá supiwaá”. (Apokalipse 1:5) Yawewaá resewara, akayú 1931 suíwara yausari kuá rera Umbeusaitá Jeová resé. Yandé arama importante retana kuá rera.

3. Mayé Umbeusaitá Jeová resé ta umusangá Jesus saisusá?

Jesus usaisú idiscípuloitá mayé ianamaitá. (Releri Marko 3:35.) Yaweté yuíri Umbeusaitá Jeová resé aintá yepewasú mayé yepé anama pañhe kuá mundo upé. Yawé arama ta useruka amú amú resé mayé mũitá asuí rendiraitá. (Filêmon 1, 2) Yandé yasendú maã Bíblia umunduwaá: “Pegustari kuaitá pe anamaitá”, u pañhe yané mũitá. (1 Pedro 2:17) Yamukameẽ yané saisusá pañhe mayé, até mairamé yané mũitá ta uprecisari ajuda.

REYUMBUÉ PIRI ARAMA

Rekuá piri Umbeusaitá Jeová resé asuí remaã marã repoderi reruyari yandé cristão supiwaá.

Cristão supiwaitá ta uruyari añhũ Bíblia supiwaá resé asuí ta umbué kuá supiwaá amú miraitá supé

4. Pañhe maã yaruyariwaá uri Bíblia suí

Jeová umbeu yané tempo upé yaentenderi piri arama iñheenga. Peleri Daniel 12:4 asuí nota. Ariré pekuntari kuá resé:

Ta uyumbué piri ramé Bíblia resé, maã usú usasá Deus miraitá irum?

Remaã mayé yepé apigá iserawaá Charles Russell asuí amuitá, ta umuñhã ta uyumbué arama Deus Ñheenga resé. Pemaã kuá VÍDEO. Ariré pekuntari kuá resé:

VÍDEO: Ta uwasemu mukũisá maã supiwaá Bíblia umbeu (7:45)

Kuá vídeo upé, mayé Charles Russell asuí isumuaraitá ta uyumbué Bíblia resé?

Rekuáwana será kuá resé?

Amuramé yatrocari mayé yaentenderi Bíblia. Marã? Ñhãsé Deus uxari yakuá merupi xinga iñheenga resé. Mayé kurasí usemu uikú, ape yandé yamaã puranga piri maãitá resé. (Releri Provérbiuitá 4:18.) Yakuaté Bíblia ti uyutrocari, ma yaentenderi ramé puranga piri maã aé umbeu, yandé yatrocari maã resé yaruyari.

5. Umbeusaitá Jeová resé: mayé kuá rera uxari ta ukuá awá taá yandé

Marã yaparawaka kuá rera Umbeusaitá Jeová resé? Pemaã kuá VÍDEO. Ariré pekuntari kuá resé:

VÍDEO: Yepé rera ta ukuá arama awá taá yandé (2:40)

Marã puranga yaparawaka ramé kuá rera Umbeusaitá Jeová resé?

Marã Jeová uparawaka yandé mayé umbeusaitá isesé? Ñhãsé Jeová uputari ta ukuntari supiwaá isesé mairamé amú miraitá ta ukuntari tiwaá supí isesé. Yasú yamaã mukũi gananisá ta ukuntariwaá Deus resé.

Yepeyepé religião ta umbué Deus uputari miraitá ta usari tupanaitá ta umuñhãwaá ta uadorari arama aé. Supí será? Peleri Levítico 26:1. Ariré pekuntari kuá resé:

Será Deus uputari yausari ídoloitá yadorari arama aé? Maã Jeová umanduári aintá resé?

Yepeyepé religião ta umbué Jesus aeté Deus. Será yaweté? Peleri João 20:17. Ariré pekuntari kuá resé:

Supí será Jesus aeté Deus? Será Jesus asuí Deus aintá yepéñhũté?
Deus uparawaka yepé miraitá ta umbeu arama miraitá supé supiwaá isesé asuí itaíra resé. Mayé reyusaã rekuá ramé kuá resé?

6. Yandé yayusaisú

Bíblia umbeu cristãoitá aintá mayé yepé mira pira rakanga yawé. Peleri 1 Korintowaraitá 12:25, 26. Ariré pekuntari kuá resé:

Maã yepé cristão supiwaá urikuté umuñhã mairamé umaã amú cristão upurará?
Mayé remaã mayé Umbeusaitá Jeová resé ta uyusaisú?

Mairamé Umbeusaitá Jeová resé yepé tetama upé ta uprecisari ajuda, ta mũitá pañhe kuá mundo upé ta usikari ta uajudari kutara aintá. Pemaã arama yepé exemplo, Pemaã kuá VÍDEO. Ariré pekuntari kuá resé:

VÍDEO: Yepé trevada usasawaá Haiti upé (5:29)

Yamaã kuá vídeo upé ta uprecisari ramé, Umbeusaitá Jeová resé ta uyuajudari. Mayé kuá umukameẽ aintá ta uyusaisú supiwaá?

Cristão supiwaitá ta usaisú awá uprecisari ajuda

YEPEYEPÉ MIRAITÁ TA UMBEU: “Umbeusaitá Jeová resé aintá yepé religião pisasuwaá.”

Supí será? Marã resuaxara kuayé?

MAÃ REYUMBUÉ

Umbeusaitá Jeová resé aintá cristão supiwaá. Yandé yepé anamaitá pañhe kuá mundo upé, yaruyari añhũ maã resé Bíblia umbeuwaá asuí yambué supiwaá Jeová resé amú miraitá supé.