LESIONY 19
Testigos xtuny Jehová, ¿nacyibu cristianos ni rasuidy xinésni la?
Testigos xtuny Jehová ronydo crer que lóodo nacdo cristianos ni rasuidy xinésni. ¿Xigony? Guisuidyno pu lagary rabeʼdo ni ronydo crer, xigony laado scú, láaca guisuidyno ximod raslooydo galnadxiʼ saʼdo.
1. ¿Pu lagary rabeʼ testigos xtuny Jehová ni rony crer?
Jesús gochbu Dios: «Xtiitzlo ngú galnigolú» (Juan 17:17). Lóodo ni nacdo Testigos xtuny Jehová ronydo ni buny Jesús: guirá ni rasuidydo rabeʼdo láani ló Xtiitz Dios. Guienno ximod gosaló testigos xtuny Jehová bisuidy la Biblia. Ló íz 1870, toib grupo ni bisuidy la Biblia nanoy gosalóyibu bisuidyibu Xtiitz Dios. Guirá ni bunyibu crer goleʼyibu láani ló la Biblia, ná galrrasuidy reʼ diti bidzakni né ni rasuidy stipnés Iglesias. De ngú bisuidyibu stipnés buñ galnigolú ni ma bienyibu ló la Biblia. a
2. ¿Xigony laado testigos xtuny Jehová?
Jehová rimbu buñ ni rony adorar láabu xomod testigos xtunybu, portín rasuidyibu ni napa Jehová (Hebreos 11:4-12:1). Por ejemplo, ló dzú ni see, Dios gochbu xcudxbu: «Lóoto nacto testigos xtunyni» (bíil Isaías 43:10). Né Jesús laa «Testigo Fiel» (Apocalipsis 1:5). Por ngú, íz 1931 bireʼ laado testigos xtuny Jehová. Rabaladxdo ni sanédo laa reʼ.
3. ¿Ximod rasuʼ testigos xtuny Jehová xcalnadxiʼ Jesús?
Jesús gondxiʼgolu xpiin, bibiʼbu biinreʼ suusi ñacyibu xfamilbu (bíil Marcos 3:35). Testigos xtuny Jehová láaca raguaʼdo toibsi, nacdo toib famil ni noʼ ló guidopynac Gudxlio. Né por ngú raibydo saʼdo «hermano» né «hermana» (Filemón 1, 2). Láaca rasobdo mandary reʼ ni ná: «Colgandxiʼ guiránac herman» (1 Pedro 2:17). Lóodo ni nacdo testigos xtuny Jehová raslooydo galnadxiʼ reʼ de xidal mod; toib cós ni ronydo láani ngú órni racnédo guiránac herman ni noʼ ló guidopynac Gudxlio ni cadudy ló galnagan.
NANOY GUISUIDYNO LÁANI
Guimbutzaayno historia de testigos xtuny Jehová né guisuidyno xi prueby noʼ ni raslooy que nacdo cristianos ni rasuidy xinésni.
Cristianos ni rasuidy xinésni, guirá ni rasuidyibu rabeʼyibu láani ló la Biblia né rasuidyibu láani stipnés buñ.
4. Guirá ni ronydo crer rabeʼdo láani ló la Biblia
Jehová goniʼ que xcalrrasuidy la Biblia sientzaayno láani ló naareʼ. Colgoʼol Daniel 12:4 né colgooy xtiitzni:
-
¿Xí láani «sioʼgolu» lainy xcudx Jehová pal nanoy rasuidyibu la Biblia?
Gon ximod toib grupo nanoydiguieʼ bisuidyibu la Biblia, ladyibu goyoʼ Charles Russell. Colguibiʼ VIDEO reʼ né colgooy xtiitzni:
-
Mod bibiʼno ló video reʼ, ¿ximod bisuidy Charles Russell la Biblia né stipnés ni bisuidy la Biblia né láabu?
¿Nanlo ndeʼ la?
Rioʼ ór ma bitzaʼdo tipnés cós ni ronydo crer. ¿Xigony? Xomodca cayoní dxoga dxoga cabiʼtzayno ximodpa nac toib lagary sacróyen, né scúca nac né la Biblia, dxoga dxoga rienno láani (bíil Proverbios 4:18). La Biblia diti radzaʼni, laʼga más cayentzaaydo láani ratzaʼdo mod bunydo crer.
5. Raslooydo que nacdo testigos xtuny Jehová
¿Xigony bireʼ laado modreʼ? Colguibiʼ VIDEO reʼ né colgooy xtiitzni:
-
¿Xigony laado testigos xtuny Jehová?
¿Xigony ma golú Jehová tipnés buñ par gac testigos xtunybu? Buñ raniʼ galrrascú de láabu, por ngú golúbu biinreʼ par guiniʼ galnigolú de Jehová, Dios ni rasuidy xinésni. Guisetlano chop galrrascú ni raniʼ buñ de láabu.
Noʼ religión ni rasuidy que Dios ranabbu buñ guiquiin dioxh par gony adorar láabu. Per ¿nigolúni la? Colgoʼol Levítico 26:1 né colgooy xtiitzni:
-
Mod ná versículo reʼ, ¿nigolúni la? ¿Xí rony pensary Dios órni buñ raquiin dioxh?
Tipnés buñ ni rasanir ló religión rasuidyibu que Jesús nac Dios. Per ¿nigolúni la? Colgoʼol Juan 20:17 né colgooy xtiitzni:
-
Mod ná versículo reʼ, ¿nigolúni la? ¿Dios né Jesús toibsi buñ layibu la?
-
¿Xí ronylo pensary que Jehová ma bixel testigos xtuny par guiniʼ ni nigolú de láabu né de Xiimbu?
6. Nadxiʼno saʼno
La Biblia ná que cristianos nacyibu xomod toib cuerpo. Colgoʼol 1 Corintios 12:25, 26 né colgooy xtiitzni:
-
¿Xí raquiin gony cristianos órni saʼyibu cadudy ló galrrioʼob?
-
Mod ma bibiʼlo, ¿ximod raslooy testigos xtuny Jehová galnadxiʼ saʼ?
Órni testigos xtuny Jehová ni noʼ stoib lagary cadudy ló galrrioʼob, testigos ni noʼ ló guidopynac Gudxlio nimaca racnéyibu biinreʼ. Par guientzaaylo láani, colguibiʼ VIDEO reʼ. De ngú colgooy xtiitzni:
-
¿Nálo que órni testigos xtuny Jehová racnéyibu saʼyibu órni rioʼ desgrasy modreʼ caslooyibu galnadxiʼ la? ¿Xigony?
Cristianos ni rasuidy xinésni raslooyibu xcalnadxiʼyibu a stipnés buñ ni caquiin galrracné.
TIPNÉS BUÑ NÁ: «Testigos xtuny Jehová nacyibu toib religión copy».
-
¿Desde pu dzú gosaló Jehová goleʼ laa xpiin «testigos»?
¿XÍ BISUIDYLO?
Testigos xtuny Jehová nacyibu cristianos ni rasuidy xinésni. Nacyibu toib famil ni noʼ ló guidopynac Gudxlio ni rony adorar a Dios, guirá ni rasuidyibu rabeʼyibu láani ló la Biblia né rasuidyibu galnigolú de Jehová.
Repas
-
¿Xigony bireʼ laado testigos xtuny Jehová?
-
¿Ximod raslooydo galnadxiʼ saʼdo?
-
Xpensarylo, ¿testigos xtuny Jehová nacyibu cristianos ni rasuidy xinésni la?
PAR GANLO MÁS
Bimbutzaay historia xtunydo.
Testigos xtuny Jehová: napyibu fe. Midid 1: Rareʼyibu ló galnacay (1:00:53)
Bibiʼ ximod testigos xtuny Jehová ma goleʼxilatyibu toib galrrasuidy falz.
Bidzel ximod rarexa tipnés galrranabdiitz ni naplo de testigos xtuny Jehová.
«Ni más ranabdiitz buñ de testigos xtuny Jehová» (Ni sieed ló jw.org)
Galrrianladx bichiinni Stephen ñony cós mal. Gon xi láani bibiʼbu lad testigos xtuny Jehová ni bichiin láabu par bitzaʼbu mod bibanybu.
a Revista ni laa, Guiich ni caniʼ, careʼni guirá ór, desde íz 1879.
Sigory láaca sioladxlo ndeʼ
NI MÁS RANABDIITZ BUÑ
¿Ximod rasuidy testigos xtuny Jehová buñ?
Órni guisuidylo né testigos xtuny Jehová labúu guiquiinlo nitisi traducción xtuny la Biblia. Labúu guiruʼlo guirá xfamilo né ximiglo par gony compañer looy.
