PWONY ME 20

Kit ma Kacokke pa Lukricitayo Tye ma Oyubbe Kwede

TUKI

Jehovah obedo Lubanga ma pe mito anyobanyoba. (1 Jo Korint 14:33) Pi meno, wageno ni jone bene gibibedo ma guyubbe maber. Kacokke pa Lukricitayo tye ma oyubbe nining? Watwero konyo kacokke wek obed maber nining?

1. Anga ma obedo lawi kacokke?

Baibul waco ni “Kricito en aye lawi lwak muye en.” (Jo Epeco 5:23) Ki i polo, Yecu doro tic pa jo pa Jehovah i wi lobo ducu. Yecu ocimo “lagwok ot ma lagen dok maryek”—ma obedo gurup pa luelda ma guteggi i yo me cwiny, ma bene kilwongogi ni Lukiko Madit. (Kwan Matayo 24:45-47.) Calo lukwena ki ludongo ma i Jerucalem i cencwari me acel, Lukiko Madit bene miyo tira bot kacokke ma i wi lobo ducu. (Tic pa Lukwena 15:2) Ento co magi pe gubedo lutela me dulwa. Giyenyo tira ki bot Jehovah kacel ki i Lokke, dok gimine i te tela pa Yecu.

2. Luelda gitye ki tic ango?

Luelda gubedo co ma guteggi i yo me cwiny ma gipwonyo kun gitiyo ki Ginacoya dok gikwayo jo pa Lubanga ki konyogi kacel ki cuko cwinygi. Pe kiculogi pi ticgi. Me ka meno, gitiyo ‘ki cwinygi ducu, i kit ma Lubanga mito, pe pi lim, ento ki mit kom.’ (1 Petero 5:1, 2) Lukony kor tic gubedo co ma i kacokke ma gikonyo luelda. I nge kare mo lukony kor tic gitwero bedo ma gupore me doko luelda.

Lukiko Madit cimo luelda mogo me doko luneno me adwol. Luneno me adwol magi gilimo kacokke mapatpat me miyo tira ki cuko cwiny lutit kwena. Luneno me adwol gicimo luelda kacel ki lukony kor tic, ma kwogi rwatte ki jami ma kiryeyo i Ginacoya.—1 Temceo 3:1-10, 12; Tito 1:5-9.

3. Tic ango ma Lacaden acel acel tye kwede?

Jo ducu ma i kacokke ‘gipako nying Jehovah’ ki nywako i yub me cokke kacel ki tito kwena bot jo mukene kit ma gitwero kwede.—Kwan Jabuli 148:12, 13.

NONG NGEC MATUT

Pwony kodi latela ango ma Yecu obedo, kit ma luelda gitute kwede me lubo lanenne, ki kit ma wan watwero tic kacel ki Yecu ki luelda.

4. Yecu obedo latela ma lakica

Yecu ominiwa lwongo mamwonya adada. Kwan Matayo 11:28-30, ci wunyam lapeny man:

Yecu obedo latela ma nining, dok en mito ni wawiny nining?

Luelda gilubo lanen pa Yecu nining? Tuk VIDIO.

VIDIO: Luelda Gumiyo Kony i Nge Oyengyeng i Nepal (4:56)

Baibul tito ka maleng kit ma luelda myero guti kwede ticgi.

Kwan Icaya 32:2 ki 1 Petero 5:1-3, ci wunyam lapeny magi:

Calo Yecu, luelda bene gitute matek me tero jo ducu me kacokke ki kica. Ngeyo meno weko iwinyo nining?
I yo mukene ango ma luelda gilubo kwede lanen pa Yecu?

5. Luelda gipwonyo romi ki weko lanen maber pigi

Yecu mono mito ni luelda gunen ticgi nining? Tuk VIDIO.

VIDIO: Wun Luelda, Wutel Yo! (7:39)

Yecu aye oweko lanen maber loyo me aluba pi jo ma gidoro kacokke. Kwan Matayo 23:8-12, ci wunyam lapeny man:

Gin ango ma gudo cwinyi ka odok i kom apokapoka ma tye i kin rwom me kit ma atir ma Baibul oketo pi luelda ki jami ma ineno lupwonye dini mukene-ni gitimo?

Luelda gigwoko watgi kacel ki wat pa jo me otgi ki Jehovah bedo matek
Luelda giparo pi dano ducu ma i kacokke
Luelda gitito kwena kare ki kare
Luelda gubedo lupwonye. Gimiyo bene kony me gwoko lengo ki tic mukene

6. Watwero tic kacel ki luelda

Baibul miniwa tyen lok ma pire tek adada ma oweko omyero wati kacel ki luelda. Kwan Jo Ibru 13:17, ci wunyam lapeny magi:

Pingo Baibul waco ni omyero wabed luwiny bot jo ma gitye ka telo wiwa? In iwinyo nining i kom cik man?

Kwan Luka 16:10, ci wunyam lapeny man:

Pingo omyero wabed luwiny bot luelda kare ducu, kadi bed watamo ni gin moni pire pe tek tutwal?

JO MOGO GIWACO NI: “Iromo woro Lubanga labongo bedo i dini mo keken.”

Adwogi maber ango ma itamo ni ngat moni nongo ka en woro Lubanga kacel ki kacokke?

WOT WIYE WIYE

Yecu aye obedo lawi kacokke. Wan watye ki yomcwiny me tic kacel ki luelda ma gitye i te tela pa Yecu pien gipwonyowa i yo me kica dok bene giwekiwa lanen maber me aluba.