Jehová ayüni com tañi cüme pepicangeal ca cüme beleal, beimu tañi trahunche adcünongequi (1 Corintios 14:33). Beimu, ¿chumngechi adcünongeabüi taiñ trahunche? Caque quiñeque iñchiñ, ¿chumabüiñ ñi com cüme amuleal trahunche mu?

1. ¿Iñi am loncoli trahunche mu?

Biblia eipi: “Cristo loncoli trahunche mu” (Efesios 5:23). Jesús huenu mu, ngüyulquebi Jehová tañi pu che huall Mapu mu. Jesús elcünoi quiñeque loncolelu adümuulu tañi ngüyulabel Jehová tañi pu che, beimu tüba engün “tati cüdaube quim ca manelbalngelu” cam tati Quiñeucülechi Ngünenelu eipingingün, Cuerpo Gobernante ca eipingequingün (papiltunge Mateo 24:45-47). Cuibi mu, pu apostol ca quiñeque loncolelu Jerusalén huariba mu ngüyulbingün Jehová tañi pu che, beimu bantepu mu ca bemngechi bemqui tübachi pu loncolelu (Hechos 15:2). Ngencauquelaingün Jehová tañi pu che mu, papiltuquingün Biblia tañi quimal Jehová ñi ayüquel ca inaquingün Jesús tañi ngüyulün.

2. ¿Chem cüdau bemqui pu loncolelu?

Pu loncolelu cüme hueniyequebingün Jehová. Elbalcünongi ñi quimelal Biblia tañi eipin ca yabültucuabel Jehová tañi pu che. Tañi cüdau cullingequelai. Biblia eipibi pu loncolelu: “Cüme duam mu bemaimün Chau Ngünechen ñi adquiñ mu. Yabüluhun mu cüdahuaimün, bemlaaimün tamün llohual plata” (1 Pedro 5:1, 2). Pu loncolelu niingün quiñeque peñi tañi quelluquetu (incaquetu) trahunche mu. Tübachi pu peñi upale antü ca pepicaucüleabüingün ñi loncolelungepoal.

Tati Quiñeucülechi Ngünenelu elbalcünoquebingün quiñeque loncolelu ñi pemeabel billque trahunche, tüba engün huitran-ngepaquechi loncolelu pingequingün. Tüba engün eluquebi ngülam ca yabültucuquebingün pu trahunche. Cabei quimquingün chem peñi inanequi Biblia ñi eipin, bemngechi loncolelu cam quelluquelu trahunche mu ngepoabüi (1 Timoteo 3:1-10, 12; Tito 1:5-9).

3. ¿Chem cüdau bemquiiñ caque quiñeque iñchiñ?

Com pu peñi ca pu lamngen trahunche mu billque dungu bemquingün ñi concüleal trahun mu ca com tañi nehuen mu amuldunguquingün, bemngechi huenupüramquebingün Jehová (papiltunge Salmo 148:12, 13).

 DOI CÜME QUIMNGE

4. Jesús piuqueyechebengi

Jesús quiñe manelbalchi dungu eipieiñmu. Papiltoiñ Mateo 11:28-30. Papiltungele hula ngütramcaabiiñ tübachi pu ramtun:

• ¿Chumngi Jesús tañi loncolen? Ca, ¿chumngechi ayüqui taiñ duamcüleal tañi loncolen mu?

5. Tañi bemquen mu pu loncolelu quimelchequi

1. Pu loncolelu cüme hueniyebi Jehová ca quellunequebi quidu tañi pu che ñi hueniyeabel Jehová.

2. Pu loncolelu inaduamquebi com pu mülelu trahunche mu.

3.   Pu loncolelu amuldunguquingün.

4. Pu loncolelu quimelchequingün, huelu ca bemquingün caque cüdau trahunche mu.

6. Com iñchiñ cüdahuabüiñ pu loncolelu mu

Biblia eipieiñmu taiñ cüdahual pu loncolelu mu. Papiltoiñ Hebreos 13:17. Papiltungele hula ngütramcaabiiñ tübachi pu ramtun:

• Biblia tañi eipin, ¿chemu inaaiñ chem eipieiñmu pu loncolelu? Eimi, ¿chem raquiduamimi tübachi dungu mu?

Papiltoiñ Lucas 16:10. Papiltungele hula ngütramcaabiiñ tübachi ramtun:

• ¿Chemu inaaiñ chem eipieiñmu pu loncolelu, püchüque dungu ume troquibiliiñ?

 CHEM PEIÑ TÜBAMU

Jesús loncoli trahunche mu. Jesús ngüyulquebi tati pu loncolelu, beimu tüba engün tañi bemün mu quimelqueiñmu ca quelluqueiñmu, beimu iñchiñ cüdauquiiñ ayühun mu.

Chem quimeleleiñmu tüba

• ¿Iñi am loncoli trahunche mu?

• Pu loncolelu, ¿chumngechi quelluquebingün tati trahunche?

• ¿Chem cüdau bemquiiñ caque quiñeque iñchiñ trahunche mu?