Taqe kunas suma organiztʼat lurasispa ukwa Jehová Diosajj muni (1 Corintios 14:33). Ukatwa markapajj suma organiztʼatäñapa. ¿Cristiano congregacionajj kunjam organiztʼatasa? ¿Kunjamsa taqe kunan sum lurasiñapatakejj yanaptʼsna?

1. ¿Khitis cristiano congregacionarojj pʼeqtʼi?

‘Cristow congregacionan pʼeqepajja’ (Efesios 5:23). Aka oraqpachan kunanaktï Diosan markapajj lurki ukanakjja, Jesusaw alajjpachatpach pʼeqtʼaski. Jupaw ‘suma phoqeri amuyasir esclavorojj’ uttʼayi, uka esclavojj Cuerpo Gobernante satarakiwa, uka jiskʼa gruponjja wali experienciani mä qhawqha ancianonakaw utji (Mateo 24:45-47 liytʼäta). Kunjamtï apostolonakasa Jerusalenankir ancianonakas nayrïr patak maranakan lurapkänjja, ukhamarakiw Cuerpo Gobernantejj oraqpachankir congregacionanakar uñjaski (Hechos 15:2). Ukampis uka chachanakajja janiw Diosan markapan jefenakäpkaspas ukhamäpkiti, jan ukasti Bibliarjamajj kuntï Diosajj munki ukarjamaw taqe kuns lurapjje, Jesusarus taqe chuymaw istʼapjjaraki.

2. ¿Kunanaksa ancianonakajj lurapjje?

Ancianonakajja walja maranak Diosar taqe chuyma servir experienciani chachanakäpjjewa. Jupanakaw Diosan markaparojj Bibliarjam yatichapjje, congregación taypinkapki ukanakarus yanaptʼapjje, chʼamañchtʼapjjaraki. Ukanak lurapjjatapat janiw qollqe mayipkiti. Jan ukasti ‘Dios nayraqatan taqe chuymaw’ lurañanakap phoqapjje, janirakiw ‘qollqe chuymäpkiti’ ni ‘kunatï jupanakatak walïki uk thaqapkiti’ (1 Pedro 5:1, 2). Ancianonakajja siervo ministerialanakampiw yanaptʼayasipjje, tiempompejja siervo ministerialanakajj kuna mayitanakatï ancianonakatak utjki ukanak phoqasajj ancianot uttʼayatäpjjarakispawa.

Cuerpo Gobernantejja yaqhep ancianonakarojj superintendente de circuitot servipjjañapatakiw uttʼayaraki. Jupanakaw congregacionanakarojj visittʼapjje, jilat kullakanakarus yanaptʼapjje, chʼamañchtʼapjjaraki. Ukatjja Biblian utjki uka mayitanakarjamaw ancianonaksa siervo ministerialanaksa uttʼayapjjaraki (1 Timoteo 3:1-10, 12; Tito 1:5-9).

3. ¿Kunsa Testigonakajj lurapjje?

Congregacionanjja taqeniw arstʼasajj ‘Jehová Diosan sutip jachʼañchapjje’. Qhawqtï puedipki ukarjam predicasas Diosan sutip jachʼañchapjjarakiwa (Salmo 148:12, 13 liytʼäta).

 JUKʼAMP YATJJATAÑÄNI

4. Jesusajj suma pʼeqtʼiriwa

Jesusajja jupar ajlliñaswa muni, ukhamat jiwasar pʼeqtʼañapataki. Mateo 11:28-30 liytʼasajja aka toqetwa parltʼapjjäta:

• ¿Jesusajj kunjam pʼeqtʼirisa? ¿Kunjamsa jiwasarojj yanaptʼañ munistu?

5. Ancianonakajj yateqaskayaw sarnaqapjje

1. Ancianonakajj Jehová Diosar jukʼamp jakʼachasiñatakiw chʼamachasipjje, familiaparus ukham lurapjjañapatakiw yanaptʼapjjaraki.

2. Khitinakatï congregación taypinkapki ukanakat ancianonakajj wal llakisipjje.

3.   Ancianonakajj predicañatak wal chʼamachasipjje.

4. Ancianonakajj suma yatichirinakäpjjewa, qʼomachañansa yaqha lurañanakansa yanaptʼapjjarakiwa.

6. Ancianonakarojj yanaptʼapjjañäni

Bibliarjamajja ancianonakar yanaptʼañatakejj walja razonanakaw utji. Hebreos 13:17 liytʼasajja aka toqetwa parltʼapjjäta:

• ¿Kunatsa Bibliajj ‘jumanak taypin irpirïpki ukanakarojj humilde chuymampi istʼapjjam’ sasin qhanañchpacha? ¿Biblian ukham qhanañchasitapajj jumatakejj kunjamakisa? ¿Kunatsa ukham amuyta?

Lucas 16:10 liytʼasajja aka toqetwa parltʼapjjäta:

• ‘Jiskʼa luräwinakansa’, ¿kunatsa ancianonakar istʼañajj wali importantejja?

 ¿KUNSA YATEQAWAYTAN?

Jesusaw congregacionarojj pʼeqtʼaski. Ancianonakajj taqe chuymaw jupar istʼapjje. Jiwasasti ancianonakan jiwasar sum uñjatapata ukhamarak yateqaskay sarnaqapjjatapatwa jupanakar yanaptʼtanjja.

Amtañataki

• ¿Khitis congregacionarojj pʼeqtʼaski?

• ¿Kunjamsa ancianonakajj congregacionan yanaptʼapjje?

• ¿Jehová Diosan servirinakapat sapa maynejj kunsa lurapjjañapa?