Yehova te Lesa wa cimfulunganya. (1 Abena Korinti 14:33) Kanshi kuti twaenekela abantu bakwe ukuba abateyanishiwa bwino. Bushe icilonganino ca Bena Kristu cateyanishiwa shani? Finshi bonse mu cilonganino twingacita pa kuti citwalilile ukuba icateyanishiwa?

1. Bushe umutwe wa cilonganino nani?

“Kristu e mutwe wa cilonganino.” (Abena Efese 5:23) Nangu ca kuti Yesu ekala ku muulu, e utungulula umulimo abantu ba kwa Yehova babomba mwi sonde lyonse. Yesu alisonta “umusha wa cishinka kabili uwashilimuka,” e kutila ibumba ilinono ilya baeluda ababomba pa myaka iingi. Ili ibumba litwa no kuti Ibumba Litungulula. (Belengeni Mateo 24:45-47.) Nga filya fine abatumwa na bakalamba mu Yerusalemu balecita, Ibumba Litungulula e lyangalila ifilonganino fya Bena Kristu mwi sonde lyonse. (Imilimo 15:2) Lelo aba abaume te ntungulushi sha cilonganino cesu. Kanshi balabelenga Baibolo pa kuti beshibe ifyo Yehova afwaya balecita, kabili balaitemenwa ukukonka ubutungulushi bwa kwa Yesu.

2. Mulimo nshi baeluda babomba?

Baeluda Bena Kristu abaume ababomba pa myaka iingi. Babomfya Baibolo pa kusambilisha abantu ba kwa Yehova, pa kubafwa, na pa kubakoselesha. Tababalipila pa mulimo babomba. Lelo baitemenwa fye ukubomba uyu mulimo. ‘Tabacema umukuni pa kuti fye bamwenemo ubunonshi bwa nsoni, lelo babomba pa mulandu wa kuti balafwaisha ukubomba.’ (1 Petro 5:1, 2) Ababomfi batumikila baume mu cilonganino abafwilishako baeluda, kabili mu kupita kwa nshita balabasonta ukuba baeluda nga bafika pa fifwaikwa ifya mu Malembo.

Ibumba Litungulula lilasonta baeluda bamo ukuba bakangalila ba muputule. Aba bakangalila ba muputule balatandalila ifilonganino pa kuti bafwe bamunyinabo na bankashi no kubakoselesha. Balasonta bamunyinefwe ukuba ababomfi batumikila nelyo baeluda nga ca kuti bafika pa fifwaikwa ifya mu Malembo.—1 Timote 3:1-10, 12; Tito 1:5-9.

3. Mulimo nshi uo Inte sha kwa Yehova bonse bakwata?

Bonse aba mu cilonganino ‘balalumbanya ishina lya kuti Yehova.’ Balalumbanya ili ishina nga baleasukapo, nga balelanda amalyashi, nelyo nga baleimba pa kulongana. Na kabili balalumbanya ishina lya kuti Yehova ilyo balebila imbila nsuma ukulingana na papela amaka yabo.—Belengeni Amalumbo 148:12, 13.

 SAMBILILENI NA FIMBI

4. Yesu ni ntungulushi iyaba ne cikuuku

Yesu alitweba amashiwi ayasuma kabili ayatusansamusha. Belengeni Mateo 11:28-30, lyena lanshanyeni aya mepusho:

• Bushe Yesu ni ntungulushi ya musango nshi, kabili bushe abo atungulula bomfwa shani?

5. Baeluda balacita ifilenga aba mu cilonganino basambililako

1. Baeluda balakosha bucibusa bwabo na Yehova, kabili balafwa ne ndupwa shabo ukuba ishakosa mu fya kwa Lesa

2. Baeluda balabika amano kuli bonse aba mu cilonganino

3. Baeluda balabila imbila nsuma lyonse

4. Baeluda balasambilisha, balawamyako Ing’anda ya Bufumu, kabili balabombako ne milimo imbi

 6. Tufwile ukulabombela pamo na baeluda

Baibolo yalilanda umulandu uukalamba uo tulingile ukulabombela pamo na baeluda. Belengeni AbaHebere 13:17, lyena lanshanyeni aya mepusho:

• Bushe caliba fye bwino ifi Baibolo itukoselesha ukulaumfwila no kunakila abatungulula? Cinshi mwa-asukila ifyo?

Belengeni Luka 16:10, lyena lanshanyeni ici cipusho:

• Cinshi cacindamina ukubombela pamo na baeluda na mu tuntu fye utunono?

 IFYO MUSAMBILILE

Yesu e mutwe wa cilonganino. Tulaitemenwa ukubombela pamo na baeluda abakonka ubutungulushi bwa kwa Yesu, pantu balatusansamusha kabili balacita ifilenga twasambililako.

Ukupitulukamo

• Bushe umutwe wa cilonganino nani?

• Bushe baeluda bafwa shani aba mu cilonganino?

• Mulimo nshi ababomfi bwa kwa Yehova bonse bakwata?