Jehovah cu ningcang tein a ummi Pathian a si. (1 Korin 14:33) Cucaah a miphun pawl zong ningcang tein dirh an si lai tiah kan i ruahchan. Khrihfabu cu zeitindah dirh a si? Khrihfabu kha hlawh a tlin nakhnga zeitindah kan bawmh khawh?

1. Khrihfabu lu cu ahodah a si?

“Khrih cu Khrihfabu lu a si.” (Efesa 5:23, NW) Jesuh nih vancung in vawleicung i Jehovah miphun pawl rianṭuannak kha lam a hruai hna. Jesuh nih “zumhawk a tlakmi le a fimmi sal,” Uktu Bu ti zongin hngalhmi hmuhtonnak a ngeimi Khrihfa upa phu hmete kha rian a pek hna. (Matthai 24:45-47 rel.) Kumzabu pakhatnak i lamkaltu hna le Jerusalem i Khrihfa upa hna bantukin Uktu Bu nih vawleicung pumpi i Khrihfabu kha lamhruainak an pek hna. (Lamkaltu 15:2) Asinain mah pa hna cu kan bupi hruaitu cu an si lo. Jeovah nih tuahter a duhmi hna kha an hngalh nakhnga Baibal kha an rel i Jesuh lamhruainak kha lungtho tein an zulh.

2. Khrihfa upa pawl i an rian cu zeidah a si?

Khrihfa upa pawl cu kum tampi chung zumhfek tein a ummi pa pawl an si. Annih nih Jehovah miphun pawl kha Baibal in an cawnpiak hna, an bawmh hna i thazaang an pek hna. An rian caah lahkhah pek an si lo. Mah canah ‘ṭuan man hmuh ding men ah si loin ṭuan an duh taktak ruang tu ah an rian kha an ṭuan.’ (1 Peter 5:1, 2) Bu rianṭuantu pawl cu Khrihfabu ah Khrihfa upa bawmtu in rian a ṭuanmi pa pawl kha an si. A hnuah bu rianṭuantu pawl nih Khrihfa upa si awkah a herhmi sining hna kha an hun tlinh khawh.

Uktu Bu nih Khrihfa upa cheukhat kha peng zohkhenhtu in rian an pek hna. Annih nih lamhruainak le thazaang pek awkah Khrihfabu kip kha an tlawn hna. Cun Baibal halmi sining a tlinhmi hna kha Khrihfa upa le bu rianṭuantu in rian an pek hna.—1 Timote 3:1-10, 12; Titas 1:5-9.

3. Jehovah Tehte pakhat cio i an rian cu zeidah a si?

Khrihfabu dihlak nih Khrihfabu pumhnak ah an i pumhnak thawngin le an si khawh chungin phungchim rian ah an i telnak thawngin ‘Jehovah min kha an thangṭhat.’—Salm 148:12, 13 rel.

 TAM DEUH IN HLATHLAI

4. Jesuh cu zaangfahnak a ngeimi hruaitu a si

Jesuh sawmnak cu a ṭha tuk. Matthai 11:28-30 rel law mah biahalnak hi i ruah u:

• Hruaitu a sinak kong he aa tlaiin Jesuh nih zeitindah ruat hna seh ti a kan duh?

5. Khrihfa upa pawl nih an nunning in an cawnpiak hna

1. Khrihfa upa pawl cu anmah he an chungkhar he thlaraulei ah an ṭhawn peng nakhnga an i zuam

2. Khrihfa upa pawl cu Khrihfabu chungmi dihlak cungah zawnruahnak an ngei

3.   Khrihfa upa pawl cu cawnpiaktu an si.

4. Thianhhlimhnak le a dang rian zong kha an bawmh hna

6. Khrihfa upa pawl he rian kan ṭuanṭi kho

Baibal nih Khrihfa upa pawl he rianṭuanṭi a biapitnak a ruang kha a kan chimh. Hebru 13:17 rel law mah biahalnak hna hi i ruah u:

• Baibal nih hruaitu pawl biangaih awkah tha a kan pekmi cu aa tlak maw? Zeicah aa tlak asiloah zeicah aa tlak lo?

Luka 16:10 rel law mah biahalnak hi i ruah u:

• Thil hmete a lawh hmanhah Khrihfa upa pawl he rianṭuanṭi cu zeicah a biapit?

 A TAWINAK

Jesuh cu Khrihfabu lu a si. Hrimhnak an kan pek i an nunning in an kan cawnpiak caah Jesuh lamhruainak tangah rian a ṭuanmi Khrihfa upa pawl he lunglawm tein rian kan ṭuanṭi.

I Ruahṭi Ṭhannak

• Khrihfabu lu cu ahodah a si?

• Khrihfa upa pawl nih Khrihfabu kha zeitindah an bawmh?

• Jehovah a biami pakhat cio i an rian cu zeidah a si?