Jehová pe ikavi opaete mbaembae oï jenda pe kavi (1 Corintios 14:33). Jáeramo jökorai oyeapo congregación pe. ¿Kërai pa Jehová güɨroata congregación? ¿Kërai pa yamborɨta opaete mbaembae oï kavi vaerä?

1. ¿Kia pa güɨroata congregación cristiana?

Biblia jei “Cristo [ko] oporogüɨrovia vae reta iñäka” (Efesios 5:23). Ara güi, Jesús güɨroata Jehová jembiokuai reta oyapo oï vae opaete ɨvɨ rupi. Jesús oiparavo amogüe anciano reta oikatu vae, “oyeokuai vae jeko kavi jare oyeandu katu reve vae”: kuae atɨ mbovɨ mii vae añave jee Testigos de Jehová güɨroata vae reta (emongeta Mateo 24:45-47). Jae reta oyangareko congregación reta re, siglo primero pe apóstol jare anciano reta Jerusalén pegua oyapo rami (Hechos 15:2). Ërei, jae reta mbaetɨ ko congregación juvicha. Jae reta oeka Jehová iyemborɨ, oyemboe iñee re jare iñeereendu Jesús jei vae re.

2. ¿Mbae mbaravɨkɨ pa oyapo anciano reta congregación pe?

Anciano reta—jae ko kuimbae täta iporogüɨrovia vae reta—omboe Biblia rupi jare oyangareko hermano reta re congregación pe. Jae reta mbaetɨ okovara oyapo vae re jare oparavɨkɨ Biblia jei rami: “pekɨ̈reɨ ngatu reve; agüɨye pemongana jupimbae vaeräño, jaeño pekɨ̈reɨ ngatu reve” (1 Pedro 5:1, 2). Oporogüɨrovia vae reta imborɨa reta oparavɨkɨ anciano reta ndive, jae reta ipuere vi güɨnoi teko kavi reta oiko vaerä ancianorä.

Testigos de Jehová güɨroata vae reta oiparavo amogüe anciano reta opou vaerä amogüe congregación reta pe güɨroata jare omokɨ̈reɨ vaerä. Jae reta ko congregación reta omoäta ngatu vae. Biblia jei rami, jae reta oñono amogüe hermano reta oyeokuai vaerä ancianorä jare oporogüɨrovia vae reta imborɨa reta rami (1 Timoteo 3:1-10, 12; Tito 1:5-9).

3. ¿Mbae pa oyapo metei ñavo congregación pe?

Opaete congregación pe omboete “yandeYa jee [Jehová]” oyapo vae rupi yemboatɨ pe jare omoërakua Tumpa iñee re yave, metei ñavo ipuere rupi (emongeta Salmo 148:12, 13).

 YAIKUAA KATU VAERÄ

4. Jesús güɨroata mboroaɨu reve

Mboroaɨu reve Jesús oparea yandeve yamboacepta vaerä yanderuvicharä. Pemongeta Mateo 11:28-30 jare peyemongeta jese:

• ¿Kërai pa yandereroata Jesús? Jare ¿kërai pa oipota ñañemosiente?

5. Anciano reta omboe oyapo vae rupi

1. Anciano reta omomɨ̈rata iamistad Jehová ndive jare omborɨ jëta pegua reta oñemomɨ̈rata vaerä vi iamistad Jehová ndive.

2. Anciano reta oyemoambeko congregación re.

3.   Anciano reta omoërakua avei.

4. Anciano reta yandemboe. Jaeramiño vi omborɨ oitɨo yemboatɨa jare oyapo ïru mbaravɨkɨ reta.

6. Yamborɨ anciano reta

Biblia yandemboe ikavi ko ñaneñeereendu anciano reta pe. Pemongeta Hebreos 13:17 jare peyemongeta jese:

• ¿Maera pa ikavi yayapo Biblia jei vae ñaneñeereendu anciano reta pe? ¿Rerovia pa jókuae ikavi? Jare ¿maera pa?

Pemongeta Lucas 16:10 jare peyemongeta jese:

• ¿Maera pa ikavi ñaneñeereendu anciano reta pe, yepe tëi mbae michi mii vae pe?

 YAYEMBOE MA VAE

Jesús güɨroata congregación cristiana. Anciano reta iñeereendu chupe, jare yande ñaneñeereendu kɨ̈reɨ ngatu reve anciano reta pe, echa jae reta oyangareko yanderé jare yandemboe oyapo vae rupi.

Emoësaka

• ¿Kia pa güɨroata congregación cristiana?

• ¿Kërai pa omborɨ anciano reta congregación pe?

• ¿Mbae pa oyapo metei ñavo Jehová jembiokuai reta congregación pe?