Yehova ni Katonda aina obutaratibu. (1 Abakorinto 14:33) Kityo, nitutegeleza abantube bagire obutaratibu. Enteko y’Ekikirisito etakatekirwe etai? Nitubasa kuunga omukono tutai obutaratibu obwo?

1. Omutwe gw’enteko n’ohai?

‘Kirisito niwe mutwe gw’enteko.’ (Abaefeso 5:23) Nayema omwiguru, kwebembera omulimo oguli kukorwa abantu ba Yehova omu nsi yona. Yesu akataho “omwiru omwesigwa aina obushobokerwa,” ekyo, kikundi ekili kike ekya abagurusi abakuzire omu by’omwoyo abo kwakwo nibetwa Orukiiko Rw’abebembezi. (Shoma Matayo 24:45-47, NWT) Nk’entumwa na abagurusi ab’ekarine ya mbere ababaire bali Yerusalemu, Orukiiko Rw’abebembezi niruha enyolekelera enteko zona ezili omu nsi. (Ebikorwa 15:2) Kyonkai, tibatwazi ba itengenezo lyaitu. Nibahondera ‘enyolekelera ya Yehova n’ekigambokye kandi nibakunira Yesu omutwe gw’enteko.

2. Abagurusi baina murukaki?

Abagurusi Bakirisito abakuzire omu by’omwoyo abali kwegesa omu kukozesa ebihandiko kandi nibashumba abantu ba Yehova omu kubajuna n’omu kubatamu omwoyo. Tibalikulipwa mushahara omu mulimo ogwo balikukora. Shana, nibakora “omu bweyendezi omu maisho ga Katonda; ti rwakwenda magoba agataina mbali gali, shana omu kugira ekihika eky’okukolera banu.” (1 Petero 5:1, 2) Abagurusi nibajunwa abahereza, aba omu kanya akandi bakusana baba bagurusi.

Orukiiko Rw’abebembezi nirutaho abagurusi nanka kuba balebelezi b’omuzunguko. Abalebelezi abo nibakyalira enteko eza buli ngeli babase kuziha enyolekelera n’okutamu omwoyo barumuna baitu na banyanyaichwe. Bonene nibatekaho abagurusi n’abahereza, abalikwetagwa kugobesheleza engesho ezili kwolekibwa omu bihandiko.—1 Timoteo 3:1-10, 12; Tito 1:5-9.

3. Buli mujulizi wa Yehova aina murukaki?

Bona omu nteko ‘nibahaisiliza eibara lya Yehova’ omu kugya omu nkiiko n’okukora omulimo gwo kurangilira omu kuhonderana n’ehali za buli muntu.​—Shoma Ezaburi 148:12, 13.

 MANYURUZA

4. Yesu mutwazi aina ekisha kandi alikutukolerage

Yesu natuha omulaliko oguli kushemera. Shoma Matayo 11:28-30, mushube mufumoreho ekibazo eki:

• Yesu mutwazi owa ngeliki kandi nayenda twehulire tutai akikwete obutwazibwe?

5. Abagurusi nibatwegesa omu kututeraho obulebero

1. Abagurusi nibekaza kugumisa ehali yabo ey’eby’omwoyo n’eye eka yabo

2. Abagurusi nibetaho bona abali omu nteko

3.   Abagurusi nibebembera omu mulimo gw’okurangilira

4. Abagurusi begesa. Kandi, nibajuna kukora obusafi n’emilimo endijo

6. Okwo twakubasa kwema hamoi na abagurusi

Ebibulia netwolekya omugasho kw’okwema hamoi na abagurusi. Shoma Abaheburania 13:17, mushube mufumoreho ebibazo ebi:

• Ebibulia netutamu omwoyo tukunire n’okwetohoya ahali balinya abali kutwebembera, isi, obuhanuzi obwo nibugasha? Isi, kubaki?

Shoma Luka 16:10, mushube mufumoreho ekibazo eki:

• Kubaki kintu ky’omugasho kwema hamoi n’abagurusi nangu n’ombintu ebilikuzoka bilibike muno?

 OMUBIGUFI

Yesu niwe mutwe gw’enteko. Nitushemelerwa kwema hamoi na abagurusi abalikukora omu kuhaburwa Yesu aha rw’enshonga nibatushemeleza n’okutwegesa kuraba aha bulebero bwabo obuli burungi.

Isi ebi wakubihorora otai?

• Omutwe gw’enteko n’ohai?

• Abagurusi nibajuna batai enteko?

• Buli omoi alikwegashaniza ahali Yehova aina murukaki?