ZAJ KAWM 20
Lub Koom Txoos Khiav Hauj Lwm Li Cas?
Vajtswv Yehauvas yog ib tug Vajtswv uas nyiam kom muaj hauv paus hauv ntsis. (1 Kauleethaus 14:33) Cov uas pe hawm nws los yuav tsum nyiam li ntawd thiab. Yog li ntawd, lub koom txoos khiav hauj lwm li cas xwb? Thiab peb yuav txhawb lub koom txoos li cas kom thiaj khiav zoo?
1. Leej twg yog tus coj lub koom txoos?
Yexus Khetos yog tus coj lub koom txoos. (Efexus 5:23) Nws nyob saum ntuj saib xyuas tej hauj lwm uas Yehauvas cov tib neeg ua thoob qab ntuj. Yexus tsa “tus qhev ncaj thiab ntse” uas yog ib pab txwj laus paub tab los ua Pab Uas Ntaus Thawj. (Nyeem Mathais 24:45-47.) Pab Uas Ntaus Thawj yog cov uas cob qhia Yehauvas cov tib neeg thoob ntiaj teb ib yam li cov tub txib thiab cov txwj laus hauv Yeluxalees uas nyob thawj ib puas xyoo. (Tes Haujlwm 15:2) Tiam sis lawv tsis yog cov coj peb lub koom haum. Lawv cia Yehauvas thiab nws Txoj Lus coj lawv, thiab lawv zoo siab hlo coj raws li Yexus tau qhia.
2. Cov txwj laus yog leej twg thiab lawv tes hauj lwm yog dab tsi?
Cov txwj laus yog ib co txiv neej uas twb pe hawm Yehauvas tau ntev loo lawm. Lawv siv Vajtswv Txoj Lus los qhia, los pab, thiab los txhawb Yehauvas cov tib neeg. Lawv ua hauj lwm dawb dawb xwb. Txawm li ntawd los, lawv yeej “zoo siab hlo ua” thiab “muab siab rau ua tiag tiag.” (1 Petus 5:1, 2) Cov tub leg num yog cov txiv neej hauv lub koom txoos uas pab cov txwj laus. Ntev mus lawv kuj yuav tau los ua txwj laus thiab.
Pab Uas Ntaus Thawj tsa ib co txwj laus los ua cov saib xyuas thaj tsam. Cov no mus xyuas cov koom txoos, mus cob qhia thiab mus txhawb cov kwv tij nkauj muam. Thiab lawv mus tsa cov txiv neej hauv tej koom txoos uas coj lub neej raws li phau Vajlugkub qhia los ua txwj laus los sis los ua tub leg num.—1 Timautes 3:1-10, 12; Titus 1:5-9.
3. Txhua tus Tim Khawv muaj lub luag hauj lwm twg?
Txhua tus Tim Khawv muaj feem los ‘qhuas Yehauvas lub npe’ thaum mus kev sib txoos thiab thaum mus qhia Vajlugkub.—Nyeem Phau Ntawv Nkauj 148:12, 13.
KAWM NTXIV
Kawm seb Yexus yog ib tug thawj coj zoo li cas, seb cov txwj laus xyaum tau nws tus qauv li cas, thiab seb peb mloog Yexus lus thiab koom tes nrog cov txwj laus li cas.
4. Yexus yog ib tug thawj coj uas siab zoo heev
Yexus caw kom peb raws nws qab. Nyeem Mathais 11:28-30, thiab tham txog lo lus no:
-
Yexus yog ib tug thawj coj zoo li cas, thiab nws xav pab peb li cas?
Cov txwj laus xyaum Yexus tus qauv li cas? Saib zaj YEEB YAJ KIAB.
Phau Vajlugkub qhia kom cov txwj laus paub leg lawv tes hauj lwm.
Nyeem Yaxayas 32:2 thiab 1 Petus 5:1-3, thiab tham txog ob lo lus no:
-
Koj xav li cas xwb thaum koj pom cov txwj laus nqes tes hlo pab lwm tus li Yexus?
-
Cov txwj laus xyaum tau Yexus li cas ntxiv?
5. Cov txwj laus ua qauv rau lwm tus xyaum
Yexus xav kom cov txwj laus saib lawv tes hauj lwm zoo li cas xwb? Saib zaj YEEB YAJ KIAB.
Yexus qhia kom cov uas ntaus thawj hauv lub koom txoos paub coj. Nyeem Mathais 23:8-12, thiab tham txog lo lus no:
-
Koj puas pom qhov txawv ntawm phau Vajlugkub tej kev cai rau cov txwj laus thiab ntawm cov thawj coj hauv tej kev ntseeg?
-
Cov txwj laus saib xyuas kom lawv thiab lawv tsev neeg txoj kev ntseeg nyob ruaj khov
-
Cov txwj laus saib xyuas txhua tus hauv lub koom txoos
-
Cov txwj laus mus tshaj tawm tsis tu ncua
-
Cov txwj laus yog cov ua tus qhia. Lawv kuj pab tu vaj tu tsev thiab ua lwm yam
6. Peb koom tes nrog cov txwj laus
Phau Vajlugkub qhia tias vim li cas ho tseem ceeb rau peb koom tes nrog cov txwj laus. Nyeem Henplais 13:17, thiab tham txog ob lo lus no:
-
Vim li cas phau Vajlugkub thiaj qhia kom peb mloog cov uas coj peb lus? Koj ho xav li cas xwb?
Nyeem Lukas 16:10, thiab tham txog lo lus no:
-
Vim li cas peb yuav tsum mloog cov txwj laus lus txawm tej uas lawv kom peb ua zoo li tsis tseem ceeb ua luaj twg?
IB TXHIA HAIS TIAS: “Koj tsis tas mus koom nrog ib txoj kev ntseeg twg li.”
-
Vim li cas ho tseem ceeb rau koj mus koom ib lub koom txoos?
KOJ KAWM TAU DAB TSI
Yexus yog tus coj lub koom txoos. Nws kuj yog tus coj cov txwj laus thiab. Peb zoo siab hlo koom tes nrog cov txwj laus vim lawv yog cov saib xyuas peb thiab ua qauv rau peb xyaum.
Rov Tham Dua
-
Leej twg yog tus coj lub koom txoos?
-
Cov txwj laus pab lub koom txoos li cas?
-
Txhua tus uas pe hawm Yehauvas lub luag hauj lwm yog dab tsi?
TSHAWB NTXIV
Mus saib seb Pab Uas Ntaus Thawj thiab cov txwj laus txhawj txog cov ntseeg niaj hnub no npaum li cas.
Kawm txog tus saib xyuas thaj tsam tes hauj lwm.
Nyeem txog cov poj niam hauv lub koom txoos tes hauj lwm.
“Yehauvas Cov Tim Khawv Puas Muaj Poj Niam Ua Cov Qhia?” (Phau Tsom Faj lub 9 Hlis xyoo 2012)
Nyeem seb cov txwj laus rau siab txhawb cov ntseeg npaum li cas.
“Cov Txwj Laus Pab Kom Peb Muaj Kev Xyiv Fab” (Phau Tsom Faj lub 1 Hlis tim 15 xyoo 2013)
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
