AJUMTALÁB 20
¿Jantʼiniʼ u tʼojnal in bichówil a Jehová?
A Jehová in léʼ abal patal ka tʼajan tin tekédh (1 Corintios 14:33). Jaxtám in tomnál abal in bichówil ka kʼwajiy alwaʼ tʼojojodh. ¿Jantʼiniʼ in tʼojojoyámal a Jehová in bichówil? ¿Jantʼiniʼ i éjtowal ku tólmixin abal in bichówil a Jehová kin áynanchij ka tʼojon alwaʼ?
1. ¿Jitaʼ in okʼnál in bichówil a Jehová?
«A Cristo pel i ókʼlek kʼal in bichówil» a Jehová (Efesios 5:23). Ma tiwaʼ ti éb, a Jesús kʼwajat in okʼnál patal an tʼojláb axi kʼwajat in tʼajál in bichówil a Jehová tin puwél an Tsabál. In bijiy «an tʼojnal axi putudh ani tsalpadh», axi jayej i exlál jantʼiniʼ an Kwenél i Ókʼnom (ka ajiy Mateo 24:45-47). Jajáʼchik in okʼnál in bichówil a Jehová antsanáʼ jantʼiniʼ in tʼajálak an abatwaléjchik ani an ókʼnom axi ti Jerusalén ti kʼaʼál siglo (Hechos 15:2). Pero jajáʼchik yab in abatnál in bichówil a Jehová. Etsʼey in aliyalchik ka tólmiyat kʼal a Jehová ani kʼal an Biblia, jayej in jilálchik ka okʼnáj kʼal a Jesús.
2. ¿Jawaʼ játs in tʼojlábil an ókʼnomchik axi ti tamkuntaláb?
An ókʼnomchik axi ti tamkuntaláb in alwaʼ exobnálchik an Biblia abal kin exóbchij axi kʼeʼatchik, jayej in beletnál ani in kanatbedhál an epchalchik axi ti tamkuntaláb. Jajáʼchik yab in konoyal ka jálbinchat in tʼojlábil. An tʼojláb axi in tʼajálchik yab in tʼajál «kʼal i tsapláb», in tʼajál kʼal in «lej kanát» tin tamét a Dios ani yab in tʼajál abal kin ataʼ i tumín (1 Pedro 5:1, 2). An ókʼnomchik jayej u tolmiyáb kʼal an tólmix ókʼnom, axéʼchik xi epchal u tʼojnal lej tsapik, jaxtám talbél in éjtowal ka bíjiyatchik ti ókʼnom.
An Kwenél i Ókʼnom in tákuyal talchik i ókʼnom abal kin bíjiychik ti ókʼnom kʼal an circuito. Axéʼchik xi ókʼnom in tsaʼbiyal talchik i tamkuntaláb abal kin kanatbédhaʼ. In tʼajálchik ti kwéntaj jawaʼ tam epchal in pútuwalits kʼal in uchbíl abal kin bijiy ti ókʼnom o ti tólmix ókʼnom (1 Timoteo 3:1-10, 12; Tito 1:5-9).
3. ¿Jawaʼ játs in tʼojlábil patalits an ólchixchik kʼal a Jehová?
Patal in éjtowal kin puwénchij «in bij a Jehová» tam u kʼalel ti tamkuntaláb. Jayej i puwénchal tam ki tʼajaʼ patal jawaʼ ki ejtow abal ku olnomáts (ka ajiy Salmo 148:12, 13).
ABAL KA EXÓBNAʼ MÁS
Ki exóbnaʼ jantʼiniʼ in okʼnál a Jesús an tamkuntaláb, jantʼoj in tʼajál an ókʼnomchik abal kin nitsʼbiy a Jesús ani jantʼiniʼ i éjtowal patal ku tólmixin kʼal a Jesús ani kʼal an ókʼnomchik.
4. A Jesús pel jun i ókʼnom axi in tʼajál ki atsʼaʼ koyat i ichích
A Jesús tu kániyal ki tʼajaʼ axéʼ. Ka ajiychik Mateo 11:28-30 ani ka tsálpaychik kʼal axéʼ:
-
¿Jantʼiniʼ tu okʼnál a Jesús ani jantʼoj játs axi tu léʼnanchal?
¿Jantʼiniʼ in nítsʼbiyal an ókʼnomchik in tʼiplabil a Jesús? Ka tsuʼuwchik an VIDEO..
An Biblia in olnál jantʼiniʼ ti kwaʼal kin putuw kʼal in uchbíl an ókʼnomchik.
Ka ajiychik Isaías 32:2 ani 1 Pedro 5:1-3, ani ka tsálpaychik kʼal axéʼ:
-
A Jesús etsʼey in kulbédhanchij in ichích an atiklábchik. An ókʼnomchik axi xowéʼ ta kʼicháj jayetsej in tʼajál. ¿Jantʼiniʼ a atsʼál tatáʼ tam ka exlaʼ axéʼ?
-
¿Jantʼoj más in tʼajál an ókʼnomchik abal kin nitsʼbiy a Jesús?
5. An ókʼnomchik in tʼajál jawaʼ in olnál
¿Jantʼiniʼ in léʼ a Jesús abal an ókʼnomchik kin putuw in uchbíl? Ka tsuʼuwchik an VIDEO.
A Jesús in uluw jantʼiniʼ ti kwaʼal ka tʼojon an epchalchik axi tu okʼnál ti tamkuntaláb. Ka ajiychik Mateo 23:8-12 ani ka tsálpaychik kʼal axéʼ:
-
¿Jantʼoj kwaʼal kin tejwamédhaʼ an ókʼnomchik? ¿A tsálpayal abal an sacerdotes ani kʼeʼat i atikláb axi in okʼnál jun i belomtaláb, in putuwal kʼal jawaʼ in uluw a Jesús?
-
An ókʼnomchik in tsápnanchal ka utey kʼal a Jehová ani in tólmiyal in yanél abal jayej kin tʼajaʼ antsanáʼ.
-
An ókʼnomchik in lej tʼajál ti kwéntaj patal an epchal axi ti tamkuntaláb.
-
An ókʼnomchik in lej tsápnanchal ka olnomáts.
-
An ókʼnomchik u exóbchix, u tólmix abal ka tʼokdháj an atáj tamkuntaláb ani in tʼajálchik kʼeʼat i tʼojláb.
6. I tólmiyal an ókʼnomchik
An Biblia tu ólchal jaleʼ tin tomnál ku tólmixin kʼal an ókʼnomchik. Ka ajiychik Hebreos 13:17 ani ka tsálpaychik kʼal axéʼ:
-
¿Jaleʼ in ulal an Biblia abal kwaʼal ki belkaʼ kʼal i kulbétal jitaʼchik tu okʼnál? ¿A tsálpayal abal tekedh ki tʼajaʼ antsanáʼ? ¿Jaleʼ?
Ka ajiychik Lucas 16:10 ani ka tsálpaychik kʼal axéʼ:
-
¿Jaleʼ ti lej exbadh ku tólmixin kʼal an ókʼnomchik, bélits max i tsálpayal abal an tʼojláb axi tu konchal yab lej exbadh?
JAWAʼ TALCHIK IN TSÁLPAYAL: «Yab i yéjenchal ku kʼalej tu támkunal abal ki kʼakʼnaʼ a Dios».
-
¿Jaleʼ ti más alwaʼ ki kʼakʼnaʼ a Dios kʼal an epchalchik?
JAWAʼ I EXOBNÁMAL
A Jesús játs axi in okʼnál in bichówil a Jehová. An ókʼnomchik u okʼnáb kʼal a Jesucristo, wawáʼ i tólmiyal an ókʼnomchik kom jajáʼchik tu beletnál ani tu exóbchal jantʼiniʼ ki kʼakʼnaʼ a Dios.
Ki tʼilaʼ jawaʼ i exóbnaʼ
-
¿Jitaʼ játs axi in okʼnál in bichówil a Jehová?
-
¿Jantʼiniʼ u tolmiyáb an tamkuntaláb kʼal an ókʼnomchik?
-
¿Jawaʼ játs i uchbíl tin bichówil a Jehová?
KA EXÓBNAʼ JANTʼOJ ÍT
Ka tʼajaʼ ti kwéntaj jantʼiniʼ an Kwenél i Ókʼnom ani axi más an ókʼnomchik in tejwamedhál abal chubax in kʼanidhál an epchalchik.
Ka exlaʼ jantʼoj tam tʼojláb in tʼajál an ókʼnomchik kʼal an circuito.
Jawaʼ in tʼajál jun i ókʼnom kʼal an circuito tam in tsaʼbiyal jun i tamkuntaláb (4:51)
Ka tsuʼuw jawaʼ játs in uchbíl an mimlábchik ti tamkuntaláb.
Ka tʼajaʼ ti kwéntaj jantʼoj in tʼajál an ókʼnomchik abal kin kanatbédhaʼ an epchalchik.
«An ókʼnomchik tu tólmiyal abal ki tʼojonchij kulbél a Jehová» (La Atalaya, 15 de enero de 2013)
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
