Yehowa gaw kashuk kashak re ai Karai Kasang n re. (1 Korinhtu 14:33) Dai majaw, shi a masha ni gaw zinlum nga na ngu anhte myit mada mai ai. Hkristan nawku hpung hpe gara hku hpawng de da ai kun? Awng dang lam lu na matu anhte gara hku madi shadaw ya mai ai kun?

1. Nawku hpung hpe kadai woi awn nga ai kun?

“Hkristu gaw dai Hpung a baw rai nga ai.” (Ehpesu 5:23) Shi gaw, mungkan ting na Yehowa a masha ni a galaw ai lam ni hpe sumsing lamu kaw na woi awn nga ai. Yesu gaw, “sadi ai hte myit su ai mayam” hpe aya tang da ai. Shanhte hpe Uphkang Hpung ngu chye nna, kunghpan ai myitsu salang ni hte hpawng de da ai hpung kaji re. (Mahte 24:​45-47 hpe hti u.) Tsa ban 1 na Yerusalem hta nga ai kasa ni hte myitsu salang ni zawn, Uphkang Hpung mung mungkan ting na nawku hpung ni hpe lam matsun ni jaw ai. (Kasa 15:2) Raitim, shanhte gaw anhte a uhpung na ningbaw ni n re. Shanhte gaw Yehowa hte shi a mungga kaw na lam matsun ni tam ai, Yesu woi awn ai hpe npu taw ai.

2. Myitsu salang ni a daw gaw hpa rai kun?

Myitsu salang ni gaw, Chyum Laika kaw na sharin ya ai kunghpan ai Hkristan la ni re. Yehowa a masha ni hpe n-gun jaw ai, karum ya ai sagu rem ni mung re. Shanhte gaw dai bungli hpe shabrai lu nna galaw ai n re. De a malai, shanhte gaw “lit lu da ai majaw galaw ai n re ai sha Karai a man hta myit lawm let galaw” ma ai. “N tara ai hku amyat lu mayu ai majaw n re ai sha shawang myit hte galaw” ma ai. (1 Petru 5:​1, 2, NWT) Myitsu salang ni hpe magam tau ni gaw karum ya ma ai. Shanhte mung aten du wa yang, myitsu salang ni hku nna magam gun na matu atsam hpring wa na re.

Uphkang Hpung gaw, myitsu salang nkau mi hpe hpung kawan hku nna aya tang ai. Hpung kawan ni gaw nawku hpung ni hpang de sa chyai nna, lam matsun jaw ai, n-gun jaw ai. Shanhte gaw Chyum Laika hta hpyi shawn da ai hte maren, atsam hpring ai ni hpe myitsu salang ni, magam tau ni hku nna aya tang ai.​—1 Timohti 3:​1-10, 12; Titu 1:​5-9.

3. Sakse Hkam langai hpra a daw gaw hpa rai kun?

Nawku hpung hta nga ai ni yawng gaw, nawku zuphpawng ni hta shang lawm ai, shanhte a masa hta hkan nna, hkaw tsun magam hta shang lawm ai hku nna ‘Yehowa a amying hpe shakawn’ ma ai.​—Shakawn 148:​11-13 hpe hti u.

 Kahtap Hkaja

4. Yesu gaw shalan shabran lam jaw ai ningbaw re

Yesu gaw grai ra sharawng hpa re ai saw shaga ai lam langai hte anhte hpe saw shaga da ai. Mahte 11:​28-30 hpe hti nna, ndai ga san hpe bawngban u:

• Yesu gaw shi a woi awn ai lam hte seng nna anhte hpe gara hku hkamsha shangun mayu ai kun?

5. Myitsu salang ni gaw kasi ningli hte sharin ya

1. Myitsu salang ni gaw tinang hkum tinang hte nta masha ni a matu wenyi lam ngangkang hkra matut galaw

2. Myitsu salang ni gaw nawku hpung hta nga ai yawng hpe lanu lahku

3.   Myitsu salang ni gaw hkaw tsun bungli hta ayan shang lawm

4. Myitsu salang ni gaw sharin achyin ya ai ni re. Shanhte gaw jasan jaseng ai lam hte kaga bungli hpe mung karum ya

6. Myitsu salang ni hte rau jawm galaw mai ai lam

Myitsu salang ni hte jawm galaw na matu ahkyak ai lam langai hpe Chyum Laika hta tsun da ai. Hebre 13:17 hpe hti nna, ndai ga san ni hpe bawngban u:

• Woi awn nga ai ni hpe npu taw na matu, madat mara na matu, Chyum Laika hta n-gun jaw da ai gaw rap ra ai lam nga ai kun? Rai yang, hpa majaw dai hku shadu ai?

Luka 16:10 hpe hti nna, ndai ga san hpe bawngban u:

• Kaji kajaw sha re ngu shadu da ai lam ni hta pyi myitsu salang ni hte rau jawm galaw na matu hpa majaw ahkyak ai kun?

 Kadun Dawk

Yesu gaw nawku hpung hpe woi awn ai wa re. Yesu a woi awn ai npu hta magam gun nga ai myitsu salang ni gaw, kasi ningli hte sharin ya ai, shalan shabran ya ai majaw, shanhte hte rau kabu gara let anhte jawm galaw ga ai.

Bai Maram

• Nawku hpung hpe kadai woi awn nga ai kun?

• Myitsu salang ni gaw nawku hpung hpe gara hku karum ya nga ai kun?

• Yehowa hpe nawku dawjau ai marai langai hpra a daw gaw hpa rai kun?